EKICWEKA EKY’OKWEGA 15
Nitwegyera ki aha by’Okutangaaza bya Yesu?
‘Akagyendagyenda naakora ebirungi, [kandi] arikukiza.’ —BYAK. 10:38.
EKYESHONGORO 13 Kristo Niwe Twine Kutooreza
EBIRAAGAMBWEHO a
1. Shoboorora embeera eyaabaire eriho obu Yesu yaakora eky’okutangaaza ky’okubanza.
TEEKATEEKA aha kyabaireho omwaka 29 Y.A.K., gurikuhendera obu Yesu yaatandika obuheereza bwe. Yesu na bamwe aha beegi be, na Mariamu nyina bari aha bugyenyi bw’okugaitwa omuri Kaana, ekyaro ekiri bukiizi-bwa-bumosho bwa Nazareesi ahu Yesu yaakuriire. Mariamu munywani w’eka egyo naabaasa kuba ariyo naahwera omu kureeberera abagyenyi. Kwonka aha bugyenyi obwo, haabaho oburemeezi oburikubaasa kureetera eka n’abagore kuhemuka. Omu kaire ako viinyo ehwaho. b Obundi haija abagyenyi abarikukira abu batebeekanisiize. Ahonaaho Mariamu agambira omutabani ati: “Tibaine viinyo.” (Yoh. 2:1-3) Yesu acwamu kukora ki? Omu muringo gw’eky’okutangaaza ahindura amaizi ‘viinyo nungi.’—Yoh. 2:9, 10.
2-3. (a) Ni by’okutangaaza ki ebi Yesu yaakozire? (b) Nitubaasa kugasirwa tuta twashwijuma eby’okutangaaza bya Yesu?
2 Yesu akakora eby’okutangaaza ebindi bingi omu buheereza bwe. c Akakora eby’okutangaaza kuhwera abantu baingi. Nk’eky’okureeberaho, omu by’okutangaaza bibiri ebi yaakozire akariisa abashaija 5,000 kandi bwanyima yaariisa abashaija 4,000, abantu boona bakaba bari nka 27,000 n’okurengamu otwariiremu abakazi n’abaana. (Mat. 14:15-21; 15:32-38) Obu Yesu yaakora eby’okutangaaza ebyo, akakiza n’abantu baingi abaabaire barwaire. (Mat. 14:14; 15:30, 31) Teekateeka aha kushemererwa oku abantu abo baagizire, Yesu ku yaabatambiire kandi akabariisa omu muringo gw’eky’okutangaaza!
3 Hariho bingi ebi turikwegyera aha by’okutangaaza bya Yesu. Omu kicweka eki, nituza kureeba amashomo agarikuhamya okwikiriza kwaitu aguturikwegyera aha by’okutangaaza ebyo. Reero bwanyima, nituza kureeba oku turikubaasa kutooreza obucureezi n’esaasi ezi Yesu yaayorekire obu yaakora eby’okutangaaza.
EKI BIRIKUTWEGYESA AHARI YEHOVA NA YESU
4. Eby’okutangaaza bya Yesu nitubyegyeraho amashomo agarikukwata ahari baahi?
4 Eby’okutangaaza bya Yesu nitubyegyeraho amashomo agarikuhamya okwikiriza kwaitu omuriwe na Ishe. Ekyo kiri kityo, ahakuba Yehova niwe yaabaire ari obukomooko bw’eby’okutangaaza ebyo. Ebyakozirwe 10:38 nihagira hati: ‘Ruhanga ku yaamushukireho [Yesu] omwoyo gurikwera n’amaani, akagyendagyenda naakora ebirungi, naakiza boona abaabaire nibaitwa kubi Sitaane; ahabw’okuba Ruhanga akaba ari hamwe nawe.’ Ijuka ngu omuri byona ebi Yesu yaagambire n’ebi yaakozire otwariiremu n’eby’okutangaaza, akooreka gye emiteekateekyere n’enyehurira za Ishe. (Yoh. 14:9) Ka tushwijume amashomo ashatu aguturikwegyera aha by’okutangaaza bya Yesu.
5. Niki ekyahigire Yesu kukora eby’okutangaaza? (Matayo 20:30-34)
5 Ery’okubanza, Yesu na Ishe nibatukunda munonga. Obu Yesu yaabaire ari omu nsi akooreka ngu naakunda abantu arikukora eby’okutangaaza kuhwera abaabaire nibabonabona. Eizooba rimwe, abashaija babiri empumi bakamweshengyereza ngu abahwere. (Shoma Matayo 20:30-34.) Yetegyereze ngu Yesu ‘akabagirira embabazi’ yaabatambira. Ebigambo by’Orugriika ebirikuvunuurwa ‘okugira embabazi’ nibimanyisa enyehurira y’esaasi ei omuntu arikugira omunda. Embabazi nk’ezo, ezirikworeka rukundo, zikahiga Yesu kuriisa abaabaire baine enjara n’okutambira omubembe. (Mat. 15:32; Mak. 1:41) Nitubaasa kuhamya ngu Yehova, Ruhanga ‘oijwire embabazi,’ n’Omwana we nibatukunda munonga kandi nibatusaasibwa twaba nitubonabona. (Luk. 1:78; 1 Pet. 5:7) Buzima ka baine ekihika ky’okwihiraho kimwe oburemeezi bw’abantu bwona!
6. Ruhanga akaha Yesu maani ki?
6 Erya kabiri, Ruhanga akaha Yesu amaani g’okumaraho oburemeezi bw’abantu boona. Eby’okutangaaza ebi Yesu yaakozire bikooreka ngu, aine amaani g’okusingura oburemeezi obu tutarikubaasa kusingura ahabwaitu. Nk’eky’okureeberaho, aine amaani g’okumaraho obukomooko bw’oburemeezi bw’abantu, nikyo ekibi eki twahungwire na byona ebirikureetwaho ekibi ekyo otwariiremu endwara n’okufa. (Mat. 9:1-6; Rom. 5:12, 18, 19) Eby’okutangaaza ebyo bikahamya ngu naabaasa kutamba “endwara zoona” kandi azoore n’abafu. (Mat. 4:23; Yoh. 11:43, 44) Kandi, aine amaani g’okucureeza eihunga n’okusingura baadaimoni. (Mak. 4:37-39; Luk. 8:2) Ka nikihuumuriza kumanya ngu Yehova akaha Omwana we amaani nk’ago!
7-8. (a) Eby’okutangaaza bya Yesu nibitureetera kugira bwesigye ki? (b) Ni ky’okutangaaza ki eki oiniire ekihika kureeba omu nsi ensya?
7 Erya kashatu, nitubaasa kuhamiza kimwe ngu emigisha y’Obukama bwa Ruhanga neija kuhikiirira. Eby’okutangaaza ebi Yesu yaakozire obu yaabaire ari omu nsi nibyoreka ebi araakore omu nsi yoona ku araabe naategyekyera omu iguru omu Bukama bwa Ruhanga. Yetegyereze oku embeera ziraabe ziri Kristo ku araabe naategyeka. Nitwija kugira amagara agahikiriire, ahakuba naija kwihaho endwara n’obumuga bwona obunyangareize abantu. (Isa. 33:24; 35:5, 6; Kush. 21:3, 4) Titurikwija kugaruka kuteerwa enjara nari kubonabona ahabw’ebihikiirizi. (Isa. 25:6; Mak. 4:41) Nituza kushemererwa munonga turikwakiira abakundwa baitu abaafiire barikuruga “omu bituuro.” (Yoh. 5:28, 29) Ni ky’okutangaaza ki eki oiniire ekihika kureeba omu nsi ensya?
8 Obu Yesu yaabaire naakora eby’okutangaaza akooreka obucureezi n’esaasi, emitwarize ei twine kuteeraho kugira. Nituza kushwijuma eby’okureeberaho bibiri. Ka tutandikye n’eky’obugyenyi bw’okugaitwa obwabaire omuri Kaana.
NIBITWEGYESA KUBA ABACUREEZI
9. Yesu akakora ki aha bugyenyi bw’okugaitwa? (Yohaana 2:6-10)
9 Shoma Yohaana 2:6-10. Mbwenu shi viinyo ku yaahwaireho aha bugyenyi, Yesu akaba aine kugira eki yaakora? Ngaaha. Hakaba hatariho bunabi obwabaire nibworeka ngu Mesia akaba naaza kukora viinyo omu muringo gw’eky’okutangaaza. Kwonka teekateeka oku orikubaasa kwehurira eby’okunywa byahwaho aha bugyenyi bwawe bw’okugaitwa. Yesu naabaasa kuba yaagiriire eka egyo esaasi, na munonga abagore, atarikwenda ngu bahemuke. Nk’oku twaba twareebire aha kutandika, akakora eky’okutangaaza. Akahindura rita 390 z’amaizi viinyo nungi. Akakora viinyo nyingi kugira ngu babaase kutsigazaho ey’okunywa bwanyima y’obugyenyi, nari ngu abagore abo bagiguze batungye esente z’okwebaisaho. Abagore abo ka baine kuba baashemereirwe!
Tooreza Yesu otarikwehimbisa ahabw’ebi obaasize kuhikiiriza (Reeba akacweka 10-11) e
10. Ni bushonshorekye ki obukuru oburi omu Yohaana eshuura 2? (Reeba n’ekishushani.)
10 Teekateeka aha bushonshorekye bukuru oburi omu Yohaana eshuura 2. Waayetegyereza ngu Yesu tiwe yaijwize enyungu amaizi? Omu mwanya gw’okwetaho omutima, akagambira abagabuzi kwijuza enyungu amaizi. (Omushororongo 6, 7) Kandi ku yaaherize kuhindura amaizi viinyo, tiwe yaagitwariire mukuru w’obugyenyi. Kureka, akagambira abagabuzi kuba nibo bakikora. (Omushororongo 8) Buzima Yesu tarakwatsire ekikopo kya viinyo akakyereza omu maisho g’abagyenyi, reero akeehimbisa ati: ‘Murooze ahari viinyo ei naakora!’
11. Niki eki turikwegyera aha ky’okutangaaza kya Yesu?
11 Nitubaasa kwegyera ki aha ky’okutangaaza kya Yesu eky’okuhindura amaizi viinyo? Nitwega kuba abacureezi. Yesu tarehimbiise ahabw’eky’okutangaaza ekyo, kandi akaba atarikwehimbisa ahabw’ebi yaabaire naahikiiriza. Kureka, butoosha omu muringo gw’obucureezi akaba ahimbisisa Ishe omuri byona ebi yaabaire naakora. (Yoh. 5:19, 30; 8:28) Twatooreza Yesu tukaba abacureezi, titurikwija kwehimbisa ahabw’ebi turikuhikiiriza. Omuri byona ebi turikukora omu buheereza ka turekye kwehimbisa ahabwaitu, kureka twehimbise aha bw’omugisha gw’okuheereza Yehova. (Yer. 9:23, 24) Ka tube niwe twahaisa ekitiinisa, ahakuba tihaine eki turikubaasa kuhikiiriza tutaine buhwezi bwa Yehova.—1 Kor. 1:26-31.
12. Ni mu muringo ki ogundi oku turikubaasa kuba abacureezi nka Yesu? Ha eky’okureeberaho.
12 Yetegyereze omuringo ogundi oku turikubaasa kuba abacureezi nka Yesu. Teekateeka ahari eki: Omureeberezi naamara obwire bwingi arikuhwera omuheereza kutebeekanisa orubazo rwe rw’abantu boona orw’okubanza. N’ekirikurugamu, ow’eishe-emwe ogwo omuto aha orubazo omu muringo murungi, kandi ekibiina kigasirwa. Bwanyima y’oruteerane, hagira owaagambira omureeberezi ati: ‘Ow’eishe-emwe nanka yaaha gye orubazo, tikwo?’ Mbwenu shi omureeberezi aine kugarukamu ngu, ‘eego, kwonka mmazire obwire bwingi ndikumuhwera’? Nari naabaasa kugarukamu omu muringo gw’obucureezi ati: Eego, nikwo kiri. Nimwesiimisa.’ Twaba turi abacureezi, titurikwehimbisa ahabw’ebintu birungi ebi turikukorera abandi. Okumanya ngu Yehova naasiima kandi naareeba ebi turikukora nikitureetera okumarwa. (Gyeragyeranisa Matayo 6:2-4; Heb. 13:16) Buzima, nikishemeza Yehova twatooreza Yesu turikuba abacureezi.—1 Pet. 5:6.
NIBITWEGYESA KUGIRA ESAASI
13. Yesu akareeba ki ari haihi n’orurembo Naini, kandi akakora ki? (Luka 7:11-15)
13 Shoma Luka 7:11-15. Teekateeka aha kyabaireho Yesu ari haihi kuhendera obuheereza bwe. Akaba agiire omu rurembo Naini, orwa Galilaaya haihi na Shuneemu, ahu nabi Elisa yaazoire mutabani w’omukazi emyaka nka 900 enyima. (2 Bag. 4:32-37) Yesu ku yaabaire ari haihi kuhika aha irembo ry’orurembo, akareeba abantu nibaza kuziika. Ekaba eri embeera y’obusaasi, ahakuba omufaakazi akaba afeereirwe omwana we omwe heza. Kwonka omufaakazi ogwo akaba atari wenka, akaba ashagatiirwe abantu baingi. Yesu akabeemereza yaakorera nyina w’omwana ogwo ekintu ky’omutaano, yaazoora omutabani. Eki ni kimwe aha by’okutangaaza bishatu ebirikugambwaho butunu omu bitabo by’Engiri.
Tooreza Yesu orikuteeraho kwehabura kugirira esaasi abarikuganya (Reeba akacweka 14-16)
14. Ni bushonshorekye ki bukuru oburi omuri Luka eshuura 7? (Reeba n’ekishushani.)
14 Yetegyereze obushonshorekye bumwe bukuru oburi omuri Luka eshuura 7. Waayetegyereza ngu Yesu ku ‘yaareebire’ omukazi naaganya ‘akamugirira esaasi’? (Omushororongo 13) Obundi Yesu okureeba omukazi ogwo naacura ayebembeire abaabaire beekoreire omutumbi gw’omutabani, kikamureetera kumugirira esaasi. Yesu taragiriire omukazi ogwo esaasi kyonka, kureka akamworeka n’embabazi. Akamuhuumuriza arikugira ati: “Otarira.” Bwanyima Yesu akagira eki yaakora kumuhwera. Akazoora mutabani w’omukazi ogwo yaamumuha.—Omushororongo 14, 15.
15. Nitwegyera ki aha ky’okutangaaza kya Yesu?
15 Nitubaasa kwegyera ki aha ky’okutangaaza kya Yesu eky’okuzoora mutabani w’omufaakazi? Nitwega kugirira esaasi abarikuganya. Amazima gari ngu, titurikubaasa kuzoora abafu nk’oku Yesu yaakozire. Kwonka nka Yesu, nitubaasa kuteeraho kugirira esaasi abarikuganya turikufayo kubeetegyereza. Nitubaasa kwehabura kubagirira embabazi turikukora nari kugamba ebirikubaasa kubahwera n’okubahuumuriza. d (Enf. 17:17; 2 Kor. 1:3, 4; 1 Pet. 3:8) Nangwa n’ebikorwa bikye by’embabazi nibibaasa kubagumya.
16. Nk’oku kirikworekwa omu kishushani, nooyegyera ki aha kyabaire aha mukazi owaabaire aherize kufeerwa omwana we?
16 Teekateeka aha mbeera egi eyaabaireho. Emyaka mikye enyima, obu baabaire nibeeshongora omu ruteerane rw’ekibiina, munyaanyazi-itwe akareeba munyaanyazi-itwe ondiijo owaabaire ari aha rubaju orundi arikurira. Ekyeshongoro kikaba nikikwata aha amatsiko g’okuzooka, kandi akaba aherize kufeerwa omuhara. Munyaanyazi-itwe ahabw’okumanya ekyo, ahonaaho akamuhika haihi yaamukwataho yaayeshongora nawe. Bwanyima munyaanyazi-itwe ogwo akagira ati: “Nkehurira ngu niinkundwa munonga ab’eishe-emwe na banyaanyazi-itwe.” Akashemererwa munonga ahabw’okugira ngu akaba ari omu ruteerane. Akagira ati: “Aha Kyombeko ky’Obukama niyo turikutungira okuhuumurizibwa.” Nitubaasa kugira obwesigye ngu Yehova naareeba ebintu bikye ebi turikukora kandi naatusiima ahabw’okugirira esaasi abafeereirwe kandi “ab’emitima ehendekire.”—Zab. 34:18.
OKWEYEGYESA OKURIKUHAMYA OKWIKIRIZA
17. Twayega ki omu kicweka eki?
17 Noobaasa kugasirwa waataho ekigyendererwa ky’okweyegyesa eby’okutangaaza bya Yesu ebiri omu bitabo by’Engiri. Nitubyegyeraho ngu Yehova na Yesu nibatukunda munonga, Yesu aine amaani g’okumaraho oburemeezi bw’abantu bwona, kandi nitubaasa kugira obwesigye omu migisha y’Obukama bwa Ruhanga. Twaba nitushwijuma eby’okutangaaza ebyo, nitubaasa kuteekateeka oku twine kuteeraho kugira emitwarize nk’eya Yesu. Ahabw’enki otarikutaho ekigyendererwa ky’okweyegyesa nari kugira Okuramya kw’Eka okurikukwata aha by’okutangaaza bya Yesu ebindi? Fayo kugira amashomo agu waayega, kandi ogagambireho n’abandi. Noija kugira bingi ebi oraakorese kugumya n’okwombeka abandi.—Rom. 1:11, 12.
18. Nituza kugamba ahari ki omu kicweka ekirikukurataho?
18 Obu Yesu yaabaire ari haihi kuhendera obuheereza bwe, akakora eky’okutangaaza ky’okuzooka ekya kashatu. Kwonka eki kikaba nikitaana aha bindi, akazoora munywani we omukundwa, kandi akakikora omu mbeera zitari za butoosha. Niki eki turikwegyera aha ky’okutangaaza ekyo? Nitubaasa kuhamya tuta okwikiriza kwaitu omu matsiko g’okuzooka? Ekicweka ekirikukurataho nikiza kugarukamu ebibuuzo ebyo.
EKYESHONGORO 20 Okahayo Omwana Waawe ow’Omuhendo
a Akacureeza eihunga ry’amaani, yaakiza abarwaire, kandi yaazoora abafu. Ka nikishemeza kushoma aha by’okutangaaza ebi Yesu yaakozire! Eby’okutangaaza ebyo tibirahandiikirwe omu Baibuli kutushemeza, kureka bikahandiikwa kutwegyesa. Twaba nitushwijuma bimwe aharibyo, nituza kwetegyereza oku birikubaasa kuhamya okwikiriza kwaitu omuri Yehova na Yesu, kandi tureebe n’emitwarize y’Ekikristaayo ei twine kuteeraho kugira.
b Omucondooza omwe wa Baibuli naashoboorora ati: “Omu mwanya ogwo obufura kikaba kiri ekintu kikuru, n’ahabw’ekyo omuntu akaba agabura ebirikukira ebi abagyenyi be barikumara. Okworeka obufura na munonga aha bugyenyi, kikaba nikyetengyesa kugabura eby’okurya n’eby’okunywa bingi munonga.”
c Ebitabo by’Engiri nibigamba aha by’okutangaaza ebirikurenga 30 ebi Yesu yaakozire. Kandi, obumwe eby’okutangaaza ebirikukira obwingi nibigambwaho kumwe. Eizooba rimwe, abantu boona ‘b’omu tauni’ bakateeranira ahu Yesu yaabaire ari kandi ‘akakiza baingi abaabaire barwaire.’—Mak. 1:32-34.
d Kubaasa kumanya ebi orikubaasa kugambira abarikuganya nari eki oraabakorere reeba ekicweka “Huumuriza Abafeereirwe Nk’oku Yesu Yaakozire,” omu Watchtower eya Novemba 1, 2010.
e ENSHOBOORORA Y’EKISHUSHANI: Yesu ayemereire enyima, naareeba abagore n’abagyenyi baabo barikunywa viinyo.
