Omukwato: Kurugiirira aha kihandiiko kimwe, ekigambo ky’Orugriika “omukwato” ekiri omu 2 Abakorinso 1:22, “n’ekigambo ekirikwikirizibwa kandi ekirikukoresibwa omu by’obushuubuzi” kumanyisa “ekicweka ky’okubanza, okukwatiriza, okuraganisa, nari omusingo ogu omuntu arikushashura, reero akagira obushoboorozi aha kintu, nari endagaano ye ekaba ehikire.” Aha bikwatiraine n’abashukirweho amajuta, okutunga ekihembo omu bwijwire nikugambwaho omu 2 Abakorinso 5:1-5 obu baraatungye omubiri ogutarikujunda. Kandi ekihembo kyabo nikitwariramu n’okutunga ekiconco ky’okutafa.​—1 Kor. 15:48-54.

Omu Rugriika orw’ebiro ebi, ebigambo ebiine akakwata nakyo n’empeta y’okuraganisa omuntu kumushwera. Eky’okureeberaho eki nikihikaana gye n’abo abarikwija kuba omugore wa Kristo ow’akamanyiso.​—2 Kor. 11:2; Kush. 21:2, 9.

Akamanyiso: Ira, akamanyiso kakaba kakoresibwa nk’omukono kuhamya ngu ekintu n’eky’omuntu nanka, nari ngu kihikire, kandi obumwe kakaba kakoresibwa kuhamya endagaano. Abashukirweho amajuta, nibateebwaho “akamanyiso,” omwoyo gurikwera kuba abantu ba Ruhanga. (Efe. 1:13, 14) Kwonka, akamanyiso aka ti k’obutwire, okwihaho oshukirweho amajuta yaahika aha kufa ari omwesigwa nari ku araahikye omu kubonabona kwingi akiri omwesigwa.​—Efe. 4:30; Kush. 7:2-4.