1, 2. Ahabw’enki ebiri omu Abarooma eshuura 8 nibishemeza Abakristaayo abashukirweho amajuta?

OKUHIKAANA n’omukoro gw’okwijuka okufa kwa Yesu ogwa buri mwaka, waashomire Abarooma 8:15-17? Noobaasa kuba waakishomire. Ekyahandiikirwe ekyo nikishoboorora oku Abakristaayo barikumanya ngu bashukirweho omwoyo gurikwera, ahakuba niguhamya n’emyoyo yaabo. Kandi omushororongo ogurikubanza omu shuura egyo nigukwata ahari abo “abari omuri Kristo Yesu.” Kwonka shi Abarooma eshuura 8 neekwata aha bashukirweho omwoyo gurikwera bonka? Nari neekwata n’aha Bakristaayo abaine amatsiko g’okutuura omu nsi?

² Ebiri omu shuura egi okukira munonga nibigamba aha Abakristaayo abashukirweho omwoyo gurikwera. Nibatunga omwoyo gurikwera reero ‘bategyereza kuhindurwa abaana ba Ruhanga, nikwo kucungurwa kw’emibiri yaabo.’ (Rom. 8:23) Buzima, nibaba baine amatsiko g’okwija kuba abaana ba Ruhanga omu biro by’omumaisho. Ekyo nikibaasika ahabw’okugira ngu bakaba Abakristaayo ababatiziibwe, kandi Ruhanga yaabasaasira ebibi byabo arikwihirira aha kitambo. Abeetsire abahikiriire n’ahabw’ekyo nibabaasa kuba abaana be ab’omwoyo.​—Rom. 3:23-26; 4:25; 8:30.

3. Ahabw’enki turikugira ngu abaine amatsiko g’okutuura omu nsi baine kufayo aha biri omu Abarooma 8?

 ³ Kwonka ebiri omu Abarooma eshuura 8 nibishemeza n’abaine amatsiko g’okutuura omu nsi, ahakuba Ruhanga naabareeba nk’abahikiriire. Eki nitukireebera omu bi yaagambire omu shuura z’enyima ez’ebaruha egi. Omu shuura ya 4, akagamba ahari Abrahamu. Omushaija ogu owaabaire aine okwikiriza akabaho Yehova atakahaire Abaisraeli ebiragiro na Yesu atakafiire ahabw’ebibi byaitu. Kwonka nabwo, Yehova akareeba okwikiriza kwa Abrahamu okw’omutaano yaamubara nk’ohikiriire. (Shoma Abarooma 4:20-22.) Omu muringo nigwo gumwe Yehova naabaasa kureeba Omukristaayo oine amatsiko g’okutuura omu nsi ebiro byona nk’ohikiriire. Omukristaayo nk’ogwo naabaasa kugasirwa omu buhabuzi oburi omu Abarooma 8 oburikuheebwa abahikiriire.

4. Kurugiirira aha biri omu Abarooma 8:21 tushemereire kuteekateeka ahari kibuuzo ki?

⁴ Omu Abarooma 8:21, nitushangamu obuhame ngu ensi ensya neija kubaho. Omushororongo ogu niguraganisa ngu “ebihangirwe ebyo nabyo biryacungurwa, birekye kuba eby’okujunda, kureka biheebwe obusingye bw’abaana ba Ruhanga obw’ekitiinisa.” Hati ekibuuzo kiri ngu, nitwija kutunga ekiconco ky’okuba omu nsi egyo? Oine obwesigye ngu naija kubamu? Abarooma eshuura 8 neija kukuha obuhabuzi oburaakuhwere.

5. Paulo akaba naagamba aha nshonga ki ey’amaani omu Abarooma 8:4-13?

⁵ Shoma Abarooma 8:4-13. Abarooma eshuura 8 neegamba ahari abo ‘abarikukurata eby’omubiri’ erikubagyeragyeranisa n’abo abarikukurata ‘eby’omwoyo.’ Abamwe nibabaasa kuteekateeka ngu neegyeragyeranisa abatari mu mazima n’abagarimu, nari abatari Bakristaayo n’Abakristaayo. Kwonka, Paulo akaba naahandiikira ‘ab’omuri Rooma, abarikukundwa Ruhanga, kandi abaayetsirwe kuba abarikwera.’ (Rom. 1:7) N’ahabw’ekyo, Paulo akaba naagyeragyeranisa Abakristaayo abarikukurata eby’omubiri n’Abakristaayo abarikukurata eby’omwoyo. Akabagyeragyeranisa ata?

6, 7. (a) Ni miringo ei ekigambo ‘omubiri’ kirikukoresibwa omu Baibuli? (b) Omu Abarooma 8:4-13, Paulo akakoresa ata ekigambo ‘omubiri’?

⁶ Banza oteekateekye aha kigambo ‘omubiri.’ Paulo akaba naamanyisa ki? Baibuli neekoresa ekigambo ‘omubiri’ omu miringo etarikushushana. Obumwe, nikiba nikimanyisa  omubiri gwenyine. (Rom. 2:28; 1 Kor. 15:39, 50) Nikibaasa n’okumanyisa obuzaare. Yesu niwe “owaazairwe omuri baijukuru ba Daudi omu mubiri,” kandi Paulo akeeta Abayudaaya “ab’oruganda rwangye omu mubiri.”​—Rom. 1:3; 9:3.

⁷ Kwonka, ebi Paulo yaahandiikire omu shuura 7 nibituhwera kumanya ekigambo ‘omubiri’ ekirikugambwaho omu Abarooma 8:4-13. Akakwatanisa “okuta omutima aha by’omubiri” hamwe ‘n’okwetenga ebibi’ okwabaire ‘nikukorera omu ngingo’ zaabo. (Rom. 7:5) Eki nikituhwera kumanya amakuru g’ebigambo abarikuta “omutima aha by’omubiri,” abu Paulo yaagambireho ngu, “bata omutima aha by’omubiri.” Akaba naamanyisa abantu abarikuta omutima aha byetengo byabo ahabw’okutahikiirira kwabo. Aba nibo barikukira kukuratira enyehurira zaabo, ebiteekateeko byabo, n’ekyetengo kyabo, nk’eky’okwenda kuteerana nari ebindi.

8. Ahabw’enki kyabaire kihikire kurabura n’Abakristaayo abashukirweho amajuta aha nshonga ‘y’okuta omutima aha by’omubiri.’?

⁸ Kwonka noobaasa kwebuuza ahabw’enki Paulo yaabaire naagambira Abakristaayo abashukirweho amajuta akabi ‘k’okuta omutima aha by’omubiri.’ Mbwenu shi akabi niko kamwe nikabaasa kuhika aha Bakristaayo abu Yehova ahindwire banywani be kandi akabareeba nk’abahikiriire? Eky’obusaasi, Omukristaayo weena naabaasa kukuratira omubiri gwe ogutahikiriire. Nk’eky’okureeberaho, Paulo akahandiika ngu bamwe aha b’eishe-emwe omuri Rooma bakaba bari abahuuku ‘b’enda zaabo,’ obundi ekyabaire nikitwariramu omururu gw’okuteerana, nari ogw’eby’okurya, eby’okunywa, nari ebindi bintu. Bamwe aharibo bakaba ‘nibabeihabeiha abataine bugobya.’ (Rom. 16:17, 18; Fil. 3:18, 19; Yud. 4, 8, 12) Kandi ijuka ngu hariho obunaku obu ow’eishe-emwe omuri Korinso yaabaire naaraara “na muka ishe.” (1 Kor. 5:1) N’ahabw’ekyo, nikyetegyerezibwa ahabw’enki Ruhanga yaakoreise Paulo kurabura Abakristaayo aha nshonga ‘y’okuta omutima aha by’omubiri.’​—Rom. 8:5, 6.

9. Okurabura kwa Paulo okuri omu Abarooma 8:6 tikurikukwata ahari ki?

⁹ Okurabura okwo na hati nikwetengyesa. Omukristaayo bwanyima y’okuheereza Ruhanga kumara emyaka, naabaasa kutandika kuta omutima aha by’omubiri. Eki tikirikukwata aha Bakristaayo obumwe abarikuteekateeka aha by’okurya, emirimo, okweshemeza, nari  okurigira omuntu. Ebi n’ebintu bya butoosha aha muheereza wa Ruhanga. Yesu akaba ashemererwa kurya eby’okurya, kandi akariisa abandi. Akaba naamanya ngu nikyetengyesa kuhuumuraho. Kandi Paulo akahandiika ngu okuteerana n’ekintu kikuru omu bushwere.

10. Omu Abarooma 8:5, 6, ebigambo “okuta omutima aha by’omubiri” nibimanyisa ki?

¹⁰ Ebigambo bya Paulo ‘okuta omutima aha by’omubiri’ biine makuru ki? Ebigambo by’Orugriika ebi Paulo yaakoreise nibimanyisa omuntu okuta ebiteekateeko bye byona n’ebigyendererwa bye byona aha kintu. Abo abarikuta omutima aha by’omubiri nibaikiriza ebyetengo byabo bibi kuba nibyo baakuratira. Omucondooza omwe arikugamba aha bari omu Abarooma 8:5 akagira ngu ebigambo ebi nibikwata ahari abo “abarikukunda munonga, abarikugamba munonga” kandi abarikuta omutima munonga aha byetengo byabo bibi. Ebyetengo ebyo nibyo birikworeka oku baraatwaze.

11. Ni bintu ki ebirikubaasa kuba bikuru ahariitwe?

¹¹ Kikaba kihikire aha Bakristaayo omuri Rooma kushwijuma eki buzima baabaire nibataho omutima. Noobaasa kushanga ngu ebiteekateeko byabo bakaba babiteire munonga aha “by’omubiri.” Nikiba kihikire naitwe kweshwijuma tukareeba, niki eki turikukira kukunda, kandi nitukunda kugamba ahari ki? Niki eki turikukunda kusherura? Abamwe nibabaasa kuba nibata omutima aha kunywa aha bika bya viinyo etarikushushana, okuhuunda enju, okusherura enjwara nsya, oku baraatungye sente, kutebeekanisa kuza kurambura, n’ebindi nk’ebyo. Ebintu ebyo ti bibi ahabwabyo, n’ebintu bya butoosha. Nk’eky’okureeberaho, eizooba rimwe Yesu akakora viinyo, kandi Paulo akagambira Timoseo kunywa “viinyo nkye.” (1 Tim. 5:23; Yoh. 2:3-11) Kwonka shi Yesu na Paulo “butoosha bakaba nibagamba, nari nibahimbisiriza” viinyo? Kikaba kiri ekintu eki baabaire nibakunda kugambaho munonga? Ngaaha. Kandi shi itwe? Niki ekirikutushemeza munonga?

12, 13. Ahabw’enki tushemereire kwegyendesereza aha bi turikutaho omutima?

¹² Okweshwijuma ni kikuru. Ahabw’enki? Paulo akahandiika ati: ‘Okuta omutima aha by’omubiri n’okufa.’ (Rom. 8:6) Oku n’okufa omu by’omwoyo hati, kandi n’okwija kufa omu by’omubiri omu biro by’omumaisho. Kwonka, Paulo akaba atarikumanyisa ngu omuntu yaatandika ‘kuta omutima aha by’omubiri’ tarikubaasa kwetantara okufa. Okuhinduka nikubaasika. Teekateeka aha mushaija enshambani omuri Korinso owaakuratiire ‘omubiri’ kandi akabingwa. Kwonka akaba naabaasa kuhinduka. Akarekyera aho kukuratira omubiri yaagaruka omu muhanda oguhikire.​—2 Kor. 2:6-8.

¹³ Omuntu ogwo ku araabe yaabaasize kuhinduka, nikibaasika ebiro ebi Omukristaayo kuhinduka na munonga yaaba atakakuratiire omubiri kuhika aha mushaija w’omuri Korinso. Buzima, Paulo okurabura aha kirikubaasa kuruga omu ‘kuta omutima aha by’omubiri’ kushemereire kuhiga Abakristaayo kukora empindahinduka ezirikwetengyesa!

14, 15. (a) Paulo akooreka ngu niki eki twine kutaho omutima? (b) Nikimanyisa ki “okuta omutima aha by’omwoyo”?

¹⁴ Bwanyima y’entumwa Paulo kurabura aha ‘kuta omutima aha by’omubiri,’ akagira ngu: “okuta omutima aha by’omwoyo n’amagara n’obusingye.” Buzima amagara n’obusingye n’ekiconco ky’amaani! Nitubaasa kutunga tuta ekiconco eki?

¹⁵ “Okuta omutima aha by’omwoyo” tikirikumanyisa ngu obwire bwona omuntu aine kuguma naareeba ahaiguru. Tikirikumwetengyesa kuguma naateekateeka kandi naagamba  ahari Baibuli nari oku arikukunda Ruhanga n’amatsiko ge ag’ebiro by’omumaisho. Ijuka ngu Paulo n’abandi omu kyasha ky’okubanza abaashemeize Ruhanga bakaba nibakora ebintu bya butoosha. Bakaba nibarya eby’okurya banywa n’eby’okunywa. Baingi aharibo bakashwera baagira amaka, kandi baakora kubaasa kwebaisaho.​—Mak. 6:3; 1 Tes. 2:9.

16. N’obu Paulo araabe yaayejumbire omu bindi, niki eki yaabaire naataho omutima munonga?

¹⁶ Kwonka, abaheereza ba Ruhanga abo tibaraikiriize ebintu ebyo ebya butoosha kuba nibyo byaba bikuru aharibo. Ebyahandiikirwe bwanyima y’okworeka ngu Paulo akaba naakora amahema, nibyoreka ngu akaba ataire omutima aha murimo gw’okubuurira n’okwegyesa abantu. (Shoma Ebyakozirwe 18:2-4; 20:20, 21, 34, 35.) Kandi ebi nibyo yaahigire ab’eishe-emwe omuri Rooma kwebembeza. Buzima, Paulo akaba ataire omutima aha by’omwoyo. Abarooma bakaba baine kumutooreza, kandi naitwe nikyo twine kukora.​—Rom. 15:15, 16.

17. Nitugasirwa tuta twata “omutima aha by’omwoyo”?

¹⁷ Niki ekirikurugamu twaguma tutaire omutima aha by’omwoyo? Abarooma 8:6 nihagarukamu hati: “Okuta omutima aha by’omwoyo n’amagara n’obusingye.” Okukora ekyo nikitwariramu okwikiriza ebiteekateeko byaitu kwebemberwa omwoyo gwa Yehova ogurikwera n’okwega kuteekateeka nk’oku arikuteekateeka. Nitubaasa kugira obuhame ngu twata omutima aha “by’omwoyo,” nitwija kugira ekigyendererwa hati. Kandi ekirikukirayo obukuru n’okutunga amagara agatahwaho yaaba omu iguru nari omu nsi.

18. Ni mu muringo ki ogu obusingye burikuruga omu ‘kuta omutima aha by’omwoyo’?

¹⁸ Paulo akaba naamanyisa ki obu yaagira ngu ‘okuta omutima aha by’omwoyo n’obusingye.’ Abantu baingi nikibagumira kugira obusingye omu biteekateeko. Bo n’obu baraabe nibasherura obusingye bw’omu mutima kubi munonga, itwe tubwine. Kimwe aha birungi by’okugira obusingye nk’obwo n’okukwatanisa n’ab’omu maka gaitu n’ab’omu kibiina. Kandi nituba twine kumanya ngu turi abatahikiriire hamwe n’ab’eishe-emwe bagyenzi baitu. N’ahabw’ekyo, nihabaasa kubaho oburemeezi, kandi ekyo kyabaho twine kukuratira obuhabuzi bwa Yesu obu: “Ogarukane nawe.” (Mat. 5:24) Kwonka eki nikibaasa kworoba twaijuka ngu ow’eishe-emwe nawe naaheereza “mukama w’obusingye.”​—Rom. 15:33; 16:20.

19. Ni busingye ki obw’omutaano obu turikubaasa kugira?

¹⁹ Kandi hariho obusingye obundi obutarikubaasa kubarwa omuhendo gwabwo. Twata “omutima aha by’omwoyo,” nitugira obusingye n’ogwo owaatuhangire. Isaaya akahandiika ebigambo ebyabaire nibikora omu bunaku bwe kandi ebirikuhikiirira omu bunaku obu: “[Yehova] omuntu orikukwegyekyerera omutima gwe oryamurindira omu busingye buzima, ahabw’okuba naakwesiga.”​—Isa. 26:3; shoma Abarooma 5:1.

20. Ahabw’enki noosiima obuhabuzi oburi omu Abarooma eshuura 8?

²⁰ Yaaba amatsiko gaitu n’ag’okutuura omu iguru nari omu nsi, twena nitubaasa kugasirwa omu buhabuzi oburi omu Abarooma eshuura 8. Twena ka nitusiima obuhabuzi bw’okwetantara kuta munonga omutima aha “by’omubiri”! Omu mwanya gw’ekyo, twena nitureeba omugasho gw’okugyendera aha buhabuzi obu: “Okuta omutima aha by’omwoyo n’amagara n’obusingye.” Ekiconco ky’okugyendera aha buhabuzi obwo n’eky’ebiro byona, ahakuba Paulo akahandiika ati: “Ebihembo by’ekibi n’okufa, kwonka ekiconco kya Ruhanga n’amagara agatahwaho omuri Kristo Yesu Mukama waitu.”​—Rom. 6:23.