1, 2. (a) Ahabw’enki kitashemereire kututangaaza twagira amaganya? (Reeba ekishushani aha kutandika.) (b) Nituza kushwijuma ki omu kicweka eki?

TURI omu bwire bw’amaganya maingi. Sitaane Omuregi aine ekiniga kingi, kandi “naashooba nk’entare erikutsinda, naasherura ou araarye.” (1 Pet. 5:8; Kush. 12:17) N’ahabw’ekyo, ti kirikutangaaza kureeba ngu obumwe, naitwe abaheereza ba Ruhanga nitwerarikirira. Abaheereza ba Yehova aba ira nk’Omugabe Daudi, bakaba bagira ‘okwerarikirira.’ (Zab. 13:2) Ijuka ngu n’entumwa Paulo, ‘akeemereza omutima ahabw’ebibiina byona.’ (2 Kor. 11:28) Kwonka nitubaasa kukora ki twaba twerarikirire ekirenga?

² Tataitwe ow’omu iguru akahwera abaheereza be aba ira, kandi n’obunaku obu naatubaasisa kwemera amaganya nari okwerarikirira. Baibuli neetuhiga eti: “Mumwegyekyerere okushoberwa kwanyu kwona, ahabw’okuba naabataho omutima.” (1 Pet. 5:7) Kwonka shi ekyo noobaasa kukikora ota? Ka tureebe emiringo ena ei turikubaasa kwegyekyereramu Yehova okushoberwa kwaitu, turikushaba twihire aha mutima, turikushoma Ekigambo kye tukakiteekateekaho, turikusherura obuhwezi bw’omwoyo gurikwera, n’okugambira omunywani ou turikwesiga enyehurira zaitu. Twaba nitushwijuma  emiringo ena egi, teeraho kureeba yaaba hariho obuhabuzi obu orikubaasa kugyenderaho.

3. Noobaasa kwegyekyerera ota Yehova omutwaro gwawe kurabira omu kushaba?

³ Eky’okubanza eki twine kukora n’okugamba na Yehova omu kushaba. Waahikwaho embeera zigumire, ezirikutiinisa, kandi ezirikukwerarikiriza, gambira Sho w’omu iguru ekikuri aha mutima. Omuhandiiki wa Zaaburi Daudi akashaba ati: “Otegye okutu okushaba kwangye, ai Ruhanga.” Bwanyima omu zaaburi niyo emwe, akagira ati: “Yegyekyera Mukama omutwaro gwawe, nawe aryaguma naakukwatirira.” (Zab. 55:1, 22) Waaheza kukora kyona ekirikubaasika kumaraho oburemeezi, okushaba oyihire aha mutima nikwija kukuhwera munonga. Kwonka shi okushaba nikubaasa kukuhwera waaba oine obusaasi n’okwerarikirira omu biteekateeko?—Zab. 94:18, 19.

4. Twaba twine okwerarikirira, ahabw’enki okushaba ni kikuru?

⁴ Shoma Abafilipi 4:6, 7. Yehova naabaasa kugarukamu okushaba n’okweshengyereza kwaitu okurikuruga aha mutima. Mu muringo ki? Yaatuha obugwagye nitubaasa kugira obusingye omu mutima n’omu biteekateeko tutaine nyehurira ezirikututeganisa. Baingi nibabaasa kuha obujurizi aha nshonga egi kurugiirira aha bi barabiremu. Omu bwire bw’amaganya n’okwerarikirira kwabo, Ruhanga akabahwera kugira obusingye oburengire okwetegyereza kw’abantu. Naiwe noobaasa kutunga obusingye obwo. “Obusingye bwa Ruhanga” nibubaasa kusingura oburemeezi bwona obu orikubaasa kurabamu. Noobaasa kugirira kimwe obwesigye omu ki Yehova arikuraganisa eki: “Otahahaaza omutima, ahabw’okuba ndi Ruhanga waawe. Ndyakuha amaani, ndyakuhwera.”​—Isa. 41:10.

5. Ekigambo kya Ruhanga nikibaasa kutureetera kita obusingye?

⁵ Omuringo ogwa kabiri ogu turikubaasa kugiramu obusingye n’okushoma Baibuli kandi tukateekateeka aha bi turikushoma. Ahabw’enki eki ni kikuru? Baibuli erimu obuhabuzi bw’eby’omwoyo oburikubaasa kukuhwera kwetantara okwerarikirira, kukutuubya, nari kukusingura. Reka kwehuzya obuhabuzi oburikugira ngu Ekigambo kya Ruhanga nikibaasa kukuhwera n’okukuhuumuriza, ahakuba kirimu ebigambo by’Omuhangi eby’obwengye. Waaba nooteekateeka aha biteekateeko bya Ruhanga, nyomushana nari nyekiro, kandi okateekateeka aha oku orikubaasa kugyendera aha buhabuzi bwa Baibuli, noija kugarurwamu amaani. Okushoma Ekigambo kya Ruhanga nikugyeragyeranisibwa n’okuba ‘ow’amaani, okaguma omutima; otarikutiina, n’obu kwakuba okuhahaaza omutima.’​—Yos. 1:7-9.

6. Ebigambo bya Yesu nibibaasa kukuhwera bita?

⁶ Omu Kigambo kya Ruhanga, nitushangamu ebigambo bya Yesu ebirikuhuumuriza. Ebigambo bye n’okwegyesa kwe bikaba nibihuumuriza abaabaire nibamuhurikiza. Abantu nyamwingi bakaija ahariwe ahakuba akaruhuura emitima y’abaremereirwe, yaagumya abataine maani, kandi yaahuumuriza abaine amaganya. (Shoma Matayo 11:28-30.) Akaba naafayo aha byetengo by’abandi omu by’omwoyo, enyehurira, n’eby’omubiri. (Mak. 6:30-32) Ekiraganiso kya Yesu eky’okutuhwera na hati nikikora. Nikibaasa kukuhwera nk’oku kyahwereire entumwa abaabaire nibagyenda na Yesu. Tikirikukwetengyesa kureeba Yesu butunu kubaasa kugasirwa. Yesu nk’omugabe omu iguru, na hati naakyoreka embabazi. N’ahabw’ekyo, waaba oine okwerarikirira, naija kukugirira embabazi akuhwere omu bwire obuhikire. Eego, Yesu naabaasa kukuhwera kwemera amaganya kandi  naabaasa kukuha amatsiko n’obumanzi omu mutima gwawe.​—Heb. 2:17, 18; 4:16.

7. Noija kugasirwa ota waashaba Ruhanga omwoyo gurikwera akakugarukamu?

⁷ Yesu akaraganisa ngu Tataitwe w’omu iguru tarikubaasa kuremwa kuha omwoyo gurikwera abarikumushaba. (Luk. 11:10-13) Omuringo gwa kashatu ogu nigwija kutuhwera guta kutuubya aha kwerarikirira? Omwoyo gwa Ruhanga ogurikwera, nigutuhwera kugira emitwarize mirungi. Emitwarize egi ei omwoyo gurikwera gurikutuhwera kugira neeyoreka emitwarize yenyini ei Ruhanga rukira boona aine. (Shoma Abagalatia 5:22, 23; Kol. 3:10) Waagira emitwarize ei omwoyo gurikwera gurikutuhwera kugira, omukago gwawe n’abandi nigweyongyera kuba murungi. N’ekiraarugyemu, bingi ebirikureeta okwerarikirira nibibaasa kutabaho. Teekateeka munonga aha ku emitwarize erikureetwa omwoyo gurikwera erikubaasa kukuhwera.

8-12. Okugira emitwarize erikureetwa omwoyo gurikwera nikikuhwera kita kwetantara okwerarikirira?

⁸ “Okukunda, okushemererwa, obusingye.” Waateeraho kuguma nooha abantu ekitiinisa, noija kushanga ngu noobaasa kurinda enyehurira zaawe. Ekyo nikibaasika kita? Waaba nooyoreka rukundo y’ab’eishe-emwe, orikubafaho, kandi okabaha ekitiinisa, noija kwetantara embeera ezirikukureetera kwerarikirira.​—Rom. 12:10.

⁹ ‘Okugumisiriza, embabazi, oburungi.’ Noogira obusingye na bagyenzi baawe waagyendera aha buhabuzi obu: “Mukorerane gye, mugirirane embabazi, kandi musaasirane.” (Efe. 4:32) Waakora ekyo, nooyetantara embeera ezirikubaasa kukureetera kugira okwerarikirira. Kandi noobaasa n’okusingura embeera ezirikubaho ahabw’obutahikiirira bw’abantu.

¹⁰ Okwikiriza. Obunaku obu, okwerarikirira kwaitu nikukira kuba kwine akakwate n’esente n’eby’obutungi. (Enf. 18:11) Buzima, okugira okwikiriza kuhami ngu Yehova naija kukureeberera nikibaasa kukuhwera kwemera nari kwetantara okwerarikirira. Ekyo nikibaasika kita? Noobaasa kwetantara okwerarikirira nk’okwo, orikugyendera aha buhabuzi bw’entumwa Paulo oburikugira ngu “ebi mwine bibe nibyo byabamara.” Paulo akongyeraho ati: “[Ruhanga] akagira ati: Tindikutsigaho, kandi tindikuhemukaho na kakye. Nikyo turikugambira, tutarikubanganisa, tuti: Mukama niwe muhwezi wangye, tinditiina; omuntu naabaasa kungira ata?”​—Heb. 13:5, 6.

¹¹ “Obucureezi, n’okwerinda.” Teekateeka aha ku okugira emitwarize nk’egyo kiri kirungi kandi kirikukuhwera. Kwonka, noija kwetantara ebikorwa ebirikubaasa kukureetera amaganya, kandi noija kugasirwa waayetantara “obushaarizi bwona, okuguubwa kubi, oruyombo, okujumiirana, n’eihari ryona.”​—Efe. 4:31.

¹² Buzima, oine kuba ori omucureezi kubaasa kuza ahansi “y’omukono gwa Ruhanga ogw’amaani” kandi ‘okamwegyekyerera okushoberwa kwawe kwona.’ (1 Pet. 5:6, 7) Kwonka waateeraho kuba omucureezi, noija kuza omu muhanda oguraakurugiremu okusiimwa Ruhanga kandi akakushagika. (Mik. 6:8) Ekyo nikiija kukuhwera kwesiga Ruhanga omu mwanya gw’okweyesiga. Waamanya ngu Ruhanga naakukunda kandi naakushagika, noija kuba otakyerarikirira ekirenga.

13. Yesu akaba naamanyisa ki obu yaagira ngu “mutaryemereza emitima”?

¹³ Omuri Matayo 6:34 (kishome), nitushangamu obuhabuzi bwa Yesu obu: “Mutaryemereza emitima.” Kwonka, obuhabuzi obu nibubaasa kureebeka nk’obugumire kubugyenderaho. Yesu akaba naamanyisa ki obu yaagira  ati: “Mutaryemereza emitima”? Buzima, akaba atarikumanyisa ngu omuheereza wa Ruhanga tarikwija kwerarikirira na kakye, ahabw’okuba twaheza kwetegyereza ebigambo bya Daudi na Paulo aha nshonga egi. Kwonka Yesu akaba naahwera abeegi be kwetegyereza ngu okwerarikirira okutarikwetengyesa, nari okwerarikirira ekirenga tikirikubaasa kumaraho obureemezi. Buri kiro kiine amaganya gakyo, n’ahabw’ekyo Abakristaayo tibaine kwerarikirira aha byabaireho enyima nari ebiraabeho omumaisho. Noobaasa kugyendera ota aha buhabuzi bwa Yesu kandi okatunga okuhuumurizibwa?

14. Noobaasa kwemera ota okwerarikirira aha byabaireho enyima?

¹⁴ Okwerarikirira okumwe nikubaasa kuba nikureetwaho ebi omuntu yaakozire enyima nari obweremwa bwe. Naabaasa kuba naayefuuza ahabw’ekintu eki yaakozire enyima, nangwa n’emyaka mingi enyima. Obumwe Omugabe Daudi akaba ahurira ‘eby’okushiisha bye bimurengyeire aha mutwe.’ Akagira ati: ‘Omutima gwangye tigurituuza.’ (Zab. 38:3, 4, 8, 18) Omu mbeera egyo, niki eky’obwengye eki Daudi yaabaire aine kukora? Mbwenu shi akakora ki? Omu bwengye, akeesiga embabazi za Yehova n’okusaasira kwe. Aine obuhame akagira ati: “Aine omugisha osaasiirwe eby’okushiisha bye.”​—Shoma Zaaburi 32:1-3, 5.

15. (a) Ahabw’enki otashemereire kwerarikirira aha biriho obunaku obu? (b) Noobaasa kukora ki kutuubya aha kwerarikirira? (Reeba akabokisi “ Oku Orikubaasa Kutuubya aha Kwerarikirira.”)

¹⁵ Obundi, noobaasa kwerarikirira aha biriho obunaku obu. Nk’eky’okureeberaho, obu Daudi yaahandiika Zaaburi 55, akaba naatiinirira amagara ge. (Zab. 55:2-5) Kwonka nabwo, taraikiriize okwerarikirira kumuremesa kwesiga Yehova. Daudi akashaba Yehova, kwonka nabwo akeetegyereza obukuru bw’okugira eki yaakora kubaasa kusingura amaganya. (2 Sam. 15:30-34) Noobaasa kugira eishomo rikuru eri waayegyera ahari Daudi. Omu mwanya gw’okwerarikirira ekirenga, gira ebintu ebi waakora kusingura ebirikureeta okwerarikirira, reero enshonga ozirekye omu mikono ya Yehova.

16. Okumanya amakuru g’eiziina rya Ruhanga nikibaasa kuhamya kita okwikiriza kwawe?

¹⁶ Obumwe Omukristaayo naabaasa kwerarikirira aha bikwatiraine n’oburemeezi obu arikuteekateeka ngu nibwija kubaho omu biro byʼomumaisho. Kwonka, toine kuguma oine amaganya, nari okwerarikirira aha bintu ebi otarikumanya. Ahabw’enki? Ahabw’okuba ebintu tibirikukira kuba bibi nk’oku turikuba nituteekateeka. Tihaine mbeera erikubaasa kurema Ruhanga ou turikwegyekyerera okushoberwa kwaitu kwona. Eiziina rye nirimanyisa “Mbaho” nari Naabaasisa Kuba. (Kur. 3:14) N’ahabw’ekyo titwine kwerarikirira aha biro by’omumaisho, ahakuba eiziina rya Ruhanga niryoreka ngu ebigyendererwa bye ahabw’abantu nibiija kuhikiirira. Noobaasa kuhamya ngu Yehova naija kuha emigisha abaheereza be abeesigwa kandi abahwere kusingura okwerarikirira aha bikwatiraine n’ebyabaireho enyima, obunaku obu, n’ebiro by’omumaisho.

17, 18. Okugaaniira omu muringo murungi nikibaasa kukuhwera kita kusingura okwerarikirira?

¹⁷ Omuringo gwa kaana ogw’okukuhwera kusingura okwerarikirira n’okugaaniiraho n’omuntu ou orikwesiga. Ou ori nawe omu obushwere, munywani waawe ow’aha mara, nari omureeberezi omu kibiina, nibabaasa kukuhwera kugira emiteekateekyere mirungi aha birikukwerarikiriza. “Amaganya g’omutima gw’omuntu gaamureetera okweyinamirira, kwonka ekigambo kirungi kigushemeza.” (Enf. 12:25) Waamugambira otarikushereka kandi okaba ow’amazima nikibaasa kukuhwera kumanya ekirikukwerarikiriza kandi okisingure. Baibuli neetugira eti: “Ahatari kuhanuura enaama zifa busha, kwonka ahu abahi b’obwengye baingi bari, zihikiirizibwa.”​—Enf. 15:22.

¹⁸ Yehova naahwera Abakristaayo kusingura okwerarikirira arikukoresa enteerane z’ekibiina eza buri saabiiti. Noija kuteeranira hamwe n’ab’eishe-emwe bagyenzi baawe abarikukufaho kandi abarikwenda kukugumya. (Heb. 10:24, 25) ‘Okugumyana’ nk’okwo nikwija kukuhwera kuguma ohami omu by’omwoyo kandi kikworobere kusingura amaganya.​—Rom. 1:12.

19. Ahabw’enki noobaasa kugira obuhame ngu omukago gwawe na Ruhanga nigwija kukugumya?

¹⁹ Yetegyereze oku omureeberezi omuri Canada yaayegire obukuru bw’okwegyekyerera Yehova ebirikumwerarikiriza. Aine omurimo gw’obushomesa n’okuhabura abeegi ekirikumureetera amaganya, kandi nabwo aine endwara y’amaganya. Ow’eishe-emwe ogu abaasize kwemera ata embeera egi? Naashoboorora ati: “Okukira byona, nyetegyereize ngu okukora n’amaani kuhamya omukago gwangye na Yehova nikimpa amaani g’okwemera enyehurira zangye. Obushagiki bw’abanywani n’ab’eishe-emwe ni bukuru naaba nyine amaganya. Ningambira omukazi wangye enyehurira zangye ntarikumushereka. Abareeberezi bagyenzi bangye n’omureeberezi orikutaayaayira ebibiina bakampwera kureeba hare. Kandi nkasherura n’obujanjabi, naakora empindahinduka omu muringo ogu ndikukoresamu obwire bwangye, kandi naataho n’obwire bw’okuhuumuraho n’okumanyiiza omubiri gwangye. Mporampora, nkatandika kwetegyeka. Haaba hariho ebintu ebi ntarikubaasa kutegyeka, enshonga ninzireka omu mikono ya Yehova.”

20. (a) Nitubaasa kwegyekyerera tuta Ruhanga okushoberwa kwaitu kwona? (b) Nituza kushwijuma ki omu kicweka ekirikurataho?

²⁰ Omu bugufu, twayetegyereza obukuru bw’okwegyekyerera Ruhanga ebirikutwerarikiriza kurabira omu kushaba n’okushoma Ekigambo kye kandi tukakiteekateekaho. Twareeba n’obukuru bw’okugira emitwarize erikureetwa omwoyo gurikwera, okugambira omuntu ou turikwesiga enyehurira zaitu, n’okugarurwamu amaani Abakristaayo bagyenzi baitu. Ekicweka ekirikurataho nikiza kushoboorora oku Yehova arikutugumya arikutuha amatsiko g’okwija kutunga ekiconco.​—Heb. 11:6.