1. Nk’oku kirikushoboororwa omu Abaefeso 6:10-13, ni muringo ki omukuru ogu Yehova arikworeka ngu naatufaho? Shoboorora.

OMURINGO gumwe ogu Yehova arikworekamu ngu naatufaho itwe abaheereza be, n’okutuhwera kusingura abazigu baitu. Abazigu baitu abarikukirayo ni Sitaane na baadaimoni. Yehova naaturabura aha bazigu aba, kandi naatuha ebirikwetengyesa omu kubarwanisa. (Shoma Abaefeso 6:10-13.) Twaikiriza Yehova kutuhwera kandi tukamwesigira kimwe, nitubaasa kusingura Omuregi. Nitubaasa kugira obumanzi nk’obu entumwa Paulo yaabaire aine. Akahandiika ati: “Ruhanga ku araabe ari aha rubaju rwaitu, oritubaasa n’oha?”​—Rom. 8:31.

2. Nituza kushwijuma ki omu kicweka eki?

² Itwe Abakristaayo abaabuzima, titurikuta omutima ahari Sitaane na baadaimoni, kureka nituguta aha kwega ebirikukwata ahari Yehova n’okumuheereza. (Zab. 25:5) Kwonka nabwo, twine kumanya obukodyo bwa Sitaane. Ahabw’enki? Kugira ngu atatugobeza. (2 Kor. 2:11) Omu kicweka eki, nituza kureeba omuringo mukuru ogu Sitaane na baadaimoni barikukoresa kuteeraho kuhabisa abantu. Nituza n’okureeba oku turikubaasa kubarwanisa tukabasingura.

3-4. (a) Obufumu niki? (b) Okwikiririza omu bufumu kujanjaire kirikwingana ki?

³ Omuringo mukuru ogu Sitaane arikukoresa kuhabisa abantu n’eby’obufumu. Abarikwejumba omu bikorwa by’obufumu nibagira ngu nibamanya ebi abandi batarikumanya, kandi  ngu nibakora eby’omutaano. Nk’eky’okureeberaho, abamwe nibagira ngu nibabaasa kumanya ebiraabeho omumaisho, kurabira omu kubandwa nari okuraguza enyonyoozi. Abandi nibeeshushaniriza nk’abarikugamba n’abafu. Hariho abarikwejumba omu bikorwa by’okuroga nari emiguruko, kandi nibabaasa kuteeraho kuroga omuntu ondiijo. *

⁴ Okwikiririza omu bufumu kujanjaire kirikwingana ki? Okucondooza okwakozirwe omu mahanga 18 omuri Latin America na Caribbean kworekire ngu omu bantu bashatu omwe aharibo naaba naikiririza omu miguruko, oburogi, nari obucecezi, kandi omubaro nigwo gumwe ogw’abantu nibaikiriza ngu nikibaasika okuhurizana n’emyoyo emibi. Okucondooza okundi kukakorwa omu mahanga 18 aga Afrika. Kandi kikashangwa ngu kimwe kya kabiri nibaikiririza omu bufumu. Buzima, hoona ahu turikutuura twine kwerinda kuteejumba omu by’obufumu. Ahakuba Sitaane naateeraho kuhabisa “ensi yoona.”​—Kush. 12:9.

5. Yehova naareeba ata eby’obufumu?

⁵ Yehova ni Ruhanga w’amazima. (Zab. 31:5) Mbwenu shi naareeba ata ebikorwa by’obufumu? Naabyangira kimwe! Yehova akagambira Abaisraeli ati: “Hatarigira omuntu weena omuriimwe owaarabya mutabani we nari muhara we omu muriro, nari owaaba omufumu, nari orikuragura ebiribaho, nari omuteezi w’ebyatsi, nari omucecezi, nari omuhi w’engisha, nari orikubandwa emizimu, nari omurogi, nari orikubuuza abafu. Ahakuba orikukora ebyo weena n’ekirikunugwa ahari” Yehova. (Bir. 18:10-12) Abakristaayo tibarikutegyekwa Ebiragiro ebi Yehova yaahaire Abaisraeli. Kwonka nitumanya ngu Yehova oku arikureeba eby’obufumu tikukahindikire.​—Mal. 3:6.

6. (a) Sitaane naakoresa ata eby’obufumu kureeta akabi aha bantu? b) Kurugiirira aha Omubuurizi 9:5, ni mazima ki agarikukwata aha mbeera y’abafu?

⁶ Yehova naaturabura aha bikwatiraine n’eby’obufumu ahakuba naamanya ebi Sitaane arikukoresa kureeta akabi aha bantu. Sitaane naakoresa eby’obufumu kwenegyeza ebishuba nk’enyegyesa erikugira ngu abafiire haine ahu bari kandi bahuriire. (Shoma Omubuurizi 9:5.) Sitaane naakoresa n’eby’obufumu kutiinisa bantu kugira ngu abaihe ahari Yehova. Sitaane naayenda ngu abarikwejumba omu by’obufumu beesigye emyoyo emibi omu mwanya gw’okwesiga Yehova.

7. Yehova naatugambira ki?

⁷ Nk’oku kyaba kyagambirwe, Yehova naatugambira eki twine kukora kwetantara kuhabisibwa Sitaane na baadaimoni. Yetegyereze bimwe ebi turikubaasa kukora kurwanisa Sitaane na baadaimoni.

8. (a) Ni muringo ki omukuru ogw’okusingura emyoyo emibi? (b) Zaaburi 146:4 nihasheeshuura hata ebishuba bya Sitaane aha bafu?

⁸ Shoma Ekigambo kya Ruhanga kandi okiteekateekyeho. Ogu nigwo omuringo ogurikukirayo omu kwangira ebishuba ebi emyoyo emibi erikwenegyeza. Ekigambo kya Ruhanga ni nka rurara y’obwogi erikushara reero ekasheeshuura ebishuba bya Sitaane. (Efe. 6: 17) Nk’eky’okureeberaho, Ekigambo kya Ruhanga nikitwegyesa ngu abafu tibarikubaasa kuhurizana n’abahuriire. (Shoma Zaaburi 146:4.) Kandi nikitwijutsya ngu Yehova niwe wenka orikugamba ebirikwesigwa ebiraabeho omu biro by’omumaisho. (Isa. 45:21; 46:10) Twashoma Ekigambo kya Ruhanga kandi tukakiteekateekaho butoosha, nitwija kuba tweteekateekire kwangira ebishuba ebi emyoyo emibi erikwenda ngu twikirize.

9. Ni bintu ki ebiine akakwate n’eby’obufumu ebi twine kwetantara?

⁹ Yanga kukora ekintu kyona ekiine akakwate n’obufumu. Abakristaayo ab’amazima tibarikwejumba omu by’obufumu eby’omuringo gwona. Nk’eky’okureeberaho, titurikuza omu bafumu nari kuteeraho kugamba n’abafu omu muringo ogundi gwona. Nk’oku kirikworekwa omu kicweka eky’enyima, nitwetantara emigyenzo y’enfu erikwegamira aha nyikiriza ngu abafu haine ahu bari bahuriire. Kandi titurikuraguza enyonyoozi nari kwebuuza aha barangi kuteeraho kumanya eby’omu biro by’omumaisho. (Isa. 8:19) Nitumanya ngu ebikorwa nk’ebyo n’eby’akabi munonga, kandi ngu nibibaasa kutureetera kukoragana butunu na Sitaane na baadaimoni.

10-11. (a) Abamwe omu kyasha ky’okubanza bakakora ki ku baayegire amazima? (b) Kurugiirira aha 1 Abakristaayo 10:21, ahabw’enki twine kutooreza Abakristaayo ba ira, kandi nitubaasa kukikora tuta?

¹⁰ Yeiheho ebintu ebiine akakwate n’okuragura. Bamwe omu kyasha ky’okubanza omu rurembo Efeso bakaba nibeejumba omu bufumu. Kwonka ku baayegire amazima, bakagira eki baakora ahonaaho. ‘Baingi ahari abo, abaabaire nibakora eby’obufumu bakateeranira hamwe ebitabo byabo, eby’okuragura babyokyeza omu maisho g’abantu boona.’ (Byak. 19:19) Abantu abo bakaba bamaririire kwangira emyoyo emibi. Ebitabo byabo ebirikukwata aha bufumu bikaba biri eby’esente nyingi. Kwonka omu mwanya gw’okuha abandi ebitabo ebyo nari kubiguza, bakabicwekyereza.  Bakaba bataire omutima aha kushemeza Yehova omu mwanya gw’okuguta aha sente ezi baraihe omu bitabo byabo.

¹¹ Nitubaasa kutooreza tuta Abakristaayo ab’omu kyasha ky’okubanza? N’eky’obwengye okweihaho ekintu kyona ekiine akakwate n’okuragura. Ebi nibitwariramu, ebikomo, engisha, nari okujwara ehirizi, nari okukoresa emibazi kwerinda emyoyo emibi.​—1 Abakorinso 10:21.

12. Ni bibuuzo ki ebi twine kwebuuza aha bikwatiraine n’eby’okweshemeza byaitu?

¹² Shwijuma gye eby’okweshemeza ebi orikwejumbamu. Yebuuze oti: ‘Ninshoma ebitabo, magaziini, nari ebiri aha mukura ebirikukwata aha burogo? Kandi shi ebyeshongoro ebi ndikuhurikiza, vidiyo na puroguraamu z’aha tiivi ezi ndikureeba, nari emizaano y’aha kompyuta ei ndikuzaana? Haine eby’okweshemeza ebi ndikwejumbamu ebiine akakwate n’eby’obufumu? Mbwenu shi nibiba birimu abarikwetwa abacwezi, emizimu, nari amaani agatarikwetegyerezibwa? Nari eby’okweshemeza nibireebekyesa emiguruko, okuroga nari okuteera amainaro nk’ebitaine nshonga?’ Buzima, tikugira ngu buri by’okweshemeza ebirimu okurengyesereza nari emigane nibiba biine akakwate n’obufumu. Waaba nooshwijuma eby’okweshemeza byawe, mariirira kwirira hare n’ekintu kyona eki Yehova arikwanga. Nitwenda kuteeraho kuguma twine ‘omutima’ ogutarikweshinja omu maisho ga Ruhanga.​—Byak. 24:16. *

13. Niki eki twine kwetantara?

¹³ Yetantare kugamba ebitebyo ebirikukwata ahari baadaimoni. Omu nshonga egi nitwenda kutooreza Yesu. (1 Pet. 2:21) Yesu atakaizire  omu nsi, akaba ari omu iguru, kandi akaba naamanya bingi ebirikukwata ahari Sitaane na baadaimoni. Kwonka akaba atarikuguma naateebya ebirikukwata aha bi baadaimoni baabaire bakozire. Yesu akaba naayenda kuba omujurizi wa Yehova, beitu atari kagambirizi wa Sitaane. Naitwe nitubaasa kutooreza Yesu turikwetantara kujanjaaza ebitebyo ebirikukwata ahari baadaimoni. Kureka, omu bi turikugamba nitwenda kworeka ngu omutima gwaitu “gwijwire ebigambo birungi,” nigo mazima.​—Zab. 45:1.

14-15. (a) Ahabw’enki tutashemereire kutiina emyoyo mibi? (b) Hariho buhame ki oburikworeka ngu Yehova naarinda abaheereza be obunaku obu?

¹⁴ Otatiina emyoyo emibi. Omu nsi obunaku obu, ebintu bibi nibibaasa kutuhikaho. Nitubaasa kutunga butandu, kurwara nari kufa kitaraariire. Kwonka titushemereire kuteekateeka ngu emyoyo etarikureebwa niyo erikureetaho ebibi ebyo. Baibuli neeshoboorora ngu twena nituhikwaho “obunaku n’ebihikiirizi.” (Mub. 9:11) Kwonka aha bikwatiraine na baadaimoni, Yehova ayorekire ngu aine amaani maingi okubakira. Nk’eky’okureeberaho, Ruhanga taraikiriize Sitaane kwita Yobu. (Yob. 2:6) Omu biro bya Musa, Yehova akooreka ngu aine amaani okukira abafumu b’Abanyamisri. (Kur. 8:18; 9:11) Yehova akahwera Yesu kusingura Sitaane na baadaimoni obu baabingwa kuruga omu iguru bakanagwa omu nsi. Kandi juba nibaija kunagwa omu kiina ekitaine bugarukiro, ahu baraabe batarikureeta akabi aha omuntu weena.​—Kush. 12:9; 20:2, 3.

¹⁵ Obunaku obu nitureeba oku Yehova arikurinda abaheereza be. Kiteekateekyeho: Nitubuurira kandi twegyesa abantu amazima omu nsi yoona. (Mat. 28:19, 20) Omu kukora ekyo, nituba nitusheeshuura ebikorwa bibi by’Omuregi. Buzima, ku ogire ngu Sitaane naabaasa, akaabaire naaremesa omurimo gwaitu gwona, kwonka tarikubaasa kukikora. N’ahabw’ekyo titushemereire kutiina emyoyo mibi. Nitumanya ngu amaisho ga Yehova ‘nigairuka oku n’oku nigabuga ensi yoona, okweyoreka ku ari ow’amaani kuhwera abaine emitima’ emwemariireho. (2 Bus. 16:9) Twaba nitwesiga Yehova, baadaimoni tibarikubaasa kutuhitsyaho akabi ak’obutwire.

16-17. Ha eky’okureeberaho ekirikworeka oku kirikwetengyesa obumanzi kusingura emyoyo emibi.

¹⁶ Twine kuba emanzi kubaasa kusingura emyoyo emibi, na munonga abanywani nari abanyabuzaare baaba nibatugyemesereza. Kwonka Yehova naaha emigisha abo abarikworeka obumanzi nk’obwo. Teekateeka aha ky’okureeberaho kya munyaanyazi-itwe Erica, orikutuura omuri Ghana. Erica akaba aine emyaka 21 obu yaikiriza kwega Baibuli. Ishe akaba ari omunyamurwa orikukora emiguruko, kandi omwishiki ogu akaba aine kwejumba omu mugyenzo ogurikutwariramu okurya eby’okurya ebihongyeirwe baaruhanga abu ishe yaabaire naaramya. Erica ku yaayangire, ekyo ab’eka ye bakakireeba nk’okugwisa kubi baaruhanga. Ab’eka ye bakaba nibaikiriza ngu baaruhanga baabo nibaija kubafubira barware n’endwara z’omutwe n’ez’omubiri.

¹⁷ Ab’eka ya Erica bakateeraho kumugyema kwejumba omu mugyenzo ogwo, kwonka yaayanga, n’obu ekyo kyabaire nikimanyisa ngu naija kuruga omu ka. Ab’eishe-emwe abamwe bakaikiriza kutuura nawe. Omu muringo ogu, Yehova akaha Erica emigisha yaatunga eka ensya erimu ab’eishe-emwe n’abanyaanyazi-itwe. (Mak. 10:29, 30) N’obu abanyabuzaare ba Erica baamwangire kandi bakootsya ebintu bye, akaguma ari omwesigwa ahari Yehova, yaabatizibwa, kandi hati ni payoniya ow’obutwire. Tarikutiina baadaimoni. Kandi aha bikwatiraine n’eka ye, Erica naagira ati: “Buri izooba ninshabira ab’eka yangye ngu babaase kutunga aha migisha erikuruga omu kumanya Yehova orikutukunda, n’obusingye oburikuruga omu kumuheereza.”

18. Twayesiga Yehova nitutunga migisha ki?

¹⁸ Twena nitubaasa kutahikwaho okugyezibwa nk’okwo omu kwikiriza kwaitu. Kwonka twena twine kusingura emyoyo emibi kandi tukaguma nitwesiga Yehova. Twakora ekyo nitwija kutunga emigisha mingi, kandi twetantare kuhabisibwa ebishuba bya Sitaane. Kandi titurikwija kwikiriza baadaimoni kuturemesa kuheereza Yehova. Kandi okukira byona, omukago gwaitu na Yehova niguza kuhama. Entumwa Yakobo akahandiika ati: ‘Mworobere Ruhanga. Murwanise Sitaane, naija kubahunga. Mwirire haihi Ruhanga, nawe abone kubairira haihi.’​—Yak. 4:7, 8.