1-2. Twine kukora ki obwo tutegyereize ensi ensya?

 NITUTWARA ekiraganiso kya Yehova eky’okuhindura ensi egi kuba ehikiriire nk’eky’omuhendo. (2 Pet. 3:13) N’obu turaabe tutarikumanya obu ensi ensya eraabeho, obuhame nibworeka ngu hatsigaireyo obwire bukye.—Mat. 24:32-34, 36; Byak. 1:7.

² Ekyo kitakabaireho, twena twine kuhamya okwikiriza kwaitu omu kiraganiso ekyo, n’obu twakuba tumazire obwire burikwingana ki omu mazima. Ahabw’enki? Ahakuba n’obu twakuba twine okwikiriza kuhami nikubaasa kutuuba. Nangwa entumwa Paulo akagira ngu okutagira okwikiriza “n’ekibi ekitwezingiriire.” (Heb. 12:1) N’ahabw’ekyo, kubaasa kuhamya okwikiriza kwaitu, obutoosha twine kuteekateeka aha buhame oburikworeka ngu ensi ensya eri haihi kubaho.—Heb. 11:1.

3. Nituza kugamba ahari ki omu kicweka eki?

³ Omu kicweka eki, nituza kureeba oku turikubaasa kuhamya okwikiriza kwaitu omu kiraganiso kya Yehova eky’ensi ensya omu miringo eshatu egi: (1) turikuteekateeka aha kitambo, (2) turikuteekateeka aha maani ga Yehova, kandi (3) turikwejumba omu by’omwoyo. Bwanyima nituza kureeba oku obutumwa obu Yehova yaahaire Habakuuki burikuhamya okwikiriza kwaitu. Hati, ka tubanze tushwijume zimwe aha mbeera ezirikutwetengyesa kugira okwikiriza kuhami omu kiraganiso kya Yehova eky’ensi ensya.

 EMBEERA EZIRIKWETENGYESA OKWIKIRIZA KUHAMI

4. Ni kucwamu kwa muringo ki okurikwetengyesa okwikiriza kuhami?

⁴ Buri izooba nitucwamu aha nshonga ezirikwetengyesa okugira okwikiriza kuhami. Nk’eky’okureeberaho, nitucwamu ebirikukwata aha banywani abu twine kugira, eby’okweshemeza, eby’obwegyese, eby’obushwere, abaana n’omurimo. Ni kirungi kwebuuza, ‘Ebi ndikucwamu nibyoreka ngu niimanya ngu entebeekanisa y’ensi egi n’ey’akaanya bwanya, kandi ngu Ruhanga ari haihi kureetaho ensi ensya?’ Nari ebi ndikucwamu nibyoreka emiteekateekyere y’abantu abarikugira ngu okufa niyo muheru?’ (Mat. 6:19, 20; Luk. 12:16-21) Nitwija kucwamu gye twahamiza kimwe ngu ensi ensya eri haihi.

5-6. Ahabw’enki nikyetengyesa kugira okwikiriza kuhami omu bwire bw’okugyezibwa? Ha eky’okureeberaho.

⁵ Nituhikwaho okugyezibwa okurikwetengyesa okugira okwikiriza kuhami. Nitubaasa kuba nituhiiganisibwa, twine endwara y’amaani, n’ebindi bintu ebirikubaasa kutumaramu amaani. Omu kubanza, nitubaasa kwemera okugyezibwa okurikutuhikaho. Kwonka kwagumizamu, nikiija kutwetengyesa okwikiriza kuhami kubaasa kugumisiriza kandi tukagumizamu nituheereza Yehova tushemereirwe.—Rom. 12:12; 1 Pet. 1:6, 7.

⁶ Twaba nitugyezibwa, nitubaasa kuteekateeka ngu ensi ensya terikwija kubaho. Mbwenu shi eki nikimanyisa ngu okwikiriza kwaitu nikuba kutuubire? Ngaaha buzima. Teekateeka aha ky’okureeberaho eki. Omu bwire bw’obutiti bw’amaani, noobaasa kuteekateeka ngu tiharaije kubaho omushana. Kwonka amazima gari ngu nihaba nihaija kubaho obwire bw’omushana. Nikyo kimwe, twaba twehwaire amatsiko, nitubaasa kuteekateeka ngu ensi ensya terikwija kubaho. Kwonka okwikiriza kwaitu kwaba kuhami, nituba nitumanya ngu ebi Ruhanga arikuraganisa nibiija kuhikiirira. (Zab. 94:3, 14, 15; Heb. 6:17-19) Ahabw’okugira obwesigye obwo, nitubaasa kugumizamu nitwebembeza okuramya Yehova.

7. Ni miteekateekyere ki ei twine kwetantara?

⁷ Omurimo gw’okubuurira nagwo nigwetengyesa kugira okwikiriza kuhami. Abantu baingi abu turikubuurira nibareeba ngu “amakuru marungi” agarikukwata aha nsi ensya nk’ekiraganiso ekitarikubaasa kuhikiirira. (Mat. 24:14; Ezk. 33:32) Titurikwenda kugira emiteekateekyere nk’ey’abantu abo. Kubaasa kwetantara ekyo kubaho, twine kugumizamu nituhamya okwikiriza kwaitu. Ka tureebe emiringo eshatu oku turikubaasa kukora ekyo.

TEEKATEEKA AHA KITAMBO

8-9. Okuteekateeka aha kitambo nikikwata kita aha kwikiriza kwaitu?

⁸ Omuringo gumwe oku turikubaasa kuhamya okwikiriza kwaitu n’okuteekateeka aha kitambo. Ekitambo nikituhamiza ngu ebi Ruhanga arikuraganisa nibiija kuhikiirira. Twateekateeka ahabw’enki Ruhanga yaahaireyo ekitambo n’oku yaayefeerereize, nituhamya okwikiriza kwaitu ngu ekiraganiso kya Ruhanga eky’amagara agatahwaho omu nsi nungi nikiija kuhikiirira. Ahabw’enki nitugira tutyo?

⁹ Ekitambo kikaba nikitwariramu ki? Yehova akoohereza Omwana we omukundwa ow’omujigaijo, kandi munywani we, kuruga omu iguru kuzaarwa omu nsi nk’omuntu ahikiriire. Obu Yesu yaabaire ari omu nsi, akeemera oburemeezi bw’emiringo yoona. Akabonabonesibwa kandi yaafeera omu  busaasi bwingi. Yehova ka yaayefeerereize kihango! Ruhanga waitu owa rukundo akaba atarikwija kwikiriza Omwana we kubonabona kandi akafa, kugira ngu tutungye amagara marungi kumara obwire bukye. (Yoh. 3:16; 1 Pet. 1:18, 19) Ahabw’okugira ngu Yehova akahayo Omwana we omukundwa, naija kuhamya ngu twatunga amagara agatahwaho omu nsi ensya.

TEEKATEEKA AHA MAANI GA YEHOVA

10. Kurugiirira aha Abaefeso 3:20, Yehova naabaasa kukora ki?

¹⁰ Omuringo ogundi oku turikubaasa kuhamya okwikiriza kwaitu n’okuteekateeka aha maani ga Yehova. Aine amaani g’okuhikiiriza byona ebi arikuraganisa. Amazima gari ngu, abantu nibabaasa kureeba ekiraganiso ky’amagara agatahwaho omu nsi ensya nk’ekitarikubaasa kuhikiirira. Kwonka Yehova naakira kuraganisa ebi abantu batarikubaasa kuhikiiriza. Naabaasa kukora ekyo, ahakuba n’ow’Obushoboorozi bwona. (Yob. 42:2; Mak. 10:27) N’ahabw’ekyo tikirikututangaaza yaaturaganisa ebigumire kuhikiiriza!—Shoma Abaefeso 3:20.

11. Gamba eky’okureeberaho ky’ebiraganiso bya Ruhanga ebyabaire nibireebeka nk’ebitarikubaasa kuhikiirira. (Reeba akabokusi “ Bimwe aha Biraganiso Ebyahikiriire.”)

¹¹ Yetegyereze bimwe aha bi Yehova yaaraganiise abaheereza be aba ira ebyabaire nibireebeka nk’ebitarikubaasika. Akahamiza Abrahamu na Saara ngu bakaba nibaza kuzaara omwana w’omwojo n’obu baabaire baakuzire. (Kut. 17:15-17) Kandi akagambira Abrahamu ngu abaijukuru bakaba nibaija kuheebwa ensi ya Kanaani. Kwonka ahabw’okugira ngu Abaisraeli baijukuru ba Abrahamu, bakamara emyaka mingi bari abahuuku omuri Misri, okaba nooshusha ngu eki Yehova yaaraganiise tikirikwija kuhikiirira. Kwonka kikahikiirira. Bwanyima, Yehova akagambira Elizaabeesi owaabaire akaikwire ngu naija kuzaara omwana. Kandi Yehova akagambira Mariamu, owaabaire ashugaine ngu akaba naija kumuzaarira Omwana, ekyo kikaba nikiza kuhikiiriza eki yaaraganiise emyaka mingi enyima omu musiri Edeni.—Kut. 3:15.

12. Yoshua 23:14 na Isaaya 55:10, 11 nihatuhamiza ki aha maani ga Yehova?

¹² Twateekateeka aha biraganiso ebi Yehova ahikiriize nikituhwera kumanya ngu aine amaani maingi, kandi nikihamya okwikiriza kwaitu omu kiraganiso ky’ensi ensya. (Shoma Yoshua 23:14; Isaaya 55:10, 11.) Ekyo kishemereire kutureetera kuhwera abandi kumanya ngu ensi ensya erikuraganisibwa tikirooto. Yehova arikugamba aha nsi ensya n’eiguru erisya akagira ati: “Ebigambo ebi n’eby’okwesigwa kandi eby’amazima.”—Kush. 21:1, 5.

YEJUMBIRE KIMWE OMU BY’OMWOYO

13. Enteerane z’ekibiina nizibaasa kuhamya zita okwikiriza kwaitu? Shoboorora.

¹³ Omuringo gwa kashatu oku turikubaasa kuhamya okwikiriza kwaitu n’okwejumbira kimwe omu by’omwoyo. Nk’eky’okureeberaho, teekateeka oku turikugasirwa omu nteerane z’ekibiina. Anna, omazire emyaka mingi omu buheereza butari bumwe obw’obutwire, naagira ati: “Enteerane nizimpwera kuguma nyine okwikiriza kuhami. N’obu omugambi yaakuba atarikwegyesa gye nari ataine kisya eki arikugamba, ningira eki naayega ekirikumpwera kwongyera kwetegyereza amazima ga Baibuli kandi ekirikuhamya okwikiriza kwangye.” b Hatariho kubangaanisa, eby’okugarukamu by’ab’eishe-emwe  na banyaanyazi-itwe omu nteerane nibihamya okwikiriza kwaitu.—Rom. 1:11, 12; 10:17.

14. Okubuurira nikuhamya kuta okwikiriza kwaitu?

¹⁴ Okwikiriza kwaitu nikuhama twayejumba omu kubuurira. (Heb. 10:23) Barbara, omazire emyaka erikurenga 70 arikuheereza Yehova, naagira ati: “Nyetegyereize ngu butoosha okubuurira nikuhamya okwikiriza kwangye. Naayongyera kugambira abandi aha biraganiso bya Yehova eby’omuhendo, nikwo n’okwikiriza kwangye kurikwongyera kuhama.”

15. Okweyegyesa nikuhamya kuta okwikiriza kwaitu? (Reeba n’ebishushani.)

¹⁵ Hariho ekindi ekirikuhamya okwikiriza kwaitu: Okweyegyesa. Susan ayetegyereize ngu naagasirwa ku arikutaho entebeekanisa y’okweyegyesa. Naagira ati: “Aha Sande, ninyeyegyesa Omunaara gw’Omurinzi ogw’Okwega saabiiti erikukurataho. Orwokubanza n’Orwakabiri, niintebeekanisiza oruteerane rw’aha gati ya saabiiti. Aha mazooba agandi, niinyeyegyesa aha nshonga ezindi.” Ahabw’okugira ngu Susan naahamira aha ntebeekanisa ye y’okweyegyesa, naagumizamu naahamya okwikiriza kwe. Irene, oheereize aha ofiisi enkuru kumara emyaka mingi, ashangire ngu okweyegyesa aha bunabi bwa Baibuli nikihamya okwikiriza kwe. Naagira ati: “Nintangaara ku ndikureeba ngu obushonshorekye bwona obw’obunabi bwa Yehova nibuhikiirira omu bwijwire.” c

‘BUZIMAZIMA NIBIIJA’ KUHIKIIRIRA

16. Ahabw’enki ebi Yehova yaahamiize Habakuuki birikutukwataho? (Abaheburaayo 10:36, 37)

¹⁶ Abaheereza ba Yehova abamwe batwire bategyereize emperu y’ensi egi kumara obwire buraingwa. Omu mireebere y’abantu, okuhikiirira kw’ekiraganiso ekyo nikubaasa kureebeka nk’okukyerereirwe. Aha nshonga egyo, Yehova akahamiza nabi Habakuuki ati: ‘Ebi waayorekwa ebyo biine obunaku bwabyo  obwatairweho, tibirituuraho kuhikiirizibwa, kandi tibiribeiha. N’obu byakutuuraho, obitegyereze, buzimazima tibirikwija, kukyerererwa.’ (Hab. 2:3) Mbwenu shi Ruhanga akagamba ebigambo ebyo kugasira Habakuuki wenka? Nari naitwe nibitugasira? Entumwa Paulo arikuhwerwa omwoyo gwa Ruhanga, akooreka ngu ebigambo ebyo bikaba nibikwata n’aha Bakristaayo abaabaire bategyereize ensi ensya. (Shoma Abaheburaayo 10:36, 37.) Buzima, nitubaasa kuhamya ngu ekiraganiso kya Yehova eky’okutucungura n’obu kyakutuuraho kuhikiirira, ‘tikirikwija, kukyerererwa.’

17. Munyaanyazi-itwe omwe akagyendera ata aha buhabuzi obu Yehova yaahaire Habakuuki?

¹⁷ Kumara emyaka mingi, abaheereza ba Yehova baingi baagyendeire aha buhabuzi bwe bw’okuguma ‘bategyereize.’ Nk’eky’okureeberaho, Louise, owaatandikire kuheereza Yehova omuri 1939, naagira ati: “Omu bwire obwo, nkaba ninteekateeka ngu Haramagedoni neija kubaho ntakaherize siniya. Kwonka tikwo kyabaire. Emyaka egi yoona, nyetegyereize ngu ningasirwa naashoma ebiri omu Baibuli ebirikukwata ahari Noa, Abrahamu, Yosefu, n’abandi abaategyereize obwire buraingwa kuheebwa ebyaraganibiibwe. Okuguma ntegyereize kimpwereire kandi nikihwera n’abandi kuguma nibahamya ngu ensi ensya eri haihi.” Abaheereza ba Yehova abandi baingi abaheereize kumara obwire buraingwa nibaikirizana n’ekyo.

18. Okureeba ebyahangirwe nikibaasa kuhamya kita okwikiriza kwaitu omu kiraganiso ky’ensi ensya?

¹⁸ N’eky’amazima, ensi ensya tekabaireho. Kwonka, haine ebintu ebimwe ebyaherize kubaho nk’enyonyoozi, emiti, enyamaishwa, n’abantu bagyenzi baitu. Tihaine orikubaasa kubangaanisa ngu ebyo byona tibyabuzima, n’obu haraabe hariho obu byabaire bitariho. Biriho ahakuba Yehova akabihanga. (Kut. 1:1, 26, 27) Ruhanga waitu akaraganisa kureetaho ensi ensya. Kandi naija kukihikiiriza. Omu nsi ensya abantu nibaija kwesiimira amagara agahikiriire ebiro byona. Omu bwire bwa Yehova obuhikire, ensi ensya neija kuba eyaabuzima nk’oku eiguru n’ensi biri ebyabuzima hati.—Isa. 65:17; Kush. 21:3, 4.

19. Noobaasa kuhamya ota okwikiriza kwawe?

¹⁹ Ekyo kitakahikiriire, kora kyona eki orikubaasa kuhamya okwikiriza kwawe. Butoosha yoreka ngu noosiima ekitambo. Teekateeka aha maani ga Yehova. Yejumbire kimwe omu by’omwoyo. Waakora otyo noija kuba omuri abo ‘abaraahungure ebyaraganisiibwe ahabw’okwikiriza n’okugumisiriza.’—Heb. 6:11, 12; Rom. 5:5.