1, 2. Ahabw’enki Abajurizi ba Yehova nibafayo aha biri omu Abarooma 5:12?

KA TUGIRE ngu nooyenda kuhandiika Ebyahandiikirwe ebi Abajurizi ba Yehova barikumanya gye kandi ebi barikukira kukoresa. Abarooma 5:12 nikiija kuba kimwe aha birikubanza? Teekateeka aha mirundi ei orikujuriza ebigambo ebi: “Nk’oku ekibi kyaizire omu nsi ahabw’okushiisha kw’omuntu omwe, kandi kikarugamu okufa, nikwo n’okufa kwabugire omu bantu boona, ahakuba boona bakashiisha.”

² Ekyahandiikirwe eki nikikoresibwa emirundi mingi omu katabo Niki Eki Turikwega omu Baibuli? Waaba nooyegyesa abaana baawe nari abandi omu katabo aka, obundi nooshoma Abarooma 5:12 mwaba nimwega eshuura 3, 5, n’eya 6. Kwonka shi n’emirundi engaahi obu orikuteekateeka aha Abarooma 5:12 kuhikaana n’omukago gwawe na Yehova, ebikorwa byawe, n’amatsiko gaawe g’omumaisho?

3. Niki eki tushemereire kuguma nitwijuka aha bikwatiraine n’embeera yaitu?

³ Twena twine kwikiriza ngu turi abasiisi. Buri izooba nitukora enshobe. Kwonka, twine obuhame ngu Ruhanga naamanya ngu tuhangirwe omu mucuucu, kandi ayeteekateekire kutugirira  embabazi. (Zab. 103:13, 14) Omu kushaba kw’eky’okureeberaho Yesu akatamu ebigambo, “otusaasire eby’okushisha byaitu.” (Luk. 11:2-4) N’ahabw’ekyo, tihaine ekishemereire kutureetera kuguma tutaire omutima aha nshobe ezi Ruhanga yaatusaasiire. Kwonka nitubaasa kugasirwa twateekateeka aha ku yaatusaasiire.

4, 5. (a) Niki ekirikutuhwera kwetegyereza ebiri omu Abarooma 5:12? (b) Ekigambo embabazi ekiri omu Abarooma 3:24 kiine makuru ki?

⁴ Eshuura ezeetooroire Abarooma 5:12, nitushangamu enshonga nkuru na munonga omu shuura ya 6. Eki nikiija kutuhwera kwetegyereza oku Yehova yaatusaasiire. Omu shuura 3, nitushomamu ebigambo ebi: “Boona bakashiisha . . . , baihirwaho busha orubanja ahabw’embabazi ze, naabacunguza okucungurwa okuri omuri Yesu Kristo.” (Rom. 3:23, 24) Paulo akaba naamanyisa ki obu yaagira ngu “ahabw’embabazi”? Akakoresa ekigambo ky’Orugriika kurugiirira aha kucondooza kumwe ekiine amakuru “g’okuhwera ahari busha, otaine ki orikushaba, nari otarikuteekateeka kugarurirwa.” Embabazi ezi, omuntu tarikuzikorerera kandi naaba atazishemereire.

⁵ Omucondooza omwe John Parkhurst akashoboorora ngu Baibuli ku erikugamba aha mbabazi za Ruhanga nari Kristo, neekira kuba neemanyisa eki baakozire kucungura abantu kuruga omu kibi n’okufa. N’ahabw’ekyo Baibuli eya New World Translation omu Rungyereza neekoresa ebigambo “embabazi ezitatushemereire.” Ka tureebe eki Ruhanga atukoreire n’oku embabazi ezitatushemereire zirikutugasira hati, zikatuha n’amatsiko aha biro by’omumaisho.

6. Abantu nibabaasa kugasirwa bata omu mbabazi za Ruhanga?

⁶ Adamu niwe ‘muntu omwe’ ou ekibi n’okufa byarabiiremu ‘kubuga omu bantu boona.’ N’ahabw’ekyo ‘ekicumuro ky’omuntu omwe kikareetera rufu okwema ahabw’ogwo.’ Paulo akoongyeraho ngu “embabazi nyingi munonga” za Ruhanga zikabaho “ahabw’omwe niwe Yesu Kristo.” (Rom. 5:12, 15, 17) Kandi embabazi ezo zirugiiremu abantu ebirungi bingi. Baingi nibaija kuhinduka abahikiriire ahabw’okuhurira kw’omwe’ Yesu Kristo. Buzima, embabazi za Ruhanga nizibaasa kuhitsya “omu magara agatahwaho ahabwa Yesu Kristo.”​—Rom. 5:19, 21.

7. Ahabw’enki Ruhanga okutuha ekitambo ziri embabazi ezitatushemereire?

⁷ Yehova kikaba kitarikumwetengyesa kwohereza Omwana we kwija omu nsi kuba ekitambo. Kandi abantu abatahikiriire bakaba batashemereire ekitambo eki Ruhanga na Yesu baahaireyo ngu abantu babaase kusaasirwa ebibi byabo. N’ahabw’ekyo okusaasirwa n’okutunga amatsiko g’okutuuraho ebiro byona buzima n’embabazi ezitatushemereire. Tushemereire kutwara ekiconco ky’embabazi za Ruhanga nk’eky’omuhendo kandi kikatuhiga kutwaza gye buri izooba.

8. Ni miteekateekyere ki egwire ei tushemereire kwetantara?

⁸ Ahabw’okugira ngu turi baijukuru ba Adamu abatahikiriire, nitukira kukora enshobe, ebitahikire, kandi nitushiisha. Kwonka titushemereire kukoresa embabazi za Yehova nk’eky’okwekwatsa kukora ebitahikire turikuteekateeka tuti: ‘Yehova naija kunsaasira.’ Eky’obusaasi, Abakristaayo abamwe ira bakeehurira batyo nangwa n’obu bamwe aha ntumwa baabaire bakiriho. (Shoma Yuda 4.) Itwe nitubaasa kutateekateeka tutyo, kwonka tushemereire kwegyendesereza kugira ngu abandi batatushiisha nari mporampora tukatandika kuteekateeka tutyo.

9, 10. Ni mu muringo ki ogu Paulo n’abandi baacungwirwe omu kibi n’okufa?

 ⁹ Paulo akatwehanangiriza ngu twine kwetantara emiteekateekyere egi: ‘Ruhanga naayetegyereza. Naija kwehuzya enshobe zangye n’ebikorwa.’ Ahabw’enki? Ahakuba nk’oku Paulo yaagizire, Abakristaayo ‘baaherize kufa aha bikwatiraine n’ekibi.’ (Shoma Abarooma 6:1, 2.) Ka baabaire bakihuriire, ahabw’enki kyagambirwe ngu ‘baaherize kufa aha bikwatiraine n’ekibi’?

¹⁰ Ruhanga akaikiriza ekitambo kukora ahabwa Paulo na bagyenzi be obunaku obwo. N’ahabw’ekyo, Yehova akabasaasira ebibi byabo, yaabashukaho omwoyo gurikwera, kandi yaabeeta kuba abaana be ab’omwoyo. Bwanyima bakaba baine amatsiko g’okuza omu iguru. Ku baakugumire bari abeesigwa, bakaatwirwe omu iguru kandi bategyeka na Kristo. Mbwenu shi obu baabaire bakiri abahuriire omu nsi, ahabw’enki baabaire nibatwarwa ‘nk’abafiire aha bikwatiraine n’ekibi’? Paulo akakoresa okugyeragyeranisa okwo kworeka ngu emitwarize yaabo ekaba ehindukiire kimwe. Akagira ngu bwanyima ya Yesu kufa, akazoorwa aine omubiri gw’omwoyo arikuza kutuura omu iguru. Niyo nshonga ahabw’enki Yesu akaba atarikwija ‘kugaruka kufa.’ Omu muringo ogwo, nikwo n’Abakristaayo baabaire bafiire batyo. Bakaba bahindukiire kimwe ahakuba bakaba batakiikiriza byetengo byabo bibi kubategyeka. Kuruga obwo, bakaba nibateeraho kushemeza Ruhanga. Bakaba ‘bafiire aha bikwatiraine n’ekibi, kwonka bakaba abahuriire ahari Ruhanga omuri Kristo Yesu.’​—Rom. 6:9, 11.

11. Itwe abaine amatsiko g’okutuura omu nsi ni mu muringo ki ogu ‘twafiire ahabw’ekibi’?

¹¹ Kandi shi itwe abaine amatsiko g’okutuura omu nsi? Obu twabaire tutakabaire Bakristaayo, tukaba nitukira kushiisha, obundi tutarikumanya oku ebikorwa byaitu biri bibi omu maisho ga Ruhanga. Tukaba turi “nk’abahuuku kukora ebihagaro n’eby’okushiisha ebirengyesereize.” Nitubaasa kugira ngu tukaba turi “abahuuku b’ekibi.” (Rom. 6:19, 20) Bwanyima tukaija twamanya amazima, twakora empindahinduka, twayehayo ahari Ruhanga, kandi twabatizibwa. Kuruga obwo, kitwire kiri ekyetengo kyaitu kworobera enyegyesa za Ruhanga n’emitindo ye. Turi nk’abaacungwirwe “okuruga omu butegyeki bw’ekibi” reero twahindurwa “abahuuku b’okuhikiirira.” (Rom. 6:17, 18) N’ahabw’ekyo naitwe nitubaasa kugira ngu ‘tukafa ahabw’ekibi.’

12. Buri omwe ahariitwe aine kucwamu kukora ki?

¹² Hati yeteekateekyeho orikwihirira aha bigambo bya Paulo ebi: “Mutaikiriza ekibi kutegyeka omu mibiri yaanyu ey’okufa, mukoorobera okurigira kwayo okubi.” (Rom. 6:12) Nitubaasa kwikiriza “ekibi kutegyeka” turikukora buri kimwe eki omubiri gwaitu ogutahikiriire gurikutuhiga kukora. Ahabw’okugira ngu nitubaasa kwikiriza ekibi kututegyeka nari kutatutegyeka, ekibuuzo kiri ngu: Niki buzima eki turikukunda omu mitima yaitu? Yebuuze oti: ‘Obumwe niinyikiriza omubiri gwangye nari ebiteekateeko byangye ebitahikiriire kuteekateeka aha kintu kandi nkikora? Nari nfiire aha bikwatiraine n’ekibi? Nimbaho ahabwa Ruhanga kurabira omuri Kristo Yesu?’ Nitwija kukora ekihikire kurugiirira aha ku turikusiima embabazi ezi Ruhanga yaatworekire arikutusaasira.

13. Ni buhame oburikworeka ngu nikibaasika omuntu kuhinduka akareka kukora ekibi?

¹³ Abamwe bahindwire emitwarize yaabo ei baabaire baine batakamanyire Yehova bakatandika n’okumuheereza. Enyima nibabaasa kuba baabaire nibakora “ebirikubakwatsa enshoni” kandi ebyabaire nibibaasa  kubarugiramu okufa. (Rom. 6:21) Bwanyima bakahinduka. Nikwo kyabaire kiri ahari baingi omuri Korinso abu Paulo yaahandiikiire. Abamwe bakaba nibaramya ebishushani, bari abashambani, ebitingwa, abashuma, abasinzi, barikukora n’ebindi bibi. Kwonka, bakabaasa ‘kwogibwa, baayezibwa.’ (1 Kor. 6:9-11) Na bamwe omu kibiina kya Rooma nibabaasa kuba nikwo baabaire bari batyo. Paulo akabahandiikira ati: “Mutaha engingo zaanyu ekibi kuzikoresa eby’okutahikiirira, kureka mweheereze Ruhanga nk’abahuriire abazoirwe kuruga omu bafu, kandi n’engingo zaanyu muzimuhe kuzikoresa eby’okuhikiirira.” (Rom. 6:13) Paulo akaba naahamya ngu nibabaasa kuguma bashemeire omu by’omwoyo, reero bagumizemu nibagasirwa omu mbabazi za Ruhanga.

14, 15. Tushemereire kwebuuza ki aha bikwatiraine ‘n’okworoba kuruga aha mutima’?

¹⁴ Na hati nikwo kiri. Ab’eishe-emwe abamwe nibabaasa kuba baabaire bari nk’ab’omuri Korinso. Kwonka nabo bakahinduka. Bakareka ebibi byabo ebyenyima ‘baayogibwa.’ Kubaasa kushemeza Yehova, twena tukakora empindahinduka. Kwonka na hati, twine kworeka ngu nitusiima embabazi za Ruhanga. N’ahabw’ekyo ka tumaririire kurwanisa ebyetengo bibi kandi tukorese amagara gaitu kuheereza Yehova!

¹⁵ Kubaasa kukora ekyo, buzima twine kwetantara kukora ebibi nk’ebi bamwe omuri Korinso baabaire nibakora. Eki ni kikuru twaba nitwenda kworeka ngu twikiriize embabazi za Ruhanga kandi ngu ‘titurikutegyekwa ekibi.’ Nitumariirira ‘kworoba kuruga aha mutima’ turikuteeraho kwetantara ebibi ebi abamwe barikureeba nk’ebitari by’amaani?​—Rom. 6:14, 17.

16. Nitumanya tuta ngu okuba Omukristaayo nikikira aha kureka ebibi eby’amaani?

¹⁶ Teekateeka aha ntumwa Paulo. Nitubaasa kuhamya ngu akaba atarikwejumba omu bibi by’amaani ebirikugambwaho omu 1 Abakorinso 6:9-11. Kwonka nabwo, akagira ngu akaba naakyeshiinja ahabw’ekibi. Akahandiika ati: “Nyowe ndi ow’obuzaarwa bw’obuntu, nkagurwa kutegyekwa ekibi; eki nkora tinkimanya; ahabw’okuba eki nkunda kukora tikyo nkora; kureka eki nyanga nikyo nkora.” (Rom. 7:14, 15) Eki nikyoreka ngu hariho ebintu ebindi ebi Paulo yaabaire naareeba nk’ebibi, kandi nabyo bikaba nibimuteganisa. (Shoma Abarooma 7:21-23.) Naitwe ka tube nikwo twakora obwo twaba nituteeraho ‘kworoba kuruga omu mutima.’

17. Ahabw’enki nooyenda kuba ow’amazima?

¹⁷ Nk’eky’okureeberaho teekateeka aha nshonga y’okuba ab’amazima. Abakristaayo boona baine kuba ab’amazima kandi abarikwesigwa. (Shoma Enfumu 14:5; Abaefeso 4:25.) Sitaane niwe “ishe w’ebishuba.” Kandi Anania n’omukazi we bakafa ahabw’okubeiha. Titurikwenda kutooreza abari nk’abo, n’ahabw’ekyo nitwetantara okubeiha. (Yoh. 8:44; Byak. 5:1-11) Kwonka okuba ab’amazima nikikira aha kutagamba ebishuba. Buzima ku turaabe nitusiima embabazi za Ruhanga, nitwija kuba ab’amazima n’omu miringo endiijo.

18, 19. Okuba ab’amazima nikikira kita aha kutagamba ebishuba butunu?

¹⁸ Okubeiha nikimanyisa okugamba ebitahikire. Kwonka, Yehova naayenda ngu abaheereza be bakore ekirikukira aha kutagamba ebishuba. Akahiga Abaisraeli ati: “Mushemereire kuba abarikwera; ahakuba Nyowe Mukama Ruhanga waanyu ndi orikwera.” Reero yaabaha eby’okureeberaho by’okuba abarikwera. Omu bugufu akabagira ati: ‘Mutariiba, mutarigobya, kandi mutaribeihana.’ (Lev. 19:2, 11) Eky’obusaasi, omuntu orikwetantara kugamba ebishuba butunu, naabaasa kuba akiine omuze gw’okubeiha abandi arikubagobeza.

 ¹⁹ Nk’eky’okureeberaho, omuntu naabaasa kugambira mukama we nari abu arikukora nabo ngu nyenkyakare tarikwija kukora nari ngu naija kutaaha kare, ahakuba akozire entebeekanisa kureeba omushaho. Kandi oshangye ngu eki arikuza kukora kyenyine n’okugura emibazi aha duuka y’emibazi nari kuza kakye omu ofiisi y’omushaho kumushashura esente ze. Kwonka oshangye ngu enshonga ye enkuru ey’okushaba orusa rw’okutakora, n’okwenda ngu agire ahu yaaza kutaayaaya nari kutwara eka ye kurambura aha mwaro. Enshonga ye ey’okugira ngu nyine entebeekanisa y’okureeba omushaho eyinemu amazima makye, kwonka shi noobaasa kugira ngu yaaba ow’amazima? Nari n’okubuzabuza? Noobaasa kuba noomanya n’eby’okureeberaho ebindi obu abantu batarikugamba mazima. Obundi eki omuntu naakikora kwetantara kufubirwa nari kugira eki yaatunga. N’obu waakuba otagambire kishuba butunu, kwonka shi nooyorobera ekiragiro kya Ruhanga ekirikugira ngu “mutaribeihana”? Teekateeka n’aha biri omu Abarooma 6:19, aharikugira ngu muheyo “engingo zaanyu nk’abahuuku kukora eby’okuhikiirira, mubone kwezibwa.”

20, 21. Okusiima embabazi za Ruhanga kishemereire kutuhiga kukora ki ekindi?

²⁰ Enshonga eri ngu okusiima embabazi za Ruhanga nikitwariramu ekirikukira aha kwetantara obushambani, obusinzi, nari ebibi ebindi ebi bamwe omuri Korinso baabaire nibakora. Okwikiriza embabazi za Ruhanga tikirikumanyisa okwetantara eby’obushambani kyonka, beitu n’okurwanisa omuze gw’okukunda eby’okweshemeza ebitashemeire. Okuhayo emibiri yaitu nk’abahuuku b’okukora eby’okuhikiirira nikiija kutuhiga kwetantara ti businzi bwonka, beitu n’okunywa amaarwa maingi tukenda kuhika aha kusinda. Nikibaasa kwetengyesa amaani maingi kurwanisa ebikorwa nk’ebyo, kwonka nitubaasa kusingura.

²¹ Ekigyendererwa kyaitu kishemereire kuba okwetantara ebibi ebihango n’ebitari bihango. Ekyo nitubaasa kutakikora omu kuhikiirira. Kwonka twine kuteeraho kukikora nk’oku Paulo yaabaire naakora. Akahiga ab’eishe-emwe bagyenzi be ati: “Mutaikiriza ekibi kutegyeka omu mibiri yaanyu ey’okufa, mukoorobera okurigira kwayo okubi.” (Rom. 6:12; 7:18-20) Twarwanisa ekibi omu miringo yoona, nitworeka ngu buzima nitusiima embabazi za Ruhanga kurabira omu Kristo.

22. Abo abarikusiima embabazi za Ruhanga nibaija kutunga kiconco ki?

²² Ruhanga akatusaasira ebibi byaitu ahabw’embabazi ze, kandi naija kugumizamu naatusaasira. Turikworeka okusiima, ka tuteereho kusingura omuze gw’okukora ebibi ebi abandi barikutwara nka bikye. Paulo akagamba aha kiconco eki tutegyereize ati: “Hati nk’oku mucungwirwe kuruga omu butegyeki bw’ekibi, mukahinduka abahuuku ba Ruhanga, ebyana ebi murikwana n’okwezibwa; kandi omuheru gwabyo n’amagara agatahwaho.”​—Rom. 6:22.