1. Twine buhame ki?

 ITWE abaheereza ba Yehova, nitumanya ngu naatukunda kandi naayenda ngu twesiimire embeera ezirikukirayo oburungi. (Rom. 8:35-39) Kandi nituhamiza kimwe ngu twagyendera aha misingye ya Baibuli nitugasirwa. (Isa. 48:17, 18) Kwonka shi, ku twakuhikwaho embeera zigumire kitaraariire?

2. Nitubaasa kuhikwaho buremeezi ki, kandi nibubaasa kutureetera kwebuuza ki?

² Abaheereza ba Yehova boona baine oburemeezi obu barikwemera. Nk’eky’okureeberaho, omwe aha b’eka yaitu naabaasa kutureebya. Nitubaasa kugira amagara mabi kitureetere kutuubya aha bi turikubaasa kukora omu buheereza. Nitubaasa kuhikwaho ebirikureetwaho ekihikiirizi. Nari nitubaasa kuhiiganisibwa ahabw’ebi turikwikiriza. Twahikwaho embeera nk’ezo, nitubaasa kwebuuza tuti: ‘Ahabw’enki eki kimbaireho? Haine ekintu kibi eki nkozire? Mbwenu shi eki nikyoreka ngu tinkiine bushagiki bwa Yehova?’ Oreehuriireho otyo? Ku kiraabe nikwo kiri, otahwamu amaani. Abaheereza ba Yehova baingi abeesigwa nibateganisibwa enyehurira nk’ezo.—Zab. 22:1, 2; Hab. 1:2, 3.

3. Nitwega ki omuri Zaaburi 34:19?

³ Shoma Zaaburi 34:19. Yetegyereze enshonga ibiri nkuru omu zaaburi egi: (1) Abantu abahikiriire nibahikwaho oburemeezi. (2) Yehova naatuhwera twagyezibwa. Yehova naatuhwera ata? Eki naakikora arikutuhwera kureeba embeera omu  ensi egi omu muringo guringaniire. N’obu Yehova arikuturaganisa ngu nitwija kushemererwa twamuheereza, tarikugira ngu titurikwija kuhikwaho oburemeezi. (Isa. 66:14) Naatuhiga kuta omutima ahari nyentsya yaitu, obu turaabe nitutuura omu mbeera ezi arikwenda ngu twesiimire ebiro byona. (2 Kor. 4:16-18) Ekyo kitakabaireho, naatuhwera kugumizamu nitumuheereza buri izooba.—Tonz. 3:22-24.

4. Nituza kushwijuma ki omu kicweka eki?

⁴ Ka tureebe eki turikubaasa kwegyera aha baheereza ba Yehova abeesigwa aba ira n’ab’obunaku obu. Nk’oku turikuza kureeba, nitubaasa kuhikwaho oburemeezi kitaraariire. Kwonka twayesiga Yehova, naija kuguma naatuhwera. (Zab. 55:22) Twaba nitushwijuma eby’okureeberaho ebyo, yebuuze oti: ‘Nkaba ninyija kutwaza nta omu mbeera nk’egyo? Eby’okureeberaho ebyo nibimpwera bita kwongyera kwesiga Yehova? Nimbyegyeraho mashomo ki agu ndikubaasa kugyenderaho?’

5. Ni buremeezi ki obu Yakobo yaatungire ahabwa Labaani? (Reeba ekishushani ekiri aha kipampagare.)

⁵ Abaheereza ba Yehova aba ira bakahikwaho embeera zigumire kitaraariire. Teekateeka ahari Yakobo. Ishe akamugambira kusherura omukazi omuri bahara ba Labaani omunyabuzaare waabo owaabaire naaheereza Ruhanga, kandi yaamuhamiza ngu Yehova naija kumuha emigisha. (Kut. 28:1-4) Kandi Yakobo nikyo yaakozire. Akaruga Kanaani yaaza omu ka ya Labaani, owaabaire aine abaishiki babiri, Lea na Rakeeli. Yakobo akarigira muhara wa Labaani, Rakeeli, kandi yaikiriza kukorera Ishe emyaka mushanju atakashwire muhara we. (Kut. 29:18) Kwonka ebintu tibiragyenzire nk’oku Yakobo yaabaire naateekateeka. Labaani akamureebya yaamuha Lea, muhara we omukuru. Bwanyima ya saabiiti, Labaani akaikiriza Yakobo kushwera Rakeeli, kwonka akamugira ngu aine kumukorera emyaka mushanju endiijo. (Kut. 29:25-27) Kandi Labaani akaryangatanisa Yakobo n’omu nshonga z’eby’obushuubuzi. Labaani akagobeza Yakobo kumara emyaka 20!—Kut. 31:41, 42.

6. Ni buremeezi ki obundi obu Yakobo yaagumisiririize?

⁶ Yakobo akagumisiriza oburemeezi obundi. Akaba aine eka mpango, kandi butoosha abatabani bakaba baine obutaikirizana. Nangwa bakaguza Yosefu murumuna waabo omu buhuuku. Batabani ba Yakobo babiri Simeoni na Leevi, bakagwisiza eka yaabo akagwe kandi baajumisa eiziina rya Yehova. Ekindi, Rakeeli omukazi we omukundwa, akafa arikuzaara omwana waabo wa kabiri. Kandi ahabw’enjara y’amaani, Yakobo akagyemeserezibwa kuza Misri ari omugurusi.—Kut. 34:30; 35:16-19; 37:28; 45:9-11, 28.

7. Yehova akooreka ata ngu naasiima Yakobo?

⁷ Kwonka omu mbeera ezo zoona, Yakobo akaguma naikiririza omuri Yehova n’omu biraganiso bye. Kandi, Yehova akahamiza Yakobo ngu naamusiima. Nk’eky’okureeberaho, n’obu Labaani araabe yaabaire ari engobya, Yehova akaha Yakobo emigisha yaatunga ebintu bingi. Kandi teekateeka oku Yakobo yaasiimire Yehova ku yaagarukire kureeba mutabani we Yosefu ou yaabaire naamanya ngu akafa. Yakobo akabaasa kwemera oburemeezi ahabw’okugira ngu akaba aine omukago guhami na Yehova. (Kut. 30:43; 32:9, 10; 46:28-30) Twaguma twine omukago guhami na Yehova nitubaasa kugumisiriza oburemeezi oburikubaho kitaraariire.

8. Omugabe Daudi akaba naayenda kukora ki?

⁸ Omugabe Daudi akaba atarikubaasa kukora byona ebi yaabaire naayenda omu kuheereza Yehova. Nk’eky’okureeberaho, akaba aine ekihika ky’okwombekyera Ruhanga  hekalu. Akagambira nabi Nasani eki yaabaire naayenda kukora. Nasani akamugarukamu ati: “Kora ekikuri aha mutima kyona, ahakuba Ruhanga ari hamwe naiwe.” (1 Bus. 17:1, 2) Ebigambo ebyo byiine kuba byagumize Daudi. Obundi ahonaaho akatandika kwetebeekanisiza omurimo muhango ogwo.

9. Daudi akatwaza ata ku baamugambiire amakuru mabi?

⁹ Omu bwire bukye, nabi wa Yehova akagaruka kureeba Daudi amwiniire amakuru garikumaramu amaani. “Ekyo kiro,” Yehova akagambira Nasani ngu Daudi tiwe araayombeke hekalu, kureka omwe ahari batabani be niwe yaabaire naija kugyombeka. (1 Bus. 17:3, 4, 11, 12) Daudi akatwaza ata ku yaagambiirwe amakuru ago? Akahindura ekigyendererwa kye. Akata omutima aha kurundaana esente n’ebikoreso ebi omutabani Sulemaani yaabaire naija kukoresa kuhikiiriza omurimo ogwo.—1 Bus. 29:1-5.

10. Yehova akaha ata Daudi emigisha?

¹⁰ Yehova ku yaaherize kumanyisa Daudi ngu tiwe araayombeke hekalu, ahonaaho akakora nawe endagaano. Yehova akaraganisa Daudi ngu omwe ahari baijukuru be naija kutegyeka ebiro byona. (2 Sam. 7:16) Omu nsi ensya, Daudi ka naija kushemererwa munonga ku araamanye ngu ari ahansi y’Obutegyeki bw’Emyaka Rukumi obwa Yesu, omwe aha baijukuru! Eki nikituhwera kwetegyereza ngu n’obu turaabe tutarikubaasa kukora byona ebi turikwenda omu buheereza, Ruhanga waitu naabaasa kuba atubiikiire emigisha mingi ei tutarikuteekateeka.

11. Abakristaayo omu kyasha ky’okubanza bakatunga migisha ki, n’obu Obukama bwa Ruhanga bwabaire butakatandikire kutegyeka? (Ebyakozirwe 6:7)

¹¹ Abakristaayo omu kyasha ky’okubanza nabo bakahikwaho oburemeezi kitaraariire. Nk’eky’okureeberaho, bakaba baine ekihika ky’okureeba Obukama bwa Ruhanga nibutandika kutegyeka, kwonka batarikumanya obu ekyo kiraabeho. (Byak. 1:6, 7) Mbwenu shi bakakora ki? Bakagumizamu nibejumbira kimwe omu murimo gw’okubuurira. Amakuru marungi ku gaayongyeire kujanjaara, kikabahamiza ngu Yehova akaba naaha omugisha ebi baabaire nibakora.—Shoma Ebyakozirwe 6:7.

12. Abakristaayo omu kyasha ky’okubanza bakakora ki ku haabaireho enjara?

¹² Omu bwire obwo, hakabaho enjara y’amaani “omu nsi yoona.” (Byak. 11:28) Enjara egyo ekakwata n’aha Bakristaayo b’ekyasha ky’okubanza. Noobaasa kuteebereza oku Abakristaayo abo babonaboine ahabw’enjara y’amaani egyo? Hatariho kubangaanisa emitwe y’amaka bakeerarikirira aha ku baabaire nibaija kubaisaho ab’eka yaabo. Kandi shi abato abaabaire baine ekigyendererwa ky’okwongyera aha buheereza bwabo? Mbwenu shi nibabaasa kuba baateekateekire ngu baine kutegyerezaho? N’omu embeera egyo, bakakora eki baabaire nibabaasa. Bakagumizamu nibabuurira kandi barikuhwera Abakristaayo bagyenzi baabo ab’omuri Buyudaaya barikubagana nabo ebi baabaire baine.—Byak. 11:29, 30.

13. Abakristaayo bakatunga migisha ki obu haabaho enjara?

¹³ Abakristaayo bakatunga migisha ki obu haabaho enjara? Abaatungire obuhwezi bakeetegyereza ngu Yehova akaba naabahwera. (Mat. 6:31-33) Eki kiine kuba kyabareetaire kwongyera kwirira haihi Abakristaayo bagyenzi baabo abaabahweraire. Abaahaireyo esente nari ebintu kuhwera bakatunga okushemererwa okurikuruga omu kuha abandi. (Byak. 20:35) Yehova akaha boona emigisha ahabw’okukora eki baabaire nibabaasa omu mbeera ezo.

14. Niki ekyahikire ahari Barunaba n’entumwa Paulo, kandi hakarugamu ki? (Ebyakozirwe 14:21, 22)

 ¹⁴ Abakristaayo omu kyasha ky’okubanza bakaba nibakira kuhiiganisibwa, obumwe kitaraariire. Teekateeka aha kyahikire ahari Barunaba n’entumwa Paulo obu baabaire nibabuurira omuri Lusitura. Omu kubanza abantu b’ekicweka ekyo bakabakiira gye baabahurikiza. Bwanyima, abahakanisa bakabeihabeiha abantu abo kandi bamwe aharibo bakateera Paulo amabaare baamureka ari haihi kufa. (Byak. 14:19) Kwonka Barunaba na Paulo bakagumizamu nibabuurira omu myanya endiijo. Hakarugamu ki? ‘Bakahindura abeegi baingi,’ kandi eky’okureeberaho kyabo n’ebigambo byabo bikagumya Abakristaayo bagyenzi baabo. (Shoma Ebyakozirwe 14:21, 22.) Baingi bakagasirwa ahabw’okugira ngu Barunaba na Paulo bakagumizamu nibabuurira n’obu baabaire nibahiiganisibwa. Twagumizamu nitukora omurimo gwa Yehova, naija kutuha emigisha.

15. Nooyegyera ki aha w’eishe-emwe A. H. Macmillan?

¹⁵ Omwaka 1914 gutakahikire, abaheereza ba Yehova bakaba baine ekihika ky’okureeba ebintu bimwe nibibaho. Teekateeka aha ky’okureeberaho, ky’Ow’eishe-emwe A. H. Macmillan. Nka baingi omu bunaku obwo, Ow’eishe-emwe Macmillan akaba naateekateeka ngu ari haihi kuza omu iguru. Omu rubazo oru yaahaire Seputemba 1914, akagira ati: “Oru nirubaasa kuba ruri orubazo rwangye rwa boona orw’aha muheru. Kwonka tikwo kyabaire. Ow’eishe-emwe Macmillan bwanyima akahandiika ati: “Obundi bamwe omuriitwe turahukiriize kuteekateeka ngu nituza kuza omu iguru ahonaaho.” Akongyeraho ati: “Eki twine kukora n’okwehenenga omu murimo gwa Mukama.” Kandi ow’eishe-emwe Macmillan nikyo yaakozire. Akaguma ari omweziriki omu buheereza. Akatunga omugisha gw’okugumya ab’eishe-emwe baingi abaabaire bakomirwe ahabw’okwanga kuza omu mahe. Kandi akagumizamu naaza omu nteerane z’ekibiina n’obu yaabaire ari omugurusi. Ow’eishe-emwe Macmillan akagasirwa ata ahabw’okukoresa gye obwire bwe ategyereize ekihembo kye? Ari haihi kufa omuri 1966, akahandiika ati: “Okwikiriza kwangye kutwire kuhami.” Ka yaatuteeraireho eky’okureeberaho kirungi eki tushemereire kutooreza, na munonga haaba hariho oburemeezi obu tugumisirize kumara obwire buraingwa!—Heb. 13:7.

16. Ow’eishe-emwe Herbert Jennings n’omukazi we bakahikwaho buremeezi ki? (Yakobo 4:14)

¹⁶ Abaheereza ba Yehova baingi nibagira amagara mabi kitaraariire. Nk’eky’okureeberaho, Ow’eishe-emwe Herbert Jennings b omu byafaayo bye akagamba aha ku we n’omukazi we baabaire bashemereirwe munonga omu buheereza bwabo bw’obumiisani omuri Ghana. Bwanyima, akagira endwara y’amaani erikureetera omuntu kurahuka kuhinduka omu nyehurira. Arikwihirira aha bigambo ebiri omu Yakobo 4:14, Ow’eishe-emwe Jennings akagyeta embeera y’okutamanya “ekiraabeho nyencakare.” (Kishome.) Akahandiika ati: “Tukaba twine kwikiriza embeera yaitu nk’oku eri, n’ahabw’ekyo tukacwamu kuruga Ghana twatsigaho banywani baitu baingi twagaruka Canada [kutunga obujanjabi].” Yehova akahwera Ow’eishe-emwe Jennings n’omukazi we kugumizamu nibamuheereza omu bwesigwa n’obu baatungire oburemeezi.

17. Eky’okureeberaho ky’ow’eishe-emwe Jennings nikigasira kita ab’eishe-emwe bagyenzi be?

¹⁷ Ebyafaayo by’Ow’eishe-emwe Jennings bihweraire baingi. Munyaanyazi-itwe omwe  akahandiika ati: “Ku naashomire ebirikukwata aha w’eishe-emwe ogwo nkagasirwa munonga okukira obundi bwona. . . . Okumanya ngu ow’eishe-emwe Jennings akabaasa kutsigaho obuheereza bwe kuza kutunga obujanjabi kikampwera kwegiraho emiteekateekyere eringaniire.” Ow’eishe-emwe ondiijo akahandiika ati: “Bwanyima y’okuheereza nk’omureeberezi kumara emyaka ikumi, nkarekyera aho ahabw’endwara y’omutwe. Okwehurira nk’oremirwe kikaba nikikira kundeetera kugira amaganya naashoma ebyafaayo by’abandi.  . . . Kwonka eky’okureeberaho ky’okugumisiriza eky’ow’eishe-emwe Jennings’ kikangumya.” Ekyo nikitwijutsya ngu twagumisiriza oburemeezi oburikutuhikaho kitaraariire nitugumya abandi. N’obu ebintu byakuba bitagyenzire nk’oku tubaire nituteekateeka, nabwo nitubaasa kutaho eky’okureeberaho kirungi ky’okwikiriza n’okugumisiriza.—1 Pet. 5:9.

18. Nk’oku kirikworekwa omu bishushani, nooyegyera ki aha ky’okureeberaho ky’omufaakazi kuruga Nigeria?

¹⁸ Ebigwererezi nka COVID-19 biraabanisemu abaheereza ba Yehova baingi. Nk’eky’okureeberaho, Omufaakazi omwe kuruga Nigeria akaba atsigaize ebintu bikye by’okwebaisaho. Akasheeshe kamwe, omuhara akamubuuza eki baabaire nibaza kurya bwanyima y’okuteeka ekikopo ky’omukyeri eki baabaire baine. Akagambira omuhara ngu tibaine esente nari eby’okurya ebindi, kwonka baine kutooreza omufaakazi wa Zarefaasi, bateeke eby’okurya ebi baine byonka, reero beesigire kimwe Yehova. (1 Bag. 17:8-16) Batakateekateekire aha eki baraarye kyamushana bakatunga eby’okurya kuruga aha b’eishe-emwe bagyenzi baabo. Eby’okurya ebi baatungire bikaba nibibaasa kumara saabiiti ibiri n’okurengamu. Munyaanyazi-itwe akagira ngu akaba atarikumanya ngu Yehova akaba ahuriire ebi yaabaire naagambira omuhara.  Buzima, twaba nitwesiga Yehova, oburemeezi oburikubaho kitaraariire nibubaasa kutureetera kwongyera kumwirira haihi.—1 Pet. 5:6, 7.

19. Aleksey Yershov agumisirize kuhiiganisibwa ki?

¹⁹ Omu myaka mikye enyima, ab’eishe-emwe na banyaanyazi-itwe baingi bagumisiriize okuhiiganisibwa okubahikireho kitaraariire. Teekateeka aha w’eishe-emwe Aleksey Yershov, orikutuura omuri Russia. Abaheereza ba Yehova omu ihanga eryo bakaba baine obugabe buringaniire obu Ow’eishe-emwe Yershov yaabatizibwa omuri 1994. Kwonka omu myaka eyaakuratsireho, embeera omuri Russia zikahinduka. Omu 2020, bakataahirira eka y’Ow’eishe-emwe Yershov, baagikyaaka kandi baatwara bingi aha bintu bye. Bwanyima y’ameezi, gavumenti ekamutaho emanja. Eky’obusaasi, emanja ezi baamutaireho zikaba nizeegamira ahari vidiyo eyaakwatsirwe omuntu owaamazire obwire oburikurenga omu mwaka gumwe arikweshushaniriza nk’orikwega Baibuli. Ka yaabaire ari endeebya!

20. Ow’eishe-emwe Yershov akahamya ata omukago gwe na Yehova?

²⁰ Hariho ekirungi kyona ekyarugire omu kuhiiganisibwa kw’ow’eishe-emwe Yershov? Eego. Omukago gwe na Yehova gukoongyera kuhama. Akagira ati: “Nyowe n’omukazi wangye tukashaba emirundi mingi. Nketegyereza ngu nkaba ntarikwija kugumisiriza embeera egyo ntaine buhwezi bwa Yehova.” Naayongyeraho ati: “Okweyegyesa nikumpwera kusingura ebirikumaramu amaani. Ninteekateeka aha by’okureeberaho by’abaheereza ba Yehova abeesigwa aba ira. Hariho eby’okureeberaho bingi omu Baibuli ebirikworeka oku kiri kikuru kuguma twikaikaine kandi turikwesiga Yehova.”

21. Twayega ki omu kicweka eki?

²¹ Twayega ki omu kicweka eki? Embeera omu nsi egi nizibaasa kuhinduka kitaraariire. Kwonka nabwo, butoosha Yehova naahwera abaheereza be baamwesiga. Nk’oku kirikworekwa omu kyahandiikirwe kikuru ky’ekicweka eki, “ebibonabono by’ohikiriire ni bingi; kwonka [Yehova] abimwihamu byona.” (Zab. 34:19) Ka tumaririire kuguma tutaire omutima aha buhwezi obu Yehova arikutuha, beitu butari buremeezi bwaitu. Nk’entumwa Paulo, nitwija kubaasa kugira tuti: “Amaani agarikukirira kimwe n’aga Ruhanga, ti gaitu.”—2 Kor. 4:7.