1. Niki eki Yehova arikureeba omu bantu be?

YEHOVA RUHANGA naashemezibwa “abantu be.” (Zab. 149:4) Buzima eki ka n’ekiteekateeko kirikushemeza! Yehova naareeba emitwarize yaitu mirungi, okubaasa kwaitu, reero atweyiriza haihi. Twaguma turi abeesigwa ahariwe, nawe naija kuguma haihi naitwe ebiro byona!​—Yoh. 6:44.

2. Ahabw’enki abamwe nibagumirwa kwikiriza ngu Yehova naabakunda?

² Bamwe nibabaasa kugira bati: ‘Niimanya ngu Yehova naakunda abaheereza be boona, kwonka shi nimbaasa kuhamya nta ngu naankunda nk’omuntu?’ Niki ekirikubaasa kukureetera kwebuuza otyo? Oksana, * owaabonaboine munonga akiri omwana, naagira ati: “Nkashemererwa munonga ku naabatiziibwe kandi nkaba payoniya. Kwonka bwanyima y’emyaka 15, nkatandika kugira ebiteekateeko bibi ahabw’ebyampikireho nkiri muto. Naayereeba nk’ou Yehova atarikukunda kandi otahikire kukundwa.” Munyaanyazi-itwe Yua ori payoniya nawe owaatungire oburemeezi bwingi akiri muto, naagira ati: “Nkehayo kuheereza Yehova ahakuba nkaba niinyenda kutunga okushemererwa. Kwonka omu mutima nkaba niimanya ngu tarikubaasa kunkunda.”

3. Nituza kwega ki omu kicweka eki?

³ Nka banyaanyazi-itwe abu twagambaho abeesigwa, noobaasa kuba noobangaanisa rukundo ei Yehova akwiniire. Ahabw’enki oshemereire kuhamya ngu Yehova naakukunda? Kandi niki ekirakuhwere waatandika kuteekateeka ngu Yehova tarikukukunda? Ka tugarukyemu ebibuuzo ebi.

4. Ahabw’enki kiri eky’akabi kubangaanisa yaaba Ruhanga naatukunda?

⁴ Rukundo nigo maani garikutuhiga kukora ekintu. Twaba nituhamya ngu Yehova naatukunda, ekyo nikiija kutuhiga kumuheereza n’omu mbeera ezigumire. Kwonka twaba nitubangaanisa yaaba Ruhanga naatufaho, nitwija kugira ‘amaani makye.’ (Enf. 24:10) Kandi twatunga oburemeezi tukatandika kubangaanisa ahari rukundo ya Ruhanga, nitubaasa kuremwa kwangira emitego ya Sitaane.​—Efe. 6:16.

5. Niki ekihikire ahari bamwe ahabw’okubangaanisa ahari rukundo ei Ruhanga abainiire?

⁵ Abakristaayo abamwe abeesigwa obunaku obu bahwairemu amaani omu by’omwoyo ahabw’okugira okubangaanisa. Omureeberezi orikwetwa James naagira ati: “N’obu ndaabe naabaire nimpeereza aha Beseeli kandi ndikukunda obuheereza bwangye omu kibiina ekirikukoresa orurimi orundi, nkatandika kubangaanisa yaaba Yehova naasiima okwefeerereza kwangye. Nkahika n’aha kubangaanisa yaaba Yehova naahurikiza okushaba kwangye.” Eva nawe ori omu buheereza obw’obutwire, naagira ati: “Nketegyereza ngu okubangaanisa rukundo ya Ruhanga n’eky’akabi ahakuba nikikwata aha buri kimwe eki orikukora kuheereza Yehova. Eki nikikwata n’aha kihika eki oiniire eby’omwoyo, kandi kituubya n’okushemererwa kwawe omu kuheereza Yehova.” Michael, ori payoniya ow’obutwire kandi omureeberezi, naagira ati: “Waaba otarikwikiriza ngu Yehova naakufaho, noija kumutishukaho.”

6. Twine kukora ki twatandika kubangaanisa yaaba Yehova naatukunda?

⁶ Eby’okureeberaho ebi nibyoreka akabi k’eby’omwoyo akarikureetwaho emiteekateekyere egwire. Mbwenu shi tushemereire kukora ki okubangaanisa kwatandika kuza omu biteekateeko byaitu? Tushemereire kubyeyihamu ahonaaho! Shaba Yehova kukuhwera kuta ‘obusingye bwa Ruhanga oburikurinda omutima gwawe n’obwengye bwawe’ omu mwanya ‘gw’ebiteekateeko ebirikuteganisa.’ (Zab. 139:23; Fil. 4:6, 7) Kandi ijuka ngu tori wenka. Ab’eishe-emwe na banyaanyazi-itwe baingi nibateganisibwa emiteekateekyere etahikire. N’abaheereza ba Yehova aba ira bakaba baine kwemera oburemeezi nk’obwo. Yetegyereze eki turikubaasa kwegyera aha ntumwa Paulo.

7. Paulo akaba aine buremeezi ki?

⁷ Mbwenu shi obumwe noohurira obujunaanizibwa bukuremereire, otarikubaasa kubuhikiiriza bwona? Kyaba nikwo kiri, noobaasa kugira eki waayegyera ahari Paulo. Akaba ayerarikiriire ti ahabw’ekibiina kimwe kyonka beitu ahabw’ebibiina byona. (2 Kor. 11:23-28) Okugira endwara etarikukira obumwe neekumaraho okushemererwa? Paulo akaba aine “eihwa omu mubiri,” erikubaasa kuba yaabaire eri endwara ei yaabaire naayenda ngu emurugyeho. (2 Kor. 12:7-10) Mbwenu shi noohurira waahwa amaani ahabw’obutahikiirira bwawe? Obumwe Paulo akaba naayehurira atyo. Akeeyeta “omuntu enshoberwa” ahabw’okuteganisibwa obweremwa bwe obutaitsya.​—Rom. 7:21-24.

8. Niki ekyahwereire Paulo kugumisiriza oburemeezi bwe?

⁸ N’obu Paulo araabe yaagyeziibwe munonga kandi akateganisibwa bingi, akagumizamu naaheereza Yehova. Niki ekyamuhigire kugumizamu naaheereza? N’obu araabe yaabaire naamanya gye obweremwa bwe, akaba naikiririza kimwe omu kitambo. Akaba naamanya gye eki Yesu yaaraganiise obu yaagira ati: ‘Omuntu weena orikwikiriza [Yesu] naija kutunga amagara agatahwaho.’ (Yoh. 3:16; Rom. 6:23) Paulo hatariho kubangaanisa akaba ari omwe ahari abo abarikwikiririza omu kitambo. Akaba naahamya ngu Yehova ayeteekateekire kusaasira n’abarikuba bakozire ekibi ky’amaani kwonka baketeisa.​—Zab. 86:5.

9. Nitwegyera ki aha bigambo bya Paulo ebiri omu Abagalatia 2:20?

⁹ Kandi Paulo akaba naikiriza ngu Ruhanga naamukunda munonga ahabw’okwohereza Yesu kumufeera. (Shoma Abagalatia 2:20.) Yetegyereze ebigambo ebirikuha amatsiko aha muheru gw’omushororongo ogwo. Paulo akagira ati: ‘Omwana wa Ruhanga, akankunda yaayehayo ahabwangye.’ Paulo akaba atarikuta obugarukiro ahari rukundo ya Ruhanga, reero akaba nk’orikugira ati: ‘Niimanya ngu Yehova naabaasa kukunda ab’eishe-emwe bagyenzi bangye, kwonka nyowe tarikubaasa kunkunda.’ Paulo akaijutsya Abarooma ati: ‘Ku twabaire tukiri abanyabibi, Kristo yaatufera.’ (Rom. 5:8) Rukundo ei Ruhanga atwiniire teine bugarukiro!

10. Nitwega ki omu Abarooma 8:38, 39?

¹⁰ Shoma Abarooma 8:38, 39. Paulo akaba aine obwesigye omu maani ga rukundo ya Ruhanga. Akahandiika ngu ‘tihaine kirikubaasa kututaanisa n’okukunda kwa Ruhanga.’ Paulo  akaba naamanya oku Yehova yaagumisiririize eihanga rya Israeli. Kandi akaba naamanya gye embabazi ezi Yehova yaamugiriire. Nitubaasa kugira ngu Paulo akaba naagira ngu, ‘obu Yehova yaayohereize Omwana we kufa ahabwangye, hariho ekishemereire kundeetera kubangaanisa rukundo ye?’​—Rom. 8:32.

11. N’obu Paulo yaakozire ebibi nk’ebirikugambwaho omu 1 Timoseo 1:12-15, ahabw’enki yaabaire naahamya ngu Ruhanga naamukunda?

¹¹ Shoma 1 Timoseo 1:12-15. Obumwe Paulo ashemereire kuba yaabaire naateganisibwa ebi yaakozire atakabaire Mukristaayo. Tikirikutangaaza kureeba ngu akaba naayegambaho nk’omusiisi ‘ow’okubanza’! Paulo atakeegire amazima, akaba naahiiga Abakristaayo omu ndembo zitari zimwe na zimwe arikubata omu kihome kandi arikwikiriza ngu n’abamwe baitwe. (Byak. 26:10, 11) Teekateeka oku Paulo aine kuba yaabaire naayehurira yaabugana Omukristaayo muto ou abazaire be baitsirwe ahabw’okugira ngu akaha orusa abaabaitsire? Paulo akeefuuza ahabw’enshobe ezi yaakozire, kwonka akaba naamanya ngu tarikubaasa kuhindura eby’enyima. Akaikiriza ngu Kristo akamufeera, kandi akahandiika arikuhamya ngu “ahabw’embabazi za Ruhanga ndi nk’oku ndi.” (1 Kor. 15:3, 10) Eki nikitwegyesa ki? Ikiriza ngu Kristo akakufeera kandi yaakuteeraho omuhanda ogurikukubaasisa kugira omukago murungi na Yehova. (Byak. 3:19) Eki Ruhanga arikutwara nka kikuru n’eki turikukora hati n’omu biro by’omumaisho, beitu zitari nshobe zaitu ez’enyima, yaaba twabaire turi Abajurizi ba Yehova nari ngaaha.​—Isa. 1:18.

12. Ebiri omu 1 Yohaana 3:19, 20 nibibaasa kutuhwera bita twaba nitwereeba nk’abatari b’omugasho nari abatarikukundwa?

¹² Waateekateeka aha ku Yesu yaafiire ahabw’ebibi byawe, noobaasa kugira oti: ‘Ekiconco ky’ekitambo buzima tikinshemereire.’  Ahabw’enki noobaasa kwehurira otyo? Omutima gwaitu ogutahikiriire nigubaasa kutubeiha, tuteekateekye ngu tituhikire kukundwa nari tituri b’omuhendo. (Shoma 1 Yohaana 3:19, 20.) Omu bwire nk’obwo, twine kwijuka ngu “Ruhanga ni mukuru okukira emitima yaitu.” Rukundo ya Tataitwe ow’omu iguru n’okusaasira kwe nibikirira kimwe enyehurira zitahikire ezirikubaasa kuba ziri omu mitima yaitu. Twine kwehamiza ngu Yehova naatukunda. Kubaasa kukora ekyo, twine kuguma nitwega Ekigambo kye, kumushaba butoosha, n’okuguma nitushashaanuka n’abaheereza be abamuhamiireho. Ahabw’enki ni kikuru kukora ebintu ebyo?

13. Okwega Ekigambo kya Ruhanga nikituhwera kita? (Reeba akabokusi “ Oku Ekigambo kya Ruhanga Kirikubahwera.”)

¹³ Yega Ekigambo kya Ruhanga buri izooba, kandi noija kwongyera kureeba gye emitwarize ya Yehova. Noija kwetegyereza ku arikukukunda munonga. Okuteekateeka aha biri omu Kigambo kye buri izooba nikibaasa kukuhwera kuteekateeka gye n’okutebeekanisa gye ebiri omu mutima gwawe. (2 Tim. 3:16) Omureeberezi orikwetwa Kevin owaabaire naayereeba nk’otari w’omuhendo naagira ati: “Okushoma Zaaburi 103 n’okugiteekateekaho kimpwereire kugira emiteekateekyere ehikire n’okwetegyereza gye oku Yehova arikundeeba buzima.” Eva, owaaba yaagambirweho enyima, naagira ati: “Nimpendera eizooba ndikuteekateeka aha bi Yehova arikutwara nka bikuru n’oku arikwehurira. Nikimpwera kugira omutima gutuurize n’okwombeka okwikiriza kwangye.”

14. Okushaba nikubaasa kutuhwera kuta?

¹⁴ Shaba butoosha. (1 Tes. 5:17) Kubaasa kugira omukago murungi n’omuntu oine kuguma noogaaniira nawe oyihire aha mutima. Nikyo kimwe n’omukago gwaitu na Yehova. Twagambira Yehova enyehurira zaitu, ebiteekateeko byaitu, n’ebirikutwerarikiriza, nituba nitworeka ngu tumwinemu obwesigye kandi ngu nitumanya ngu naatukunda. (Zab. 94:17-19; 1 Yoh. 5:14, 15) Yua, owaaba yaagambirweho, naagira ati: “Ku ndikuba ninshaba, ninkora ekirikukira aha kugamba ebyabaho omu izooba. Niingambira Yehova oku ndikuteekateeka n’oku ndikwehurira. Mporampora, mbaasize kureeba Yehova nka Taata orikukunda abaana be beitu atari nk’orikukurira abakozi omu kitongore.”​—Reeba akabokusi “ Waashomire Ekitabo Eki?”

15. Yehova naayoreka ata ngu naatufaho?

¹⁵ Okuba hamwe n’abanywani abeesigwa, n’ekiconco kuruga ahari Yehova. (Yak. 1:17) Tataitwe ow’omu iguru naayoreka ngu naatufaho arikutuha eka y’eby’omwoyo y’ab’eishe-emwe na banyaanyazi-itwe abarikutukunda “ebiro byona.” (Enf. 17:17) Omu baruha ei  Paulo yaahandiikiire Abakolosai, akagamba aha Bakristaayo abamushagikire, yaagira ngu ‘bakamuhuumuriza.’ (Kol. 4:10, 11) Nangwa na Kristo Yesu akaba aine kuhwerwa kandi akaba naasiima obuhwezi bwa banywani be abantu, na baamaraika.​—Luk. 22:28, 43.

16. Abanywani abeesigwa nibabaasa kutuhwera bata kwirira haihi na Yehova?

¹⁶ Noogasirwa omu bwijwire omu banywani abeesigwa abu Yehova atuhaire? Okugambira munywani waawe ebirikukwerarikiriza tikirikworeka ngu ori omweremwa, kureka n’eky’oburinzi. Yetegyereze ebi James, owaaba yaagambirweho arikugamba: “Okugira abanywani abakuzire omu by’omwoyo kimpwereire munonga. Naaba ninteganisibwa emiteekateekyere etahikire, abanywani aba ab’omuhendo nibaampurikiza kandi bampamiza ngu nibankunda. Kurabira omuribo, nimbaasa kureeba oku Yehova arikunkunda n’oku arikunfaho.” Ka ni kikuru munonga kuteeraho kugira emikago ehami n’ab’eishe-emwe na banyaanyazi-itwe!

17-18. Twine kuhurikiza oha, kandi ahabw’enki?

¹⁷ Sitaane naayenda ngu turekyere aho kuteeraho kukora ekihikire. Naayenda twikirize ngu Yehova tarikutukunda, kandi ngu titushemereire kucungurwa. Kwonka nk’oku twaheza kureeba, ekyo n’ekishuba.

¹⁸ Yehova naakukunda. Ori ow’omuhendo munonga omu maisho ge. Waamworobera, noija ‘kuguma omu kukunda kwe’ ebiro byona nka Yesu. (Yoh. 15:10) N’ahabw’ekyo otahurikiza Sitaane nari omutima gwawe ogurikukucwera orubanja. Omu mwanya gw’ekyo, hurikiza Yehova orikureeba ebirungi omuri buri omwe ahariitwe. Gira obuhame ngu Yehova naashemezibwa ‘abantu be,’ naiwe obarimu!