1. Abamwe nibeehurira bata aha bikwatiraine n’okugamba n’abantu omu kubuurira? (Reeba n’ekishushani.)

 ITWE abaheereza ba Yehova, nitubuurira abandi ahabw’okugira ngu nitukunda Tataitwe ow’omu iguru, kandi nitwenda kubahwera kumumanya. Ababuurizi abaingi nibashemererwa baaba bari omu kubuurira. Kwonka abandi tibarikushemererwa. Ahabw’enki? Abamwe nibabaasa kuba baine enshoni kandi batarikweyesiga. Abandi nibagumirwa kuza omu maka g’abandi bateetsirwe. Abandi nibabaasa kutiina kwangwa. Kandi abamwe bakeegyesibwa kwetantara kugwisa kubi abandi. N’obu ab’eishe-emwe na banyaanyazi-itwe abo baraabe nibakunda munonga Yehova, nibagumirwa kubuurira abu batarikumanya amakuru marungi. Kwonka nabwo, nibamanya obukuru bw’omurimo ogu, kandi nibagwejumbamu butoosha. Ekyo ka nikishemeza Yehova!

2. Ahabw’enki otaine kuhwa amaani, waaba noogumirwa kushemererwa omu buheereza?

² Obumwe noogumirwa kugira okushemererwa omu buheereza ahabw’enyehurira nk’ezo? Kyaba nikwo kiri, otahwa amaani. Waaba otarikweyesiga nikibaasa kworeka ngu ori omucureezi, kandi torikwenda kwetaho omutima nari kuhondana n’abandi. Kandi tihariho orikwenda abandi bamutwarize kubi, na munonga yaaba naateeraho kubakorera ebirungi. Sho ow’omu iguru naamanya gye oburemeezi obu orikurabamu, kandi naayenda kukuha obuhwezi oburikwetengyesa. (Isa. 41:13) Omu kicweka eki, nituza kushwijuma obuhabuzi bw’emiringo etaano oburikubaasa kutuhwera kusingura enyehurira nk’ezo, n’oku turikubaasa kwongyera kushemererwa omu buheereza.

 IKIRIZA EKIGAMBO KYA RUHANGA KUKUGUMYA

3. Niki ekyahweraire nabi Yeremia kubuurira abandi?

³ Kuruga ira, obutumwa kuruga omu Kigambo kya Ruhanga butwire nibugumya abaheereza be barikuhikiiriza obujunaanizibwa bugumire. Teekateeka ahari nabi Yeremia. Akatiina, Yehova ku yaamuhaire obujunaanizibwa bw’okubuurira. Yeremia akagira ati: “Tindikumanya kugamba, ahabw’okuba nkiri muto.” (Yer. 1:6) Akabaasa ata kusingura okutiina? Ekigambo kya Ruhanga kikamugumya. Akagira ati: “Omu mutima gwangye oshusha oti harimu omuriro ogurikubuguma oguri omu magufa gangye, okufa mamigye nikundutsya kandi tindikukubaasa.” (Yer. 20:​8, 9) N’obu Yeremia yaabaire aine ekicweka kigumire, obutumwa obu yaahairwe kubuurira bukamuha amaani agaabaire nigetengyesa kukora omurimo ogwo.

4. Niki ekirikubaho twashoma Ekigambo kya Ruhanga kandi tukakiteekateekaho? (Abakolosai 1:​9, 10)

⁴ Abakristaayo nibatunga amaani kuruga omu butumwa oburi omu Kigambo kya Ruhanga. Obu entumwa Paulo yaahandiikira ekibiina kya Kolosai akagira ngu okumanya okuhikire kukaba nikwija kuhiga ab’eishe-emwe ‘kugyenda nk’oku aba [Yehova] bashemereire,’ obwo barikugumizamu ‘nibaana ebyana omu mirimo yoona emirungi.’ (Shoma Abakolosai 1:​9, 10.) Emirimo mirungi egyo neetwariramu okubuurira amakuru marungi. N’ahabw’ekyo, twashoma Ekigambo kya Ruhanga kandi tukakiteekateekaho, okwikiriza kwaitu omuri Yehova nikuhama, kandi nitwongyera kwetegyereza gye obukuru bw’okugambira abandi obutumwa bw’Obukama.

5. Nitubaasa kwongyera tuta kugasirwa omu bi turikushoma omu Baibuli n’ebi turikwega?

⁵ Kubaasa kugasirwa omu Kigambo kya Ruhanga, twine kwetantara kurahukiiriza turikukishoma, turikukyega, na twaba nitukiteekateekaho. Twine kwetwara. Waashoma ekyahandiikirwe kikakugumira kwetegyereza, otakyehuzya. Omu mwanya gw’ekyo, koresa Watch Tower Publications Index nari Akatabo k’Okucondooza ak’Abajurizi ba Yehova kutunga ebirikushoboorora omushororongo ogwo. Waayetwara orikweyegyesa, noija kwongyera kuhamya ngu ebiri omu Kigambo kya Ruhanga bihikire. (1 Tes. 5:21) Oku orikwongyera kugira obwesigye, nikwo oraayongyere kushemererwa orikugambira abandi ebi oyegire.

 YETEBEEKANISIZE GYE OBUHEEREZA

6. Ahabw’enki twine kwetebeekanisiza gye obuheereza?

⁶ Waayetebeekanisiza gye obuheereza, noija kubaasa kugamba n’abantu oikaikaine. Yesu akahwera abeegi be kwetebeekanisa atakaboheriize omu buheereza. (Luk. 10:​1-11) Ahabw’okugira ngu bakagyendera aha bi yaabeegyeise, bakashemererwa ahabw’ebi babaasize kukora.—Luk. 10:17.

7. Nitubaasa kwetebeekanisiza tuta obuheereza? (Reeba n’ekishushani.)

⁷ Nitubaasa kwetebeekanisiza tuta obuheereza? Twine kuteekateeka oku turikubaasa kugamba amazima omu bigambo byaitu. Kandi, nikiija kutuhwera twateekateeka bukiri kare aha nshonga ibiri nari ishatu ezi abantu omu kicweka kyaitu barikukira kwekwatsa, n’oku turikubaasa kubagarukamu. Reero twaba nitugamba n’abantu, nitubaasa kuteeraho kwikaikana, kumwenya, n’okworeka ngu nitubakunda.

8. Ni mu muringo ki oku Abakristaayo bari nk’enyabya z’eibumba ezi entumwa Paulo yaagambireho?

⁸ Entumwa Paulo akooreka obujunaanizibwa bwaitu omu murimo gw’okubuurira obu yaagira ati: “Obutungi obu tubwine omu nyabya z’eibumba.” (2 Kor. 4:7) Obutungi obwo niki? N’omurimo gw’okujuna amagara ogw’okubuurira obutumwa bw’Obukama. (2 Kor. 4:1) Enyabya z’eibumba niki? Nizijwekyera abaheereza ba Ruhanga, abarikutwarira abandi amakuru marungi. Omu bwire bwa Paulo, abashuubuzi bakaba nibakoresa enyabya z’eibumba kutwariramu ebintu by’omuhendo, nk’eby’okurya, viinyo, n’esente. Nikyo kimwe, Yehova atukwatsize obutumwa bw’omuhendo nigo makuru marungi. Ahabw’okuhwerwa Yehova, twine amaani agarikwetengyesa kugumizamu nitubuurira.

SHABA KUGIRA OBUMANZI

9. Nitubaasa kusingura tuta okutiina abantu nari okwangwa? (Reeba n’ekishushani.)

⁹ Obumwe, nitubaasa kutiina abantu nari tutiine kwangwa. Nitubaasa kusingura tuta oburemeezi obwo? Teekateeka aha ki entumwa baakozire obu baaragiirwa kutagaruka kubuurira. Omu mwanya gw’okutiina, bakashaba Yehova kubahwera “kugamba ekigambo [kye] n’obumanzi bwona.” Kandi akagarukamu okushaba kwabo ahonaaho. (Byak. 4:​18, 29, 31) Obumwe twatiina abantu, naitwe twine kushaba Yehova kutuhwera. Mushabe  kukuhwera kusingura okutiina abantu ahabwa rukundo ei obainiire.

10. Yehova naatuhwera ata kuhikiiriza obujunaanizibwa bwaitu nk’Abajurizi be? (Isaaya 43:​10-12)

¹⁰ Yehova atutooraine kuba Abajurizi be, kandi naaraganisa kutuhwera kuba emanzi. (Shoma Isaaya 43:​10-12.) Yetegyereze emiringo ena oku arikutuhwera. Ogw’okubanza, Yesu naaba ari hamwe naitwe twaba nitubuurira amakuru marungi. (Mat. 28:​18-20) Ogwa kabiri, Yehova naakoresa baamaraika kutuhwera. (Kush. 14:6) Ogwa kashatu, Yehova naatuha omwoyo ogurikwera kutuhwera kwijuka ebi turikwega. (Yoh. 14:​25, 26) Ogwa kana, Yehova atuhaire ab’eishe-emwe na banyaanyazi-itwe kubuurira naitwe. Ahabw’obuhwezi bwa Yehova n’obushagiki bw’ab’eishe-emwe, twine byona ebirikwetengyesa kuba abasinguzi.

HINDURAMU KURUGIIRIRA AHA MBEERA, KANDI GIRA EMITEEKATEEKYERE MIRUNGI

11. Noobaasa kutunga ota abantu baingi waaba ori omu kubuurira? (Reeba n’ekishushani.)

¹¹ Nikikumaramu amaani ku orikuza kubuurira okashangayo abantu bakye? Noobaasa kwebuuza oti: ‘Abantu abari omu kicweka eki ndikubuuriramu barahi hati?’ (Byak. 16:13) ‘Bari aha murimo nari baaza kugura ebintu?’ Kyaba nikwo kiri, noobaasa kubuurira abantu baingi orikubuurira aha ruguuto? Ow’eishe-emwe orikwetwa Joshua naagira ati: “Mbaasize kubuurira ndikugyendagyenda omu byombeko ebihango ebi barikugurizamu ebintu n’ahu barikwemereza ebiiruka.” We n’omukazi we, Bridget, nibashanga abantu baingi omu ka ku barikubuurira omu mwabazyo na Sande omu ihangwe.—Efe. 5:​15, 16.

12. Nitubaasa kumanya tuta ebi abantu barikwikiriza nari ebirikuberarikiriza?

¹² Abantu baayoreka ngu tibaakunda obutumwa, teeraho kumanya ebi barikwikiriza nari ebirikuberarikiiriza. Joshua na Bridget nibakoresa ekibuuzo ekiri aha mutwe gwa turakiti omu nyanjura yaabo. Nk’eky’okureeberaho, ku barikuba nibakoresa turakiti Baibuli Noogitwara nka Ki? nibagira bati: “Abamwe nibatwara Baibuli nk’Ekigambo kya Ruhanga, abandi tikwo barikugitwara. Iwe nooteekateeka ki?” Eki butoosha nikibahwera kutandika kugaaniira n’abantu.

13. Ahabw’enki nitubaasa kwereeba nk’abasinguzi omu buheereza n’obu abantu barikwanga kutuhurikiza? (Enfumu 27:11)

 ¹³ Okuba abasinguzi omu buheereza tikirikurugiirira aha birungi ebirikurugamu. Ahabw’enki? Ahakuba nituba tukozire eki Yehova n’Omwana we barikwenda ngu tukore, nikwo kubuurira abantu. (Byak. 10:42) N’obu twakuba tutaboine muntu w’okubuurira nari baayanga obutumwa bwaitu, nitubaasa kushemererwa ahabw’okumanya ngu nitushemeza Tataitwe ow’omu iguru.—Shoma Enfumu 27:11.

14. Ahabw’enki nitushemererwa omubuurizi ondiijo yaatunga orikwenda kwega Baibuli omu kicweka ky’okubuuriramu?

¹⁴ Kandi nitubaasa kushemererwa omubuurizi ondiijo yaatunga orikwenda kwega Baibuli omu kicweka ky’okubuuriramu. Omunaara gw’Omurinzi gukagyeragyeranisa omurimo gwaitu gw’okubuurira n’okusherura omwana obuzire. Abantu baingi nibeejumba omu kumusherura omu myanya etari emwe. Ku arikuboneka, orikumubona tiwe arikushemererwa wenka, beitu boona abarikwejumba omu kumusherura. Nikyo kimwe, n’omurimo gw’okuhindura abantu abeegi. Ababuurizi boona nibeejumba omu kubuurira abantu, kandi boona nibashemererwa omuntu musya yaatandika kwija omu nteerane.

TA OMUTIMA AHARI RUKUNDO EI OINIIRE YEHOVA N’ABATAAHI

15. Okugyendera ahari Matayo 22:​37-39 nikituhwera kita kwongyera aha muhimbo gwaitu omu kubuurira? (Reeba n’ekishushani .)

¹⁵ Nitubaasa kwongyera aha muhimbo gwaitu gw’okubuurira turikuta omutima ahari rukundo ei twiniire Yehova n’abataahi. (Shoma Matayo 22:​37-39.) Teekateeka aha kushemererwa oku Yehova arikugira yaareeba nitubuurira, n’oku abantu barikwija kushemererwa baatandika kwega Baibuli. Kandi ijuka ngu baingi abarikuhurikiza obutumwa, kandi bakacwamu kuheereza Yehova nibaija kutuuraho ebiro byona.—Yoh. 6:40; 1 Tim. 4:16.

16. Nitubaasa tuta kugira okushemererwa omu buheereza bwaitu naatwaba tutarikubaasa kuruga omuka? Ha eky’okureeberaho.

¹⁶ Hariho enshonga erikukuremesa kuruga owaawe? Kyaba nikwo kiri, ta omutima aha ki orikubaasa kukora kworeka ngu nookunda Yehova n’abataahi. Omu bwire bw’ekigwererezi kya COVID-19, Samuel na Dania bakaba batarikubaasa kuruga omuka. Omu  bwire obwo obwabaire bugumire, butoosha bakaba nibabuurira barikukoresa esimu, barikuhandiika amabaruha, barikwegyesa abantu Baibuli bari aha Zoom. Samuel akaba abuurira abu yaashanga omu irwariro ahu yaabaire aza kuragurirwa ekookoro. Naagira ati: “Oburemeezi nibutureetera kuhwa amaani omu biteekateeko, omu by’omubiri n’omu by’omwoyo. Nituba twine kusherura okushemererwa omu kuheereza Yehova.” Omu mbeera egyo, Dania akagwa, kandi akaba atarikubaasa kuruga omu kitanda kumara ameezi ashatu. Reero bwanyima akaba aine kuguma omu kagaari kumara ameezi mukaaga. Naagira ati: “Nkateeraho kukora eki embeera yangye yaabaire neembaasisa kukora. Nkabaasa kubuurira omushahokazi owaabaire naandagurira, kandi nkaba mbuurira boona abaabaire nibareeta ebintu omu ka. Kandi nkagaaniira aha simu n’omukazi owaabaire naajwekyera ekitongore ky’eby’obujanjabi.” N’obu Samuel na Dania baabaire batarikubaasa kukora bingi, kwonka bakakora eki baabaire nibabaasa, kandi bakatunga okushemererwa.

17. Noobaasa kugasirwa gye ota omu buhabuzi obu twaheebwa omu kicweka eki?

¹⁷ Obuhabuzi obu twaheebwa omu kicweka eki nibukora gye twabugyenderaho bwona. Buri buhabuzi ni nk’ebirungo ebirikoresibwa omu kuteeka eby’okurya. Ebirungo byakoresibwa kumwe, eby’okurya nibinura. N’ahabw’ekyo, twagyendera aha buhabuzi obwo bwona, nitwija kuba twetebeekaniise gye kusingura enyehurira zitahikire, kandi tugire n’okushemererwa omu buheereza.