1. Noobaasa kugira ota omukago murungi n’omuntu?

OKUKIRA munonga eidaara ry’okubanza ery’okunywana omuntu n’okumara obwire nawe. Mwaguma nimugaaniira hamwe, mukagamba aha biteekateeko byanyu n’enyehurira zaanyu, nimuba abanywani. Kwonka tikwo kyorobi kityo kunywana Yesu. Ahabw’enki?

2. Enshonga y’okubanza ahabw’enki kitoorobi kunywana Yesu n’eha?

² Enshonga y’okubanza ahabw’enki kitoorobi, itwe titukareebaga Yesu. Abakristaayo baingi omu kyasha ky’okubanza nabo tibaramureebire. N’obu kiraabe kiri kityo, entumwa Petero akagira ati: “Ogwo mumukunda, mutakamureebaga; kandi n’obu muraabe mutarikumureeba hati, nimumwikiriza.” (1 Pet. 1:8) N’ahabw’ekyo nikibaasika kunywana Yesu n’obu waakuba otakamureebaga.

3. Enshonga ya kabiri ahabw’enki kitoorobi kunywana Yesu n’eha?

³ Enshonga ya kabiri, titurikubaasa kugaaniira na Yesu butunu. Twashaba, nituba nitugaaniira na Yehova. N’amazima nitushaba kurabira omu iziina rya Yesu, kwonka nituba tutarikugamba na Yesu butunu. Nangwa na Yesu tarikwenda ngu tumushabe. Ahabw’enki? Okushaba n’omuringo gw’okuramya, kandi Yehova niwe wenka oshemereire kuramibwa. (Mat. 4:10) N’obu kiraabe kiri kityo, nitubaasa kworeka ngu nitukunda Yesu.

4. Enshonga ya kashatu ahabw’enki kitoorobi kunywana Yesu n’eha, kandi nituza kushwijuma ki omu kicweka eki?

 ⁴ Enshonga ya kashatu, Yesu naatuura omu iguru, n’ahabw’ekyo titurikubaasa kuba hamwe nawe butunu. Kwonka nitubaasa kumanya bingi ebirikumukwataho n’obu twakuba tutari nawe butunu. Nituza kureeba ebintu bina ebi turikubaasa kukora kuhamya omukago gwaitu nawe. Kwonka, ka tubanze tureebe ahabw’enki kiri kikuru kuba banywani ba Yesu.

5. Ahabw’enki twine kuba banywani ba Yesu? (Reeba obubokusi “ Waanywana Yesu Nooba Munywani wa Yehova” na “ Okumanya Omwanya gwa Yesu omu Muringo Oguhikire.”)

⁵ Twine kuba banywani ba Yesu twaba nitwenda kugira omukago murungi na Yehova. Ahabw’enki? Teekateeka aha nshonga ibiri. Ey’okubanza, Yesu akagambira abeegi be ati: ‘Isheboona nawe naabakunda, ahabw’okuba mukankunda.’ (Yoh. 16:27) Kandi akagira ati: ‘Tihariho orikwija ahari Isheboona, atarabire muriinye.’ (Yoh. 14:6) Okuteeraho kuba banywani ba Yehova tutabandize kuba banywani wa Yesu kiri nk’okuteeraho kutaaha omu nju otarabire aha rwigi rwayo. Yesu akakoresa eky’okureeberaho nikyo kimwe obu yaabaire naayegambaho ngu niwe “irembo ry’entaama.” (Yoh. 10:7) Enshonga ya kabiri n’okugira ngu Yesu akooreka gye emitwarize nk’eya Ishe. Akagambira abeegi be ati: “Ondeebire, biri areebire Isheboona.” (Yoh. 14:9) N’ahabw’ekyo, omuringo mukuru gw’okumanya Yehova n’okwega ebirikukwata ahari Yesu. Twayongyera kwega ahari Yesu nitwongyera kumukunda. Kandi twayongyera kugira omukago murungi na Yesu, rukundo ei twiniire Ishe neeyongyera kuhama.

6. Ni nshonga ki endiijo ahabw’enki twine kuba banywani ba Yesu? Shoboorora.

 ⁶ Twine kuba banywani ba Yesu, okushaba kwaitu kubaasa kugarukwamu. Eki nikimanyisa ngu twine kukora ekirikukira aha kushaba ‘omu iziina rya Yesu,’ eki turikukira kugamba twaba nituhendera okushaba. Twine kwetegyereza oku Yehova arikukoresa Yesu kugarukamu okushaba kwaitu. Yesu akagambira entumwa ze ati: ‘Kyona eki muraashabe omu iziina ryangye, ninyija kukikora.’ (Yoh. 14:13) N’obu Yehova araabe niwe arikuhurira okushaba kwaitu kandi akakugarukamu, ahaire Yesu obushoboorozi bw’okuhikiiriza ebi Yehova acwiremu. (Mat. 28:18) N’ahabw’ekyo Yehova atakagarukiremu okushaba kwaitu, naabanza yaareeba yaaba nitukuratira obuhabuzi obu Yesu yaatuhaire. Nk’eky’okureeberaho Yesu akagira ati: ‘Ku muraasaasire abantu eby’okushiisha byabo, naimwe Shoimwe ow’omu iguru naija kubasaasira, kwonka ku muraabe mutarikusaasira bantu eby’okushiisha byabo, naimwe Shoimwe tarikwija kubasaasira eby’okushiisha byanyu.’ (Mat. 6:14, 15) Ka nikiba kiri kikuru kutwariza abandi omu muringo gw’embabazi nk’oku Yehova na Yesu barikututwariza!

7. Ni baahi abarikwija kugasirwa omu kitambo kya Yesu?

⁷ Abo bonka abaine omukago murungi na Yesu nibo barikwija kugasirwa omu kitambo kye. Ekyo nitukimanya tuta? Yesu akagira ati: “Tihariho rukundo erikukira egi, omuntu kufeera banywani be.” (Yoh. 15:13) Abaheereza ba Yehova abeesigwa abaabaireho Yesu atakaizire omu nsi nibaija kuba baine kwega ebirikumukwataho kandi bamukunde. Abashaija n’abakazi nka Abrahamu, Sarai, Musa, na Rahabu nibaija kuzooka, kwonka nabo nibaija kuba baine kuba banywani ba Yesu kubaasa kutunga amagara agatahwaho.​—Yoh. 17:3; Byak. 24:15; Heb. 11:8-12, 24-26, 31.

8-9. Nk’oku kiri omuri Yohaana 15:4, 5, omukago gwaitu na Yesu nigutubaasisa kukora ki, kandi ahabw’enki eki ni kikuru?

⁸ Twine omugisha gw’okukorera hamwe na Yesu omu murimo gw’okubuurira n’okwegyesa abantu amakuru marungi g’Obukama. Yesu obu yaabaire ari omu nsi, akaba ari omwegyesa. Kandi okwiha obu Yesu yaagaruka omu iguru, naagumizamu kwebembera omurimo gw’okubuurira n’okwegyesa. Naareeba oku orikuteeraho kuhwera abandi kumanya Ishe kandi naakusiima. Nangwa, nitubaasa kuhikiiriza gye omurimo ogu ahabw’okuhwerwa Yehova na Yesu.​—Shoma Yohaana 15:4, 5.

⁹ Ekigambo kya Ruhanga nikyoreka butunu ngu kubaasa kushemeza Yehova twine kukunda Yesu kandi tukaguma tumwiniire rukundo egyo. N’ahabw’ekyo ka tureebe ebintu bina ebi turikubaasa kukora kubaasa kuba banywani ba Yesu.

10. Eidaara ery’okubanza ery’okugira omukago murungi na Yesu ni riiha?

¹⁰ (1) Teeraho kumanya Yesu. Eki nitubaasa kukikora twashoma ebitabo bya Baibuli nka, Matayo, Mako, Luka, na Yohaana. Twateekateeka aha bi Yesu yaarabiremu ebiri omu bitabo ebi, nitwija kumukunda kandi tumuhe ekitiinisa ahabw’omuringo gw’embabazi ogu yaatwariizemu abantu. Nk’eky’okureeberaho, n’obu araabe yaabaire ari Mukama w’abeegi be akaba atarikubatwariza nk’abahuuku. Kureka, akaba abagambira oku arikwehurira n’oku arikuteekateeka. (Yoh. 15:15) Yesu akaba ashaasha nabo kandi arira nabo. (Yoh. 11:32-36) Nangwa n’abo abaabaire nibamuhakanisa bakeetegyereza ngu akaba ari munywani w’abo abaikiriize obutumwa  bwe. (Mat. 11:19) Twatooreza Yesu ahabw’omuringo ogu yaatwariizemu abeegi be, nitwija kugira emikago mirungi n’abandi, tugire okumarwa n’okushemererwa, kandi nitwija kwongyera kusiima Kristo.

11. Eidaara rya kabiri ery’okuba banywani ba Yesu ni riiha, kandi ahabw’enki riri rikuru?

¹¹ (2) Teekateeka kandi otwaze nka Yesu. Twayongyera kuteekateeka nka Yesu n’okutwaza nkawe, nitwongyera kugira omukago murungi nawe. (1 Kor. 2:16) Nitubaasa kutooreza tuta Yesu? Yetegyereze eky’okureeberaho kimwe. Yesu akaba naata omutima aha kuhwera abandi omu mwanya gw’okweshemeza wenka. (Mat. 20:28; Rom. 15:1-3) Ahabw’okugira emiteekateekyere nk’egi, akaba aine omutima gw’okwefeerereza n’okusaasira. Akaba atarikurahuka kugira ekiniga ahabw’ebi abandi baamugambaho. (Yoh. 1:46, 47) Kandi akaba atarikureetera abantu kuhemuka arikuguma naagamba aha nshobe zaabo ez’enyima. (1 Tim. 1:12-14) Yesu akagira ati: ‘Ku muraagume nimukundana, nibwo abantu boona baraamanye ku muri abeegi bangye.’ (Yoh. 13:35) Ni kirungi kwebuuza oti: “Nintooreza Yesu ndikukora kyona ekirikubaasika kuguma nyine obusingye n’ab’eishe-emwe na banyaanyazi-itwe?”

12. Eidaara rya kashatu ry’okuba banywani ba Yesu ni riiha, kandi nitubaasa kurihikaho tuta?

¹² (3) Shagika beene Ishe Yesu. Ebi turikukorera beene Ishe abashukirweho omwoyo gurikwera, Yesu naabireeba nk’ebi twakorera we. (Mat. 25:34-40) Omuringo mukuru ogu turikubaasa kushagikamu abashukirweho omwoyo gurikwera, n’okwejumbira kimwe omu murimo gw’okuhindura abantu abeegi ogu Yesu yaaragiire abakuratsi be. (Mat. 28:19, 20; Byak. 10:42) “Ab’entaama ezindi” baahwera beene Ishe Yesu nibwo barikubaasa kuhikiiriza omurimo gw’okubuurira ogurikukorwa omu nsi yoona hati. (Yoh. 10:16) Ku oraabe ori omwe aha b’entaama ezindi, buri murundi ogu orikwejumba omu murimo ogu, nooyoreka ngu nookunda abashukirweho omwoyo gurikwera na Yesu.

13. Nitubaasa kugyendera tuta aha buhabuzi bwa Yesu oburi omuri Luka 16:9?

¹³ Kandi nituba banywani ba Yehova na Yesu turikuhayo esente zaitu kushagika omurimo ogu barikwebembera. (Shoma Luka 16:9.) Nk’eky’okureeberaho, nitubaasa kuhayo kushagika omurimo ogurikukorwa omu nsi yoona, kandi esente ezi turikuhayo nizihwera omu kubuurira omu myanya eyehereire, okwombeka n’okuhunduuza ebyombeko ebirikukoresibwa omu kuramya kwaitu, n’okuhwera abahikirweho ebihikiirizi. Nitubaasa kuhayo esente kushagika ekibiina eki turimu, kandi tuhwere n’abu turikumanya ngu haine eki bakyenire. (Enf. 19:17) Egi n’emiringo ei turikubaasa kushagikamu beene Ishe Kristo.

14. Nk’oku kiri omu Abaefeso 4:15, 16, eidaara rya kana ery’okuba banywani ba Yesu ni riiha?

¹⁴ (4) Shagika entebeekanisa z’ekibiina Ekikristaayo. Nitwongyera kuhamya omukago gwaitu na Yesu omutwe gw’ekibiina, twakwatanisa n’abatoorainwe kutureeberera. (Shoma Abaefeso 4:15, 16.) Nk’eky’okureeberaho, hati nituteeraho kureeba ngu ebyombeko by’Obukama byakoresibwa omu bwijwire. Egi niyo nshonga ahabw’enki, ebibiina ebimwe bikagaitwa hamwe kandi ensharo z’ebicweka byabo by’okubuuriramu zaahindurwa. Entebeekanisa egi ehwereire munonga omu kukoresa gye esente ezihairweyo. Kandi ahabw’enshonga egi, kyetengyeise ngu ababuurizi abamwe bakore empindahinduka kumanyiira embeera nsya. Ababuurizi aba nibabaasa kuba bamazire emyaka mingi barikuheereza  omu kibiina ekimwe, kandi bainemu n’abanywani baingi. Kwonka hati bashabirwe kuza kuheereza omu kibiina ekindi. Kwonka ka kishemereire kuba nikishemeza munonga Yesu kureeba oku abeegi be aba abeesigwa barikushagika entebeekanisa egi!

15. Omukago gwaitu na Yesu nigwija kwongyera kuhama guta omu biro by’omumaisho?

¹⁵ Abashukirweho omwoyo gurikwera baine amatsiko g’okuba na Yesu ebiro byona, barikutegyeka nawe omu Bukama bwa Ruhanga. Buzima nibaija kuba na Kristo barikumureeba, barikugamba nawe, kandi bagire obwire bw’okuba nawe. (Yoh. 14:2, 3) Abaine amatsiko g’okutuura omu nsi, Yesu naija kuba naabakunda kandi naabafaho. N’obu baraabe nibaija kuba batarikureeba Yesu butunu, omukago gwabo nawe nigwija kuguma nigwongyera kuhama barikwesiimira omu mbeera nungi ezi Yehova na Yesu baraabe babaasiise kubaho.​—Isa. 9:6, 7.

16. Nitwija kutunga migisha ki twaba banywani ba Yesu?

¹⁶ Twikiriza okweta kwa Yesu kuba banywani be, nitwija kutunga emigisha mingi. Nk’eky’okureeberaho, na hati nitugasirwa omuri rukundo ye n’obushagiki bwe. Tuhairwe omugisha kwija kutuuraho ebiro byona. Kandi ekirikukirayo obukuru, okuba banywani na Yesu nikitureetera kutunga ekintu ky’omuhendo ekirikukirayo nigwo mukago murungi na Ishe, Yehova. Ka n’omugisha gw’amaani kuba banywani ba Yesu!