1-2. Yesu ashemereire kuba yaabaire naamanyisa ki obu yaagamba ebiri omuri Yohaana 4:35, 36?

YESU akaba ariyo naaraba aha rubaju rw’emisiri etandikire kukura. (Yoh. 4:3-6) Ekihingwa ekyabaire kiri omu misiri egi kikaba nikiburayo ameezi nk’ana kikashaaruurwa. Yesu akagamba ekintu ekyareebekire nk’ekitari kya butoosha. Akabagira ati: “Munagye amaisho, mureebe emisiri ku eyezire, ku ehikire kugyeshwa.” (Shoma Yohaana 4:35, 36.) Akaba naamanyisa ki?

² Yesu ashemereire kuba yaabaire naamanyisa okushaaruura abantu omu muringo gw’akamanyiso. Yetegyereze ekyabaire kyaheza kubaho. N’obu Abayudaaya butoosha baraabe baabaire batarikukwatanisa n’Abasamaria, Yesu akaba yaaheza kubuurira omukazi Omusamaria, kandi akahurikiza! Nangwa, obu Yesu yaabaire naagamba aha misiri “ehikire kugyeshwa,” guruupu y’Abasamaria abu omukazi yaabaire yaaheza kugambira ebirikukwata ahari Yesu bakaba bariyo nibaija kwega ebirikukiraho. (Yoh. 4:9, 39-42) Omuhandiiki omwe akahandiika aha mishororongo egi ati: “Ahabw’okugira ngu abantu bakaba baine ekihika ky’amaani . . . bakooreka ngu bakaba bari nk’ekihingwa ekihikire kushaaruurwa.”

3. Waareeba abantu nk’oku Yesu yaabaire naabareeba, noija kuba ota omubuurizi murungi?

³ Kandi shi abantu abu orikubuurira amakuru marungi? Nooreeba ngu bari nk’ekihingwa ekihiisize ekihikire kushaaruurwa? Ku kiraabe nikwo kiri, noija kukora ebintu bishatu ebi. Eky’okubanza, noija kutwara okubuurira nka kikuru. Obwire bw’eishaaruura ni bukye, tihariho obwire bw’okushiisha. Ekya kabiri, noija kushemererwa kureeba abantu barikusiima amakuru marungi. Baibuli  neegira eti: ‘Abantu nibashemererwa omu igyesha.’ (Isa. 9:3, Baibuli y’Abanyakaturiki) Kandi ekya kashatu, noija kureeba buri muntu nk’orikubaasa kuba omwegi wa Yesu, n’ahabw’ekyo noija kuhikaanisa enyanjura yaawe n’ebi arikukunda.

4. Nituza kwegyera ki aha ntumwa Paulo omu kicweka eki?

⁴ Yesu akaba atarikuteekateeka ngu Abasamaria tibarikubaasa kuba abeegi be, nk’oku abakuratsi be barikubaasa kuba baabaire nibateekateeka. Omu mwanya gw’ekyo, akabareeba nk’abarikubaasa kuba abeegi be. Naitwe twine kureeba abantu omu kicweka kyaitu nk’abarikubaasa kuba abeegi ba Kristo. Entumwa Paulo akatuteeraho eky’okureeberaho ky’omutaano. Nitubaasa kumwegyeraho ki? Omu kicweka eki, nituza kushwijuma oku (1) yaamanyire ebirikukwata aha nyikiriza z’abantu abu yaabaire naabuurira, (2) oku yaamanyire ebi barikukunda, (3) n’oku yaabareebire nk’abarikubaasa kuba abeegi ba Yesu.

5. Ahabw’enki Paulo yaabaire naabaasa kwetegyereza abamuhurikiize omu sinagogi?

⁵ Paulo akaba naakira kubuurira omu sinagogi z’Ekiyudaaya. Nk’eky’okureeberaho omuri sinagogi ya Tesalonika, akahikaanisa ebiteekateeko n’Abayudaaya aha “Byahandiikirwe okumara amazooba ashatu ga Sabato.” (Byak. 17:1, 2) Obundi Paulo akaba naahurira aikaikaine omuri sinagogi. Akakurira omu ka y’Ekiyudaaya. (Byak. 26:4, 5) Paulo akaba naamanya ebirikukwata aha Bayudaaya, n’ahabw’ekyo akaba naabaasa kubabuurira aine obumanzi.​—Fil. 3:4, 5.

6. Abantu b’Aseene omu katare bakaba nibataana bata aha bu Paulo yaabuuriire omuri sinagogi?

⁶ Abarikuhiiganisa ku baagyemesereize Paulo kuhungira Tesalonika, akaza Beroya, yaagumizamu yaaza Aseene. Akagaruka yaahikaanisa ebiteekateeko ‘n’Abayudaaya n’abanyadiini omuri sinagogi.’ (Byak. 17:17) Kwonka Paulo ku yaabaire naabuurira omu katare, akashangamu abantu b’omutaano. Bamwe aha baabaire bamuhurikiize bakaba bari Abanyamahanga abaabaire nibareeba obutumwa bwa Paulo ‘nk’okwegyesa kusya.’ Bakamugira bati: “Oreetsire ebigambo bisya omu matu gaitu.”​—Byak. 17:18-20.

7. Kurugiirira aha Ebyakozirwe 17:22, 23, Paulo akahindura ata omu nyanjura ze?

⁷ Shoma Ebyakozirwe 17:22, 23. Paulo tarabuuriire Abanyamahanga b’Aseene omu muringo nigwo gumwe nk’oku yaabuuriire Abayudaaya omu sinagogi. Naabaasa kuba yaayebuurize ati: ‘Abantu b’Aseene aba nibaikiriza ki?’ Akaba naayegyendesereza kureeba ebimwetooroire kandi ayetegyereza n’emigyenzo y’ediini z’abantu. Ekindi, Paulo akaba asherura enshonga  omu kuramya kwabo erikubaasa kuba neikirizana n’amazima g’Ebyahandiikirwe. “Obu yaabaire ari Omukristaayo Omuyudaaya, akaba naamanya ngu Abagriika abakaafiire tibarikuramya Ruhanga ow’amazima ow’Abakristaayo Abayudaaya,” nikwo omucondooza omwe wa Baibuli yaagizire, “kwonka akaba naateeraho kworeka ngu Ruhanga ou arikubuuriraho omu mazima, ti Ruhanga musya aha bantu b’Abaseene.” N’ahabw’ekyo Paulo akaba ayeteekateekire kuhindura omu nyanjura ye. Akagambira Abaseene ngu obutumwa bwe bukaba niburuga ahari “Ruhanga Otarikumanywa,” ou baabaire nibateeraho kuramya. N’obu Abanyamahanga baraabe baabaire batarikumanya gye Ebyahandiikirwe, Paulo tarabahugireho. Omu mwanya gw’ekyo akabareeba nk’emisiri ehiisize eine kushaaruurwa, reero yaahindahindura omu nyanjura ze z’amakuru marungi.

8. (a) Noobaasa kumanya ota enyikiriza z’abantu omu kicweka kyanyu? (b) Omuntu yaagira ngu aine ediini ye, noobaasa kumugarukamu ota?

⁸ Nka Paulo, yetegyereze ebikwetooroire. Teeraho kureeba obumanyiso oburikworeka enyikiriza z’abantu omu kicweka kyanyu. Nyineeka ahunzire ata eka ye nari emotoka ye? Mbwenu shi eiziina rye, emijwarire, oku arikweboneza, nari emigambire ye nibyoreka ediini ye? Obundi yaakugambira butunu ngu aine ediini ye. Payoniya w’omutaano orikwetwa Flutura abantu ku barikumugambira batyo, naagarukamu ati: “Ti naija aha kukugyema enyikiriza zangye, beitu kugamba naiwe aha nshonga egi . . . ”

9. Noobaasa kukoresa nshonga ki kwikirizana n’omuntu orikukunda ediini?

⁹ Ni nshonga ki ezi orikubaasa kugaaniiraho n’omuntu omunyadiini? Gamba aha nshonga ei murikubaasa kwikirizanaho. Naabaasa kuba naaramya Ruhanga omwe, naabaasa kuba naikiriza ngu Yesu n’Omujuni w’abantu, nari naabaasa kuba naikiriza ngu turi omu biro by’emperu ebiri haihi kuhendera. Orikwihirira aha nyikiriza ezi murikushushanisa, yaanjura obutumwa bwa Baibuli omu muringo ogurikushemeza omuntu ogwo.

10. Twine kuteeraho kukora ki, kandi ahabw’enki?

¹⁰ Guma noijuka ngu abantu abamwe nibabaasa kuba batarikwikiriza buri kimwe eki ediini yaabo erikwegyesa. N’ahabw’ekyo, na bwanyima y’okumanya ediini y’omuntu, teeraho kumanya kyenyini eki we arikwikiriza. “Abantu baingi ebiro ebi nibajwanzya ebigunjano by’abantu n’enyikiriza z’ediini,” David payoniya ow’omutaano kuruga Australia nikwo arikugira. Donalta, omuri Albania, naagira ati: “Abamwe abu turikubuurira nibagira ngu haine ediini ei barimu, kwonka bwanyima nibagamba amazima ngu tibarikwikiririza omuri Ruhanga.” Ow’eishe-emwe omwe omumiisani omuri Argentina ayetegyereize ngu bamwe nibagira ngu nibaikiririza omu bushatu, kwonka buzima tibarikwikiriza ngu Tataitwe, Omwana, n’omwoyo gurikwera ni Ruhanga  omwe. Naagira ngu “ahabw’okumanya ekyo nikinyorobera kutunga enshonga ei ndikubaasa kwikirizanaho n’omuntu.” N’ahabw’ekyo, teeraho kumanya eki abantu buzima barikwikiriza. Reero nka Paulo, noobaasa kugira ngu aha bantu b’emiringo yoona “mpindukire byona.”​—1 Kor. 9:19-23.

11. Nk’oku kirikworekwa omu Ebyakozirwe 14:14-17, Paulo akabuurira ata abantu b’omuri Lusitura omu muringo ogurikushemeza?

¹¹ Shoma Ebyakozirwe 14:14-17. Paulo akamanya ebi abu yaabaire naabuurira baabaire nibakunda, reero yaahindura omu nyanjura ye. Nk’eky’okureeberaho, guruupu y’abantu abu yaagambire nabo omuri Lusitura bakaba nibamanya kakye Ebyahandiikirwe nari bataine na kakye aku barikumanya. N’ahabw’ekyo Paulo akagamba nabo omu muringo ogu barikubaasa kwetegyereza. Akagamba aha kwera kw’eby’okurya n’okutunga okushemererwa ahabw’okuba omu mbeera nungi. Akakoresa ebigambo n’eby’okureeberaho ebi abu yaabaire naabuurira barikubaasa kwetegyereza.

12. Noobaasa kumanya ota eki omuntu arikukunda reero okahindura omu nyanjura yaawe?

¹² Koresa okwetegyereza kubaasa kumanya ebirikushemeza abantu omu kicweka kyanyu reero ohindure omu nyanjura yaawe. Noobaasa kumanya ota ekirikushemeza omuntu waaba oriyo nooza kumuhika nari kuhika aha ka ye? Teeraho kwetegyereza ebikwetooroire. Obundi naabaasa kuba ahingire, arikushoma ekitabo, arikukanika emotoka ye, nari aine ekindi eki arikukora. Kyaba nikibaasika, ahabw’enki otarikukoresa eki ariyo naakora kumureetera kwejumba omu kugaaniira? (Yoh. 4:7) Nangwa n’emijwarire y’omuntu neebaasa kumanyisa bingi ahariiwe nk’eihanga rye, omurimo gwe, nari omuzaano ogu arikukunda. “Nkatandika kugaaniira n’omutsigazi w’emyaka 19 owaabaire ajwaire omwenda oguriho omweshongozi rurangaanwa,” Gustavo nikwo arikugira. “Nkamubuuza aha nshonga egyo, kandi omutsigazi ogwo akangambira ahabw’enki naakunda omweshongozi ogwo. Okugaaniira okwo kukarugamu okumwegyesa Baibuli, kandi hati n’omwe aha b’eishe-emwe bagyenzi baitu.”

13. Noobaasa kushaba ota omuntu omu muringo murungi kumwegyesa Baibuli?

 ¹³ Waacwamu kwegyesa omuntu Baibuli, mureetere kukunda okwega, kandi mworekye oku arikubaasa kugasirwa omu kwega. (Yoh. 4:13-15) Nk’eky’okureeberaho, munyaanyazi-itwe orikwetwa Poppy, omukazi owaayorekire ngu naasiima akamwakiira omu nju ye. Poppy ku yaareebire ekihandiiko aha kisiika ekirikworeka ngu omukazi ogwo n’omuhangu omu by’obwegyese, akagira ngu naitwe nitwegyesa abantu kurabira omu ntebeekanisa y’okwega Baibuli n’enteerane. Omukazi ogwo akaikiriza kwega Baibuli, yaaza n’omu nteerane eizooba eryakuratsireho, kandi bwanyima akaija n’aha ruteerane oruhango orw’ekiro kimwe. Bwanyima y’omwaka gumwe, akabatizibwa. Noobaasa kwebuuza oti: ‘Ni bintu ki ebirikushemeza abu ndikugarukira? Nimbaasa kugamba aha ntebeekanisa yaitu y’okwegyesa abantu Baibuli omu muringo ogurikushemeza?’

14. Noobaasa kwegyesa ota buri mwegi wa Baibuli kuhikaana n’embeera ye?

¹⁴ Bwanyima y’okutandika kwegyesa omuntu Baibuli, tebeekanisa gye buri murundi ogu orikuza kumwegyesa, orikuteekateeka aha bukomooko bw’omwegi waawe n’ebirikumushemeza. Waaba nootebeekanisa, toorana ebyahandiikirwe ebi oraashome, vidiyo ei oraayorekye, n’eby’okureeberaho ebi oraakorese kushoboorora amazima ga Baibuli. Yebuuze oti: ‘Okukira munonga niki ekiraashemeze omwegi ogu, kandi kikamuhika aha mutima?’ (Enf. 16:23) Omuri Albania, omukazi ou payoniya orikwetwa Flora yaabaire naayegyesa Baibuli akagamba butunu ati: “Tindikubaasa kwikiriza enyegyesa y’okuzooka.” Flora taramugyemire enyegyesa egyo. Naashoboorora ati: “Nkateekateeka ngu aine kubanza yaamanya Ruhanga orikuraganisa okuzooka.” Kuruga obwo, buri kwega, Flora akaba agamba munonga ahari rukundo ya Yehova, obwengye bwe, n’amaani ge. Bwanyima, omwegi akaija yaikiririza omu kuzooka. Hati n’Omujurizi wa Yehova oine omujinya.

15. Kurugiirira aha Ebyakozirwe 17:16-18, ni bikorwa ki ebyabaire biri omuri Bugriika eya ira ebyateganiise Paulo, kwonka ahabw’enki atarahugire aha bantu b’Aseene?

¹⁵ Shoma Ebyakozirwe 17:16-18. Paulo tarahugire aha bantu b’Aseene, n’obu orurembo rwabo ruraabe rwabaire rwijwire okuramya ebishushani, obushambani, n’ebigunjano by’ekikaafiire, kandi taraikiriize n’ebijumo kumumaramu amaani. Paulo nawe akahinduka Omukristaayo, n’obu araabe yaabaire ari ‘omurogotsi, omujumi, kandi omuntu enshaarizi.’ (1 Tim. 1:13) Nk’oku Yesu yaareebire okubaasa omuri Paulo, nawe Paulo akareeba okubaasa omu bantu b’Aseene. Kandi okugira obuhame obu kikaba kitagwire.​—Byak. 9:13-15; 17:34.

16-17. Niki ekirikworeka ngu abantu b’emiringo yoona nibabaasa kuhinduka abeegi ba Kristo? Ha eky’okureeberaho.

¹⁶ Omu kyasha ky’okubanza, abantu b’enganda zitarikushushana bakahinduka abeegi ba Yesu. Obu Paulo yaahandiikira Abakristaayo abaabaire nibatuura Korinso omu rurembo rwa Bugriika, akagira ngu bamwe omu kibiina ekyo bakaba bari enkozi z’emishango nari enshambani. Kandi akoongyeraho ati: “Bamwe omuriimwe mukaba muri nk’abo, kwonka mukoogibwa, mwayezibwa.” (1 Kor. 6:9-11) Mbwenu shi ku waabaire ori iwe okaba noija kureeba abantu abo nk’abarikubaasa kuhinduka bakaba abeegi ba Yesu?

¹⁷ Obunaku obu, abantu baingi beeteekateekire kukora empindahinduka ezirikwetengyesa kuba abeegi ba Yesu. Nk’eky’okureeberaho omuri Australia, payoniya ow’omutaano orikwetwa Yukina akeetegyereza ngu abantu b’emiringo yoona nibabaasa kwikiriza obutumwa bwa Baibuli. Eizooba rimwe ku yaabaire ari aha ofiisi emwe, akareeba omwishiki aine engondo nari  tatu nyingi kandi ajwaire emyenda mihango ejabiriire. “Nkabanza kweziringamu kakye,” Yukina nikwo arikugira, “kwonka bwanyima nkatandika kugamba nawe. Nketegyereza ngu akaba naakunda munonga Baibuli nangwa na zimwe aha ngondo ezaabaire ziri aha mubiri gwe ekaba eri emishororongo kuruga omu kitabo kya Zaaburi!” Omukazi ogwo akatandika kwega Baibuli n’okwija omu nteerane. *

18. Ahabw’enki tutaine kucwera abantu orubanja?

¹⁸ Mbwenu shi Yesu akareeba ngu emisiri ehiisize y’okushaaruura ahabw’okugira ngu akaba naamanya ngu abantu abarikukira obwingi nibaija kumukuratira? Ngaaha buzima. Ebyahandiikirwe nibyoreka ngu abantu bakye nibo baabaire nibaija kumwikiririzamu. (Yoh. 12:37, 38) Kandi Yesu akaba naabaasa kumanya ekiri omu mitima y’abantu. (Mat. 9:4) N’obu araabe yaabaire naata omutima ahari bakye abaabaire nibamwikiriza, akaba aine obweziriki arikubuurira buri omwe. N’ahabw’ekyo itwe abatarikubaasa kushoma ebiri omu mitima y’abantu, twine kwetantara omuze gw’okuteekateeka ngu ekicweka ky’okubuuriramu ni kibi nari ngu omuntu tarikubaasa kwega amazima! Omu mwanya gw’ekyo, twine kureeba okubaasa kw’abantu. Marc, omumiisani omuri Burkina Faso, naakigambaho ati: “Abantu abu ndikuba ninteekateeka ngu nibaija kutunguuka, obwire obwingi nibarekyera aho okwega. Kwonka abantu abu ndikuba nindeeba ngu tibaine rugyendo, nibo barikutunguuka gye. N’ahabw’ekyo nyegire ngu ni kirungi kureka omwoyo gwa Yehova ogurikwera kutwebembera.”

19. Tushemereire kugira miteekateekyere ki aha bantu omu kicweka kyaitu?

¹⁹ Omu kubanza noobaasa kushusha ngu omu kicweka tiharimu abantu baingi abari nk’ebihingwa ebyezire ebihikire kushaaruurwa. Kwonka ijuka eki Yesu yaagambiire abeegi be. Akagira ngu emisiri eyezire, arikumanyisa ngu ehikire kushaaruurwa. Abantu nibabaasa kuhinduka babe abeegi ba Kristo. Yehova naareeba abantu aba abarikubaasa kuba abeegi ba Kristo ‘nk’eitungo.’ (Hag. 2:7) Twaba nitureeba abantu nk’oku Yehova na Yesu barikubareeba, nitwija kuteeraho kumanya ebirikukwata aha bukomooko bwabo n’ebirikubashemeza. Titurikwenda kubareeba nk’abashuhuuki, beitu nk’abarikubaasa kuba ab’eishe-emwe na banyaanyazi-itwe.