1-2. Ahabw’enki Yesu yaabaire ayerarikiriire munonga?

OMU kiro ky’aha muheru Yesu akihuriire, akagira obusaasi bwingi. Abantu abarikuhenda ebiragiro bakaba bari haihi kumubonabonesa kandi bamwite. Kwonka okufa tikwo kwonka okwabaire nikwerarikiriza Yesu. Akaba naakunda munonga Ishe kandi arikwenda kumushemeza. Yesu akaba naamanya ngu yaaguma ari omwesigwa omu bwire bugumire obwo, naija kuhwera omu kujuririra eiziina rya Yehova. Yesu akaba naakunda abantu, kandi akaba naamanya ngu nitwija kutunga amagara agatahwaho yaaguma ari omwesigwa kuhitsya aha muheru.

² N’obu Yesu araabe yaabaire aine amaganya maingi, akaba aine obusingye. Akaba yaagambiire entumwa ze ngu “obusingye bwangye nimbubaha.” (Yoh. 14:27) Akaba aine “obusingye bwa Ruhanga,” nikwo kwikaikana n’eihoreere ebirikuruga omu kugira omukago gw’omuhendo na Yehova. Obusingye obwo bukareetera Yesu kugira obugwagye omu mutima n’omu biteekateeko.​—Fil. 4:6, 7.

3. Nituza kushwijuma ki omu kicweka eki?

³ Tihariho n’omwe ahariitwe orikubaasa kugyemeserezibwa nk’oku Yesu yaagyemesereziibwe, kwonka boona abarikukuratira Yesu nibaija kugyezibwa. (Mat. 16:24, 25; Yoh. 15:20) Kandi nka Yesu, naitwe nitwija kushoberwa. Nitubaasa kwerinda tuta amaganya kutaturemesa kugira obusingye bw’omu biteekateeko? Ka tushwijume ebintu bishatu ebi Yesu yaakozire omu buheereza bwe omu nsi, reero tureebe oku turikubaasa kumutooreza twagyezibwa.

4. Orikuteekateeka aha biri omu 1 Abatesalonika 5:17, ha eby’okureeberaho ebirikworeka ngu Yesu akaguma naashaba aha izooba eryahereerukireyo atakafiire.

⁴ Shoma 1 Abatesalonika 5:17. Yesu akaba naashaba hakye-hakye eizooba rye eryahereerukireyo akihuriire. Obu yaatandikaho omukoro gw’okwijuka okufa kwe, akashabira omugaati na viinyo. (1 Kor. 11:23-25) Yesu atakarugire omu mwanya ogu we n’abeegi be baagiriiremu Okuhingurwaho, akabanza yaashaba nabo. (Yoh. 17:1-26) Ku yaahikire omuri Gesesemaani ari n’abeegi be, nabwo akashaba hakye-hakye. (Mat. 26:36-39, 42, 44) Kandi ebigambo ebi Yesu yaahererukireyo kugamba atakafiire kukaba kuri okushaba. (Luk. 23:46) Akaguma naashaba Yehova aha bikwatiraine na buri mbeera yoona ei yaarabiremu aha izooba eryahereerukireyo akiri omu nsi.

5. Ahabw’enki obumanzi bw’entumwa bwatuubire?

⁵ Enshonga emwe ahabw’enki Yesu yaagumisiriize okugyezibwa kwe n’ahabw’okwesiga Ishe kurabira omu kushaba. Kwonka abeegi be, bakaremwa kugumisiriza omu kushaba ekiro ekyo. N’ekyarugiremu, obumanzi bwabo bukatuuba eshaaha y’okugyezibwa ku yaahikire. (Mat. 26:40, 41, 43, 45, 56) Twaba nitugyezibwa, nitwija kuguma turi abeesigwa twatooreza Yesu, kandi tukagumizamu nitushaba. Nitubaasa kushaba aha bikwatiraine na ki?

6. Okwikiriza nikutuhwera kuta kuguma twine obusingye?

⁶ Nitubaasa kushaba Yehova ‘kutwongyera okwikiriza.’ (Luk. 17:5; Yoh. 14:1) Nitwenda kugira okwikiriza ahakuba Sitaane naagyeza boona abarikukuratira Yesu. (Luk. 22:31) Okwikiriza nikutuhwera kuta kuguma twine obusingye n’obu twakuhikwaho embeera zigumire  zikurataine? Twakora kyona ekirikubaasika kwemera okugyezibwa, okwikiriza nikwija kutuhwera kwesiga Yehova ngu naija kugira eki yaakora. Ahabw’okugira obwesigye ngu naakora gye ebintu kutukira, twine obusingye bw’omu biteekateeko n’omu mutima.​—1 Pet. 5:6, 7.

7. Waayegyera ki aha bigambo bya Robert?

⁷ Okushaba nikutuhwera kuguma twine obusingye bw’omu biteekateeko n’obu twakuhikwaho kugyezibwa ki. Teekateeka aha ky’okureeberaho kya Robert, omureeberezi omwesigwa ori omu myaka ya 80. Naagira ati: “Obuhabuzi oburi omu Abafilipi 4:6, 7 bumpwereire kwemera okugyezibwa kwingi. Ntwire nyine oburemeezi bw’esente. Nkafeerwaho obujunaanizibwa bwangye bw’okuba omureeberezi.” Niki ekihwereire Robert kuguma aine obusingye bw’omu mutima n’omu biteekateeko? Naagira ati: “Ninshaba ahonaaho naahurira naatandika kwerarikirira. Niinyikiriza ngu oku ndikweyongyera kushaba emirundi mingi kandi munonga, nikwo ndikuhurira naagira obusingye.”

8. Nk’oku kirikworekwa omuri Yohaana 8:29, ni nshonga ki endiijo eyaareeteire Yesu kugira obusingye?

⁸ Shoma Yohaana 8:29. N’obu Yesu yaabaire naahiiganisibwa, akaguma aine obusingye bw’omu mutima n’omu biteekateeko ahakuba akaba naamanya ngu naareetera Ishe okushemererwa. Akaguma naayorobera Ishe, n’obu kyabaire kimugumiire kukora. Akaba naakunda Ishe Yehova kandi ayemariire aha kumuheereza. Atakaizire omu nsi, akaba ari “omukozi mukuru” wa Ruhanga. (Enf. 8:30) Kandi obu yaabaire ari omu nsi, akaba ari omweziriki omu kwegyesa abandi ebirikukwata ahari Ishe. (Mat.  6:9; Yoh. 5:17) Omurimo ogwo gukaba gureetera Yesu okushemererwa kwingi.​—Yoh. 4:34-36.

9. Okwejumbira kimwe omu murimo gw’okubuurira nikituhwera kita kuguma twine obusingye bw’omu mutima n’omu biteekateeko?

⁹ Nitubaasa kutooreza Yesu turikworobera Yehova, kandi butoosha turikugira bingi ‘by’okukora omu murimo gwa Mukama.’ (1 Kor. 15:58) Twaba tutaire omutima munonga aha ‘kigambo kya Ruhanga’ omu murimo gw’okubuurira, nitwija kuguma twine emiteekateekyere mirungi n’obu twakuba twine oburemeezi. (Byak. 18:5) Nk’eky’okureeberaho, abantu abu turikushanga omu buheereza nibaba baine oburemeezi bw’amaani kukira obwaitu. Kwonka ku barikwega kukunda Yehova kandi bakagyendera aha buhabuzi bwe, embeera zaabo nizihinduka bashemererwa. Buri murundi ogu turikureeba ekyo kyabaho, nitweyongyera kuhamya ngu Yehova naija kutureeberera. Kandi obuhame obwo nibutuhwera kuguma twine obusingye bw’omu mutima n’omu biteekateeko. Munyaanyazi-itwe omwe otwire naateganisibwa enyehurira z’okwereeba nk’otaine mugasho n’amaganya, ashangire eki kihikire. Naagira ati: “Ku ndikuba nyine bingi by’okukora omu buheereza, nikimpwera kurinda enyehurira zangye n’okugira okushemererwa. Ninteekateeka ngu ku ndikuba ndi omu buheereza, nimba nimpurira ndi haihi na Yehova.”

10. Waayegyera ki aha bigambo bya Brenda?

¹⁰ Kandi teekateeka n’aha ky’okureeberaho kya munyaanyazi-itwe orikwetwa Brenda. We n’omuhara bakaba baine endwara y’amaani eya muhinya. Brenda naagyendera omu kagaari kandi aine amaani makye. Naabuurira enju aha nju obu arikubaasa, kwonka omuringo gwe mukuru ogw’okubuurira n’okuhandiika amabaruha. Naagira ati: “Bwanyima y’okwikiriza ngu embeera zangye tizirikuza kuhinduka omu busingye obu, nkabaasa kuta omutima aha buheereza bwangye. Buzima ku ndikuba nimbuurira, nimba ntarikuteekateeka aha maganya gangye. Omu mwanya gw’ekyo ninta omutima aha kuhwera abantu b’omu kicweka ky’ekibiina kyaitu eky’okubuuriramu. Kandi butoosha okubuurira nikunyijutsya amatsiko gangye g’ebiro by’omumaisho.”

11-13. (a) Entumwa n’abantu abandi bakooreka bata ngu nibanywani ba Yesu abaabuzima? (b) Banywani ba Yesu bakamureetera kwehurira ata?

¹¹ Omu buheereza bwa Yesu bwona obwabaire bugumire, entumwa abeesigwa bakooreka ngu ni banywani be. Bakaba bari abanywani abu Baibuli erikugambaho eti: “Habaho munywani w’omuntu okira owa nyina owaazairwe nawe.” (Enf. 18:24) Yesu akaba naatwara banywani be abo nk’ab’omuhendo. Omu buheereza bwe bwona, tihaine n’omwe omuri beene ishe ab’omubiri owaamwikiriize. (Yoh. 7:3-5) Obumwe n’abanyabuzaare be bakagira ngu agwire eiraro. (Mak. 3:21) Okutaana n’ekyo, aha kiro ekyahereerukireyo Yesu atakafiire, akabaasa kugambira entumwa ze abeesigwa ngu “niimwe abaagumisiriize naanye omu bi naagyeziibwe.”​—Luk. 22:28.

¹² Entumwa obumwe bakaba bareebya Yesu, kwonka omu mwanya gw’okuta omutima aha nshobe zaabo, akaba areeba ngu nibamwikiririzamu. (Mat. 26:40; Mak. 10:13, 14; Yoh. 6:66-69) Ekiro ekyahereerukireyo Yesu akiri n’abashaija aba abeesigwa, akabagira ati: “Mbeetsire banywani bangye, ahakuba byona ebi naagambiirwe Tata, mbibamanyiise.” (Yoh. 15:15) Hatariho kubangaanisa, banywani ba Yesu bakaba nibamugumya munonga. Obuhwezi obu baahaire Yesu omu kubuurira bukamureetera kushemererwa munonga.​—Luk. 10:17, 21.

¹³ Oyihireyo entumwa, Yesu akaba aine abanywani abandi, abashaija n’abakazi abaabaire  nibamuhwera omu murimo gw’okubuurira n’omu miringo endiijo. Abamwe bakaba bamweta omu maka gaabo kutunga eky’okurya. (Luk. 10:38-42; Yoh. 12:1, 2) Abamwe bakaba nibagyenda nawe babagana nawe ebintu byabo. (Luk. 8:3) Yesu akaba aine abanywani barungi ahabw’okugira ngu nawe akaba ari murungi aharibo. Akaba naabakorera ebirungi kandi abaineho emiteekateekyere mirungi. Yesu akaba ahikiriire, kwonka akaba naasiima obushagiki bw’abanywani be abatahikiriire. Kandi buzima bakamuhwera kuguma aine obusingye bw’omu biteekateeko n’omu mutima.

14-15. Nitubaasa kutunga tuta abanywani barungi, kandi nibabaasa kutuhwera bata?

¹⁴ Abanywani barungi nibatuhwera kuguma tuhamiire ahari Yehova. Kandi omuringo murungi gw’okutunga abanywani barungi n’okuba omunywani murungi. (Mat. 7:12) Nk’eky’okureeberaho, Baibuli neetuhiga kwehayo kuhwera abandi na munonga “abooro.” (Efe. 4:28) Noobaasa kugira omuntu omwe omu kibiina kyanyu ou waahwera? Noobaasa kuhwera omubuurizi otaine gagyenda orikumugurira ebintu? Noobaasa kuha eby’okurya abarikutegana omu by’entaasya? Waaba noomanya kukoresa omukura gwa jw.org^® na JW Library^®, noobaasa kuhwera abandi omu kibiina kyanyu kwega kubikoresa? Twaba nitwejumbira kimwe omu kuhwera abandi, nikiba kyorobi kutunga okushemererwa.​—Byak. 20:35.

¹⁵ Abanywani abu turikutunga nibaija kutushagika twaba nitugyezibwa, kituhwere kutunga obusingye bw’omu mutima n’omu biteekateeko. Nk’oku Elihu yaahurikiize Yobu obu yaabaire naagamba aha kugyezibwa kwe, banywani baitu nibatuhurikiza twaba nitubagambira ebirikutwerarikiriza. (Yob. 32:4) Titushemereire  kuteekateeka ngu banywani baitu nibaija kutucweramu, beitu n’eky’obwengye kugyendera aha buhabuzi bwa Baibuli. (Enf. 15:22) Kandi nk’oku Omugabe Daudi yaikiriize obuhwezi bwa banywani be, titushemereire kugira amaryo tukanga kwikiriza obuhwezi bwa banywani baitu twaba twine eki turikwenda. (2 Sam. 17:27-29) Buzima, abanywani nk’abo n’ekiconco kuruga ahari Yehova.​—Yak. 1:17.

16. Kurugiirira aha Abafilipi 4:6, 7, ni muringo ki gumwe ogu turikubaasa kutungamu obusingye? Shoboorora.

¹⁶ Shoma Abafilipi 4:6, 7. Ahabw’enki Yehova naatugambira ngu nitubaasa kutunga obusingye obu arikuha kurabira “omuri Kristo Yesu”? N’ahabw’okugira ngu nitubaasa kutunga obusingye bw’obutwire omu biteekateeko byaitu n’omu nyehurira zaitu twaba nitwikiriza Yesu, kandi turikwetegyereza omwanya gwe omu kuhikiiriza ebigyendererwa bya Ruhanga. Nk’eky’okureeberaho, ahabw’ekitambo kya Yesu, nitubaasa kusaasirwa ebibi byaitu byona. (1 Yoh. 2:12) Eki ka nikitureetera oburuhuuko bw’amaani! Yesu obu ari Omugabe w’Obukama bwa Ruhanga, naija kwihaho akabi koona akatuhikireho ahabwa Sitaane n’ensi ye. (Isa. 65:17; 1 Yoh. 3:8; Kush. 21:3, 4) Eki ka nikituha amatsiko! N’obu Yesu araabe atuhaire obuheereza butoorobi, ari naitwe, naatushagika kuraba omu biro by’emperu eby’obusingye obu. (Mat. 28:19, 20) Ekyo ka nikituha obumanzi bw’amaani! Oburuhuuko, amatsiko, n’obumanzi nibyo birikukora nk’omusingi ogwombekirweho obusingye bwaitu bw’omu mutima n’omu biteekateeko.

17. (a) Omukristaayo naabaasa kuguma ata aine obusingye bw’omu mutima n’omu biteekateeko? (b) Nk’oku kirikugambwa omuri Yohaana 16:33, niki eki turikwija kubaasa kukora?

¹⁷ Mbwenu shi noobaasa kuguma ota oine obusingye waaba noogyezibwa? Noobaasa kukikora waatwaza nk’oku Yesu yaatwarize. Eky’okubanza, shaba kandi ogumizemu nooshaba. Ekya kabiri, yorobera Yehova, kandi obuurire n’obweziriki n’obu kyakuba kigumire kukikora. Ekya kashatu, yesigye banywani baawe kukuhwera omu kugyezibwa. Reero obusingye bwa Ruhanga nibwija kurinda ebiteekateeko byawe n’omutima gwawe. Kandi naiwe, noija kusingura buri kugyezibwa kwona nk’oku Yesu yaasingwire.​—Shoma Yohaana 16:33.