AHA murundi ogundi, omukazi ogwo akagaruka yaatonganisa Toñi. Akatwaza ata? Naagira ati: “Embeera egyo ekaba egumire munonga. Akaba ataine h’okwihirira kukoresa ebigambo ebirikujuma.” N’obu kiraabe kiri kityo, Toñi akagaruka yaashaba omukazi ogwo okusaasirwa kandi yaamugira ngu naamanya obusaasi obu aine.

Ku ogire ngu niiwe waabaire ori Toñi, okaba noija kutwaza ota? Okaba noija kutarahuka kugira ekiniga? Okaba noija kugumirwa kurinda ekiniga kyawe? Buzima, nikibaasa kutooroba kuguma oyikaikaine omu mbeera nk’eyagambwaho aha ruguru. Twaba twine obujune nari omuntu yaatugwisa kubi, nikiba kyorobi kugira ekiniga.

Kwonka Baibuli neetuhiga kutarahuka kugira ekiniga. Nangwa, Ekigambo kya Ruhanga nikyoreka ngu obucureezi bwine akakwate n’obwengye. Yakobo akabuuza ati: “Omuriimwe n’oha oine obwengye, orikwetegyereza? Ahabw’emitwarize ye mirungi ayorekye emirimo ye n’obwengye oburimu obucureezi.” (Yak. 3:13) Ni mu muringo ki ogu okutarahuka kugira ekiniga kurikworeka obwengye kuruga ahaiguru? Kandi niki ekirikubaasa kutuhwera kugira omutwarize ogu?

Okutarahuka kugira ekiniga nikwikaikanisa embeera. “Okugarukamu gye kwikaikanisa ekiniga; kwonka ekigambo ekirikusaasa kiimutsya ekiniga.”​—Enf. 15:1.

Okugarukamu n’ekiniga nikubaasa kwongyera embeera kuba mbi ahakuba ni nk’okwongyera enku omu muriro. (Enf. 26:21) Okutaana n’ekyo, okugarukamu otaine kiniga nikwikaikanisa embeera. Nikubaasa n’okwikaikanisa omuntu enshaarizi.

Toñi akareeba ekyo nikibaho. Omukazi owaaba yaagambirwe ku yaareebire oku Toñi yaagarukiremu ataine kiniga, akarira. Akashoboorora ngu akaba naateganisibwa oburemeezi bwe hamwe n’eka ye. Toñi akamubuurira, kandi yaatandika kumwegyesa Baibuli beitu ahabw’okugira ngu obu yaamujuma akaguma ayikaikaine.

Okutarahuka kugira ekiniga nikutureetera kushemererwa. “Baine omugisha [okushemererwa] abacureezi [abatarikurahuka kugira ekiniga;] ahabw’okuba abo baryahungura ensi.”​—Mat. 5:5.

Ahabw’enki abatarikurahuka kugira ekiniga baine okushemererwa? Baingi abaabaire bari enshaarizi, hati baine okushemererwa ahabw’okugira omutwarize gw’okutarahuka kugira ekiniga. Embeera zaabo zibaire nungi, kandi nibamanya ngu baine ebiro birungi by’omumaisho. (Kol. 3:12) Adolfo, omureeberezi orikutaayaayira ebibiina omuri Spain, naijuka oku yaabaire ari obu yaabaire atakaizire omu mazima.

“Nkaba ntaine kigyendererwa,” Adolfo nikwo arikugira. “Nkaba nkira kurahuka kugira ekiniga munonga, na banywani bangye bakaba nibatiina obushaarizi bwangye ahabw’okuba ekihanda. Bwanyima obunaku bukahika naahinduka. Omu kurwana kumwe okw’obushaarizi, bakancumita emirundi mukaaga naajwa kakye nfe.”

Kwonka hati, Adolfo naayegyesa abandi kutarahuka kugira ekiniga kurabira omu bigambo n’eky’okureeberaho kye. Abantu baingi nibamukunda ahabw’emitwarize ye mirungi. Adolfo naagira ngu aine okushemererwa ahabw’empindahinduka ezi yaakozire. Kandi naasiima Yehova ahabw’okumuhwera kugira omutwarize gw’okutarahuka kugira ekiniga.

Okutarahuka kugira ekiniga nikushemeza Yehova. “Mwana wangye, gira obwengye oshemeze omutima gwangye, mbone kugarukamu ogwo otuura naanjuma.”​—Enf. 27:11.

Yehova naaba ari nk’orikujumwa omuzigu we omukuru Omuregi. Yehova akaabaire ahikire kugira ekiniga ahabw’ebijumo bya Sitaane, kwonka Baibuli neemugambaho nk’ogwo “otarahuka kugira ekiniga.” (Kur. 34:6) Twateeraho kutooreza Ruhanga tutarikurahuka kugira ekiniga, nituba abanyabwengye abarikushemeza Yehova munonga.​—Efe. 5:1.

Ensi egi eijwiremu obushaarizi. Nitubaasa kubugana abantu “abanyamaryo, abarikwemanya, abarikujumiirana, . . . abarikubeihererana, abatarikweyangisa, enshaarizi.” (2 Tim. 3:2, 3) Kwonka, ekyo tikishemereire kuremesa Omukristaayo kwerinda kutarahuka kugira ekiniga. Ekigambo kya Ruhanga nikitwijutsya ngu ‘obwengye oburikuruga omu iguru, n’obw’obusingye, n’okutwaza gye.’ (Yak. 3:17) Twaba twine obusingye n’okutwaza gye, nitworeka ngu twine obwengye kuruga ahari Ruhanga. Obwengye obwo nibwija kutuhiga kutarahuka kugira ekiniga, omuntu yaatutwariza kubi kandi nikiija kutuhwera kuguma nitwirira haihi na Yehova obukomooko bw’obwengye obutaine bugarukiro.