1. Paradiso y’eby’omwoyo niki, kandi twine kumariirira kukora ki?

 HARIHO paradiso omu nsi hati erimu abantu abarikukora ebintu bingi birungi, kandi abaine obusingye obwabuzima. Abaahikire omu paradiso egi bamaririire kutagirugamu. Kandi nibenda ngu abantu baingi baije omu paradiso egi. Paradiso egyo niki? Ni paradiso y’eby’omwoyo! a

2. Niki ekirikushemeza ahari paradiso y’eby’omwoyo?

² Ekirikushemeza, Yehova ataireho embeera y’obusingye omu nsi egi eya Sitaane ey’akabi eijwire rwango, n’ebintu bibi. (1 Yoh. 5:19; Kush. 12:12) Ruhanga waitu oine rukundo naareeba ebibi ebirikureetwaho entebeekanisa y’obusingye obu, kandi naatuha oburinzi kubaasa kugumizamu nitumuheereza tushemereirwe. Ekigambo kye nikigamba ahari paradiso y’eby’omwoyo ‘nk’obuhungiro’ obwine oburinzi kandi “nk’omusiri ogurikwitirirwa amaizi.” (Isa. 4:6; 58:11) Ahabw’emigisha ei Yehova arikuha abari omu paradiso egi, nibabaasa kuraba gye omu biro bigumire ebi eby’emperu.—Isa. 54:14; 2 Tim. 3:1.

3. Ebiri omuri Isaaya eshuura 65 bikabanza kuhikiirira bita?

³ Yehova arikukoresa nabi Isaaya akagamba embeera ei abari omu paradiso y’eby’omwoyo baabaire nibaija kubamu. Noobaasa kushoma ebigambo bye omuri Isaaya eshuura 65, ebyabandize kuhikiirira omuri 537 Y.A. Omu bwire obwo, Abayudaaya abaayeteisize bakaruga omu bukwatwa omuri Babulooni bakagaruka omu nsi yaabo. Yehova akaha abaheereza be emigisha, kandi yaabahwera kugaruka kuhindura  Yerusaalemu omwanya murungi, n’okugaruraho hekalu omwanya gw’okuramya okw’amazima omuri Israeli.—Isa. 51:11; Zek. 8:3.

4. Ebiri omuri Isaaya eshuura 65 bihikiriire bita omu bunaku bwaitu?

⁴ Okuhikiirira kw’obunabi bwa Isaaya okwa kabiri kukatandika omuri 1919 Y.A.K. obu abaheereza ba Yehova ab’obunaku obu baaruga omu bukwatwa bwa Babulooni Orukuru. Obwo nibwo paradiso y’eby’omwoyo yaatandika kubaho omu nsi yoona. Ababuurizi b’Obukama abeeziriki bakatandikaho ebibiina bingi, kandi baateeraho kugira emitwarize y’Ekikristaayo. Abashaija n’abakazi abaabaire bari enshaarizi, barikutwaza nk’ey’enyamaishwa ‘bakajwara omuntu ondiijo omusya, owaahangirwe omu nshusha ya Ruhanga omu kuhikiirira.’ (Efe. 4:24) N’amazima, emigisha mingi ei Isaaya yaagambireho neija kubaho omu bwijwire omu nsi ensya. Kwonka n’obunaku obu nitugasirwa omu miringo mingi omu paradiso y’eby’omwoyo. Ka tureebe oku paradiso egi ey’eby’omwoyo erikutureetera kwehurira, n’ahabw’enki tutaine kugirugamu.

OKU ABARI OMU PARADISO Y’EBY’OMWOYO BARIKWEHURIRA

5. Nk’oku kirikworeka omuri Isaaya 65:​13, nitutunga bintu ki omu paradiso y’eby’omwoyo?

⁵ Baine amagara marungi n’oburuhuuko. Obunabi bwa Isaaya nibworeka entaaniso eri aha gati y’abari omu paradiso y’eby’omwoyo n’abatagirimu. (Shoma Isaaya 65:13.) Yehova naahaazya ebyetengo by’omwoyo eby’abaheereza be. Twine omwoyo gwe ogurikwera, Ekigambo kye, n’eby’okurya bingi by’omwoyo kugira ngu ‘turye, . . . tunywe, . . . [kandi] tushemererwe.’ (Gyeragyeranisa Okushuuruurwa 22:17.) Kwonka, abatari mu paradiso y’eby’omwoyo, baine ‘enjara . . . , eiriho . . . , n’enshoni.’ Ekyetengo kyabo ky’eby’omwoyo tikirikwigusibwa.—Amo. 8:11.

6. Ebiri omuri Yoeli. 2:​21-24 nibyoreka ki aha by’okurya by’omwoyo, kandi nibitugasira bita?

⁶ Omu bunabi bwa Yoeli akagamba aha bintu ebirikwetengyesa nk’eby’enjuma, viinyo, amajuta kworeka ngu Yehova naaha abaheereza be ebirikwetengyesa omu bwingi, otwariiremu n’eby’okurya by’omwoyo. (Yoel. 2:​21-24) Nk’eky’okureeberaho atuhaire Baibuli, ebitabo by’ekibiina, omukura gwaitu, enteerane z’ekibiina, enteerane empango ez’ekiro kimwe n’ez’ebiro bishatu. Nitugasirwa omu by’okurya by’omwoyo buri izooba kandi eki nikitureetera kugira amagara marungi n’oburuhuuko.

7. Niki ekirikutuhwera kugira ‘obunanukye bw’omu mutima’? (Isaaya 65:14)

⁷ Baine okushemererwa n’okumarwa. Abaheereza ba Ruhanga baine okushemererwa ahabw’okugira ngu nibasiima Yehova. (Shoma Isaaya 65:14.) Nitugira ‘obunanukye bw’omu mutima’ ahabw’amazima agarikutugumya, ebiraganiso ebirikuhuumuriza ebiri omu Kigambo kya Ruhanga, n’amatsiko agarikwegamira aha kitambo kya Kristo. Twagamba aha bintu ebyo turi n’ab’eishe-emwe na banyaanyazi-itwe nikitureetera kugira okushemererwa okwabuzima.—Zab. 34:8; 133:​1-3.

8. Emitwarize ebiri mikuru y’abari omu paradiso y’eby’omwoyo n’eha?

⁸ Emitwarize ebiri mikuru ei abari omu paradiso y’eby’omwoyo baine, ni rukundo n’obumwe. ‘Okukwatanisa’ oku abaheereza ba Yehova baine nikworeka oku embeera ziraabe ziri omu nsi ensya, ahu baraabe baine obumwe na rukundo erikukira ei baine hati. (Kol. 3:14) Munyaanyazi-itwe omwe naashoboorora eki yaayetegyereize aha baheereza  ba Yehova obu yaabanza kuba nabo, naagira ati: “Nkaba ntarikumanya kushemererwa, nangwa n’omu ka yangye. Abajurizi ba Yehova nibo naabandize kureeba nibooreka rukundo eyaabuzima.” Weena orikwenda kugira okushemererwa okwabuzima n’okumarwa aine kuba omu paradiso y’eby’omwoyo. Oyihireho ebi abantu barikugamba aha baheereza ba Yehova, baine eiziina rirungi na Yehova n’abarikumuramya boona.—Isa. 65:15.

9. Isaaya 65:​16, 17 neeraganisa ki aha bikwatiraine n’oburemeezi obu turikurabamu?

⁹ Baikaikaine kandi batuurize. Isaaya 65:14 nihooreka ngu abarikucwamu kutaguma omu paradiso y’eby’omwoyo ‘nibaborooga ahabw’obusaasi bw’omu mutima, [kandi] nibateera ekiboroogo ahabw’emitima y’obujune.’ Kandi shi byona ebireetaire abaheereza ba Ruhanga obusaasi n’amaganya? Byona nibiija ‘kweba, birugye omu maisho [ga Ruhanga].” (Shoma Isaaya 65:​16, 17.) Yehova naija kumaraho oburemeezi bwaitu bwona, kandi ebiteekateeko bibi nibiija kuba bitakiijukwa.

10. Ahabw’enki n’ogureeba nk’omugisha kuba n’ab’eishe-emwe na banyaanyazi-itwe? (Reeba n’ekishushani.)

¹⁰ Okuba omu nteerane z’Ekikristaayo nikituhuumuriza, tuhurira twikaikaine tutarikuteekateeka aha birikutwerarikiriza omu nsi egi embi. Kandi nituhwera kwongyera aha kwikaikana okuri omu paradiso y’eby’omwoyo twayoreka emitwarize y’omwoyo gurikwera nka, rukundo, okushemererwa, obusingye, embabazi, n’obucureezi. (Gal. 5:​22, 23) Ka twine omugisha gw’omutaano kuba omu kibiina kya Ruhanga! Abarikuguma omu paradiso y’eby’omwoyo nibaija kureeba ekiraganiso kya Ruhanga ‘eky’ensi ensya n’eiguru erisya’ kirikuhikiirira omu bwijwire.

11. Kurugiirira ahari Isaaya 65:​18, 19, nitukwatwaho tuta paradiso y’eby’omwoyo ei Yehova yaatandikireho?

¹¹ Nibeesiima kandi nibasiima. Isaaya neeyoreka enshonga endiijo ahabw’enki twine ‘kushemererwa’ kandi tukeesiimira omu paradiso y’eby’omwoyo. Paradiso egyo ekatandikwaho Yehova. (Shoma Isaaya 65:​18, 19.) Niyo nshonga ahabw’enki arikutukoresa kuhwera abantu kuruga omu bibiina by’ensi ebitarikwegyesa amazima kwija omu paradiso yaitu y’eby’omwoyo. Nitushemererwa ahabw’emigisha ei turikutunga ahabw’okuba omu mazima, kandi twine ekihika ky’okugagambira abandi.—Yer. 31:12.

12. Ebiraganiso ebiri omuri Isaaya 65:​20-24 nibikureetera kwehurira ota, kandi ahabw’enki?

¹² Nitwesiima kandi nitusiima amatsiko agu twine nk’abatuuzi ba paradiso y’eby’omwoyo. Teekateeka ahari byona ebi turareebe kandi  tukakora omu nsi ensya! Baibuli neeraganisa eti: ‘Tiharigaruka kubayo akeereere . . . akarikumara ebiro bikye, n’obu yaakuba omugurusi otarikuhitsya biro bye.’ Nitwija ‘kwombeka amaju, tugatuuremu [kandi] tubyare emizaabibu, turye ebijuma byayo.’ Ti turaije ‘kuhendekyera busha’ ahakuba nitwija kuba turi abu Yehova “ahaire omugisha.” Naaturaganisa oburinzi n’amagara marungi againe ekigyendererwa. ‘Batakeetsire,’ naija kuba naamanya eki buri omwe arikwenda kandi ‘ahaazye ekintu kyona ekihuriire ebi kirikwetenga.’—Isa. 65:​20-24; Zab. 145:16.

13. Isaaya 65:25 nihashoboorora hata empinduka ezi abantu barikukora ku barikutandika kuheereza Yehova?

¹³ Baine obusingye n’oburinzi. Ahabw’obuhwezi bw’omwoyo gurikwera, baingi abaabaire baine emitwarize nk’ey’enyamaishwa bakozire empinduka z’amaani. (Shoma Isaaya 65:25.) Bataireho munonga kweihamu emitwarize etashemeire. (Rom. 12:2; Efe. 4:​22-24) Amazima gari ngu, abaheereza ba Yehova ti bahikiriire, n’ahabw’ekyo nitugumizamu kukora enshobe. Kwonka, Yehova areetaire “abantu boona” kugira obumwe, rukundo n’obusingye obwabuzima. (Tit. 2:11) Ekyo n’eky’okutangaaza eki Ruhanga ow’obushoboorozi bwona wenka arikubaasa kukora.

14. Mbwenu shi ebiri omuri Isaaya 65:25 bihikiriire bita omu mbeera y’ow’eishe-emwe?

¹⁴ Mbwenu shi abantu nibabaasa kuhindura emitwarize yaabo? Teekateeka aha ky’okureeberaho eki. Omutsigazi w’emyaka 20 w’emicwe mibi owaateirwe omu kihome emirundi mingi, akaba naayejumba omu bikorwa by’obushaarizi. Akaba akomirwe ahabw’okwiba emotoka, okuhenda amaju, n’ahabw’ebikorwa bibi ebindi. Akaba naakunda kurwana na buri omwe. Ku yaatandikire kwega Baibuli n’okuza omu nteerane z’abajurizi ba Yehova, akahamya ngu atungire ekintu ky’omuhendo, niyo paradiso y’eby’omwoyo. Bwanyima y’okubatizibwa, akaba naakira kuteekateeka oku ebiri omuri Isaaya 65:25 birikumukwataho. Akahindura emitwarize ye y’obushaarizi eyaabaire eri nk’ey’entare, yaaba ow’obusingye nk’entaama.

15. Ahabw’enki nituteeraho kuhwera abantu baingi kutwegaitaho omu paradiso y’eby’omwoyo, kandi ekyo nitukikora tuta?

¹⁵ Isaaya 65:13 neetandika eti: “Oku nikwo Mukama [Yehova] arikugamba naagira ati.” Omushororongo 25 niguhendera n’ebigambo ebirikugira ngu, “nikwo [Yehova] arikugamba.” Ebi arikugamba butoosha nibibaho. (Isa. 55:​10, 11) Paradiso y’eby’omwoyo n’eyaabuzima. Yehova ataireho eka y’ab’eishe-emwe omu nsi yoona, kandi n’ey’omutaano. Twaba turi n’abaheereza be, nituba twine obusingye n’oburinzi oburinganiire omu nsi egi eijwire obushaarizi. (Zab. 72:7) Ahabw’enshonga ezo, nitwenda kuhwera abantu baingi kutwegaitaho omu paradiso yaitu y’eby’omwoyo. Ekyo nitukikora turikuta omutima aha kuhindura abantu abeegi.—Mat. 28:​19, 20.

OKU TURIKUBAASA KUREETERA ABANDI KWENDA KWIJA OMU PARADISO Y’EBY’OMWOYO

16. Niki ekirikureetera abantu kwenda kwija omu paradiso y’eby’omwoyo?

¹⁶ Buri omwe ahariitwe aine obujunaanizibwa bw’okureetera abandi kwenda kuza omu paradiso y’eby’omwoyo. Nitubaasa kuhikiiriza obujunaanizibwa obwo twatooreza Yehova. Tarikugyema abantu kwija omu kibiina kye. Kureka, omu muringo gwa rukundo ‘naayeyiriza’ haihi abantu. (Yoh. 6:44; Yer. 31:3) Abantu b’emitima mirungi abarikwega aha mitwarize ya Yehova erikushemeza nibahurira barikwenda kumwirira haihi. Emitwarize yaitu mirungi n’ebikorwa byaitu birungi,  nibibaasa kureetera bita abantu kwenda kwija omu paradiso y’eby’omwoyo?

17. Nitubaasa kureetera tuta abandi kwenda kwija omu paradiso y’eby’omwoyo?

¹⁷ Omuringo gumwe oku turikubaasa kureetera abantu kwija omu paradiso y’eby’omwoyo n’okutwariza ab’eishe-emwe bagyenzi baitu omu muringo gwa rukundo kandi ogw’embabazi. Abasya baija omu nteerane zaitu, nitwenda ngu bareebe eki abatarikwikiriza baareebire obundi obu baaza omu nteerane omuri Korinso eya ira. Bakagira bati: “Buzima kwo Ruhanga ari omuriimwe.” (1 Kor. 14:​24, 25; Zek. 8:23) N’ahabw’ekyo, twine kugumizamu nitworobera obuhabuzi bw’okuguma ‘twine obusingye’ na bagyenzi baitu.—1 Tes. 5:13.

18. Niki ekirikubaasa kureetera abantu kwenda kwija omu kibiina?

¹⁸ Butoosha twine kuteeraho kureeba ab’eishe-emwe na banyaanyazi-itwe nk’oku Yehova arikubareeba. Ekyo nitukora turikuta omutima aha mitwarize yaabo mirungi, beitu butari butahikiirira bwabo, oburaahitsye obwire bukahwaho. Nitubaasa kushoboorora oburemeezi bwona omu muringo gwa rukundo ‘turikukorerana gye, tukagirirana embabazi, kandi tukasaasirana.’ (Efe. 4:32) Reero abarikwenda kutwarizibwa batyo nibaija kwenda kwija omu paradiso y’eby’omwoyo. b

GUMA OMU PARADISO Y’EBY’OMWOYO

19. (a) Nk’oku kirikworekwa omu kabokusi  “Bakagyenda Baagaruka,” abamwe bagambire ki bwanyima y’okugaruka omu paradiso y’eby’omwoyo? (b) Twine kumariirira kukora ki? (Reeba n’ekishushani.)

¹⁹ Ka nikitwesiimisa kuba omu paradiso yaitu y’eby’omwoyo! Eboneire munonga, kandi  harimu baingi abarikuhimbisa Yehova kukira ira. Ka tugumizemu kusiima Yehova ahabw’okututeeraho paradiso y’eby’omwoyo! Weena orikwenda kutunga oburuhuuko, okumarwa, okwikaikana, n’oburinzi aine kwija omu paradiso y’eby’omwoyo kandi akagigumamu. Kwonka oyerinde, ahakuba Sitaane naakora kyona eki arikubaasa kutubeihabeiha ngu tugirugyemu. (1 Pet. 5:8; Kush. 12:9) Titwine kumwikiriza kutusingura. Ka tuteereho n’agaitu goona kuhamya ngu paradiso y’eby’omwoyo yaaguma eboneire, eshemeire, kandi erimu obusingye.