DIANA orengize emyaka 80 atungire oburemeezi bwingi omu myaka mikye enyima. Iba akarwara endwara y’obwongo ey’okwebwa juba, kandi yaafeera ahu yaabaire naatungira obujanjabi. Batabani be babiri n’abo bakafa, kandi Diana nawe akaba naateganisibwa ekookoro y’amabeere. Kwonka ab’eishe-emwe ku barikureeba Diana omu nteerane nari omu kubuurira, naaba ashemereirwe.

John akamara emyaka erengire 43 arikutaayaayira ebibiina. Akaba naakunda munonga obuheereza bwe, kandi akaba naareeba ngu tihaine kindi eki arikubaasa kukora. Kwonka akarekyera aho kutaayaayira ebibiina kubaasa kureeberera omunyabuzaare we orwaire. Ab’eishe-emwe n’abanyaanyazi-itwe abarikumumanya ku barikumureeba aha nteerane empango nibareeba ngu takahindukire na kakye. Na hati naakishemererwa munonga.

Niki ekihwereire Diana na John kugira okushemererwa? Omuntu oine oburemeezi, naabaasa kuguma ata ashemereirwe? Omuntu naabaasa kuguma ata ashemereirwe yaafeerwa obuheereza bwe? Baibuli neetuha eky’okugarukamu. Neegira eti: ‘Abahikiriire nibaija kushemerererwa omuri’ Yehova. (Zaaburi 64:10) Nitubaasa kwetegyereza gye amazima aga twamanya ekiraatureetere okushemererwa okwabuzima n’ekitarikureeta kushemererwa.

Hariho ebintu ebirikukira kureeta okushemererwa. Nk’eky’okureeberaho, omushaija n’omukazi abarikukundana bataaha omu bushwere. Nari omuntu yaazaara omwana, nari yaatunga obuheereza busya omu kibiina kya Yehova. Ebintu ebi byona nibireeta okushemererwa ahakuba byona n’emigisha kuruga ahari Yehova. Akatuha ekiconco ky’obushwere, okubaasa kw’okuzaara abaana, n’emirimo y’okukora omu kibiina kye.—Okutandika 2:18, 22; Zaaburi 127:3; 1 Timoseo 3:1.

Kwonka ebimwe nibireeta okushemererwa kw’akaanya kakye. Eky’obusaasi, omwe aha abashweraine naabaasa kureebya mugyenzi we nari afe. (Ezekieli 24:18; Hosea 3:1) Abaana nibabaasa kugomera abazaire baabo nari Ruhanga, kandi obundi babingwe omu kibiina.  Nk’eky’okureeberaho, Yehova akaba atarikusiima obuheereza bw’abatabani ba Samueli, kandi Daudi akatunga oburemeezi bw’amaani omu ka ye ahabw’okushambana na Batisheba. (1 Samueli 8:1-3; 2 Samueli 12:11) Ebintu nk’ebi byabaho, tibirikureeta okushemererwa kureka amaganya n’obusaasi bwingi.

Kandi obundi, titurikubaasa kugumizamu n’obuheereza obumwe ahabw’okurwara, nari ahabw’okureeberera eka yaitu, nari haabaho empindahinduka omu kibiina. Baingi abafeereirwe obuheereza bwabo nibagira ngu nibaguma nibateekateeka aha ku obuheereza obwo bwabaire nibubareetera kushemererwa.

Kyorobi kureeba ngu okushemererwa okurikureetwa ebyo byona tikurikugumaho ebiro byona. Mbwenu shi hariho okushemererwa okurikugumaho n’obu embeera zaakuba zigumire? Buzima kuriho, ahakuba Samueli, Daudi, n’abandi bakaguma bashemereirwe n’obu baraabe baatungire okugyezibwa.

Yesu akaba naayetegyereza gye eki okushemererwa kirikumanyisa. Atakaizire omu nsi, Baibuli neeyoreka ngu akaba ‘naayesiimira omu maisho ga [Yehova] buri izooba.’ (Enfumu 8:30) Kwonka ku yaahikire omu nsi obumwe akaba ahikwaho oburemeezi bw’amaani. Beitu nabwo, Yesu akaba atunga okushemererwa ahabw’okukora ebi Ishe arikukunda. (Yohaana 4:34) Kandi shi obu yaabaire ari haihi kufa aine obusaasi bw’amaani? Baibuli neegira eti: “Ahabw’okushemererwa okwatairwe omu maisho ge, akagaya enshoni” z’okuhanikwa aha muti. (Abaheburaayo 12:2) N’ahabw’ekyo ebintu bibiri ebi Yesu yaagizire ngu nibireeta okushemererwa okwabuzima nitubaasa kubyegyeraho bingi.

Eizooba rimwe, abeegi ba Yesu 70 bakaba nibaruga omu kubuurira. Bakaba bashemereirwe ahabw’ebi baabaire bakozire, n’ahabw’okubinga baadaimoni. Yesu akabagira ati: “Kwonka eki mutakishemerererwa baadaimoni okuboorobera; kureka mushemererwe ahabw’amaziina gaanyu kuhandiikwa omu iguru.” (Luka 10:1-9, 17, 20) Eego, okusiimwa Yehova ni kikuru munonga, kandi nikitureetera okushemererwa kwingi kukira obuheereza bw’omutaano bwona.

Eizooba erindi, Yesu akaba naabuurira abantu, omukazi omwe Omuyudaaya yaakunda okwegyesa kwe reero yaagira ngu nyina owaamuzire aine okushemererwa kuzaara  omwana nk’ogwo. Yesu akamugarukamu ati: “Okukira abaine omugisha [okushemererwa] n’abahurira ekigambo kya Ruhanga bakakyorobera!” (Luka 11:27, 28) Okukunda abaana baitu nikibaasa kutureetera kushemererwa. Kwonka ekirikutureetera okushemererwa okwabuzima n’okworobera Yehova, kandi tukagira omukago murungi nawe.

Nitushemererwa munonga twamanya ngu Yehova naatusiima. Kandi n’obu twakuba twine okugyezibwa kw’amaani, nituguma twine okushemererwa. Nangwa, twaguma turi abeesigwa twaba nitugyezibwa, okushemererwa kwaitu nikweyongyera. (Abarooma 5:3-5) Kandi Yehova naaha omwoyo gurikwera, abo abarikumwesiga, kandi okushemererwa ni gumwe aha mitwarize y’omwoyo gurikwera. (Abagalatia 5:22) Ekyo nikituhwera kwetegyereza ahabw’enki Zaaburi 64:10 nihagira hati: ‘Abahikiriire nibaija kushemerererwa omuri’ Yehova.

Eki nikyoreka gye ahabw’enki Diana na John baagumire baashemereirwe n’obu baraabe baatungire oburemeezi. Diana naagira ati: “Ntungire obuhungiro omuri Yehova, nk’oku omwana arikuhungira aha muzaire we.” Naayongyeraho ati: “Ninyehurira ngu Yehova ampaire omugisha gw’okubaasa kugumizamu nimbuurira butoosha nyine akamwenyo.” Niki ekyahwereire John kuguma ashemereirwe n’okugira bingi by’okukora ku yaafeereirwe obuheereza bwe? Naagira ati: “Okukwiha 1998 obu naaheebwa obujunaanizibwa bw’okwegyesa omu Ishomero ry’Okutendeka Abaheereza n’Abareeberezi, nkaguma niinyeyongyera kweyegyesa Baibuli okukira ira.” Naashoboorora ngu tikirabagumiire we n’omukazi we kukora empindahinduka ahakuba bakaba beeteekateekire kukora omurimo gwona ogu Yehova araabahe. Naayongyeraho ati: “Tukikozire tutarikwefuuza.”

Baingi babaasize kureeba okuhikiirira kw’ebigambo ebiri omu Zaaburi 64:10. Nk’eky’okureeberaho, teekateeka aha mushaija n’omukazi we abaamazire emyaka erikurenga 30 aha Beseeli omuri United States. Bwanyima bakashabwa kuba baapayoniya ab’omutaano. Nibagira ngu “okugira amaganya n’ekya butoosha waafeerwa eki orikukunda” kwonka nibongyeraho bati: “Torikubaasa kuganya ebiro byona.” Ahonaaho ku baahikireyo, bakatandika kubuurira n’ekibiina. Kandi bakagira ngu: “Tukashaba ebi twabaire nitwetenga byenyine. Kikatugumya kandi kyatureetera okushemererwa, okureeba okushaba kwaitu nikugarukwamu. Bwanyima y’okuhikayo, abandi omu kibiina bakatandika kuheereza nka baapayoniya kandi twatunga n’abeegi ba Baibuli abarikutunguuka.”

Buzima, ti kyorobi okuguma tushemereirwe. Haine obu turikugira enaku. Kwonka twine obwesigye omu bigambo bya Yehova ebiri omu Zaaburi 64:10. N’obu twakuhwamu amaani, twine obwesigye ngu twaguma turi abeesigwa omu mbeera zoona, nitwija ‘kushemerererwa omuri’ Yehova. Nitubaasa kutegyereza n’ekihika obu Yehova araahikiirize eki yaaraganiise ‘eky’eiguru erisya n’ensi ensya.’ Obwo buri omwe naija kuba ari ohikiriire, kandi naija ‘kushemererwa, ananukye ebiro byona’ ahabw’ebi Yehova araakore.—Isaaya 65:17, 18.

Teekateeka aha biraarugyemu. Nitwija kuba twine amagara marungi turikwimuka buri kasheeshe twine amaani. Byona ebyatuhikireho bikatureetera obusaasi, tibirikwija kugaruka kubaho. Yehova naatuhamiza ngu ‘ebya ira tibirikwija kwijukwa, n’obu kwakuba okuteebwaho omutima.’ Nitwija kwakira abakundwa baitu abafiire, kandi nitwija kwehurira nk’abazaire b’omwishiki w’emyaka 12 ou Yesu yaazoire reero bakagira okushemererwa “kwingi munonga.” (Mako 5:42) Bwanyima, buri omwe omu nsi naija kuba ahikiriire ‘arikushemererwa omuri’ Yehova ebiro byona.