1. Omwojo omwe akooreka ata ngu aine amatsiko g’okuzooka?

 OMWOJO orikwetwa Matthew aine endwara emureeteire kushemezibwa emirundi mingi. Obu yaabaire aine emyaka mushanju, we n’ab’eka ye bakaba nibareeba puroguraamu ya buri kwezi aha JW Broadcasting^®. Puroguraamu egyo ku yaabaire erihakye kuhendera, bakareeba ekyeshongoro ekihimbirwe ekirikworeka abantu barikwakiira abakundwa baabo abaazoirwe. b Bwanyima, Matthew akahika haihi abazaire be, yaabakwata omu ngaro yaabagira ati: “Maama, Taata mwakireeba? N’obu naakufa ninyija kuzooka. Nimwija kuntegyerezaho kakye.” Teekateeka aha ku abazaire abo baayehuriire ku baamanyire ngu mutabani waabo naikiririza kimwe ngu nihaza kubaho okuzooka.

2-3. Ahabw’enki ni kikuru kuteekateeka aha matsiko g’okuzooka?

² Obumwe n’obumwe, ni kirungi kuteekateeka aha kiraganiso ky’okuzooka. (Yoh. 5:28, 29) Ahabw’enki? Ahakuba titurikumanya obu turaakwatwe endwara y’akabi nari tukafeerwa omukundwa waitu kitaraariire. (Mub. 9:11; Yak. 4:13, 14) Amatsiko gaitu g’okuzooka nigatuhwera kwemera oburemeezi nk’obwo. (1 Tes. 4:13) Ebyahandiikirwe nibituhamiza ngu Tataitwe ow’omu iguru naatumanya gye kandi naatukunda munonga. (Luk. 12:7) Teekateeka oku Yehova arikufayo kutumanya gye kugira ngu atuzoore twine emitwarize yaitu kandi turikubaasa kwijuka. Yehova okuturaganisa amagara agatahwaho n’okutuzoora twafa, ka nikyoreka ngu naatukunda!

³ Omu kicweka eki, nituza kureeba ahabw’enki nitwikiriza ngu nihaija kubaho okuzooka. Bwanyima nituza kwetegyereza eky’okutangaaza ky’omu Baibuli ekirikuhamya okwikiriza kwaitu ekirimu ebigambo by’ekyahandiikirwe kikuru  ky’ekicweka eki: “Munyaanyoko naija kuzooka.” (Yoh. 11:23) Aha muheru, nituza kureeba oku turikubaasa kwongyera kuhamya amatsiko gaitu g’okuzooka.

4. Kubaasa kwikiriza ekiraganiso, twine kuba nituhamya ki? Ha eky’okureeberaho.

⁴ Kubaasa kwikiriza ekiraganiso, twine kuba nituhamiza kimwe ngu orikukiraganisa naayenda kukihikiiriza kandi aine amaani g’okukikora. Nk’eky’okureeberaho: Teera akashushani ngu eihunga riteire enju yaawe yaasiisikara munonga. Reero munywani waawe akuraganisa arikugira ngu, ‘Naija kukuhwera akwombekyere enju.’ Eki arikugamba naakimanyisa kandi naiwe oine obwesigye ngu naayenda kukuhwera. Yaaba ari omwombeki otendekirwe kandi aine ebikoreso ebirikwetengyesa nooba oine obwesigye ngu naaza kukuhwera. Noobaasa kwikiriza eki yaakuraganisa. Kandi shi, aha bikwatiraine n’ekiraganiso kya Ruhanga eky’okuzooka? Mbwenu shi aine ekihika n’amaani g’okuhikiiriza ekiraganiso ekyo?

5-6. Ahabw’enki nituhamya ngu Yehova naayenda kuzoora abaafiire?

⁵ Mbwenu shi Yehova aine ekihika ky’okuzoora abafu? Eego buzima. Akahwera abahandiiki baingi ba Baibuli kuhandiika ngu naija kuzoora abantu omu biro by’omumaisho. (Isa. 26:19; Hos. 13:14; Kush. 20:11-13) Kandi Yehova ku arikugira eki yaaraganisa, naakihikiiriza. (Yos. 23:14) Yehova naayendera kimwe kuzoora abafu. Ahabw’enki nitubaasa kugira tutyo?

⁶ Teekateeka aha bigambo bya Yobu owaabaire ari omwesigwa. Akaba naahamiza kimwe ngu n’obu yaakufa, Yehova aine ekihika ky’okugaruka kumureeba. (Yob. 14:14, 15) Nikyo kimwe, Yehova naayendera kimwe kugaruka kureeba abaheereza be abaafiire. Aine ekihika ky’okuzoora abaafiire bakagira amagara marungi n’okushemererwa. Kandi shi obuhumbi bw’abantu abaafiire batakeegire amazima agarikukwata ahari Yehova? Ruhanga waitu oine rukundo nabo naija kubazoora. (Byak. 24:15) Naayenda ngu batungye omugisha gw’okuba banywani be kandi batuure omu nsi ebiro byona. (Yoh. 3:16) Buzima, Yehova aine ekyetengo ky’okuzoora abaafiire.

7-8. Ahabw’enki nitubaasa kuhamiza kimwe ngu Yehova aine amaani g’okuzoora abaafiire?

⁷ Mbwenu shi Yehova aine amaani g’okuzoora abaafiire? Eego buzima! Yehova ‘n’Ow’obushoboorozi bwona.’ (Kush. 1:8) N’ahabw’ekyo aine amaani maingi g’okusingura abazigu be boona, otwariiremu na rufu. (1 Kor. 15:26) Okumanya ekyo nikitugumya kandi nikituhuumuriza. Teekateeka aha kyahikire ahari Munyaanyazi-itwe Emma Arnold. Okwikiriza kwe n’okw’ab’eka ye kukagyezibwa munonga omu Rutaro rw’Ensi Yoona II. Kubaasa kuhuumuriza omuhara ahabw’okufeerwa abakundwa baabo omu nkambi ya Nazi, Emma akagira ati: “Ku ogire ngu abantu abarikufa tibarikwija kugaruka kuba abahuriire, omuzigu rufu akaabaire naakiza Ruhanga amaani.” Kwonka ekyo tikwo kiri! Ruhanga ow’obushoboorozi bwona owaahangire abantu aine amaani g’okuzoora abafu.

⁸ Enshonga endiijo erikutuhamiza ngu Ruhanga naabaasa kuzoora abaafiire n’ahabw’okugira ngu naijuka buri kimwe. Naamanya eiziina rya buri nyonyoozi. (Isa. 40:26) Kandi, naijuka abaafiire. (Yob. 14:13; Luk. 20:37, 38) N’ahabw’ekyo kyorobi kwijuka buri kimwe ekirikukwata aha abaraazoorwe, otwariiremu akarande kaabo, ebi baarabiremu n’ebiteekateeko byabo.

9. Ahabw’enki noikiririza omu kiraganiso kya Yehova eky’okuzoora abafu?

 ⁹ Buzima, nitubaasa kwikiriza ekiraganiso kya Yehova eky’okuzoora abaafiire ahakuba nitumanya ngu aine ekyetengo n’amaani g’okukihikiiriza. Yetegyereze enshonga endiijo erikutureetera kwikiriza ekiraganiso ekyo. Hariho abantu abu Yehova yaazoire. Omu bwire bwa Baibuli, akabaasisa abashaija bamwe abeesigwa, otwariiremu na Yesu kuzoora abafu. Ka tushwijume ebirikukwata aha kuzooka kumwe oku Yesu yaakozire okurikugambwaho omuri Yohaana eshuura 11.

10. Niki ekyabaireho Yesu arikubuurira seeri ya Yorudaani, kandi akakora ki? (Yohaana 11:1-3)

¹⁰ Shoma Yohaana 11:1-3. Teekateeka aha kyabaireho omuri Besania omwaka 32 Y.A.K., guri haihi kuhendera. Yesu aine abanywani omu kyaro ekyo, Laazaaro na banyaanya babiri, Mariamu na Mariza. (Luk. 10:38-42) Kwonka Laazaaro arwara kandi banyaanya beerarikirira. N’ahabw’ekyo booherereza Yesu obutumwa ari seeri ya Yorudaani, orugyendo rw’ebiro nka bibiri kuruga Besania. (Yoh. 10:40) Eky’obusaasi, Laazaaro afa entumwa yaaheza kuhika Yesu. N’obu Yesu amanya ngu munywani we yaafa, aguma ei yaabaire ari bwanyima aza Besania. N’ahabw’ekyo Yesu arikuza kuhikayo, Laazaaro akaba amazire ebiro bina afiire. Yesu naayenda kukora ekiraagasire banywani be kandi ekiraahaise Ruhanga ekitiinisa.—Yoh. 11:4, 6, 11, 17.

11. Ni ishomo ki erikukwata aha bunywani eriturikwegyera aha kyabaireho obu Laazaaro yaafa?

¹¹ Ekyabaireho nikitwegyesa eishomo eririkukwata aha bunywani. Yetegyereze eki: Obu Mariamu na Mariza baayohereza entumwa ahari Yesu, tibaramugambiire kwija Besania. Kureka bakamugira ngu munywani we omukundwa arwaire. (Yoh. 11:3) Obu Laazaaro yaafa, Yesu akaba naabaasa kumuzoora atagiireyo. Kwonka akacwamu kuza Besania kuba hamwe na banywani be Mariamu na Mariza. Oine omunywani orikubaasa kukuhwera otamushabire buhwezi? Ekyo nikimanyisa ngu noobaasa kugira obwesigye ngu naija kukuhwera haabaho ‘ekihikiirizi.’ (Enf. 17:17) Nka Yesu, nitubaasa kuba omunywani nk’ogwo aha bandi! Hati ka tureebe ebyabaireho bwanyima.

12. Yesu akaraganisa ki Mariza, kandi ahabw’enki yaabaire naabaasa kwesiga ekiragaaniso ekyo? (Yohaana 11:23-26)

¹² Shoma Yohaana 11:23-26. Mariza amanya ngu Yesu ari haihi kuhika Besania. Ahonaaho ashohora kumubugana reero amugira ati: “Mukama wangye, kuri obaire ori aha, munyaanyazi takufiire.” (Yoh. 11:21) Buzima, Yesu naabaasa kukiza Laazaaro. Kwonka naayenda kukora ekintu kirikutangaaza. Amuraganisa ati: “Munyaanyoko naija kuzooka.” Kandi amuha enshonga endiijo y’okwikiriza eki yaamuraganisa, arikugira ati: “Niinye kuzooka n’amagara.” Buzima Ruhanga akaha Yesu amaani g’okuzoora abafu. Enyimaho, akaba aherize kuzoora omwishiki muto owaabaire aherize kufa kandi  yaazoora n’omutsigazi aha izooba eri yaafeereireho. (Luk. 7:11-15; 8:49-55) Kwonka shi naabaasa kuzoora omuntu omazire ebiro bina afiire kandi owaatandikire kujunda?

13. Nk’oku kirikworekwa omu Yohaana 11:32-35, Yesu akatwaza ata ku yaareebire Mariamu n’abandi barikurira? (Reeba n’ekishushani.)

¹³ Shoma Yohaana 11:32-35. Teekateeka aha kyabaireho bwanyima. Mariamu munyaanya Laazaaro ondiijo agyenda kubugana Yesu. Amugambira ebigambo nk’ebi mukuru we yaagamba arikugira ati: “Mukama wangye, kuri obaire ori aha, munyaanyazi takufiire.” Mariamu n’abaabaire nibaganya nawe baine obusaasi bwingi. Yesu ku abareeba nibacura, atsinda omu mutima gwe. Ahabw’okusaasibwa banywani be, arira. Naamanya ngu okufeerwa omukundwa nikireetera omuntu obusaasi. Buzima, aine ekihika ky’okumaraho ekirikubareetera kurira.

14. Oku Yesu yaatwarize obu Mariamu yaabaire naarira nikibaasa kutwegyesa ki ahari Yehova?

¹⁴ Oku Yesu yaatwarize ku yaareebire Mariamu naarira nitukyegyeraho ngu Yehova ni Ruhanga oine esaasi. Ahabw’enki nitubaasa kugira tutyo? Nk’oku tureebire omu kicweka eky’enyima, Yesu naatooreza emiteekateekyere n’emitwarize ya Ishe omu muringo oguhikiriire. (Yoh. 12:45) N’ahabw’ekyo twashoma ngu Yesu akagirira esaasi banywani be abaabaire nibaganya kandi yaarira, nitubaasa kugira ngu na Yehova naakwatwaho munonga ku arikutureeba niturira. (Zab. 56:8) Ekyo tikirikutureetera kwenda kwirira haihi Ruhanga oine esaasi nyingi?

15. Nk’oku kirikworekwa omu Yohaana 11:41-44, niki ekyabaireho aha kituuro kya Laazaaro? (Reeba n’ekishushani.)

¹⁵ Shoma Yohaana 11:41-44. Yesu ahika aha kituuro kya Laazaaro kandi aragiira ngu baiheho eibaare. Mariza ayanga, arikugira ngu hati aine kuba yaajunzire. Yesu amugarukamu ati: “Tinaakugira nti, ku oraikirize, noija kureeba ekitiinisa kya Ruhanga?” (Yoh. 11:39, 40) Reero Yesu ari omu maisho g’abantu aimutsya amaisho areeba ahaiguru ashaba. Naayenda kuhaisa Yehova ekitiinisa ahabw’ebi ariyo naaza kukora. Bwanyima Yesu ayeta n’eiraka rihango ati: “Laazaaro, shohora oije.” Kandi Laazaaro  ashohora aruga omu kituuro. Yesu akakora eki bamwe baabaire nibateekateeka ngu tikirikubaasika.​—Reeba ebigambo by’okwegaho aha Yohaana 11:17

16. Ebiri omu Yohaana eshuura 11 nibihamya bita okwikiriza kwaitu omu matsiko g’okuzooka?

¹⁶ Ebiri omu Yohaana eshuura 11 nibihamya okwikiriza kwaitu omu matsiko g’okuzooka. Bita shi? Ijuka eki Yesu yaaraganiise Mariza obu yaamugira ati: “Munyaanyoko naija kuzooka.” (Yohaana 11:23) Yesu nka Ishe, aine ekyetengo n’amaani g’okuhikiiriza okuraganisa okwo. Amarira ge gakooreka ngu aine ekihika ky’okwihaho ebirikureetaho okufa n’obusaasi. Kandi Laazaaro ku yaarugire omu kituuro, Yesu akooreka ngu aine amaani g’okuzoora abafu. Teekateeka aha kindi eki Yesu yaijukize Mariza obu yaamugira ati: “Tinaakugira nti, ku oraikirize, noija kureeba ekitiinisa kya Ruhanga?” (Yoh. 11:40) Twine enshonga zihikire ahabw’enki nitwikiriza ngu ekiraganiso kya Ruhanga eky’okuzooka nikiija kuhikiirira. Mbwenu shi nitubaasa kukora ki kwongyera kuhamya amatsiko g’okuzooka?

17. Twine kwijuka ki twaba nitushoma aha kuzooka okurikugambwaho omu Baibuli?

¹⁷ Shoma aha kuzooka okwabaireho ira kandi okuteekateekyeho. Baibuli neegamba aha kuzooka kw’emiringo munaana okwabaireho. c Ahabw’enki otarikushwijuma gye buri kuzooka okurikugambwaho? Waaba nooshoma ebirikukwata aha kuzooka, ijuka ngu abaazoirwe bakaba bari abantu abaabuzima, abashaija, abakazi n’abaana. Yetegyereze amashomo agu orikubaasa kwega. Teekateeka aha ku buri kuzooka okwabaireho kurikworeka ngu Ruhanga aine ekyetengo n’amaani g’okuzoora abaafiire. Okukira munonga, teekateeka aha kuzooka kwa Yesu okurikukirayo. Ijuka ngu okuzooka kwe kukahamibwa enkumi n’enkumi zaabakareebi kandi nikutuhwera kuhamya okwikiriza kwaitu.—1 Kor. 15:3-6, 20-22.

18. Noobaasa kugasirwa ota waakoresa gye ebyeshongoro byaitu ebirikukwata aha matsiko g’okuzooka? (Reeba n’Obugambo obw’Ahansi.)

 ¹⁸ Teeraho kuhurikiza ‘ebyeshongoro eby’omwoyo’ ebirikukwata aha matsiko g’okuzooka. d (Efe. 5:19) Ebyeshongoro ebi nibireetera okuzooka kuba okwabuzima kandi nibihamya okwikiriza kwaitu omu matsiko ago. Muteeraho kubihurikiza, mubyegyezemu, reero muhikaanise ebiteekateeko aha makuru g’ebigambo byabyo omu kuramya kw’eka. Kwata ebyeshongoro ebyo omu mutwe kandi ogume noobiteekateekaho. Reero waahikwaho oburemeezi oburikuta amagara gaawe omu kabi nari waafeerwa omuntu, omwoyo gurikwera gwa Yehova nigwija kukuhwera kwijuka ebyeshongoro ebyo bikuhuumurize kandi bikugumye.

19. Nitubaasa kuteekateeka ahari ki aha bikwatiraine n’okuzooka? (Reeba akabokusi “ Noija Kubabuuza Ki?”)

¹⁹ Teera akashushani. Yehova akatuha okubaasa kw’okuteera akashushani tukeereeba omu nsi ensya. Munyaanyazi-itwe omwe naashoboorora ati: “Mmazire obwire buraingwa ndikuteera akashushani ndi omu Paradiso ndikuhurira obuhooho burungi bw’ebimuri birikurabya.” Teera akashushani orikubugana omushaija n’omukazi abeesigwa abaabaireho ira. N’oha ou oiniire ekihika kureeba? Noija kumubuuza ki? Teera akashushani orikugaruka kuba n’abakundwa baawe abaafiire. Teekateeka aha bi oraabanze kubagambira, kubumbatirana, n’okushemererwa oku araagire waabareeba.

20. Twine kumariirira kukora ki?

²⁰ Nitusiima Yehova munonga aha bw’ekiraganiso kye ky’okuzooka. Nituhamya ngu ekiraganiso eki nikiija kuhikiirira ahakuba Yehova aine ekyetengo n’amaani g’okukihikiiriza. Ka tumaririire kuhamya okwikiriza kwaitu omu matsiko aga ag’omuhendo. Twakora tutyo, nitwija kwongyera kwirira haihi Ruhanga orikuraganisa buri omwe ati: ‘Abakundwa baawe nibaija kuzooka.’