EKICWEKA EKY’OKWEGA 18
Mugumyane omu Nteerane z’Ekibiina
‘Ka tuteekateekye oku . . . , turaagumyane.’ —HEB. 10:24, 25.
EKYESHONGORO 88 Ompabure Emihanda Yaawe
EBIRAAGAMBWEHO a
1. Ahabw’enki nitugarukamu omu nteerane?
AHABW’ENKI nituza omu nteerane z’ekibiina? Enshonga enkuru n’okuhimbisa Yehova. (Zab. 26:12; 111:1) Kandi nituza omu nteerane kugira ngu tugumyane omu bwire obu obugumire. (1 Tes. 5:11) Twahanika omukono kandi tukagarukamu, nituhikiiriza ebintu ebyo bibiri.
2. Ni ryari obu turikubaasa kugarukamu omu nteerane zaitu?
2 Buri saabiiti, nitutunga omugisha gw’okugarukamu omu nteerane. Nk’eky’okureeberaho, aha wiikenda nitwejumba omu kwega Omunaara gw’Omurinzi. Omu ruteerane orw’aha gati ya saabiiti, nitubaasa kugarukamu omu kicweka ky’eby’Omuhendo eby’Omwoyo, Okwega Baibuli okw’Ekibiina, n’omu bicweka ebindi eby’okuhikaanisa ebiteekateeko.
3. Niki ekirikubaasa kuturemesa kugarukamu, kandi ebiri omu Abaheburaayo 10:24, 25 nibibaasa kutuhwera bita?
3 Twena nitwenda kuhimbisa Yehova n’okugumya Abakristaayo bagyenzi baitu. Kwonka hariho ebirikubaasa kuturemesa kugarukamu. Nitubaasa kutiina kugarukamu, nari nitubaasa kutatooranwa buri kuhanika omukono. Mbwenu shi nitubaasa kukora ki? Eky’okugarukamu kiri omu baruha ei entumwa Paulo yaahandiikire Abaheburaayo. Ku yaabaire naagamba aha bukuru bw’okuteeranira hamwe akagira ngu twine kuta omutima aha ‘kugumyana.’ (Shoma Abaheburaayo 10:24, 25.) Twamanya ngu na bikye ebi turikugarukamu nibigumya abandi, titurikwija kutiina kuhanika omukono kugarukamu. Kandi twaba tutarikukira kutooranwa, nitubaasa kushemererwa ahabw’okugira ngu abandi omu kibiina nibatunga omugisha gw’okugarukamu.—1 Pet. 3:8
4. Ni nshonga ki ishatu eziraagambweho omu kicweka eki?
4 Omu kicweka eki, nituza kubanza kureeba oku turikubaasa kugumyana omu kibiina kikye ahu abarikugarukamu bari bakye. Reero, nituza kureeba oku turikubaasa kugumyana omu kibiina kihango ekirimu baingi abarikuhanika omukono kugarukamu. Kandi, nituza n’okureeba oku turikubaasa kutebeekanisa eby’okugarukamu ebirikugumya abandi.
MUGUMYANE OMU KIBIINA KIKYE
5. Nitubaasa kugumyana tuta omu kibiina kikye nari guruupu?
5 Omu kibiina kikye nari guruupu, nihaba harimu bakye abarikuhanika omukono kugarukamu. Obumwe, orikwebembera ekicweka naaba aine kutegyerezaho kakye kugira ngu hagire owaahanika omukono kugarukamu. Oruteerane nirubaasa kureebeka nk’orwatwara obwire bwingi ekirikubaasa kumaramu bamwe amaani. Ekyo kyabaho noobaasa kukora ki? Teeraho kuhanika omukono emirundi mingi. Waakora otyo, noija kubaasa kugarukamu emirundi mingi.
6-7. Noobaasa kweihamu ota okutiina oku orikugira waaba nooyenda kugarukamu?
6 Kwonka shi ku waakuba nootiina kugarukamu? Baingi nikwo barikwehurira. Kwonka kubaasa kwongyera kugumya Abakristaayo bagyenzi baawe teeraho kweihamu okutiina oku orikugira waaba nooyenda kugarukamu. Ekyo noobaasa kukikora ota?
7 Okweijutsya obuhabuzi oburi omu Minaara y’Omurinzi ey’enyima nikibaasa kukuhwera. b Nk’eky’okureeberaho, tebeekanisa gye. (Enf. 21:5) Oku orikwongyera kwetegyereza ebi orikutebeekanisa, nikwo orikwongyera kworoberwa kugarukamu. Ekindi, teeraho kugarukamu omu bugufu. (Enf. 15:23; 17:27) Waagarukamu omu bugufu torikutiina. Eky’okugarukamu kigufu kyorobi kwetegyerezibwa kukira ekirikuba kirimu ebigambo bingi n’enshonga nyingi. Waagarukamu omu bugufu omu bigambo byawe, nooyoreka ngu otebeekaniise gye kandi ngu nooyetegyereza ebi otebeekaniise.
8. Yehova naareeba ata okuteeraho kwaitu kumuha ekirikukirayo oburungi?
8 Kandi shi ku waakuteeraho kukuratira obuhabuzi obu bwona, kwonka nabwo okatiina kugarukamu emirundi erikurenga ahari gumwe? Gira obwesigye ngu Yehova naasiima okuteeraho kwawe kukora eki orikubaasa. (Luk. 21:1-4) Okuha ekirikukirayo oburungi tikirikumanyisa okukora eki otarikubaasa. (Fil. 4:5) Manya eki orikubaasa kukora, taho ekigyendererwa ky’okukikora kandi oshabe kuguma oikaikaine. Noobaasa kutandika orikutaho ekigyendererwa ky’okugarukamu omurundi gumwe omu bugufu.
MUGUMYANE OMU KIBIINA KIHANGO
9. Ni bureemezi ki oburikubaasa kubaho omu kibiina kihango?
9 Ekibiina kyanyu kyaba kirimu ababuurizi baingi, nihabaasa kubaho oburemeezi obw’omuringo ogundi. Obundi ab’eishe-emwe na banyaanyazi-itwe baingi nibahanika emikono kugarukamu, ekyo kireetera otatooranwa emirundi mingi. Nk’eky’okureeberaho, Danielle obutoosha naakunda kugarukamu omu nteerane. c Naatwara okugarukamu nk’ekicweka ky’okuramya, nk’omuringo gw’okugumya abandi, kandi nikumuhwera kuhamya okwikiriza kwe omu mazima ga Baibuli. Kwonka ku yaagiire omu kibiina kihango akaba naagarukamu emirundi mikye kandi obumwe babura n’okumutoorana omu ruteerane rwona. Akagira ati: “Nkehurira kubi, okaba nooshusha ngu tinshemereire kugarukamu.” Akoongyeraho ati: “Ekyo kyaguma nikibaho nootandika kuteekateeka ngu nibakigyenderera.”
10. Noobaasa kwongyera ota aha mirundi ei orikugarukamu?
10 Oreehurireho nka Danielle? Kyaba nikwo kiri, noobaasa kuteekateeka ngu oine kuguma ohunami ohurikiize kyonka. Kwonka oine kuguma nooteeraho kugarukamu. Ekyo noobaasa kukikora ota? Tebeekanisa eby’okugarukamu bingi buri ruteerane. Reero waaba otatoorainwe omu bucweka oburikubanza, noobaasa kutunga omugisha gw’okugarukamu oruteerane rwaba nirugyenda omu maisho. Waaba nootebeekanisa Omunaara gw’Omurinzi ogw’Okwega teekateeka aha ku buri kacweka karikuhikaana n’omutwe gw’ekicweka ekyo. Waakora otyo, noija kuba oine bingi by’okugarukamu. Ekindi, noobaasa kutebeekanisa kugarukamu aha bucweka oburimu amazima agatoorobi kushoboorora. (1 Kor. 2:10) Ahabw’enki? Ahakuba nihabaasa kuba hariho bakye abarikubaasa kugarukamu aha bucweka obwo. Kandi shi ku waakuteeraho kuta omu nkora obuhabuzi obwo, kwonka nabwo omu nteerane nyingi atatooranwe kugarukamu? Oruteerane rutakatandikire noobaasa kugambira oraayebembere ekicweka ky’okwega ekibuuzo eki orikwenda kugarukamu.
11. Abafilipi 2:4 nihatuhiga kukora ki?
11 Shoma Abafilipi 2:4. Paulo arikuhwerwa omwoyo gurikwera akahiga Abakristaayo kufayo aha bandi. Nitubaasa kugyenderera tuta aha buhabuzi obwo omu nteerane? Turikwijuka ngu abandi nabo nibenda kugarukamu.
Nk’oku orikwikiriza abandi kwejumba omu kigaaniiro, reka n’abandi baagarukyemu omu nteerane (Reeba akacweka 12)
12. Omuringo murungi gw’okugumya abandi omu nteerane ni guuha? (Reeba n’ekishushani.)
12 Teekateeka ahari eki. Waaba noogaaniira na banywani baawe, mbwenu shi naiwe wenka orikugamba? Ngaaha buzima! Nooyenda ngu nabo beejumbe omu kigaaniiro. Nikyo kimwe, twaba turi omu nteerane nitwenda ngu baingi babaase kugarukamu nk’oku kirikubaasika. Nangwa, gumwe aha miringo mirungi y’okugumya ab’eishe-emwe na banyaanyazi-itwe n’okubaikiriza kworeka okwikiriza kwabo barikugarukamu. (1 Kor. 10:24) Ka tureebe oku turikubaasa kukora ekyo.
13. Nitubaasa kureetera tuta baingi kwejumba omu kugarukamu?
13 Twagarukamu omu bugufu, nikibaasisa baingi kugarukamu. Abareeberezi n’ababuurizi abamazire obwire nibaheereza baine kutaho eky’okureeberaho kirungi. N’obu waakugarukamu omu bugufu, yetantare kugamba enshonga zoona. Waagamba ahari buri nshonga omu kacweka, abandi tibaraatungye eky’okugarukamu. Nk’eky’okureeberaho, omu kacweka aka, twaheebwa obuhabuzi bw’emiringo ebiri, okugarukamu omu bugufu n’okwetantara kugamba enshonga zoona. Waaba naiwe waabanza kutooranwa kugarukamu aha kacweka aka, gambaho enshonga emwe.
Ni ryari obu turikubaasa kucwamu kutahanika omukono omu ruteerane? (Reeba akacweka 14) f
14. Niki ekirikubaasa kutuhwera kumanya emirundi ei twine kugarukamu? (Reeba n’ekishushani.)
14 Koresa okwetegyereza kucwamu obu oraagarukyemu. Waahanika omukono emirundi mingi, noobaasa kugyemesereza orikwebembera ekicweka kukutoorana n’obu abandi barikuba batakagarukiremu. Eki nikibaasa kureetera abandi kutahanika omukono.—Mub. 3:7.
15. (a) Twine kutwaza tuta twaba tutatoorainwe kugarukamu? (b) Abarikwebembera ebicweka by’okwega nibabaasa kworeka bata ngu nibafayo ahari buri omwe? (Reeba akabokusi “ Waaba Nooyebembera Ekicweka.”)
15 Ababuurizi baingi baahanika omukono noobaasa kutagarukamu emirundi yoona ei orikwenda. Obumwe, orikwebembera ekicweka naabaasa kutatoorana boona abaahanika omukono. Ekyo nikibaasa kutureetera kwehurira kubi, kwonka titwine kuguubwa kubi twaba tutatoorainwe kugarukamu.—Mub. 7:9.
16. Nitubaasa kugumya tuta abarikugarukamu omu nteerane?
16 Waaba otagarukiremu emirundi yoona ei orikwenda, noobaasa kuhurikiza gye abandi baaba nibagarukamu reero bwanyima y’oruteerane obasiime ahabw’okugarukamu? Ab’eishe-emwe na banyaanyazi-itwe waabasiima nikibagumya nk’eby’okugarukamu ebi waaba nooza kuha. (Enf. 10:21) Okusiima abandi n’omuringo ogundi gw’okugumyana.
OKU TURIKUBAASA KUGUMYANA OMU MIRINGO ENDIIJO
17. (a) Abazaire nibabaasa kuhwera bata abaana baabo kutebeekanisa eby’okugarukamu ebirikuhikaana n’emyaka yaabo? (b) Kurugiirira ahari vidiyo, ni bintu ki bina ebi twine kukuratira twaba nitutebeekanisa eky’okugarukamu? (Reeba n’obugambo obw’ahansi.)
17 Ni mu miringo ki endiijo oku turikubaasa kugumyana omu nteerane? Waaba ori omuzaire, hwera abaana baawe kutebeekanisa eby’okugarukamu ebirikuhikaana n’emyaka yaabo. (Mat. 21:16) Obumwe, ekicweka nikibaasa kuba kirimu enshonga z’amaani, nk’oburemeezi bw’omu bushwere nari eby’emicwe, kwonka nihaba harimu akacweka kamwe nari bubiri ahu omwana arikubaasa kugarukamu. Kandi hwera abaana baawe kwetegyereza ahabw’enki obumwe nibabaasa kutatooranwa baahanika omukono. Okubashobororera ekyo nikibaasa kubahwera kutaguubwa kubi abandi baaba nibo batooranwa kugarukamu.—1 Tim. 6:18. d
18. Nitubaasa kwetantara tuta kwetaho omutima twaba nitugarukamu? (Enfumu 27:2)
18 Twena nitubaasa kutebeekanisa eby’okugarukamu ebirikuhimbisa Yehova kandi ebirikugumya Abakristaayo bagyenzi baitu. (Enf. 25:11) N’obu obumwe turikubaasa kugamba omu bugufu ebi turabiremu, twine kwetantara kwegambaho ekirenga. (Shoma Enfumu 27:2; 2 Kor. 10:18) Kureka, twine kuteeraho kuta omutima ahari Yehova, Ekigambo kye, n’abaheereza be. (Kush. 4:11) Kwonka, ekibuuzo ky’akacweka kyaba nikituhiga kugamba aha ki turikuteekateeka, nikiba kitagwire kukikora. Nk’ekibuuzo ky’akacweka akarikukurataho.
19. (a) Niki ekiraarugyemu twayoreka ngu nitufayo aha bandi omu nteerane z’ekibiina? (Abarooma 1:11, 12) (b) Niki ekirikukushemeza aha kugarukamu omu nteerane?
19 N’obu haraabe hatariho biragiro ebirikworeka oku twine kugarukamu, twena nitubaasa kuteeraho kugarukamu omu muringo ogurikugumya bagyenzi baitu. Eki nitubaasa kukikora turikwongyera aha by’okugarukamu byaitu. Nari turikumarwa n’emirundi ei turaagarukyemu, reero tukashemererwa ahabw’okugira ngu n’abandi baagarukamu. Twaba nitufayo aha bandi omu nteerane z’ekibiina, twena nitubaasa ‘kugumyana.’—Shoma Abarooma 1:11, 12.
EKYESHONGORO 93 Ha Omugisha Enteerane Zaitu
a Nitugumya abandi twagarukamu omu nteerane. Kwonka abamwe nibatiina kugarukamu. Kandi abandi nibakunda kugarukamu kwonka nibaba nibenda ngu batooranwe emirundi mingi. Omu mbeera ezo zoona, nitubaasa kworeka tuta ngu nitufayo aha bandi? Nitubaasa tuta kugarukamu omu muringo ogurikuhiga ab’eishe-emwe na banyaanyazi-itwe kukundana n’okukora ebirungi? Ekicweka eki nikiza kugarukamu ebibuuzo ebyo.
b Kubaasa kutunga obuhabuzi obundi, reeba ebiri omu Omunaara gw’Omurinzi ogwa Jenwari 2019, rup. 8-13.
c Amaziina agamwe gahindwirwe.
d Reeba vidiyo Ba Munywani wa Yehova—Tebeekanisa eky’Okugarukamu Kyawe aha jw.org.
f ENSHOBOORORA Y’EKISHUSHANI: Omu kibiina kihango, ow’eishe-emwe owaaherize kugarukamu, naareka abandi bagarukamu omu nteerane.
