1-2. Nitubaasa kukuratira tuta ebiribatiro by’ebigyere bya Yesu? Ha eky’okureeberaho.

KA TUGIRE ngu ori omwe aha guruupu y’abantu abarikuraba omu ihamba ry’orubaare. Mwine obeebembeire kubooreka omuhanda orikumanya gye eihamba eryo. Agyenda arikutsiga enyima ebiribatiro by’ebigyere bye omu rubaare. Mukigumizamu nimugyenda, mweshanga mutakibaasa kureeba obeebembeire kubooreka omuhanda! Kwonka timutiinire. Kureka, nimugyendera haihi n’ebiribatiro bye nk’oku murikubaasa!

² Abakristaayo ab’amazima, turi nk’abarikuraba omu ihamba ry’akabi, niyo ensi egi embi. Ekirungi, Yehova atuhaire orikutwebembera ohikiriire, niwe Omwana we Yesu Kristo, ou turikugyendera haihi n’ebiribatiro by’ebigyere bye. (1 Pet. 2:21) Kurugiirira aha kucondooza kumwe, omu kyahandiikirwe eki Petero akagyeragyeranisa Yesu aha muntu orikworeka abandi omuhanda. Kushushana n’omuntu ogwo, akatsigaho ebiribatiro bye, nari entambwe ze ezi turikubaasa kukuratira. Ka tugarukyemu ebibuuzo bishatu ebi. Ebiribatiro by’ebigyere niki? Ahabw’enki twine kubikuratira? Kandi nitubikuratira tuta?

3. Nikimanyisa ki okugyendera omu bigyere by’omuntu?

³ Nikimanyisa ki okugyendera omu bigyere by’omuntu? Omu Baibuli, ebigambo ‘okugyenda’ hamwe ‘n’ebigyere’ obumwe nibimanyisa okukora nk’oku omuntu yaakozire. (Kut. 6:9; Enf. 4:26) Eky’okureeberaho eki omuntu arikutaho nikibaasa kugyeragyeranisibwa n’ebigyere, nari ebiribatiro ebi omuntu arikutsiga enyima yaaba naagyenda. N’ahabw’ekyo okugyendera omu  bigyere by’omuntu nikimanyisa okukuratira eky’okureeberaho kye, nari okumutooreza.

4. Nikimanyisa ki okukuratira ebiribatiro by’ebigyere bya Yesu?

⁴ Hati nikimanyisa ki okukuratira ebiribatiro by’ebigyere bya Yesu? Omu bugufu nikimanyisa okumutooreza. Omu kyahandiikirwe kikuru ky’ekicweka eki, entumwa Petero naagamba aha ky’okureeberaho kirungi kya Yesu eky’okugumisiriza omu kubonabona. Kwonka hariho emiringo mingi ei turikubaasa kutoorezamu Yesu. (1 Pet. 2:18-25) Buzima, entwaza ya Yesu yoona, otwariiremu ebi yaagambire byona n’ebi yaakozire n’eky’okureeberaho eki twine kukuratira.

5. Mbwenu shi abantu abatahikiriire nibabaasa kukuratira Yesu omu muringo oguhikiriire? Shoboorora.

⁵ Itwe abantu abatahikiriire, buzima nitubaasa kukuratira eky’okureeberaho kya Yesu? Eego, nitubaasa. Ijuka ngu Petero naatuhiga kuteeraho kugyendera omu biribatiro bya Yesu nk’oku turikubaasa, beitu kutari kubigyenderamu omu muringo oguhikiriire. Twagyendera omu bigyere bye n’obwegyendesereza, n’obu turaabe tutahikiriire, nitwija kuba nitugyendera aha bigambo by’entumwa Yohaana ebirikutuhiga “kutwaza nka we [Yesu] oku yaabaire atwaza.”​—1 Yoh. 2:6.

6-7. Ahabw’enki turikubaasa kugira ngu okugyendera omu biribatiro by’ebigyere bya Yesu nikitwiriza haihi na Yehova?

⁶ Okugyendera omu bigyere bya Yesu nikiija kutwiriza haihi na Yehova. Ahabw’enki turikubaasa kugira tutyo? Eky’okubanza, Yesu akataho eky’okureeberaho ky’omutaano eky’okutwaza omu muringo ogurikushemeza Ruhanga. (Yoh. 8:29) N’ahabw’ekyo, twagyendera omu biribatiro by’ebigyere bya Yesu, nitushemeza Yehova. Kandi nitubaasa kuhamya ngu Tataitwe ow’omu iguru naija kwirira haihi abarikuteeraho munonga kuba banywani be.​—Yak. 4:8.

 ⁷ Kandi, Yesu akatooreza Ishe omu muringo oguhikiriire. Niyo nshonga ahabw’enki Yesu yaagizire ati: ‘Orikundeeba, biri naaba areebire na Isheboona.’ (Yoh. 14:9) Twagira emitwarize nk’eya Yesu omu kukoragana n’abandi, nk’okugirira omubembe esaasi, okugirira embabazi omukazi owaabaire aine endwara y’akabi, n’okufayo aha bafeereirwe, nituba nitutooreza na Yehova. (Mak. 1:40, 41; 5:25-34; Yoh. 11:33-35) Twayongyera kuba nka Yehova nitwongyera kumwirira haihi.

8. Shoboorora ahabw’enki okugyendera omu biribatiro by’ebigyere bya Yesu kirikwija kutuhwera ‘kusingura’ ensi.

⁸ Okugyendera omu biribatiro by’ebigyere bya Yesu nikituhwera kutahugibwa ensi egi embi. Yesu ari haihi kufa, akabaasa kugira ati: “Nyowe nsingwire ensi.” (Yoh. 16:33) Akaba naamanyisa ngu taraikiriize kugyemeserezibwa emiteekateekyere y’ensi egi, ebigyendererwa byayo, n’ebikorwa byayo. Yesu tarahugire kuruga aha kigyendererwa ekyamureetsire omu nsi eky’okujuririra Yehova. Kandi shi itwe? Ensi egi erimu ebintu bingi ebirikubaasa kutuhuzya. Kwonka nka Yesu twine kuta omutima aha kukora ebi Yehova arikukunda, reero naitwe nitwija ‘kusingura ensi.’​—1 Yoh. 5:5.

9. Twine kukora ki kubaasa kuguma omu muhanda ogurikuhitsya omu magara agatahwaho?

⁹ Okugyendera omu biribatiro by’ebigyere bya Yesu nikihitsya omu magara agatahwaho. Omutsigazi omugaiga ku yaabuurize eki aine kukora kutunga amagara agatahwaho, Yesu akamugarukamu ati: “Oije onkuratire.” (Mat. 19:16-21) Abayudaaya abamwe abaabaire batarikwikiriza ngu Yesu niwe Kristo, akabagira ati: ‘Entaama zangye nizinkuratira. Ninziha amagara agatahwaho.’ (Yoh. 10:24-29) Yesu arikugambira Nikodemu, omwe aha b’Eishengyero owaakunzire enyegyesa ze, akamugira ngu ‘orikumwikiririzamu’ naija kutunga “amagara agatahwaho.” (Yoh. 3:16) Nitwikiririza omuri Yesu twagyendera aha bi yaayegyeise omu bigambo, ebikorwa n’eky’okureeberaho. Twakora tutyo, nitwija kuguma omu muhanda ogurikuhitsya omu magara agatahwaho.​—Mat. 7:14.

10. Niki ekirikutwarirwa omu ‘kumanya’ gye Yesu? (Yohaana 17:3)

¹⁰ Tutakagyendeire haihi n’ebigyere bya Yesu, twine kubanza twamumanya. (Shoma Yohaana 17:3.) “Okumanya” Yesu n’ekintu eki twine kugumizamu nitukora. Nituba twine kumwetegyereza gye, turikwega aha mitwarize ye, emiteekateekyere ye, n’emitindo ye. N’obu twakuba tumazire omu mazima emyaka engahi, nituba twine kugumizamu turikwega kubaasa ‘kumanya’ Yehova n’Omwana we.

11. Ebitabo bina eby’Engiri birimu ki?

¹¹ Yehova kubaasa kutuhwera kumanya gye Omwana we, akahandiikisa ebitabo by’Engiri bina byateebwa omu Kigambo kye. Ebitabo by’Engiri ebi birimu ebyafaayo bya Yesu n’obuheereza bwe. Ebihandiikirwemu nibitumanyisa  ebi Yesu yaagambire, ebi yaakozire, n’oku yaabaire naayehurira. Ebitabo bina ebi nibituhwera ‘kuteekateeka’ aha ky’okureeberaho kya Yesu. (Heb. 12:3) Nitubaasa kugira ngu ebitabo ebi birimu ebiribatiro by’ebigyere bya Yesu ebi yaatutsigiire kugyenderamu. N’ahabw’ekyo twashwijuma ebitabo by’Engiri, nitubaasa kwongyera kumanya gye Yesu. N’ekirikurugamu, nitukuratira ebiribatiro by’ebigyere bye haihi nawe.

12. Nitubaasa kugasirwa tuta omu bwijwire omu bitabo by’Engiri?

¹² Kubaasa kugasirwa gye omu bitabo by’Engiri, twine kukora ekirikukira aha kubishoma bushoma. Twine kugira obwire tukeega ebirimu n’obwegyendesereza kandi tukabiteekateekaho munonga. (Gyeragyeranisa Yoshua 1:8.) Ka tureebe obuhabuzi bw’emiringo ebiri oburikubaasa kutuhwera kuteekateeka aha bitabo by’Engiri n’okugyendera aha bi turikushomamu.

13. Noobaasa kureetera ota ebiri omu Ngiri kuba ebyabuzima?

¹³ Eky’okubanza, reetera ebiri omu bitabo by’Engiri kuba ebyabuzima. Koresa okuteebereza kwawe kureeba, kuhurira, n’okuteekateeka aha kyabaire nikibaho. Kubaasa kukuhwera kukora ekyo, condooza omu bitabo by’okucondoozamu eby’ekibiina kya Yehova. Shwijuma ebyetooroire ebi orikwega ebirikubibandiza nari ebirikubikurata. Sherura ebirikushoboorora obukomooko n’embeera ezaabaire ziriho. Gyeragyeranisa ebi orikwega n’ebirikuhikaana nabyo ebiri omu kitabo ky’Engiri ekindi. Obumwe omuhandiiki w’Engiri omwe akaba agamba aha kashonshorekye akaine amakuru aku ondiijo ataratairemu.

14-15. Nitubaasa kugyendera tuta aha biri omu bitabo by’Engiri?

¹⁴ Ekya kabiri, gyendera aha biri omu bitabo by’Engiri. (Yoh. 13:17) Waaheza kwega gye ebiri omu Ngiri, yebuuze oti: ‘Omu bi naashoma harimu ebi ndikubaasa kugyenderaho? Nimbaasa kubikoresa nta kuhwera ondiijo?’ Gira omuntu ou waateekateekaho, reero omu bwire buhikire kandi omu muringo gwa rukundo obagane nawe ebi oyegire.

 ¹⁵ Ka tureebe eky’okureeberaho oku turikubaasa kugyendera aha obuhabuzi bubiri obu. Nituza kushwijuma ebirikukwata aha mufaakazi omukyene ou Yesu yaareebire omu hekalu.

16. Shoboorora ekyabaireho ekirikugambwaho omuri Mako 12:41.

¹⁶ Reetera ebi orikushoma kuba ebyabuzima. (Shoma Mako 12:41.) Teera akashushani. Ekaba eri Nisani 11, 33 Y.A.K., harikuburayo obwire obutahikire na saabiiti emwe Yesu akaitwa. Yesu akaba yaaheza kumara obwire bwingi eizooba eryo arikwegyesa omu hekalu. Abahakanisa be bakaba baaheza kumuteganisa. Enyimaho, abamwe bakaba baherize kumubuuza ahu arikwiha obushoboorozi bwe. Abamwe bakateeraho kumubuuza ebibuuzo bigumire. (Mak. 11:27-33; 12:13-34) Bwanyima Yesu akaza omu kicweka ekindi ekya hekalu, ekirikwetwa Eishengyero ry’Abakazi. Omu mwanya ogu akaba naabaasa kureeba obubokusi bw’esente aha bisiika by’eishengyero eryo. Reero Yesu akashutama yaaguma naareeba abantu barikuhayo ebiheebwayo byabo omu bubokusi. Akareeba abantu baingi abagaiga barikutamu ebinushu bingi. Obundi akaba ari haihi ekirikumara kubaasa kuhurira okubomborekana kw’ebinushu ebi baabaire nibatambika omu bubokusi.

17. Omufaakazi omworo orikugambwaho omuri Mako 12:42 akakora ki?

¹⁷ Shoma Mako 12:42. Omu kaire ako, haine omukazi omwe ou Yesu yaataireho omutima. Akaba ari omukyene kandi ‘omufaakazi omworo.’ (Luk. 21:2) Embeera zikaba zitarikumworobera, obundi naagumirwa kwehitsya eby’okwebaisaho. Kwonka, akaza ahu obubokusi bw’ebiheebwayo buri reero omu muringo gw’obwengye yaatamu otunushu tubiri bukye, obundi titurahuriirwe obu yaabaire naatuta omu kabokusi. Yesu akamanya otunushu tubiri otu yaatairemu oturikwetwa leputa, otwabaire nitukirayo obukye omu bwire obwo. Otusente otwo tukaba turi tukye tutarikubaasa n’okugura n’ekiteera-nkumba kimwe, akanyonyi kakye ekaabaire nikahererukayo kugura esente nkye.

18. Kurugiirira ahari Mako 12:43, 44, Yesu akagamba ki aha kuhayo kw’omufaakazi?

¹⁸ Shoma Mako 12:43, 44. Omufaakazi ogu akashemeza Yesu munonga. N’ahabw’ekyo akeeta abeegi be yaabagambira ebirikukwata aha mufaakazi ogu ati: “Omufaakazi oriya yaatamu bingi okukira boona.” Reero yaashoboorora ati: ‘Ahabw’okuba [na munonga abagaiga] abo boona baatamu aha nshagi yaabo, kwonka omufaakazi oriya yaatamu ebi aine byona, kandi niryo itungo rye heza.’ Omufaakazi ogwo ku yaahaireyo otusente twe otu yaabaire atsigaize eizooba eryo twonka, akaba ariyo naata amagara ge omu mikono ya Yehova kuba niwe yaamureeberera.​—Zab. 26:3.

19. Nitubaasa kwega eishomo ki rikuru aha bigambo bya Yesu ebirikukwata aha mufaakazi omworo?

¹⁹ Bihikaanise n’embeera yaawe. Yebuuze oti: ‘Nitubaasa kwegyera ki aha bigambo bya Yesu ebirikukwata aha mufaakazi omworo?’ Teekateeka aha mufaakazi ogwo. Hatariho kubangaanisa akaba naayenda kuha Yehova bingi. Kwonka, akakora eki arikubaasa yaaha Yehova eki yaabaire aine ekirikukirayo oburungi. Kandi Yesu akaba naamanya ngu ebi omukazi ogwo yaahaireyo n’eby’omuhendo ahari Ishe. Eky’okwega n’eki: Yehova naashemererwa twahayo ekirikukirayo oburungi nikwo kumuheereza n’omutima gwaitu gwona kandi twekundiire. (Mat. 22:37; Kol. 3:23) Yehova naashemererwa yaareeba nitukora eki turikubaasa! Omusingye ogu nigukwata aha bwire obu turikumara turikwejumba omu kuramya, otwariiremu obuheereza bwaitu n’enteerane zaitu.

20. Noobaasa kugyendera ota aha mashomo agarikukwata aha mufaakazi omworo? Ha eky’okureeberaho.

²⁰ Noobaasa kugyendera ota aha mashomo  agarikukwata aha mufaakazi? Teeraho kuteekateeka aha bantu abarikubaasa kuba baine kuhamizibwa ngu ebi barikukora nibishemeza Yehova. Nk’eky’okureeberaho, haine munyaanyazi-itwe omukaikuru ou orikumanya obundi orikwehurira kubi ahabw’okugira ngu takibaasa kukora bingi omu buheereza, ahabw’amagara mabi nari amaani makye? Nari noobaasa kuteekateeka aha w’eishe-emwe oine endwara y’amaani etarikukira orikwehurira kubi ahabw’okugira ngu tarikubaasa kuza omu buri ruteerane aha Kyombeko ky’Obukama? Abari nk’aba bahwere orikugamba ebigambo ‘birungi ebirikubaasa’ kubombeka. (Efe. 4:29) Gaaniiraho nabo aha mashomo marungi agu twayega agarikukwata aha mufaakazi omworo. Ebigambo byawe nibibaasa kubahamiza ngu Yehova naashemererwa twamuha ekirikukirayo oburungi. (Enf. 15:23; 1 Tes. 5:11) Waasiima abandi ahabw’okuha Yehova ekirikukirayo oburungi, n’obu kyakuba nikireebeka nka kikye kita, nooba noogyendera haihi n’ebiribatiro by’ebigyere bya Yesu.

21. Omaririire kukora ki?

²¹ Ka nitushemererwa ahabw’okugira ngu ebitabo by’Engiri nibigamba munonga ahari Yesu, ekirikutubaasisa kumutooreza, n’okugyendera haihi n’ebigyere bye! Omu kweyegyesa nari omu kuramya kw’eka ahabw’enki otarikuta omutima aha bitabo by’Engiri? Ka twijukye ngu kubaasa kugasirwa omu kwega nk’okwo, twine kureetera ebi turikwega kuba ebyabuzima kandi tubigyendereho. Oyihireho okukora nk’ebi Yesu yaakozire, twine kuhurikiza n’ebi yaagambire. Omu kicweka ekirikukurataho, nituza kureeba eki turikubaasa kwegyera aha bigambo ebi Yesu yaahererukireyo kugamba.