1. Abaheereza ba Ruhanga boona nibaba nibenda kukora ki, kandi n’ahabw’enki? (Reeba ekishushani eky’aha mutwe.)

KRISTO YESU akaragiira abakuratsi be ngu “mugyende omu mahanga goona, muhindure abantu abeegi.” (Mat. 28:19) Abaheereza ba Ruhanga boona abeesigwa nibenda kwega oku barikubaasa ‘kuhikiiririza kimwe’ obuheereza obu bahairwe. (2 Tim. 4:5) Ahakuba omurimo ogu ni mukuru munonga, nigwetengyesa, kandi gwine kukorwa ahonaaho kukira ekindi kintu kyona. Kwonka nikibaasa kuguma kumara obwire bwingi omu buheereza nk’oku orikuba nooyenda.

2. Nitutunga buremeezi ki omu kuhikiiriza obuheereza bwaitu?

² Hariho ebintu ebindi bikuru ebirikutwara obwire bwaitu n’amaani. Nitubaasa kuba nitukora omurimo gw’okwebaisaho kumara eshaaha nyingi omu izooba kwehitsyaho ebi turikwenda n’ab’omu maka gaitu. Nitubaasa kuba twine obujunaanizibwa bwingi, endwara, obujune, nari obuhuruzi ahabw’emyaka ya bukuru. Nitubaasa kuhikiiriza tuta obuheereza bwaitu n’obu twakuba twine embeera zigumire?

3. Nitubaasa kwetegyereza tuta amakuru g’ebigambo bya Yesu ebiri omuri Matayo 13:23?

³ Embeera zaitu zaaba nizituremesa kumara obwire bwingi omu kuheereza Yehova, titwine kuhwamu amaani. Yesu akaba naamanya ngu twena titurikubaasa kwana embibo z’Obukama ezirikwingana. (Shoma Matayo 13:23.) Yehova naasiima buri kimwe eki turikukora twamuheereza nk’oku turikubaasa. (Heb. 6:10-12) Kwonka obumwe, nitubaasa kuteekateeka ngu embeera zaitu nizitubaasisa kukora bingi. Omu kicweka eki nituza kureeba oku turikubaasa kwebembeza obuheereza bwaitu, kwetantara ebirikutuhuzya, n’okuboneza omuringo ogu turikubuuriramu n’ogu  turikwegyesamu. Kwonka ebyo tutakabireebire, nikimanyisa ki okuhikiiririza kimwe obuheereza bwaitu?

4. Nikimanyisa ki okuhikiiririza kimwe obuheereza bwaitu?

⁴ Omu bugufu, kubaasa kuhikiiriza gye obuheereza bwaitu, twine kwejumba omu murimo gw’okubuurira n’okwegyesa nk’oku kirikubaasika. Kwonka nihatwariramu ekirikukira aha kumara eshaaha nyingi omu kubuurira. Ekigyendererwa kyaitu nikiba kiri kikuru ahari Yehova. Ahabw’okukunda Yehova n’abataahi, nitukora n’omutima gumwe omu buheereza bwaitu bw’Ekikristaayo. * (Mak. 12:30, 31; Kol. 3:23) Okuheereza Yehova n’omutima gumwe nikimanyisa okuhayo amagara gaitu, n’amaani gaitu nk’oku turikubaasa omu kuheereza Yehova. Twaba nitusiima omugisha gw’okwejumba omu murimo gw’okubuurira, nituteeraho kuhwera abantu baingi nk’oku kirikubaasika kumanya amakuru marungi.

5-6. Ha eky’okureeberaho kworeka oku omuntu oine obwire bukye arikubaasa kwebembeza okuheereza Yehova.

⁵ Teekateeka aha mutsigazi orikukunda kuteera endongo. Naakunda kuteera ebyeshongoro ahu yaayendera hoona. Bwanyima atunga omurimo gw’okuteera endongo aha wiikenda omuri gumwe aha myanya y’okuriiramu. Kwonka entaasya ye, terikumumara omu nshohoza ye. N’ahabw’ekyo acwamu kukora omu duuka kuruga Orwokubanza kuhitsya Orwakataano. N’obu araabe naamara obwire bwingi aha duuka, kwonka omutima gwe gwona guri aha kweshongora. Aine ekihika ky’okwongyera aha mwoga gwe akaba omweshongozi ow’obutwire. Kandi buri kaire koona aku arikutunga naakakoresa kuteera ebyeshongoro, n’obu karikuba kari kakye.

⁶ Omu muringo nigwo gumwe, noobaasa kuba oine obwire bukye bw’okwejumba omu murimo gw’okubuurira. Kwonka nigwo murimo ogu orikukunda munonga. Nooteeraho kwongyera kuhika abantu aha mutima orikubeegyesa amakuru marungi. Ahabw’okugira ngu oine bingi by’okukora, noobaasa kwebuuza oku orikubaasa kwebembeza omurimo gw’okubuurira.

7-8. Nitubaasa kugira tuta emiteekateekyere nk’eya Yesu aha buheereza?

⁷ Yesu akataho eky’okureeberaho ky’omutaano arikugira emiteekateekyere mirungi aha buheereza. Okugamba aha Bukama bwa Ruhanga kikaba kiri ekintu kikuru ahariwe. (Yoh. 4:34, 35) Akagyenda mahiro nyingi kuza kubuurira abantu baingi nk’oku kirikubaasika. Akaba acwa oburyo bw’okugamba n’abantu omu maka gaabo n’omu myanya erimu abantu baingi. Ebi Yesu yaabaire naakora byona bikaba biine akakwate n’obuheereza.

⁸ Nitubaasa kutooreza Kristo turikusherura oburyo bw’okubuurira abantu amakuru marungi omu mwanya n’omu bwire ebirikutubaasikira. Nituba tweteekateekire kwefeerereza ebi turikukunda kwejumba omu murimo gw’okubuurira. (Mak. 6:31-34; 1 Pet. 2:21) Abamwe omu kibiina nibabaasa kuba baapayoniya ab’omutaano, ab’obutwire, nari abahwezi. Abandi beegire endimi ezindi nari bacwiremu kuza omu bicweka ahu ababuurizi barikwendwa munonga. Kwonka, omurimo muhango ogw’okubuurira nigukorwa ababuurizi abaabutoosha, abarikuteeraho kukora nk’oku barikubaasa. Yaaba nitubaasa kukora bingi nari bikye, Yehova tarikutushaba kukora ekirengire aha ki turikubaasa. Naayenda ngu twena tukunde obuheereza bwaitu twaba nitubuzya amakuru marungi ‘ag’ekitiinisa kya Ruhanga’ orikushemererwa.​—1 Tim. 1:11; Bir. 30:11.

9. (a) Paulo akeebembeza ata omurimo gw’okubuurira n’obu araabe yaabaire aine kukora omurimo gw’okwebaisaho? (b) Ebyakozirwe 28:16, 30, 31 nihooreka hata emiteekateekyere ya Paulo aha buheereza?

⁹ Entumwa Paulo nawe akataho eky’okureeberaho kirungi eky’okutwara obuheereza nka kikuru munonga. Obu yaabaire ari omuri Korinso omu rugyendo rwe rw’obumiisani orwa kabiri, akaba aine esente nkye kyamureetera kumara obwire arikukora amahema. Kwonka tarabaasize kureeba okukora amahema nk’omurimo gwe ogurikukirayo obukuru. Akakora omurimo ogu kumushagika omu buheereza, kugira ngu abuurire Abakorinso amakuru marungi ‘atarikuheebwa bihembo’ nari batarikumushashura. (2 Kor. 11:7) N’obu Paulo araabe yaakozire omurimo gw’okwebaisaho, akagumizamu naayebembeza obuheereza bwe, kandi akaba naabuurira ahari buri Sabato. Embeera ze ku zatandikire kumubaasisa kuta omutima aha kubuurira akagamba ‘ekigambo kya Ruhanga, naahamiza Abayudaaya ku Yesu ari Kristo.’ (Byak. 18:3-5; 2 Kor. 11:9) Bwanyima, Paulo ku yaabaire akomiirwe omu nju ye omuri Rooma kumara emyaka ebiri, akaba naabuurira abaija kumutaayaayira, kandi akahandiika n’amabaruha. (Shoma Ebyakozirwe 28:16, 30, 31.) Paulo akaba amaririire kutaikiriza kintu kyona kutaahataaha omu buheereza bwe. Akahandiika ati: “Nk’oku tuhairwe obuheereza obu . . . , titurikuhwa matsiko.” (2 Kor. 4:1) Nka Paulo, n’obu turaabe twine kumara obwire aha mirimo y’okwebaisaho, nabwo nitubaasa kwebembeza omurimo gw’Obukama turikugutwara nka mukuru munonga.

10-11. Nitubaasa kuhikiiriza tuta obuheereza bwaitu omu bwijwire n’obu amagara gaitu gaakuba nigaturemesa kukora bingi?

¹⁰ Twaba tutarikubaasa kwejumbira kimwe omu kubuurira enju aha nju ahabwa bukuru nari amagara mabi, nitubaasa kuteeraho kukoresa emiringo endiijo ey’okubuurira. Ababuurizi b’omu kyasha ky’okubanza bakaba baza ahu abantu bari. Bakaba bakora kyona ekirikubaasika kugamba aha mazima baaba bari enju aha nju, omu myanya y’abantu baingi, kitaraariire, na hoona ahu ‘baabaire bashanga’ abantu. (Byak. 17:17; 20:20) Twaba tutaine maani g’okugyenda munonga, nitubaasa kushutama omu mwanya ogurimu abantu baingi tubuurire abahinguzi. Nari nitubaasa kubuurira kitaraariire, tuhandiikye amabaruha, nari tukorese esimu  kubuurira. Ababuurizi baingi abaine oburemeezi oburikubaremesa kwejumba omu kubuurira enju aha nju nibatunga okushemererwa n’okumarwa omu miringo endiijo ey’okubuurira.

¹¹ N’obu waakuba oine amagara mabi, noobaasa kuhikiiriza obuheereza bwawe omu bwijwire. Garuka oteekateekye ahari Paulo. Akagira ati: “Amaani agarikukirira kimwe n’aga Ruhanga, ti gaitu.” (2 Kor. 4:7) Paulo akaba naayetenga amaani aga obu yaarwara omu rugyendo rwe rumwe orw’obumiisani. Akashoboororera Abagalatia ati: “Endwara y’omu mubiri niyo yaandeetaire kubabuurira [amakuru marungi] aha murundi ogw’okubanza.” (Gal. 4:13) Nikyo kimwe, naiwe ahabw’okugira amagara mabi noobaasa kutunga omugisha gw’okubuurira abandi amakuru marungi, nk’abashaho, n’abandi abarikukujaanjaba. Baingi ahari aba nibaba batari muka beitu aha mirimo yaabo obu ababuurizi barikuza owaabo.

12. Nikimanyisa ki okugira eriisho eririkureeba hamwe?

¹² Yesu akagira ati: “Etabaaza ey’omubiri niryo riisho. N’ahabw’ekyo eriisho ryawe ku riraabe [nirireeba hamwe, nari riine ekigyendererwa], omubiri gwawe gwona nigwija kwijura omushana.” (Mat. 6:22) Eki nikimanyisa ki? Akaba naamanyisa ngu twine kworobya embeera zaitu, nari kuta omutima aha kigyendererwa kimwe, tutarikwikiriza ekintu kyona kutuhuzya kuruga aha kigyendererwa ekyo. Yesu akatuteeraho eky’okureeberaho kirungi arikuta omutima aha buheereza bwe, kandi akeegyesa abeegi be kuguma bataire omutima aha kuheereza Yehova n’okwebembeza Obukama bwe. Nitutooreza Yesu twayebembeza obuheereza bw’Ekikristaayo, turikubanza kusherura Obukama bwa Ruhanga n’okuhikiirira kwe.​—Mat. 6:33.

13. Niki ekirikubaasa kutuhwera kuta omutima aha buheereza bwaitu bw’Ekikristaayo?

 ¹³ Omuringo gumwe gw’okuta omutima aha buheereza bwaitu n’okumara obwire bukye omu bintu ebitari bikuru kugira ngu tumare obwire bwingi turikuhwera abandi kumanya Yehova n’okumukunda. * Nk’eky’okureeberaho, nitubaasa kuhindura omu shaaha z’emirimo yaitu ey’okwebaisaho kugira ngu tumare obwire bwingi omu buheereza buri saabiiti? Nitubaasa kutuubya aha by’okweshemeza ebirikubaasa kuba nibitwara obwire bwingi?

14. Omushaija n’omukazi we bakakora mpindahinduka ki kubaasa kuta omutima aha buheereza bw’Ekikristaayo?

¹⁴ Eki nikyo omureeberezi omwe orikwetwa Elias, n’omukazi we baakozire. Elias naashoboorora ati: “Ahonaaho tukaba tutarikubaasa kuba baapayoniya, kwonka hakaba hariho ebi turikubaasa kukora kwongyera aha buheereza bwaitu. N’ahabw’ekyo tukakora ebintu bikye-bikye ebyatubaasiise kwongyera aha bwire obu turikumara omu kubuurira. Nk’eky’okureeberaho, tukatuubya aha nshohoza yaitu, eby’okweshemeza ebirengire, kandi tukashaba bakama baitu kukora empindahinduka omu ntebeekanisa yaitu y’omurimo. N’ekyarugiremu, tukatandika kwejumba omu kubuurira omu mwabazyo, tukoongyera aha beegi ba Baibuli, twayejumba n’omu kubuurira aha gati ya saabiiti emirundi ebiri buri kwezi. Ka kyatureeteire okushemererwa!”

15-16. Kuhikaana n’ebiri omuri 1 Timoseo 4:13, 15, nitubaasa kwongyera tuta kuba ababuurizi barungi? (Reeba n’akabokusi “ Ebigyendererwa Ebiraampwere Kuhikiiririza Kimwe Obuheereza Bwangye.”)

¹⁵ Omuringo ogundi ogw’okuhikiiriza obuheereza bwaitu omu bwijwire n’okwongyera aha bukoryo  bw’okubuurira. Emirimo emwe neeyetengyesa ngu abakozi kugumizamu nibatendekwa kandi nibeegyesibwa, kwongyera aha kumanya kwabo n’obukoryo bwabo. Nikyo kimwe n’ababuurizi b’Obukama. Twine kugumizamu nitwega oku turikubaasa kuhikiiriza gye obuheereza bwaitu.​—Enf. 1:5; shoma 1 Timoseo 4:13, 15.

¹⁶ Mbwenu shi nitubaasa kugumizamu tuta nitutunguuka omu buheereza bwaitu? Turikuta omutima aha buhabuzi obu turikutunga buri saabiiti omu ruteerane rw’Obuheereza Bwaitu n’Oku Turikutwaza. Oruteerane oru rurimu okutendekwa kw’omuhendo okurikutuhwera kwongyera aha bukoryo bwaitu omu murimo gw’okubuurira. Nk’eky’okureeberaho, ceyamaani yaaba naaha obuhabuzi abeegi abaaheza kuha embazo z’eby’okureeberaho, nitubaasa kwegamu enshonga ezirikubaasa kutuhwera kuboneza obuheereza bwaitu. Obuhabuzi obwo nitubaasa kubuta omu nkora twaza kugaaniira n’omuntu aha makuru marungi. Nitubaasa kushaba obuhwezi orikwebembera guruupu yaitu, nari tukore nawe omu buheereza, nari omubuurizi ondiijo orikumanya kubuurira gye, nka payoniya, nari omureeberezi orikutaayaayira ebibiina. Twamanya obukoryo bw’okukoresa buri kikoreso ekiri omu by’Okukoresa omu Kwegyesa, nitwija kweyongyera kukunda okubuurira n’okwegyesa.

17. Noija kutunga ki waahikiiririza kimwe obuheereza bwawe?

¹⁷ Ka twine omugisha gw’amaani okureeba ngu Yehova naatwikiriza kuba abakozi abarikukora hamwe nawe! (1 Kor. 3:9) Waata omutima aha bintu ebirikukira obukuru, kandi okata omutima aha buheereza bw’Ekikristaayo, noija kuheereza Yehova oshemereirwe. (Fil. 1:10; Zab. 100:2) Obu ori omwe aha baheereza ba Ruhanga, noobaasa kuhamya ngu naija kukuha amaani agarikwetengyesa kuhikiiriza obuheereza bwawe, n’obu waakuba oine oburemeezi nari ebirikukuteganisa. (2 Kor. 4:1, 7; 6:4) Yaaba embeera zaawe nizikubaasisa kubuurira munonga nari kakye, noija kutunga ekiraakureetere kwesiima waaba nookora n’omutima gumwe omu buheereza bwawe. (Gal. 6:4) Waahikiiririza kimwe obuheereza bwawe, nooyoreka ngu nookunda Yehova n’abantu bagyenzi baawe. “Omu kukora otyo, noija kwejuna kandi ojune n’abarikukuhurira.”​—1 Tim. 4:16.