Omushaija yaagaitwa n’ondiijo, ekibiina nikireeba obushwere bwe obw’enyima nk’obwahendeire. Kubaasa kwetegyereza enshonga ezirikutureetera kugira tutyo, ka twetegyereze eki Yesu yaagambire aha kugaitururwa n’okugaruka kutaaha omu bushwere.

Nk’oku kirikworekwa omuri Matayo 19:9, Yesu akooreka enshonga emwe ey’okwihiriraho kugaitururwa kurugiirira aha Byahandiikirwe. Akagira ati: ‘Omuntu weena orikushenda omukazi we atamutuzire bushambani, akashwera ondiijo, naaba ashambaine.’ Ebigambo bya Yesu ebi, nibyoreka ngu (1) kurugiirira aha Byahandiikirwe obushambani niyo nshonga yonka ey’okwihiriraho kugaitururwa (2) kandi ngu omushaija orikubinga omukazi we atarikwihirira aha Byahandiikirwe akashwera ondiijo naaba yaashambana. a

Mbwenu shi ebigambo bya Yesu nibimanyisa ngu omushaija yaashambana akagaitururwa n’omukazi we naaba ahikire kushwera kurugiirira aha Byahandiikirwe? Nikibaasa kutamanyisa ekyo. Haabaho obushambani omu bushwere, omukazi ou bareebize niwe arikucwamu yaaba araasaasire iba nari kutamusaasira. Yaacwamu kutamusaasira kandi bakagaitururwa omu butongore, bombi nibaba nibaikirizibwa kuza omu bushwere obundi, baahendera enshonga z’okugaitururwa.

Kwonka, omukazi naabaasa kuba aine enshonga ehikire ey’okuguma omu bushwere bwe, kimureetere kusaasira iba. Kandi shi, omushaija ku yaakwanga okusaasira kw’omukazi we akagumizamu akagaitururwa nawe? Ahabw’okugira ngu omukazi ayeteekateekire kusaasira iba n’okuguma omu bushwere bwe, nikimanyisa ngu omushaija naaba atahikire kugaruka kushwera kurugiirira aha Byahandiikirwe. Yaayangisiriza akashwera ondiijo atahikire kukikora kurugiirira aha Byahandiikirwe, naaba yaashambana ogundi, ekirikumanyisa ngu ekibiina nikiba kiine kutaho akakiiko k’orubanja kugaruka kugaaniira nawe.—1 Kor. 5:1, 2; 6:9, 10.

Omushaija yaashwera atarikwikirizibwa kurugiirira aha Byahandiikirwe, ekibiina nikireeba kita obushwere bwe obw’okubanza, n’obusya? Kurugiirira aha Byahandiikirwe shi obushwere bwe obw’okubanza nibuba bukiri obuhikire? Mbwenu shi omukazi ou baareebize naaba naakibaasa kucwamu kusaasira obaire ari iba nari kutamusaasira? Ekibiina shi nikireeba obushwere obusya nk’obushwere bw’obushambani?

Enyima, ekibiina kibaire nikireeba obushwere obusya nk’obw’obushambani ou bareebize yaaba akihuriire, atashweirwe, nari atarashambaine. Kwonka, Yesu taragambire aha muntu ou bareebize obu yaabaire naagamba aha kugaitururwa n’okugaruka kushwera. Kureka, akagira ngu omushaija yaagaitururwa atarikwihirira aha Byahandiikirwe akagaruka akashwera, naaba yaashambana. Ekirikumanyisa ngu, okugaitururwa n’okugaruka kushwera, eki Yesu yaagizire  ngu nikiingana n’obushambani, nikiba kyahendera obushwere obw’okubanza.

Obushwere bwahendera ahabw’okugaitururwa n’okugaruka kushwera, ou bareebize naaba atakibaasa kusaasira nari kutasaasira mugyenzi we. N’ahabw’ekyo, naaba atakiine obujunaanizibwa bw’okucwamu kusaasira obaire ari iba nari kutamusaasira. Kandi, oku ekibiina kirikureeba obushwere obusya tikurikurugiirira aha kufa kw’ou baareebize, okushwerwa kwe, nari obushambani bwe. b

Omu ky’okureeberaho eky’aha ruguru, omushaija akashambana ekyarugiremu okugaitururwa. Kandi shi omushaija ku yaakuba atashambaine kwonka akagaitururwa reero akashwera ondiijo? Nari shi omushaija ku yaakuba yaagaiturairwe atakashambaine, kwonka akashambana yaaheza kugaitururwa, kandi akashwera n’obu omukazi we yaabaire ayeteekateekire kumusaasira? Omu by’okureeberaho ebi byona, okugaitururwa n’okugaruka kushwera, ebirikwingana n’obushambani, nibihendera obushwere obw’okubanza. Obushwere obusya nibuba buhikire omu biragiro bya gavumenti. Nk’oku kiri omu Watchtower, eya Novemba 15, 1979, orupapura 32, “hati naaba yaaza omu bushwere busya, n’ahabw’ekyo tarikubaasa kugarukira omukazi we ow’okubanza, obushwere bwabo nibuhendera ahabw’obushambani, okugaitururwa, n’okugaruka kushwera.”

Enyetegyereza egi ehindwirwemu terikutuubya aha kwera kw’obushwere, nari kworeka ngu obushambani ti kibi ky’amaani. Omushaija yaagaitururwa n’omukazi we atarikwihirira aha Byahandiikirwe akashwera ondiijo, nihaba haine kuteebwaho akakiiko k’orubanja ahabw’enshonga y’obushambani. (Yaaba ashweire Omukristaayo mugyenzi we, nawe naaba aine kukorwaho akakiiko k’orubanja, ahakuba nawe naaba ashambaine.) N’obu obushwere obusya buraabe butarikureebwa nk’obw’obushambani, omushaija ogwo tarikubaasa kuheebwa obujunaanizibwa bwona omu kibiina kumara emyaka mingi, kuhitsya eki yaakozire kyayeba nari yaaba atakihemuka ahabw’ekibi eki yaakozire. Eki nikitwariramu n’okuteekateeka aha mbeera eza hati ez’omukazi ou yaareebize,n’ez’abaana abu arikubaasa kuba yaatsigireho.—Mal. 2:14-16.

Ahabw’okugira ngu okugaitururwa okutarikwegamira aha byahandiikirwe n’okugaruka kushwera nibirugamu oburemeezi bwingi, Abakristaayo nibaba abanyabwengye batooreza Yehova barikutwara obushwere nk’oburikwera.—Mub. 5:4, 5; Heb. 13:4.