1. Nitubaasa kutaho bigyendererwa ki eby’omwoyo?

 ITWE Abakristaayo abaabuzima nitukundira kimwe Yehova. Nituba nitwenda kumuheereza omu muringo ogurikukirayo oburungi. Kwonka twaba nitwenda kumuheereza aha rurengo oruhikire, twine kutaho ebigyendererwa by’omwoyo, nk’okugira emitwarize y’Ekikristaayo, okwega emyoga y’omugasho, n’okusherura oburyo bw’okuheereza abandi. b

2. Ahabw’enki twine kutaho ebigyendererwa by’omwoyo kandi tukakora n’amaani kubihikiiriza?

² Ahabw’enki twine kufayo kutunguuka omu by’omwoyo? Ekikuru, nituba nitwenda kushemeza Tataitwe ow’omu iguru. Yehova naashemererwa yaareeba nitukoresa etalanta zaitu n’okubaasa kwaitu, kumuheereza omu bwijwire. Kandi, nituba nitwenda kutunguuka omu by’omwoyo kugira ngu tubaase kwongyera kuhwera ab’eishe-emwe na banyaanyazi-itwe. (1 Tes. 4:9, 10) Yaaba tumazire bwire ki omu mazima, nitubaasa kutunguuka omu by’omwoyo. Ka tureebe oku ekyo turikubaasa kukikora.

3. Nk’oku kiri omu 1 Timoseo 4:12-16, entumwa Paulo akahiga Timoseo kukora ki?

³ Obu entumwa Paulo yaahandiikira Timoseo, omutsigazi muto ogwo akaba yaamazire obwire ari omureeberezi. Kwonka, Paulo akamuhiga kugumizamu naatunguuka omu by’omwoyo. (Shoma 1 Timoseo 4:12-16.) Waayetegyereza ebigambo bya Paulo, nooreeba ngu akaba naayenda ngu Timoseo atunguukye omu miringo ebiri, arikugira emitwarize y’Ekikristaayo nka rukundo, okwikiriza, n’okushemera, n’okwongyera kuboneza emyoga ye nk’okushoma gye omu rweteeraine, okubuurira, n’okwegyesa. Turikwijuka eky’okureeberaho  kya Timoseo, ka tureebe oku okutaho ebigyendererwa biringaniire kirikubaasa kutuhwera kutunguuka omu by’omwoyo. Nituza n’okureeba emiringo emwe oku turikubaasa kwongyera aha buheereza bwaitu.

4. Kurugiirira aha Abafilipi 2:19-22, niki ekyareeteire Timoseo kuba omuheereza wa Yehova ow’omugasho?

⁴ Niki ekyareeteire Timoseo kuba omuheereza wa Yehova ow’omugasho? N’emitwarize ye y’Ekikristaayo ey’omutaano. (Shoma Abafilipi 2:19-22.) Kurugiirira aha ku Paulo yaagambire ahari Timoseo, nitwetegyereza ngu akaba ari omucureezi, omwesigwa, omukozi, kandi ou orikubaasa kugiramu amatsiko. Akaba aine rukundo, kandi akaba naafayo munonga aha b’eishe-emwe. N’ekyarugiremu, Paulo akakunda Timoseo kandi akaba atarikweziringa kumuha obuheereza bugumire. (1 Kor. 4:17) Nikyo kimwe, naitwe nitureetera Yehova kutukunda n’okuba ab’omugasho munonga omu kibiina, twagira emitwarize ei arikukunda.—Zab. 25:9; 138:6.

5. (a) Noobaasa kumanya ota omutwarize gw’Ekikristaayo ogu oine kubonezamu? (b) Nk’oku kirikworekwa omu kishushani, munyaanyazi-itwe ariyo naahikiiriza ata ekigyendererwa kye eky’okugirira abandi esaasi?

⁵ Toorana ekigyendererwa kyenyini eki oraakoreho. Shaba Yehova kandi oteekateekye ahu orikwenda kubonezamu. Toorana omutwarize gwenyini ogu orikwenda kuboneza. Nk’eky’okureeberaho, noobaasa kwongyera kugirira esaasi ab’eishe-emwe nari kugira ekyetengo ky’okwenda kubahwera? Mbwenu shi nikikwetengyesa kwongyera kugira obusingye n’abandi n’okubasaasira? Noobaasa kubuuza omunywani ou orikwesiga kukugambira oku orikubaasa kubonezamu.—Enf. 27:6.

6. Noobaasa kuhikiiriza ota ekigyendererwa kyawe eky’okugira omutwarize ogu waakoraho?

⁶ Teeraho kuhika aha kigyendererwa kyawe. Eki noobaasa kukikora ota? Omuringo gumwe n’okushwijuma gye omutwarize ogu orikwenda kubonezamu. Ka tugire ngu nooyenda kwongyera kusaasira abandi. Noobaasa kutandika orikushoma kandi okateekateeka aha barikugambwaho omu Baibuli abaasaasiire abandi, n’abo abatarabasaasiire. Teekateeka ahari Yesu. Akaba naasaasira abandi. (Luk. 7:47, 48) Akaba naayehuzya enshobe zaabo, kandi areeba n’okubaasa kwabo. Okutaana n’ekyo, Abafarisaayo omu bwire bwa Yesu bakaba “nibagaya abandi.” (Luk. 18:9) Bwanyima y’okuteekateeka aha by’okureeberaho ebi, yebuuze oti: ‘Niki eki ndikureeba  omu bandi? Aha mitwarize egi ni guuha ogu ndikucwamu kutaho omutima?’ Waaba noogumirwa kusaasira omuntu, teeraho kuhandiika emitwarize yoona emirungi ey’omuntu ogwo. Bwanyima yebuuze oti: ‘Yesu naareeba ata omuntu ogu? Naabaasa kumusaasira?’ Okucondooza nk’oku nikubaasa kukuhwera kuhindura emiteekateekyere yaawe. Omu kubanza, nikibaasa kutwetengyesa kukora munonga kusaasira abatugwisize kubi. Kwonka twaguma nitwongyera kubonezamu, nikiija kutworobera kusaasira.

7. Kuhikaana n’Enfumu 22:29, obunaku obu Yehova naakoresa ata abakozi abanyamyoga?

⁷ Ekigyendererwa ekindi eki orikubaasa kutaho, n’okwega omwoga gw’omugasho. Teekateeka aha bakozi baingi abarikwetengyesa omu kwombeka Ebyombeko by’Obukama, ebya Beseeli, n’eby’enteerane empango. Baingi ahari aba nibeega emyoga egi barikukora hamwe n’ab’eishe-emwe na banyaanyazi-itwe abahangu omu kukora emirimo egi. Nk’oku kirikworekwa omu kishushani, ab’eishe-emwe na banyaanyazi-itwe nibeega emyoga erikwetengyesa omu kureeberera Ebyombeko by’Obukama n’eby’enteerane empango. Omu miringo egi n’endiijo mingi, Yehova Ruhanga, Omugabe ‘otarikuhwaho,’ na Yesu Kristo, “Omugabe w’abagabe,” nibakora ebintu by’amaani kurabira omu bakozi abanyamyoga. (1 Tim. 1:17; 6:15; shoma Enfumu 22:29.) Nitwenda kwezirika kukoresa emyoga yaitu kuhimbisisa Yehova, beitu kutari kwehimbisa.—Yoh. 8:54.

8. Noobaasa kumanya ota omwoga ogu oine kukoraho?

⁸ Toorana ekigyendererwa kyenyini eki oraakoreho. Ni mwoga ki ogu orikwenda kutaho omutima? Buuza abareeberezi baawe nari omureeberezi wa saketi aha bikwatiraine n’omwoga ogu orikubaasa kukoraho. Nk’eky’okureeberaho, baakugira ngu oine kwongyera kuba omugambi murungi n’okuboneza omu myegyeseze yaawe, babuuze kukugambira omuringo gw’okugamba ogu oine kukoraho. Bwanyima kora munonga kubonezamu. Eki noobaasa kukikora ota?

9. Noobaasa kuhika ota aha kigyendererwa kyawe eky’okwega omwoga?

⁹ Teeraho kuhika aha kigyendererwa kyawe. Ka tugire ngu nooyenda kuboneza emyegyeseze yaawe. Noobaasa kwega n’obwegyendesereza akatabo Ba Omweziriki omu Kushoma N’omu Kwegyesa. Waaheebwa ekicweka omu ruteerane rw’aha gati ya saabiiti, noobaasa kushaba ow’eishe-emwe kukuhurikiza orikwegyezamu kare, reero akuhabure ahu oine kubonezamu. Otateeraho kumanywa nk’oine omwoga kyonka, beitu n’okumanywa nk’omweziriki kandi ou abandi barikubaasa kugiramu amatsiko.—Enf. 21:5; 2 Kor. 8:22.

10. Ha eky’okureeberaho ekirikworeka oku turikubaasa kuboneza omu mwoga.

¹⁰ Kandi shi omwoga ogu orikwenda kwega gwaba nigutwariramu ekintu ekirikukugumira omu buhangwa? Otahanika! Ow’eishe-emwe Garry akaba naateganisibwa okushoma. Naijuka oku yaabaire naahemuka yaateeraho kugira eki yaashoma omu nteerane. Kwonka akagumizamu naayezirika kushoma. Hati naagira ngu ahabw’okutendekwa oku yaatungire, naabaasa kuha embazo omu nteerane eza butoosha, omu nteerane empango ez’ekiro kimwe, n’ez’ebiro bishatu!

11. Nka Timoseo, niki ekiraatuhwere kwongyerwa obujunaanizibwa?

¹¹ Mbwenu shi Timoseo akaba omugambi murungi nari omwegyesa w’omutaano? Ekyo Baibuli terikukigamba. Kwonka buzima, akoongyera kuhikiiriza gye obujunaanizibwa bwe ahabw’okukuratira obuhabuzi bwa Paulo.  (2 Tim. 3:10) Nikyo kimwe, twayongyera kuboneza emyoga yaitu, nitwija kuba abahikire kwongyerwa obujunaanizibwa.

12. Ogasiirwe ota omu buheereza bw’abandi?

¹² Twena nitugasirwa omu buheereza bw’abandi. Twaba turi omu irwariro, nitusiima munonga abareeberezi abari aha Bukiiko bw’Eby’obujanjabi nari aba Guruupu z’Okutaayaayira Abarwaire, baija kutureeba. Twaba nituraba omu mbeera egumire, omureeberezi orikufayo yaakoresa obwire bwe kutuhurikiza n’okutuhuumuriza, buzima nikitushemeza. Twaba nitwenda obuhwezi omu kwegyesa omwegi wa Baibuli, nitushemererwa payoniya yaagyenda naitwe reero bwanyima akatworeka ahu twine kubonezamu. Ab’eishe-emwe aba na banyaanyazi-itwe nibashemererwa kutuhwera. Naitwe nitubaasa kutunga aha kushemererwa okwo, twayehayo kuheereza ab’eishe-emwe bagyenzi baitu. Okuha nikureeta okushemererwa kwingi “okukira okuheebwa,” nikwo Yesu yaagizire. (Byak. 20:35) Ku oraabe nooyenda kwongyera aha buheereza bwawe omu miringo egi nari endiijo, niki ekiraakuhwere kuhika aha kigyendererwa kyawe?

13. Waaba nootaho ekigyendererwa, oine kwijuka ki?

¹³ Yetantare kutaho ekigyendererwa ekitashoboorokire gye. Nk’eky’okureeberaho, noobaasa kuteekateeka oti: ‘Niinyenda kwongyera aha buheereza bwangye omu kibiina.’ Kwonka nikibaasa kuguma kumanya oku orikubaasa kuhika aha kigyendererwa nk’ekyo, kandi noobaasa n’obutamanya obu oraakihikeho. N’ahabw’ekyo, toorana ekigyendererwa kyenyini eki orikwenda kuhikaho omu buheereza. Nangwa noobaasa n’okuhandiika ekigyendererwa ekyo, n’entebeekanisa ezi otaireho kukihikiiriza.

14. Ahabw’enki tutaine kwekoma omu kutaho ebigyendererwa?

¹⁴ Titwine kwekoma omu kutaho ebigyendererwa. Ahabw’enki? Ahakuba titurikubaasa kutegyeka embeera zaitu. Nk’eky’okureeberaho: Entumwa Paulo akaba ahweraire omu kutandikaho ekibiina omu rurembo rwa Tesalonika. Kandi buzima akaba aine ekigyendererwa ky’okugumayo n’okuhwera Abakristaayo basya abo. Kwonka abahakanisa bakamugyemesereza kuruga omu rurembo orwo. (Byak. 17:1-5, 10) Ku ogire ngu Paulo  akaangisiriza yaagumayo, akaba naija kuta amagara g’ab’eishe-emwe omu kabi. Kwonka Paulo tarahanikire. Kureka, akahinduramu kuhikaana n’embeera ezaabaire ziriho. Bwanyima, akoohereza Timoseo omuri Tesalonika kureeberera Abakristaayo basya abo omu by’omwoyo. (1 Tes. 3:1-3) Abatesalonika ka baine kuba baashemereirwe ahabw’okureeba ngu Timoseo akaba ayeteekateekire kuheereza ahu araayoherezibwe!

15. Embeera ezi tutaineho bushoboorozi nizibaasa kuteganisa zita ebigyendererwa byaitu? Ha eky’okureeberaho.

¹⁵ Nitubaasa kwegyera aha kyahikire ahari Paulo omuri Tesalonika. Nitubaasa kuba turiyo nitukununkirira kutunga obujunaanizibwa, kwonka embeera ezi tutaineho bushoboorozi zituremese kubutunga. (Mub. 9:11) Ku kiraabe nikwo kiri ahariiwe, ba oyeteekateekire kutaho ekigyendererwa ekindi eki orikubaasa kuhikaho. Eki nikyo Ted na Hiedi, omushaija n’omukazi we baakozire. Ahabw’amagara mabi, bakaruga aha Beseeli. Kwonka rukundo ei bainiire Yehova ekabahiga kwongyera aha buheereza bwabo. Bakatandika barikuba baapayoniya ab’obutwire omu kibiina. Bwanyima, bakaba baapayoniya ab’omutaano, reero Ted yaatendekwa kuba omuhwezi w’omureeberezi wa saketi. Bwanyima y’obwire, emyaka ei abareeberezi ba saketi baine kugarukiraho ekahindurwa. Ted na Hiedi bakamanya ngu emyaka yaabo tekibabaasisa kuguma omu buheereza obu. N’obu baraabe baayehuriire kubi, bakeetegyereza ngu nibabaasa kuheereza Yehova omu miringo endiijo. Ted naagira ati: “Twegire kuteekoma aha muringo gumwe gw’obuheereza.”

16. Nitubaasa kwega mashomo ki omu Abagalatia 6:4?

¹⁶ Titurikubaasa kutegyeka buri kimwe ekirikutubaho. N’ahabw’ekyo, ni kikuru kutapima omuhendo gwaitu kurugiirira aha buheereza obu turimu, nari kugyeragyeranisa obuheereza bwaitu n’obu abandi barimu. Hiedi naashoborora ati: “Nooburwa obusingye embeera zaawe waazigyeragyeranisa n’ez’abandi.” (Shoma Abagalatia 6:4.) Ni kikuru ngu tusherure emiringo ei turikubaasa kubamu ab’omugasho. c

17. Noobaasa kukora ki kuba ohikire kwongyerwa obujunaanizibwa?

¹⁷ Yoreka ngu oyeteekateekire kuheereza orikworobya embeera zaawe, kandi orikwetantara amabanja agatarikwetengyesa. Taho ebigyendererwa ebikye ebiraakuhwere kuhika aha bigyendererwa ebihango. Nk’eky’okureeberaho, ekigyendererwa kyawe ekihango kyaba kiri okuba payoniya ow’obutwire,  noobaasa kugumizamu ori payoniya omuhwezi kumara obwire? Ekigyendererwa kyawe ku kiraabe kiri okuba omuheereza, noobaasa kwongyera aha bwire obu orikumara omu buheereza, n’okutaayaayira abarwaire n’abakaikwire omu kibiina? Okumanya oku oraatungye, nikwija kukubaasisa kuhika aha bujunaanizibwa obundi omu biro by’omumaisho. Mariirira kuhayo ekirikukirayo oburungi omu buheereza bwona obu orikuheebwa.—Rom. 12:11.

18. Nk’oku kirikworekwa omu kishushani, nooyegyera ki ahari Beverley?

¹⁸ Bukuru terikubaasa kuturemesa kutaho ebigyendererwa n’okubihikaho. Teekateeka ahari munyaanyazi-itwe Beverley ow’emyaka 75. Akaba aine endwara y’amaani eyaabaire neemureetera kugumirwa kugyenda. Kwonka akaba naayenda kwejumbira kimwe omu hururu y’okweta abantu aha Kiijutsyo. N’ahabw’ekyo akataho ebigyendererwa byenyini ebi arikwenda kuhikiiriza. Beverley akashemererwa ku yaahikiriize ebigyendererwa bye omu hururu egi. Obweziriki bwe bukahiga abandi kwejumbira kimwe omu buheereza. Yehova naatwara obuheereza bw’ab’eishe-emwe na banyaanyazi-itwe abakuzire nk’obw’omuhendo, n’obu embeera zaabo ziraabe zitarikubabaasisa kukora bingi.—Zab. 71:17, 18.

19. Ni bigyendererwa ki eby’omwoyo ebi turikubaasa kutaho?

¹⁹ Taho ebigyendererwa ebi orikubaasa kuhikaho. Gira emitwarize eraareetere Yehova kukukunda. Yega emyoga eraakubaasise kwongyera kuba ow’omugasho ahari Ruhanga waitu n’ekibiina kye. Sherura oburyo bw’okuheereza ab’eishe-emwe na banyaanyako omu bwijwire. d Nka Timoseo, ahabw’emigisha ya Yehova, ‘boona nibaija kureeba oku orikweyongyera kugyenda omumaisho.’—1 Tim. 4:15.