1. Yehova naatwenza ki?

 KIMWE aha birikukirayo kushemeza abari omu bushwere n’okuzaara omwana w’amagara marungi. Kwonka, n’obu abazaire barikuba nibamukunda tibarikwenda agume ari omwereere. Nangwa nibeerarikirira munonga yaaba atarikukura. Nikyo kimwe, Yehova naashemererwa twateera orutambwe rw’okubanza kuba abakuratsi ba Yesu, kwonka tarikwenda ngu tugume turi abeereere omu by’omwoyo. (1 Kor. 3:1) Kureka, naayenda ngu tube Abakristaayo ‘abakuzire.’—1 Kor. 14:20.

2. Nituza kushwijuma ki omu kicweka eki?

² Okuba Omukristaayo okuzire nikimanyisa ki? Twine kukora ki kuba abakristaayo abakuzire? Eby’okurya eby’omwoyo ebigumire nibituhwera bita omu kukura kwaitu? Kandi ahabw’enki twine kwetantara kweyesiga ekirenga? Omu kicweka eki, nituza kugarukamu ebibuuzo ebyo.

OKUBA OMUKRISTAAYO OKUZIRE NIKIMANYISA KI?

3. Nikimanyisa ki okuba Omukristaayo okuzire?

³ Ekigambo ky’Orugriika ‘obukuru’ nikibaasa n’okumanyisa “okuba okuzire,” “ohikiriire,” nari “otaine eki abuzirweho.” a (1 Kor. 2:6) Nituba Abakristaayo abakuzire twarekyera aho kuba abeereere omu by’omwoyo tukaba abashaija n’abakazi ab’eby’omwoyo. Kwonka, n’obu twakukura omu by’omwoyo, titwine kurekyera aho kugumizamu nitutunguuka. (1 Tim. 4:15) Twena, otwariiremu n’abato, nitubaasa kukura omu by’omwoyo. Mbwenu shi niki ekirikworeka ngu Omukristaayo akuzire omu by’omwoyo?

4. Noobaasa kumanya ota Omukristaayo okuzire?

⁴ Omukristaayo okuzire n’ogwo orikukora byona ebi Ruhanga arikutwenza, atarikutooranamu ebi arikwenda kukuratira.  Amazima gari ngu, ahabw’obutahikiirira naakora enshobe. Kwonka nabwo, omu mbeera za butoosha naayoreka ngu naateekateeka, kandi naatwaza omu muringo ogurikuhikaana n’ebi Ruhanga arikukunda. Ataireho omuntu omusya, kandi naateeraho kureetera emiteekateekyere ye kuhikaana n’eya Ruhanga. (Efe. 4:​22-24) Ayetendekire kucwamu gye arikwihirira aha biragiro n’emisingye ya Yehova, n’ahabw’ekyo tikirikumwetengyesa kugira ebiragiro bingi kubaasa kumanya oku araatwaze. Ku arikucwamu, naateeraho kuhamira aha ki yaacwamu.—1 Kor. 9:​26, 27.

5. Omukristaayo orikuguma ari omwereere omu by’omwoyo naahikwaho kabi ki? (Abaefeso 4:​14, 15)

⁵ Aha rubaju orundi, Omukristaayo orikuguma ari omwereere omu by’omwoyo naabaasa kuhabisibwa “oburyarya n’obugobya,” kandi aikiriize amakuru gatahikire n’abeehagwire aha mazima. b (Shoma Abaefeso 4:​14, 15.) Naabaasa kugira ihari, obutaikirizana, kurahuka kuguubwa kubi, nari kugwa omu kwohibwa.—1 Kor. 3:3.

6. Ha eky’okureeberaho kworeka eki kirikumanyisa kuba okuzire omu by’omwoyo? (Reeba n’ekishushani.)

⁶ Nk’oku kyaba kyagambirwe, Ebyahandiikirwe nibigyeragyeranisa okukura omu by’omwoyo n’okukura kw’omwana. Omwana naaba atarikumanya bingi, n’ahabw’ekyo naaba aine kurindwa, kandi akareebererwa omuntu okuzire. Nk’eky’okureeberaho, nyina w’omwana naabaasa kumugambira kumukwata omukono barikucwekanisa oruguuto. Omwana yaaguma naakura, nyina naabaasa kumwikiriza kucwekanisa oruguuto ari wenka, kwonka nabwo naamwijutsya kureeba embaju zombi atakacwekaniise. Omwana yaakura, naaba naabaasa kwetantara akabi k’omuringo nk’ogwo. Nk’oku abaana barikwetenga obuhwezi bw’abantu bakuru kubaasa kwetantara akabi, Abakristaayo abeereere omu by’omwoyo nibaba baine kuhwerwa abakuzire kucwamu gye, n’okwetantara akabi akarikubaasa kubahikaho omu by’omwoyo. Kwonka, Abakristaayo abakuzire baaba nibenda kucwamu, nibateekateeka aha misingye ya Baibuli kumanya emiteekateekyere ya Ruhanga aha nshonga, reero bagyendera aha bi baayega.

7. Mbwenu shi Abakristaayo abakuzire omu by’omwoyo nabo nibeetenga obuhwezi bw’abandi?

 ⁷ Mbwenu shi ekyo nikimanyisa ngu Omukristaayo okuzire omu by’omwoyo tarikwetenga obuhwezi bw’abandi? Ngaaha. Obumwe nabo nibashaba obuhwezi. Kwonka, omuntu otakuzire omu by’omwoyo, naabaasa kwenda ngu abandi bamugambire eki aine kukora, nari kuba nibo baamucweramu. Kwonka Omukristaayo okuzire omu by’omwoyo, naagyendera aha buhabuzi bw’obwengye obu abandi barikumuha arikumanya ngu Yehova naayenda ngu buri muntu ‘ayekorere omutwaro gwe wenka.’—Gal. 6:5.

8. Abakristaayo abakuzire omu by’omwoyo nibataana bata?

⁸ Nk’oku abantu bakuru batarikushushana omu ndeebeka, n’Abakristaayo abakuzire omu by’omwoyo baine emitwarize etarikushushana, nk’obwengye, obumanzi, obufura, n’embabazi. Ekindi, Abakristaayo babiri abakuzire omu by’omwoyo nibabaasa kuhikwaho embeera zitarikushushana, bacwemu ebitarikushushana, kwonka birikuhikaana n’Ebyahandiikirwe. Nikyo kimwe, n’omu nshonga ahu buri omwe arikwecweramu arikwihirira aha omuntu we ow’omunda. Tibarikucwera bagyenzi baabo orubanja bacwamu ebirikutaana n’ebyabo. Kureka, nibata omutima aha kuguma baine obumwe.—Rom. 14:10; 1 Kor. 1:10.

TWINE KUKORA KI KUBA ABAKRISTAAYO ABAKUZIRE?

9. Mbwenu shi okukura omu by’omwoyo nikibaho bubaho? Shoboorora.

⁹ Nitubaasa kukura haahinguraho obwire, kwonka okukura omu by’omwoyo tikurikubaho bubaho. Nk’eky’okureeberaho, ab’eishe-emwe na banyaanyazi-itwe omuri Korinso bakaikiriza amakuru marungi, babatizibwa, baatunga omwoyo gurikwera, kandi baagasirwa omu buhabuzi obu entumwa Paulo yaabahaire. (Byak. 18:​8-11) Kwonka, bwanyima y’emyaka babatiziibwe, baingi aharibo bakaba batakakuzire omu by’omwoyo. (1 Kor. 3:2) Nitubaasa kwetantara tuta ekyo kubaho?

10. Twine kukora ki kubaasa kutunguuka omu by’omwoyo? (Yuda 20)

¹⁰ Kubaasa kukura omu by’omwoyo, twine kubanza twagira ekihika ky’okuba bakuru. ‘Abarikukunda okutagira bwengye,’ barikwenda kuguma bari abeereere omu by’omwoyo, tibarikubaasa kutunguuka. (Enf. 1:22) Titurikwenda kuba nk’abantu bakuru, abarikwenda ngu abazaire baabo bagume nibabacweramu. Kureka, nitwenda kwecweramu ebiraatuhwere kugumizamu nitukura omu by’omwoyo. (Shoma Yuda 20.) Waaba nooteeraho kutunguuka omu by’omwoyo, shaba Yehova kukuha ekyetengo n’amaani g’okukora.—Fil. 2:13.

11. Yehova atuhaire ki kutuhwera kutunguuka kuba Abakristaayo abakuzire omu by’omwoyo? (Abaefeso 4:​11-13)

¹¹ Yehova naamanya ngu titurikubaasa kukura omu by’omwoyo ahabwaitu. Atuhaire abariisa n’abeegyesa omu kibiina Ekikristaayo abeeteekateekire kutuhwera ‘kukura’ omu by’omwoyo, ‘kuhika aha rugyero rwa Kristo oruhikire.’ (Shoma Abaefeso 4:​11-13.) Yehova atuhaire n’omwoyo gurikwera kutuhwera kugira “okuteekateeka kwa Kristo.” (1 Kor. 2:​14-16) Kandi, Ruhanga akahandiikisa ebitabo bina by’Engiri kutumanyisa emiteekateekyere ya Yesu, oku yaabaire naagamba, n’oku yaatwarize omu buheereza bwe omu nsi. Waateekateeka, kandi okatwaza nka Yesu, noobaasa kuhika aha kigyendererwa kyawe ky’okuba Omukristaayo okuzire omu by’omwoyo.

 OMUGASHO GW’EBY’OKURYA EBY’OMWOYO EBIGUMIRE

12. “Eby’okubandizaho ebya Kristo” niki?

¹² Kubaasa kukura omu by’omwoyo, titwine kuguma aha ‘by’okubandizaho ebya Kristo,’ nizo nyegyesa z’Ekikristaayo ez’okutandikirwaho. Enyegyesa nk’ezo nizitwariramu okweteisa, okwikiriza, okubatizibwa, n’okuzooka. (Heb. 6:​1, 2) Kandi nizo zirikukora omusingi gw’Obukristaayo. Ahabw’enshonga egyo, entumwa Petero akazigambaho arikubuurira omutwe muhango gw’abantu aha Pentekoote. (Byak. 2:​32-35, 38) Twine kwikiriza enyegyesa nkuru ezi kubaasa kuba abeegi ba Kristo. Nk’eky’okureeberaho, Paulo akooreka ngu omuntu weena otarikwikiririza omu kuzooka naaba atari Mukristaayo owaabuzima. (1 Kor. 15:​12-14) Kwonka, titwine kugarukira aha kumanya amazima agoorobi gonka.

13. Twine kukora ki kubaasa kugasirwa omu by’okurya by’omwoyo ebigumire ebirikugambwaho omu Abaheburaayo 5:14? (Reeba n’ekishushani.)

¹³ Okutaana n’enyegyesa ez’okubandizaho, eby’okurya eby’omwoyo ebigumire tibirikutwariramu ebiragiro bya Yehova byonka, beitu n’emisingye ye, erikutuhwera kwetegyereza emiteekateekyere ye. Kubaasa kugasirwa omu by’okurya ebyo, twine kweyegyesa ebiri omu Kigambo kya Ruhanga, tukabiteekateekaho, kandi tukabigyenderaho. Twakora tutyo, nituba nitwetendeka kucwamu ebirikushemeza Yehova. c—Shoma Abaheburaayo 5:14.

14. Paulo akahwera ata Abakorinso kukura omu by’omwoyo?

¹⁴ Abakristaayo abatakuzire omu by’omwoyo nibagumirwa kucwamu gye baayeshanga omu mbeera erikubetengyesa kugyendera aha misingye ya Baibuli n’okugigyenderaho. Abamwe nibateekateeka ngu nibabaasa kukora eki barikwenda, haaba hatariho kiragiro kya Baibuli. Abandi nibabaasa kwenda ngu habeho ekiragiro n’obu ekyo kyakuba kitarikwetengyesa. Nk’eky’okureeberaho, nikireebeka ngu Abakristaayo omuri Korinso bakaba nibenda ngu Paulo ateho ekiragiro aha bikwatiraine n’okurya ebihongyeirwe ebishushani. Omwanya gw’okubagambira  eky’okukora akabaijutsya ngu buri omwe aine kwecweramu arikwihirira aha muntu we ow’omunda. Akahikaanisa nabo ebiteekateeko aha misingye eyaabaire neija kuhwera buri omwe aharibo kuguma aine omuntu murungi w’omunda, kandi atarikuteeza abandi entsibo. (1 Kor. 8:​4, 7-9) Paulo okukora atyo, akaba naahwera Abakorinso kukura omu by’omwoyo kugira ngu bakorese okubaasa kwabo kw’okwetegyereza omu mwanya gw’okwesiga omuntu ondiijo kubacweramu nari kwenda ngu hateebweho ebiragiro.

15. Paulo akahwera ata Abakristaayo Abaheburaayo kutunguuka omu by’omwoyo?

¹⁵ Ebi Paulo yaahandiikiire Abakristaayo Abaheburaayo nitubyegyeraho eishomo rikuru munonga. Abamwe bakaba barekyeire aho kukura omu by’omwoyo, ‘bahindukire abarikwetenga amate, bitari by’okurya [by’omwoyo] ebigumire.’ (Heb. 5:12) Bakaba baremirwe kuguma nibagyendera aha rurengo rw’amazima agu Yehova yaabaire naabashuuruurira mporampora omu kibiina. (Enf. 4:18) Nk’eky’okureeberaho, Abayudaaya baingi bakaba nibashagika Ebiragiro bya Musa n’obu biraabe byabaire bihwaireho emyaka nka 30 enyima ahabw’ekitambo kya Kristo. (Rom. 10:4; Tit. 1:10) Hatariho kubangaanisa, emyaka 30 bukaba buri obwire burikumara kubaasisa Abakristaayo Abayudaaya kuhindura emiteekateekyere yaabo. Omuntu weena orikushoma ebaruha ei Paulo yaahandiikiire Abaheburaayo naabaasa kureeba ngu erimu eby’okurya by’omwoyo ebigumire. Ebaruha ye ekabahwera kuhamya okwikiriza kwabo omu ntebeekanisa y’okuramya okw’Ekikristaayo n’okugumizamu nibabuurira n’obumanzi n’obu baraabe baabaire nibahiiganisibwa Abayudaaya.—Heb. 10:​19-23.

YETANTATARE KWEYESIGA EKIRENGA

16. Niki ekindi eki twine kukora, oyihireho okutunguuka omu by’omwoyo?

¹⁶ Titwine kugarukira aha kuteeraho kukura omu by’omwoyo, kureka twine kuguma turi abakuzire. Eki nikyetengyesa ngu twetantare okweyesiga ekirenga. (1 Kor. 10:12) Twine kuguma ‘nitweshwijuma’ kureeba yaaba nitugumizamu nitutunguuka.—2 Kor. 13:5.

17. Ebaruha ei Paulo yaahandiikiire Abakolosai neeyoreka eta obukuru bw’okuguma tukuzire omu by’omwoyo?

¹⁷ Omu baruha ei Paulo yaahandiikiire Abakolosai,  akooreka ngu ni kikuru kuguma tukuzire omu by’omwoyo. N’obu Abakristaayo abo baraabe baabaire bakuzire omu by’omwoyo, Paulo akabarabura kutabeihabeihwa emiteekateekyere y’ensi. (Kol. 2:​6-10) Kandi, Epafura owaabaire naamanya ekibiina, akaba ashaba obutoosha ngu ‘bagume bari abahikire,’ nari abakuzire. (Kol. 4:12) Enshonga n’eha? Paulo na Epafura bombi bakaba nibeetegyereza ngu okuguma okuzire omu by’omwoyo nikyetengyesa okuteeraho n’obushagiki bwa Ruhanga. Bakaba nibenda ngu Abakolosai bagume bari Abakristaayo abakuzire omu by’omwoyo n’obu baraabe baabaire nibahikwaho emirabanamu.

18. Niki ekirikubaasa kuhika aha Mukristaayo okuzire omu by’omwoyo? (Reeba n’ekishushani.)

¹⁸ Paulo akarabura Abaheburaayo ngu Omukristaayo okuzire omu by’omwoyo naabaasa kufeerwa enkoragana ye na Ruhanga ebiro byona. Omukristaayo naabaasa kugaangaza omutima gwe ateekateekye ngu takibaasa kweteisa kusaasirwa Ruhanga. Ekirungi, Abaheburaayo bakaba batakahikire aha rurengo orwo. (Heb. 6:​4-9) Kandi shi abamwe abarikurekyera aho kubuurira nari bakabingwa omu kibiina, kwonka bwanyima bakeeteisa? Ku barikuba abacureezi bakeeteisa nibooreka ngu bo n’ab’omutaano. Kwonka, baagarukira Yehova nibaba baine kuhwerwa. (Ezk. 34:​15, 16) Abareeberezi nibabaasa kukora entebeekanisa kugira ngu ababuurizi abakuzire omu by’omwoyo bahwere abari nk’abo kugaruka kugira omukago murungi na Yehova.

19. Twine kugira kigyendererwa ki?

¹⁹ Ku oraabe nooteeraho kuba Omukristaayo okuzire omu by’omwoyo, noobaasa kuhika aha kigyendererwa kyawe. Gumizamu nooyeriisa eby’okurya ebigumire eby’omwoyo, kandi oteereho kugira emiteekateekyere erikuhikaana n’eya Yehova. Kandi waaba okuzire omu by’omwoyo mariirira kuguma ori Omukristaayo okuzire.