Ahabw’enki Yesu arikuza kufa yaajuriize ebigambo bya Daudi ebiri omu Zaaburi 22:1?

Bimwe aha bigambo ebi Yesu yaagambire atakafiire bikahandiikwa omuri Matayo 27:46: “Ruhanga wangye, Ruhanga wangye, n’enki ekyakuntsigisaho?” Yesu okugamba ebigambo ebi, kikahikiiriza obunabi bwa Daudi oburi omu Zaaburi 22:1. (Mak. 15:34) Nikiba kigwire kuteekateeka ngu Yesu akajuriza ebigambo ebyo ahabw’okumureebya nari ahabw’okutagira okwikiriza omu kaire ako. Yesu akaba naayetegyereza gye enshonga ahabw’enki yaabaire aine kufa, kandi akaba ayeteekateekire kwikiriza kwitwa. (Mat. 16:21; 20:28) Kandi akaba naamanya ngu Yehova akaba atarikwija ‘kumurinda embaju zoona’ kugira ngu atafa. (Yob. 1:10) Yehova akaikiriza Yesu kworeka butunu ngu naabaasa kuguma ari omwesigwa kuhika n’aha kufa.​—Mak. 14:35, 36.

Mbwenu ahabw’enki Yesu yaajuriize ebigambo bya zaaburi egyo? N’obu turaabe tutarikuhamiza kimwe, ka tureebe ekirikubaasa kuba kyamureeteire kubijuriza

Yesu okugamba ebigambo ebyo shi, akaba naayoreka ngu Yehova amwihiremu obwara yaamureka kufa? Yesu akaba aine kwehayo nk’ekitambo ataine buhwezi bwa Yehova. Akaba ari omuntu kandi akafa kugira ngu “aroze aha kufa omu mwanya gw’abantu boona.”​—Heb. 2:9.

Yesu okujuriza ebigambo bikye bya Zaaburi egyo, akaba naayenda ngu abantu bateekateekye ahari Zaaburi egyo yoona? Omu bwire obwo gukaba guri omucwe gw’Abayudaaya kukwata zaaburi nyingi omu mutwe. Ku baakuhuriire ebigambo bikye bya zaaburi egyo, bakaba nibaija  kuhika nibateekateeka ahari zaaburi egyo yoona. Ku kiraabe nikyo Yesu yaabaire agyendereire, naabaasa kuba yaahwereire Abayudaaya kwijuka obunabi bwingi obuhandiikirwe omu zaaburi egi oburikugamba aha kufa kwe. (Zab. 22:7, 8, 15, 16, 18, 24) Kandi zaaburi egyo neehendera erikuhimbisa Yehova, kandi neemugambaho nk’Omugabe orikutegyeka ensi yoona.​—Zab. 22:27-31.

Mbwenu shi Yesu okujuriza ebigambo bya Daudi ebi, akaba naayoreka ngu taine rubanja? Yesu atakafiire, akahozesibwa kandi yaateebwaho orubanja rw’okuba omurogotsi. (Mat. 26:65, 66) Okuhozesibwa okwo kukabaho nyekiro omu itumbi kandi kukaba nikuhenda ebiragiro. (Mat. 26:59; Mak. 14:56-59) Yesu okujuriza ebigambo ebyo nk’ekibuuzo ekitarikwetengyesa kugarukamu, naabaasa kuba yaabaire naayoreka ngu taine rubanja orushemereire kumureetera kufubirwa omu muringo ogwo.

Kandi shi Yesu akaba naijutsya abandi ngu n’obu Daudi araabe yaikiriziibwe kubonabona, tikirikumanyisa ngu Yehova akaba atarikumusiima? Ekibuuzo kya Daudi kikaba kitarikworeka ngu taine kwikiriza. Bwanyima y’okubuuza atyo, akooreka ngu naayesiga amaani ga Yehova ag’okujuna, kandi Yehova akagumizamu naamuha emigisha. (Zab. 22:23, 24, 27) Nikyo kimwe, Yesu ‘Omwana wa Daudi’ obu yaabaire ari omu busaasi aha muti gw’okubonabona, kikaba kitarikumanyisa ngu Yehova tarikumusiima.​—Mat. 21:9.

Tugire ngu Yesu akaba naayoreka obusaasi bwe bwingi ngu Yehova taramurinzire kutaitwa ahabw’okwenda kworeka gye ku amuhamiireho? Kikaba kitari kigyendererwa kya Yehova ngu Omwana we abonabone kandi afe. Ekyo kikaija kwetengyesa bwanyima y’obugomi bw’okubanza. Yesu tihaine eki yaabaire ashobize, beitu akabonabona kandi yaitwa kubaasa kugarukamu ebibuuzo ebi Sitaane yaareetsireho n’okuhayo omuhendo gw’ekitambo kugaruraho eki twafeereirwe. (Mak. 8:31; 1 Pet. 2:21-24) Eki kikaba nikibaasa kuhikiirira, Yehova yaiha oburinzi bwe ahari Yesu kumara obwire bukye.

Mbwenu shi Yesu akaba naateeraho kuhwera abakuratsi be kuta omutima aha nshonga eyaareeteire Yehova kumwikiriza kufa omu muringo ogu? * Yesu akaba naamanya ngu okufeera aha muti nk’enkozi y’ebibi kikaba nikiza kuteeza baingi entsibo. (1 Kor. 1:23) Abakuratsi be ku baakutaire omutima aha nshonga yenyini eyaamureeteire kwitwa, obwo nibwo baabaire nibaija kwetegyereza gye ahabw’enki yaafiire atyo. (Gal. 3:13, 14) Bakaba nibaija kumureeba nk’Omujuni, beitu atari nkozi y’ebibi.

Oyihireho kyona ekyareeteire Yesu kujuriza ebigambo ebyo, akeetegyereza ngu byona ebyamuhikireho, bikaba nibitwarirwa omu kigyendererwa kya Yehova. Yesu bwanyima y’eshaaha nkye yaaheza kujuriza zaaburi egyo akagira ati: “Kyahwa!” (Yoh. 19:30; Luk. 22:37) Eego, Yehova okwiha oburinzi ahari Yesu kumara obwire bukye, kikabaasisa Yesu kuhikiiriza omu bwijwire byona ebi yaatumiirwe omu nsi. Kandi kikamubaasisa kuhikiiriza omu bwijwire byona ebyamuhandiikirweho “omu biragiro bya Musa n’omu bya baanabi n’omuri Zaaburi.”​—Luk. 24:44.