Ebicweka ebiherize kwizira omu Omunaara gw’Omurinzi obishomire n’obwegyendesereza? Reeba ku oraabe noobaasa kugarukamu ebibuuzo ebi:

Yesu akaba naagamba ahari kibi ki omu buhabuzi bwe oburi omuri Matayo 18:15-17?

Akaba naagamba aha nshonga ezirikubaasa kushoboororwa abo abarikukwatwaho. Kwonka enshonga neeba eri ey’amaani erikubaasa kubingisa omuntu omu kibiina yaaba etashobooroirwe. Nk’eky’okureeberaho, nikubaasa kuba kuri okubeiherera omuntu, nari okuryangatanisa.​—w16.05, rup. 7.

Noobaasa kukora ki kugasirwa omu kushoma Baibuli?

Noobaasa kukora ebi: Shoma oine emiteekateekyere mirungi, gyendera aha bi orikushoma; yebuuze ebibuuzo nka, ‘nimbaasa kukoresa nta ebi kuhwera abandi?’ kandi koresa ebitabo ebi twine kucondooza aha bi waashoma.​—w16.05, rup. 24-26.

Mbwenu shi kigwire Omukristaayo kucura n’obu araabe naikiririza omu kuzooka?

Okwikiririza omu kuzooka tikirikwihaho obusaasi bw’okufeerwa obu Omukristaayo arikuba aine. Abrahamu akacurira okufa kwa Saara. (Kut. 23:2) Haahinguraho obwire, amaganya nigatuuba.​—wp16.3, rup. 4.

Omushaija oine eihembe rya bwino n’abashaija mukaaga abaine eby’okurwanisa by’okucwekyereza abari omu Ezekieli eshuura 9 nibajwekyera ki?

Nitubamanya nk’abarikujwekyera amahe g’omu iguru agaabaire geejumbire omu kucwekyereza Yerusaalemu, kandi nigaija kwejumba omu kucwekyereza ahari Haramagedoni. Omu biro ebi, omushaija oine bwino naajwekyera Yesu Kristo orikuta akamanyiso aha baraahonokeho.​—w16.06, rup. 16-17.

Baibuli ekarindwa eta kutacwekyerezibwa?

Baibuli ekarindwa (1) tiyaasiisikara n’obu eraabe yaabaire ehandiikirwe aha bintu ebirikujunda nk’ebifunjo, n’empu; (2) okuhiiganisibwa ab’eby’obutegyeki n’abeebembezi b’ediini abaabaire nibenda kugicwekyereza; (3) obutumwa bwayo tibwahindurwa abantu.​—wp16.4, rup. 4-7.

Omukristaayo naabaasa kweihaho ata ebitarikwetengyesa?

Manya ebi orikwetenga byenyine, kandi yeiheho enshohoza etarikwetengyesa. Kora embaririra eringaniire. Naga ebintu ebi otarikukoresa, kandi shashura amabanja. Tuubya aha bwire obu orikumara aha murimo, kandi tebeekanisa oku oraayongyere aha buheereza bwawe.​—w16.07, rup. 10.

Niki eki Baibuli erikugambaho ngu n’eky’omuhendo kugira ezaabu n’efeeza?

Yobu 28:12, 15 nihooreka ngu obwengye kuruga ahari Ruhanga nibukira ezaabu n’efeeza. Waaba noobusherura, teeraho kuba omucureezi n’okugira okwikiriza kuhami.​—w16.08, rup. 18-19.

Mbwenu shi kihikire obunaku obu ow’eishe-emwe kugira ebireju?

Omu mahanga agamwe, ebireju ebitererize gye nibiikirizibwa kandi nibibaasa kutateeza abantu entsibo omu kubuurira. Kwonka, ab’eishe-emwe abamwe nibabaasa kucwamu kutagira ebireju. (1 Kor. 8:9) Omu mahanga agandi, ti mucwe gwabo kukuza ebireju, n’ahabw’ekyo Abakristaayo abari omu mahanga ago tibarikugira bireju.​—w16.09, rup. 21.

Ahabw’enki turikubaasa kwesiga ebiri omu Baibuli ebirikukwata ahari Daudi na Goliasi?

Oburaingwa bwa Goliasi oburikugabwaho ni centimita 15 kukira omuntu orikukirayo oburaingwa omu byafaayo. Daudi akaba ari omuntu owabuzima, nk’oku ebihuugirwe birikworeka kandi bikagamba aha nju ya Daudi n’ebi Yesu yaagambire. Ebihandiikirwe nibihikaana n’amazima agarikumanywa.​—w16.5, rup. 13.

Okumanya, okwetegyereza, n’obwengye nibitaana bita?

Omuntu oine okumanya naaba naamanya ebintu nari amazima. Omuntu oine okwetegyereza naabaasa kureeba oku ekintu kirikutaana aha kindi. Kwonka omuntu oine obwengye naabaasa kugaita okumanya n’okwetegyereza kandi abikorese omu muringo oguhikire.​—w16.10, rup. 18.