1. Niki ekirikutureetera okushemererwa kwingi?

 YEHOVA naayenda ngu tushemererwe. Eki nitukimanya ahakuba okushemererwa ni gumwe aha mitwarize y’omwoyo gurikwera. (Gal. 5:22) Obu okuha kurikureeta okushemererwa okukira okuheebwa, nitushemererwa twayejumbira kimwe omu buheereza bw’Ekikristaayo, kandi tukahwera n’ab’eishe-emwe omu miringo endiijo.—Byak. 20:35.

2-3. (a) Nk’oku kiri omu Abagalatia 6:4, ni bintu ki bibiri ebiraatuhwere kuguma tushemereirwe turikuheereza Yehova? (b) Nituza kwega ki omu kicweka eki?

² Kurugiirira aha Abagalatia 6:4, entumwa Paulo akagamba aha bintu bibiri ebirikubaasa kutuhwera kuguma tushemereirwe. (Kishome.) Eky’okubanza, ekigyendererwa kyaitu kiine kuba okuha Yehova erikukirayo oburungi. Twaba nitumuha ekirikukirayo oburungi, nituba twine kushemererwa. (Mat. 22:36-38) Ekya kabiri, twine kwetantara kwegyeragyeranisa n’abandi. Byona ebi amagara gaitu garikutubaasisa kukora, okutendekwa oku twine, nari okubaasa oku twine, tushemereire kubisiimira Yehova. Kasita, buri kimwe eki twine niwe yaakituhaire. Kandi, abandi baaba baine ahu barikukora gye omu buheereza kutukira, twine kushemererwa nabo ahabw’okukoresa etalanta zaabo kuhimbisa Yehova, omu mwanya gw’okwetunguura nari kwesherurira ebyabo. N’ahabw’ekyo, omu mwanya gw’okuhayahana nabo, twine kubeegyeraho

³ Omu kicweka eki, nituza kureeba ekirikubaasa kutuhwera kuteehurira kubi twaba tutakibaasa kuheereza nka ira. Nituza n’okureeba oku turibaasa kukoresa gye etalanta zaitu, n’eki turikubaasa kwegyera aha bandi.

4. Niki ekirikubaasa kureetera abamwe kwehurira kubi? Ha eky’okureeberaho.

⁴ Bamwe aha baheereza ba Yehova nibagumirwa kukora empinduka ahabw’emyaka ya bukuru, nari amagara mabi. Ekyo nikyo kyahikire ahari Carol. Akatunga omugisha gw’okuza kuheereza ahu abahwezi barikwendwa munonga. Omu bwire obwo, akaba aine abeegi ba Baibuli 35, kandi akaba ahweraire baingi kutunguuka kuhika aha kwehayo n’okubatizibwa. Carol akaba aine obuheereza burungi! Bwanyima akatunga omunyangararo yaaba ow’okuguma omu ka ye obwire obwingi. “Niimanya ngu ahabw’okugira amagara mabi, tindikubaasa kukora nk’ebi abandi barikukora,” nikwo Carol arikugira, “kwonka ninyehurira nk’otaine kwikiriza nk’okwabo. Tindikubaasa kukora buri kimwe eki ndikwenda kukora, kandi eki kigumire kwemera.” Carol naayenda kuha Yehova ekirikukirayo oburungi. Ekyo buzima, nitukimusiimira munonga! Nituhamya ngu Ruhanga waitu omunyambabazi naasiima okuteeraho kwe.

5. (a) Twine kwijuka ki twaba nitwehurira kubi ahabw’okutaheereza nka ira? (b) Nk’oku kirikworekwa omu bishushani, ow’eishe-emwe atwire naaha ata Yehova ekirikukirayo oburungi?

⁵ Waaba nooyehurira kubi ahabw’okukora bingi, yebuuze oti: ‘Yehova naayenda ngu mmuhe ki?’ N’ekirikukirayo oburungi eki orikubaasa hati. Teekateeka aha mbeera egi: Munyaanyazi-itwe ori omu myaka ya 80, naayehurira kubi ahabw’okugira ngu takikora bingi omu buheereza nk’obu yaabaire ari omu myaka ya 40. Naateekateeka ngu n’obu araabe naahayo ekirikukirayo oburungi, Yehova tarikukisiima. Kwonka shi ekyo buzima kihikire? Kiteekateekeho. Munyaanyazi-itwe ogu ku araabe yaabaire naahayo ekirikukirayo oburungi omu myaka ya 40, kandi na hati omu myaka ya 80 naakihayo ekirungi eki arikubaasa, nikimanyisa ngu naakigumizamu kuhayo ekirikukirayo oburungi. Twatandika kuteekateeka ngu Yehova tarikusiima bikye ebi turikukora omu buheereza, twine kwijuka ngu niwe arikututeeraho omutindo gw’ekirikumushemeza. Twaha Yehova ekirikukirayo oburungi, naija kutusiima.—Gyeragyeranisa Matayo 25:20-23.

6. Nitubaasa kwegyera ki ahari Maria?

⁶ Nitwija kushemererwa twata omutima aha ki turibaasa kukora omu mwanya gw’eki tutarikubaasa. Teekateeka ahari munyaanyazi-itwe Maria, oine endwara erikumuremesa kukora bingi omu buheereza. Omu kubanza, akagira amaganya kandi yaayehurira nk’otaine mugasho. Kwonka ku yaayetegyereize munyaanyazi-itwe omazire obwire bwingi aha kitanda, akacwamu kumuhwera. “Nkatebeekanisa kubuurira nawe turikukoresa esimu n’okuhandiika n’amabaruha,” nikwo Maria arikugira. “Buri kubuurira nawe, nkaba mpika omu ka nshemereirwe kandi mmazirwe ahabw’okumuhwera.” Naitwe nitwija kwongyera kushemererwa twata omutima aha bi turikubaasa kukora omu mwanya gw’okuguta aha bi tutarikubaasa kukora. Kwonka shi ku twakuba nitubaasa kukora bingi, nari haine ebi turikukora gye omu buheereza?

7. Ni buhabuzi ki obu entumwa Petero yaahaire Abakristaayo?

⁷ Omu baruha ya Petero ey’okubanza, akahiga ab’eishe-emwe kukoresa ebiconco ebi baine nari etalanta kwombeka bagyenzi baabo. Petero akahandiika ati: “Nk’oku omuntu weena yaahairwe ekiconco, mube nikwo mwabihweresana, nk’ababiiki barungi ab’embabazi za Ruhanga ez’emiringo yoona.” (1 Pet. 4:10) Titwine kweziringa kukoresa  etalanta zaitu omu bwijwire ahabw’okutiina ngu abandi nibaija kutugirira eihato nari kutumaramu amaani. Twatimwimwa kukoresa ebiconco byaitu, nikyoreka ngu titurikuha Yehova ekirikukirayo oburungi.

8. Kurugiirira aha 1 Abakorinso 4:6, 7, ahabw’enki tutaine kwehimbisa ahabw’ebiconco ebi twine?

⁸ Twine kukoresa ebiconco byaitu omu bwijwire, kwonka twine kwegyendesereza kuteehimbisa ahabw’okugira ebiconco ebyo. (Shoma 1 Abakorinso 4:6, 7.) Nk’eky’okureeberaho, noobaasa kuba noomanya kutandika kwegyesa abantu Baibuli. Otakaayeziringa kukoresa ekiconco ekyo! Kwonka okukoresa ekiconco nikutaanira kimwe n’okwehimbisa ahabw’okukigira. Ka tugire ngu omu biro bikye enyima otandikire kwegyesa omuntu Baibuli omu buheereza. Oine ekihika ky’okukigambiraho aba guruupu yaawe y’okubuurira. Kwonka okiza omu ruteerane rw’okwetebeekanisa kubuurira, ohurira munyaanyazi-itwe naagambira abandi oku ahaire omuntu magaziini. We ahaire omuntu magaziini, kwonka iwe otandikire kwegyesa omuntu Baibuli. Noija kukora ki? Noomanya ngu waakigambiraho aba guruupu yaawe nikiija kubahiga, kwonka noobaasa kucwamu kukigambaho omu bwire obundi obuhikire kugira kitamaraho okushemererwa munyaanyazi-itwe ogabire magaziini. Eki n’ekikorwa ky’embabazi. Kwonka eki tikishemereire kukuremesa kutandika kwegyesa abantu Baibuli. Oine ekiconco, kikorese!

9. Twine kukoresa tuta ebiconco byaitu?

⁹ Ka tugume nitwijuka ngu okubaasa kwona oku twine n’ekiconco kuruga ahari Ruhanga. Twine kukukoresa kwombeka ekibiina, kutari kwekuza. (Fil. 2:3) Twakoresa amaani gaitu n’okubaasa kwaitu kukora ebi Ruhanga arikukunda, nitwija kushemererwa, ti ahabw’okugira ngu nitukira abandi, beitu ahabw’okwenda kuhimbisa Yehova.

10. Ahabw’enki kitari ky’oburyo kwegyeragyeranisa n’abandi?

¹⁰ Omuntu yaaba ategyendesereize, naabaasa kugwa omu mutego gw’okugyeragyeranisa okubaasa kwe n’obweremwa bw’ondiijo. Nk’eky’okureeberaho, ow’eishe-emwe naabaasa kuba naaha gye embazo za boona. Oku nikwo kubaasa kwe. Kwonka omu mutima gwe, naabaasa kuba naagaya ow’eishe-emwe otarikuha gye embazo. Kwonka ow’eishe-emwe ogwo naabaasa kuba ari efura, arikumanya kutendeka gye abaana be, nari aine omujinya omu buheereza. Ka nitusiima kureeba ngu twine ab’eishe-emwe na  banyaanyazi-itwe baingi abaine etalanta zaabo abarikukoresa ebiconco byabo kuheereza Yehova n’okuhwera abandi!

11. Ahabw’enki twine kuteeraho kutooreza Yesu?

¹¹ N’obu turaabe tutaine kwegyeragyeranisa n’abandi nitubaasa kugasirwa twayegyera aha baheereza ba Yehova abeesigwa. Ka tugire eki twayegyera ahari Yesu. N’obu araabe yaabaire ahikiriire, nitubaasa kwegyera aha mitwarize ye mirungi n’ebi yaakozire. (1 Pet. 2:21) Twateeraho kukora kyona ekirikubaasika kumutooreza, nitwongyera kuheereza gye Yehova n’okuba ababuurizi barungi.

12-13. Nitubaasa kwegyera ki aha Mugabe Daudi?

¹² Omu Kigambo kya Ruhanga, harimu abashaija n’abakazi abeesigwa abu turikubaasa kutooreza n’obu baraabe baabaire batahikiriire. (Heb. 6:12) Teekateeka aha Mugabe Daudi, ou Yehova yaagizire ngu akaba ‘ari nk’omutima gwe oku gurikwenda’, nari nk’oku envunuura ya Baibuli endiijo erikugira owaabaire “ari omushaija orikumushemeza munonga”. (Byak. 13:22) Kwonka Daudi akaba atahikiriire. Nangwa, akakora n’enshobe z’amaani. Kwonka nabwo, n’eky’okureeberaho kirungi ahariitwe. Ahabw’enki? Ahabw’okuba ku yaahanirwe, tarateireho kwehozaho. Kureka, akaikiriza okuhaana kw’amaani oku yaahairwe, kandi akashaasha munonga ahabw’eki yaabaire akozire. N’ekyarugiremu, Yehova akamusaasira.—Zab. 51:3, 4, 10-12.

¹³ Nitubaasa kwegyera ahari Daudi turikwebuuza tuti: ‘Nintwaza nta naahanwa? Ahonaaho niinyikiriza enshobe zangye, nari niinteeraho kwehozaho? Nindahuka kwekwatsa abandi? Niinteeraho munonga kutagaruka kukora enshobe ezo?’ Noobaasa kwebuuza ebibuuzo nibyo bimwe waaba nooshoma aha bashaija n’abakazi abandi abarikugambwaho omu Baibuli. Bakatunga oburemeezi nk’obu oine? Bakaba baine mitwarize ki emirungi? Waaba noobashomaho, yebuuze oti: ‘Nimbaasa kwongyera kutwaza nta nk’omuheereza wa Yehova ogu omwesigwa?’

14. Nitugasirwa tuta twayegyera aha b’eishe-emwe bagyenzi baitu?

¹⁴ Kandi nitubaasa kugasirwa twayegyera aha Bakristaayo bagyenzi baitu, abato n’abakuru. Nk’eky’okureeberaho, noobaasa kuteekateeka aha ahari omwe omu kibiina oriyo naagyezibwa, obundi naagyemeserezibwa ab’orwingano rwe, naahakanisibwa ab’eka ye, nari aine amagara mabi? Aine emitwarize mirungi ei orikwenda kwongyera kugira?  Waashwijuma eky’okureeberaho kye kirungi, noobaasa kwega oku oraagumisirize okugyezibwa kwawe. Ka ni kirungi kureeba ngu twine eby’okureeberaho by’okwikiriza ebi turikubaasa kutooreza! Buzima eki nikireeta okushemererwa.—Heb. 13:7; Yak. 1:2, 3.

15. Entumwa Paulo akaha buhabuzi ki oburikubaasa kutuhwera kugumizamu nituheereza Yehova tushemereirwe?

¹⁵ Kubaasa kureetaho obusingye n’obumwe omu kibiina, buri omwe aine kuhayo ekirikukirayo oburungi. Teekateeka aha Bakristaayo omu kyasha ky’okubanza. Bakaba baine ebiconco bingi n’obuheereza butarikushushana. (1 Kor. 12:4, 7-11) Kwonka ekyo tikirabareeteire kuhayahayana nari kwebaganisamu. Kureka, Paulo akahiga buri omwe aharibo kukoresa ekiconco kye “kwombeka omubiri gwa Kristo.” Paulo akahandiikira Abaefeso ati: ‘Buri rugingo rwaba nirukora eki rwahangiirwe, okwo nikwo omubiri gwona gurikukura, gukeeyombeka omuri rukundo.’ (Efe. 4:1-3, 11, 12, 16) Abaakikozire, bakareetaho obusingye n’obumwe, emitwarize ei turikureeba omu bibiina byaitu obunaku obu.

16. Twine kumariirira kukora ki? (Abaheburaayo 6:10)

¹⁶ Mariirira kwetantara kwegyeragyeranisa n’abandi. Kureka, yegyera ahari Yesu, kandi teeraho kugira emitwarize nk’eye. Yegyera aha barikugambwaho omu Baibuli abaabaire baine okwikiriza, otwariiremu n’ab’obunaku. Gira obwesigye ngu waagumizamu nookora eki orikubaasa, Yehova ‘t’otahikiriire kwebwa emirimo yaawe.’ (Shoma Abaheburaayo 6:10.) Gumizamu nooyesiimira omu kuheereza Yehova, orikumanya ngu naasiima okuteeraho kwawe n’amaani kumushemeza.