NIKI ekiine oburemeezi burikwingana nka kiro emwe n’ekicweka kwonka ekirikugambwaho ngu nikyo kigumire kwetegyereza oku kirikukora? N’obwongo bw’abantu. Buzima nibutangaaza. Ku turikweyongyera kubwegaho, nitweyongyera kusiima emirimo ya Yehova ‘erikutangaaza.’ (Zab. 139:14) Kimwe aha bintu bingi ebi obwongo burikukora n’okuteera akashushani.

Nitubaasa kukoresa tuta okubaasa kwaitu kw’okuteera akashushani? Omuringo gumwe n’okuteekateeka aha bintu bisya nari ebirikushemeza, nari ebitakakuhikahoga. Bwanyima y’okumanya ekyo, mbwenu shi torikwikiriza ngu buzima nookira kukoresa okubaasa kwawe kw’okuteera akashushani? Nk’eky’okureeberaho, orashomire ebirikukwata aha mwanya ogu otakazamuga nari okahurira ebirikugukwataho? Mbwenu shi ekyo nikikuremesa kuteera akashushani k’omwanya ogwo omu biteekateeko byawe? Buzima, twateekateeka aha kintu eki tutarikubaasa kureeba, kuhurira, kuroza, kukwata, nari kukaga, nituba nitukoresa okubaasa kwaitu kw’okuteera akashushani.

Baibuli neetuhwera kumanya ngu abantu bakahangwa omu kishushani kya Ruhanga. (Kut. 1:26, 27) Mbwenu shi ekyo tikirikubaasa kuba nikyoreka ngu na Yehova naateekateeka? Obu yaareebire ngu kihikire kutuhanga twine obushoboorozi obu, naamanya ngu tushemereire kubukoresa kumanya gye ebi arikukunda. (Mub. 3:11) Nitubaasa kukoresa tuta obushoboorozi bw’okuteera akashushani kukora ekyo, kandi ni muringo ki omubi ogw’okuteera akashushani ogu twine kwetantara?

(1) Okuteera akashushani omu bwire bugwire nari aha bintu ebigwire.

Hariho obuhame oburikworeka ngu okuteera akashushani nikubaasa kuba okw’omugasho. Kwonka, obu Omubuurizi 3:1 harikutuhwera kwetegyereza ngu ‘buri kintu kiine obwire bwakyo,’ nitubaasa kukora ekintu omu bwire bugwire. Nk’eky’okureeberaho, twikiriza ebiteekateeko byaitu kuhuga twaba turi omu nteerane nari turikweshomesa Baibuli, mbwenu okuteera akashushani kwaitu nikuba nikutuhwera nari nikuturemesa? Yesu akarabura aha kabi akarikuruga omu kuta ebintu bibi omu biteekateeko byaitu, nk’okuteekateeka aha by’emicwe mibi. (Mat. 5:28) Ebimwe ebi turikubaasa kuteekateekaho nibibaasa kuba bitarikushemeza Yehova. Waaba nooteekateeka aha bintu bibi noobaasa kurugaho nookora ebibi. Mariirira kutaikiriza okuteera akashushani kwawe kushiisha omukago gwawe na Yehova!

(2) Okuteekateeka ngu eby’obugaiga nibibaasa kukuha oburinzi obw’obutwire.

Okugira ebintu nikyetengyesa kandi n’eky’omugasho. Kwonka, nibiija kutureebya twatandika kuteekateeka ngu oburinzi n’okushemererwa ebyabuzima nibiruga omu kugira eby’obutungi. Omushaija omunyabwengye Sulemaani akahandiika ati: “Eitungo ry’omutungi nirwo rurembo rwe oruhamire, kandi ni nk’orugo  ruraingwa rw’amabaare orurikumurinda.” (Enf. 18:11) Nk’eky’okureeberaho, teekateeka aha kyabaireho obu omwegyemure gwateera Manila, omuri Philippines ebicweka kinaana ahari igana omu Kwamwenda 2009. Mbwenu shi eby’obutungi bikahonokaho? Omugaiga owaafeereirwe ebintu bingi akagira ati: “Omwegyemure gukareetaho okwingana, gurikureetera abagaiga hamwe n’abooro obusaasi n’okubonabona.” Nikibaasa kworoba kuteekateeka ngu obugaiga nibureeta oburinzi. Kwonka amazima gari ngu tiburikubaasa.

(3) Okwerarikirira aha bintu ebirikubaasa kutabaho.

Yesu akatuhabura kuterarikirira ekirenga. (Mat. 6:34) Omuntu orikuba ayerarikiriire obwire bwona naaba naakoresa munonga okubaasa kwe kw’okuteera akashushani. Nitubaasa kushiisha amaani maingi turikuteekateeka aha buremeezi obutakabaireho nari oburikubaasa kutabaho na kakye. Ebyahandiikirwe nibyoreka ngu okwerarikirira nk’okwo nikubaasa kumaramu omuntu amaani agire n’amaganya. (Enf. 12:25) Ka nikiba kiri kikuru kugyendera aha buhabuzi bwa Yesu tutarikwerarikirira ekirenga, kandi tukareka eizooba rikahwa n’amaganya gaaryo.

(1) Okureeba kare akabi okakeetantara.

Ebyahandiikirwe nibituhiga kuba abanyabwengye tukareeba hare. (Enf. 22:3) Twakoresa gye okubaasa kwaitu okw’okuteera akashushani, nitwija kuteekateeka aha biraarugye omu kucwamu kwaitu. Nk’eky’okureeberaho, waayetwa aha mukoro, okuteera akashushani nikubaasa kukuhwera kuta kucwamu kuzayo nari kutazayo? Bwanyima y’okuteekateeka aha bandi abeetsirwe, obuhango bw’omukoro, obu omukoro guraabeho nari ahu guraabe, teekateeka ahari eki: Niki ekirikubaasa kubayo? Mbwenu shi ku orikuteera akashushani nooreeba ngu omukoro nigwija kuba murungi gurikuhikaana n’emisingye ya Baibuli? Okuteera akashushani nikwija kukuhwera kureeba ebintu ebi omu biteekateeko byawe. Okuteera akashushani waaba nooza kucwamu nikwija kukuhwera kwetantara embeera z’akabi omu by’omwoyo.

(2) Okuteekateeka oku orikubaasa kutwaza omu buremeezi bw’amaani.

Okuteera akashushani nikitwariramu “okumanya oku oraatwaze haabaho oburemeezi.” Ka tugire ngu waatunga obutaikirizana n’omuntu omu kibiina. Noija kuhika ota aha w’eishe-emwe nari munyaanyazi-itwe kugaruraho obusingye? Hariho enshonga nyingi z’okuteekateekaho. Omuntu ogwo naagaaniira  mu muringo ki? Ni bwire ki burungi bw’okugamba aha buremeezi? Ni bigambo ki nari eiraka ki eri nshemereire kukoresa? Waateera akashushani omu muringo murungi, noobaasa kuteekateeka aha miringo mingi ei oraakwatemu embeera, reero otooranemu gumwe ogurikubaasa kukora gye. (Enf. 15:28) Waakwata enshonga zigumire omu muringo nk’ogwo nikihwera kureetaho obusingye omu kibiina. Buzima nooba waateera akashushani omu muringo murungi.

(3) Yongyera kushoma Baibuli n’okugyega.

Okushoma Baibuli buri izooba ni kikuru. Kwonka, hariho ekikuru ekirikwetengyesa okukira okushoma empapura za Baibuli nyingi. Twine kumanya enshonga nkuru eziri omu Baibuli kandi tukateeraho kuzigyenderaho. Okushoma Baibuli kwaitu kushemereire kutuhwera kwetegyereza gye emisingye ya Baibuli. Okuteera akashushani nikubaasa kutuhwera kukora ekyo. Mu muringo ki? Teekateeka aha biri omu kitabo Imitate Their Faith. Twashoma ebiri omu kitabo eki, nibibaasa kutuhwera kuteera akashushani tukamanya embeera ezi abarikugambwaho baabaire barimu. Nitureeba emyanya, tuhurira amaraka, tukaga akahooho, kandi tumanya n’enyehurira z’abo abarikugambwaho. Eki nikituhwera kugira ebindi ebi twayega omu Baibuli ebirikutugaruramu amaani obundi ebi tubaire nituteekateeka ngu nitumanya gye. Okuteera akashushani omu muringo ogu twaba nitweshomesa, kandi turikwega Baibuli buzima nikirugamu ebirungi.

(4) Okugirira abandi esaasi.

Okugirira abandi esaasi buzima n’omutwarize murungi. Obu Yehova na Yesu barikumanya enyehurira z’abandi, nikiba kiri kirungi kubatooreza. (Kur. 3:7; Zab. 72:13.) Nitubaasa kugira tuta omutwarize ogu? Kimwe aha birikubaasa kutuhwera kugira esaasi, n’okuteera akashushani. Nitubaasa kuba tutakahikwahoga oburemeezi obu Omukristaayo mugyenzi waitu aine. Kwonka, nitubaasa kwebuuza tuti: ‘Ku ogire ngu niinye ndi omu mbeera egi, nkayehuriire nta? Nkayenzire kutwarizibwa nta?’ Twateekateeka oku turikubaasa kugarukamu ebibuuzo ebi, nikiija kutuhwera kwongyera kugira esaasi. Buzima, twaba nitworeka ngu twine esaasi omu buheereza bwaitu n’omu kukoragana n’Abakristaayo bagyenzi baitu, ebi turikukora byona nibiija kuba eby’omugasho.

(5) Okuteera akashushani aha ku ensi ensya eraabe neeshusha.

Ebyahandiikirwe birimu ebintu bingi ebirikukwata aha kuraganisa kwa Ruhanga okw’ensi ensya. (Isa. 35:5-7; 65:21-25; Kush. 21:3, 4) Ebitabo byaitu birimu ebishushani bingi ebirikworeka oku ensi ensya eraabe neeshusha. Ahabw’enki? Ebishushani nibituhwera kwongyera kuteera akashushani n’okwereeba turikutunga emigisha egi. Yehova owaatuhaire ekiconco ky’okuteera akashushani, naamanya gye oku ekiconco eki kiri kikuru. Twateekateeka aha bi arikugaranisa nikitureetera kugira obuhame ngu nibiija kuhikiirira, kandi nikituhwera kuguma turi abeesigwa, n’okugumisiriza omu buremeezi obu twine.

Yehova atuhaire ekiconco ky’omuhendo eky’okuteera akashushani. Buzima ekiconco eki nikiija kutuhwera kumuheereza gye buri izooba. Ka tuteereho kusiima Owaatuhaire ekiconco eki eky’omuhendo turikukikoresa gye buri izooba.