1, 2. Ahabw’enki n’eky’obwengye kuhurikiza Omuhangi waawe waaba noocwamu eki oraakore? (Reeba ebishushani aha kutandika.)

KU ORAABE ori muto, obundi nootunga obuhabuzi bwingi oburikukwata aha biro byawe by’omumaisho. Abashomesa, abahi b’obwengye, nari abandi nibabaasa kukugambira ngu oine kutunga obwegyese bw’ahaiguru, nari omurimo oguraakubaasise kutunga esente nyingi. Kwonka Yehova naakuha obuhabuzi bw’omutaano. N’amazima, naayenda ngu okore n’amaani ah’eishomero kugira ngu obaase kutunga esente z’okwebaisaho. (Abakolosai 3:23) Kwonka kandi naamanya ngu waaba ori muto, nooba oine kucwamu aha nshonga nkuru eziraakwate aha biro byawe by’omumaisho. Naakuha emisingye erikukwebembera kandi ekakuhwera kukora ebirikumushemeza omu biro ebi eby’emperu.​—Matayo 24:14.

² Ijuka ngu Yehova naamanya byona. Naamanya ekiraabeho nyentsya, kandi naamanya gye ngu emperu y’ensi egi eri haihi. (Isaaya 46:10; Matayo 24:3, 36) Kandi Yehova  naiwe naakumanya. Naamanya ekiraakureetere okushemererwa n’ekiraakureetere enaku. Obuhabuzi bw’abantu nibubaasa kureebeka nka burungi kandi obuhikire, kwonka bwaba butarikwegamira aha Kigambo kya Ruhanga nibuba butari obwabuzima.​—Enfumu 19:21.

3, 4. Adamu na Haawa okuhurikiza obuhabuzi bubi kikabakwataho kita hamwe n’abaana baabo?

³ Obuhabuzi bubi butwireho kumara obwire buraingwa. Sitaane niwe yaabandize kuha abantu obuhabuzi bubi. Akagambira Haawa na Adamu ngu nibaija kushemererwa baayecweramu oku baraatuure. (Okutandika 3:1-6) Kwonka Sitaane akaba naayeyendeza! Akaba naayenda ngu Adamu na Haawa n’abaana baabo ab’ebiro by’omumaisho bamworobere kandi bamuramye, reero bangye Yehova. Kwonka Sitaane tihaine eki yaabaire yaakoreire abantu. Yehova niwe yaabaire abahaire buri kimwe. Adamu akamuha Haawa na Haawa yaamuha Adamu, akabaha omusiri murungi ogwa Edeni, n’emibiri ehikiriire eyaabaire neebaasa kugumaho ebiro byona.

⁴ Kwonka eky’obusaasi, Adamu na Haawa bakagomera Ruhanga. Omu kukora batyo, bakeecwa ahari Ogwo owaabahaire amagara. Eki kikarugamu akabi kahango. Nk’ebimuri ebicwirwe aha kimera, Adamu na Haawa mporampora bakakura kandi baafa. N’abaana baabo bakahikwaho oburemeezi obu, kandi eki nikitwariramu naitwe. (Abarooma 5:12) Abantu baingi obunaku obu nibeehuzya emisingye ya Ruhanga bakora eki barikwenda kukora. (Abaefeso 2:1-3) Niharugamu ki? Baibuli neeyoreka gye ngu “tihariho bwengye” omu kuhakanisa Yehova.​—Enfumu 21:30.

5. Ruhanga akaba aine bwesigye ki omu bantu, kandi ahabw’enki yaabaire ahikire?

⁵ Yehova akaba aine obuhame ngu nihaija kubaho abantu otwariiremu n’abato abarikwenda kumumanya n’okumuheereza. (Zaaburi 103:17, 18; 110:3) Abato aba n’ab’omuhendo ahari Yehova! Ori omwe aharibo? Ku kiraabe nikwo kiri, hatariho kubangaanisa nootunga “ebirungi” bingi kuruga ahari Ruhanga, kandi eki nikyongyera aha kushemererwa kwawe. (Shoma Zaaburi 103:5; Enfumu 10:22) Nituza kugamba aha bintu birungi bina aharibyo. Eby’okurya by’omwoyo, abanywani barungi, ebigyendererwa birungi, n’obugabe obwabuzima.

6. Ahabw’enki oshemereire kwigutsya ekyetengo kyawe eky’eby’omwoyo, kandi Yehova ataireho bintu ki kukuhwera?

⁶ Enyamaishwa tiziine kyetengo ky’eby’omwoyo, ekirikumanyisa ngu tiziine kyetengo ky’okumanya Omuhangi waazo. Kwonka itwe tukiine. (Matayo 4:4) Twahurikiza Ruhanga, nitutunga obwengye, n’okushemererwa. Yesu akagira ngu baine okushemererwa abarikufayo aha kyetengo kyabo ky’eby’omwoyo. (Matayo 5:3) Ruhanga naatuha Baibuli kandi naakoresa ‘omwambari omwesigwa kandi ow’obwengye’ kutuha ebitabo ebirikuhamya okwikiriza kwaitu. (Matayo 24:45) Ebitabo ebi nitubyeta eby’okurya by’omwoyo ahakuba nibihamya okwikiriza kwaitu n’omukago ogu twine na Yehova. Nitutunga eby’okurya by’omwoyo ebitarikushushana!​—Isaaya 65:13, 14.

7. Eby’okurya by’omwoyo kuruga ahari Ruhanga nibikuhwera bita?

 ⁷ Eby’okurya by’omwoyo nibibaasa kukuha obwengye, kandi bikuhwere kuteekateeka gye, ekirikukurinda omu miringo mingi. (Shoma Enfumu 2:10-14.) Nk’eky’okureeberaho, emitwarize egi neija kukuhwera kumanya ebishuba, nk’ekirikugira ngu tihariho Muhangi nari ngu esente n’ebintu nibikureetera okushemererwa. Emitwarize egi neekuhwera kwetantara ebyetengo bibi nari emize mibi erikukushiisha. N’ahabw’ekyo kora kyona ekirikubaasika kuba omunyabwengye n’okugira emiteekateekyere mirungi. Reero noija kwereebera ngu Yehova naakukunda kandi naakwendeza ebirungi.​—Zaaburi 34:8; Isaaya 48:17, 18.

8. Ahabw’enki oshemereire kwirira haihi na Yehova hati, kandi eki nikiija kukugasira kita omu biro by’omumaisho?

⁸ Juba, buri kimwe ekiri omu nsi ya Sitaane nikiija kucwekyerezibwa. Yehova wenka niwe arikubaasa kuturinda, kandi akatuha ebintu ebi turikwenda, ebirikubaasa kutwariramu eby’okurya byaitu ebya buri izooba. (Habakuuki 3:2, 12-19) N’ahabw’ekyo hati nibwo bwire bw’okwirira haihi na Ruhanga, kandi okoongyera kumwesiga. (2 Petero 2:9) Waakora otyo, n’obu waakuhikwaho mbeera ki, noija kwehurira nka Daudi, owaagizire ngu Yehova “niwe ntaho amaisho obutoosha. Tinditengyetsibwa, ahakuba ari aha rubaju rwangye rwa buryo.”​—Zaaburi 16:8.

9. (a) Kurugiirira ahari Yohaana 6:44, Yehova naakora ki? (b) Ni kintu ki eky’omutaano ekirikubaho twabugana Abajurizi ba Yehova bagyenzi baitu?

⁹ Waabugana omuntu otari omu mazima omurundi gw’okubanza, buzima nooba noomumanya kirikwingana ki? Noobaasa kuba noomanya eiziina rye n’oku arikushusha nikwo kuheza. Kwonka omurundi gw’okubanza waabugana omuntu ori omu mazima n’eky’omutaano. Nooba noomanya ngu naakunda Yehova. Nooba noomanya ngu haine ekirungi eki Yehova yaamureebiremu, kandi akamweta kuba omwe aha b’eka ye abarikumuramya. (Shoma Yohaana 6:44.)  Otarikwihirira ahu yaakuriire nari oku yaakuziibwe, nooba noomanya bingi ebirikumukwataho, kandi nawe naakumanyaho bingi!

10, 11. Abajurizi ba Yehova nibashushanisa ki, kandi eki nikikukwataho kita?

¹⁰ Ahonaaho waabugana Omujurizi wa Yehova, noomanya ngu oine ebintu bikuru ebi orikushushanisa nawe. Nooba noomanya ngu n’obu mutarikushushanisa rurimi, kwonka nimugamba orurimi orushemeire orw’amazima orurikushushana. (Zefania 3:9) Eki nikimanyisa ngu mwembi nimwikiririza omuri Ruhanga, nimugyendera aha mitindo y’emicwe erikushushana, kandi mwine amatsiko garikushushana ag’ebiro by’omumaisho. Ebintu ebi nibibahwera kwesigana n’okugira omukago guhami ebiro byona.

¹¹ N’ahabw’ekyo waaba nooramya Yehova, noobaasa kugira ngu buzima oine abanywani barungi. Nooba oine abanywani omu nsi yoona, n’obu waakuba otakababuganahoga! Noobaasa kuteekateeka aha baheereza ba Yehova abandi abaine ekiconco eki eky’omuhendo?

12. Noobaasa kutaho bigyendererwa ki ebirungi?

¹² Shoma Omubuurizi 11:9–12:1. Oine ebigyendererwa byona ebi orikwenda kuhikiiriza? Obundi otaireho ekigyendererwa ky’okushoma Baibuli buri izooba nari kugarukamu gye, nari kuha gye embazo zaawe omu nteerane. Nari obundi nooteeraho kwega kukoresa gye Baibuli omu kubuurira. Nooyehurira ota waamanya ngu oriyo nootunguuka nari abandi baakugambira ngu nookora gye? Obundi nooyehurira gye, kandi buzima oshemereire kwehurira otyo! Ahabw’enki? Ahakuba nooba nookora eki Yehova arikwenda ngu okore, nk’oku Yesu yaakozire.​—Zaaburi 40:8; Enfumu 27:11.

13. Okuheereza Ruhanga nikukira kuta okwebembeza ebigyendererwa by’ensi egi?

¹³ Waata omutima aha kuheereza Yehova, nooba nookora omurimo oguraakureetere kushemererwa, kandi gukakuhwera kugira ekigyendererwa. Paulo akaha obuhabuzi obu: ‘Muhame, murekye kunyiganyigibwa, mweyongyere obutoosha kukora omurimo gwa Mukama, ahabw’okuba nimumanya ngu okukora kwanyu ti kwa busha omuri Mukama.’ (1 Abakorinso 15:58) Kwonka abantu baata omutima aha bigyendererwa by’ensi, nk’okukora sente nari okurangaanwa, tibarikutunga okushemererwa okwabuzima. N’obu baakuba abasinguzi, butoosha nibaba nibeehurira baine ekirikubaburaho. (Luka 9:25) Eki nitukyegyera aha ky’okureeberaho ky’Omugabe Sulemaani.​—Abarooma 15:4.

14. Noobaasa kwegyera ki aha kugyezesa kwa Sulemaani?

¹⁴ Sulemaani owaabaire ari omwe aha bashaija b’amaani abagaiga abarabaireho akakora okugyezesa. Akagambira omutima gwe ati: “Ka nkugyeze n’eby’okweshemeza, oshemererwe, ogwe gye.” (Omubuurizi 2:1-10) N’ahabw’ekyo Sulemaani akombeka enju nungi munonga, yaatebeekanisa emisiri erikushemeza n’ey’okuhuumuriramu mirungi munonga, kandi yaakora buri kimwe eki yaabaire naayenda. Mbwenu akahurira amazirwe kandi ashemereirwe? Sulemaani ku yaateekateekire ahari buri kimwe eki yaabaire aine, n’ebi yaakozire, akagira ati: ‘nkashanga byona biri busha.’ Akoongyeraho ati: ‘Tihaine ekiine omugasho.’ (Omubuurizi 2:11) Noija kwegyera aha kugyezesa kwa Sulemaani?

15. Ahabw’enki oine kugira okwikiriza, kandi nikukuhwera kuta nk’oku Zaaburi 32:8 harikworeka?

¹⁵ Abamwe nibeega baaheza kukora enshobe, reero bakatunga oburemeezi. Yehova tarikwenda ngu eki kitubeho. Naayenda ngu  omuhurikize kandi omworobere. Eki nikyetengyesa okwikiriza, kwonka torikubaasa kwefuuza ebi orikucwamu ahabw’okwikiriza. Kandi na Yehova tarikubaasa kwebwa ‘okukunda oku waayorekire ahabw’eiziina rye.’ (Abaheburaayo 6:10) N’ahabw’ekyo kora n’amaani kwombeka okwikiriza kuhami. Obwo noija kucwamu gye kandi okyereebere ngu Yehova naakwendeza ebirungi.​—Shoma Zaaburi 32:8.

16. Ahabw’enki twine kutwara obugabe nk’obw’omuhendo kandi tukabukoresa omu muringo gw’obwengye?

¹⁶ Paulo akagira ngu ahu omwoyo gwa Yehova guri, niho obusingye buri. (2 Abakorinso 3:17) Okugira obugabe nikishemeza Yehova, kandi naayenda ngu naiwe oshemererwe kubugira. Kwonka naayenda ngu okorese obugabe bwawe omu muringo gw’obwengye oguraakurinde. Shana obundi ab’orwingano rwawe nibareeba ebirikwitsa enshoni, nibashambana, nibeejumba omu mizaano y’akabi, nari nibakoresa kubi amaarwa n’emibazi. Omu kubanza ebintu bi nibibaasa kureebeka nka birungi nari ebirikushemeza, kwonka nibikira kurugamu ebintu ebibi, nk’endwara, emize egumire eicwa, nari okufa. (Abagalatia 6:7, 8) Abato abarikwejumba omu bintu ebi nibabaasa kuteekateeka ngu baine obugabe, kwonka buzima tibabwine.​—Tito 3:3.

17, 18. (a) Okworobera Ruhanga nikutubaasisa kuta kutunga obusingye obwabuzima? (b) Ni mu muringo ki ogu Adamu na Haawa baabaire baine obusingye kukira abantu obunaku obu?

¹⁷ Kwonka okworobera Yehova n’eky’oburungi bwaitu. Ni kirungi aha magara gaitu, kandi nikituha obugabe obwabuzima. (Zaaburi 19:7-11) Kandi waakoresa obugabe omu muringo gw’obwengye okacwamu kworobera ebiragiro n’emisingye ya Yehova ehikiriire, nooyoreka Ruhanga n’abazaire baawe ngu ori omuntu w’obujunaanizibwa. Obundi abazaire baawe nibaija kukwesiga bakwongyere obugabe. Kandi Yehova naaraganisa ngu juba naija kuha abaheereza be abeesigwa boona obugabe obuhikiriire, obu Baibuli erikweta “obusingye [obugabe] bw’abaana ba Ruhanga obw’ekitiinisa.”​—Abarooma 8:21.

¹⁸ Obu nibwo bugabe obu Adamu na Haawa baabaire baine. Omu musiri Edeni, Ruhanga akabagambira ekintu kimwe eki baabaire bataine kukora. Haine omuti gumwe ogu baabaire bazibiirwe kurya ebijuma byagwo. (Okutandika 2:9, 17) Mbwenu nooteekateeka ngu Ruhanga akaba ataireho amaremesa kubaha ekiragiro ekyo? Ngaaha buzima! Teekateeka aha biragiro bingi ebi abantu bataireho, kandi bakagyema abandi kubyorobera. Kwonka we Yehova akaha Adamu na Haawa ekiragiro kimwe kyonka.

19. Yehova na Yesu nibatwegyesa ki ebiraatuhwere kuba ab’obusingye?

¹⁹ Yehova n’omunyabwengye munonga omu muringo ogu arikututwarizamu. Omu mwanya gw’okutuha ebiragiro bingi, naagumisiriza arikutwegyesa kworobera ekiragiro kya rukundo. Naatwegyesa kugyendera  aha misingye ye n’okwanga ekibi. (Abarooma 12:9) Omwana we Yesu omu Rubazo rwe orw’aha Rushozi, akatuhwera kwetegyereza ahabw’enki abantu nibakora ebintu bibi. (Matayo 5:27, 28) Kandi omu nsi ensya, Yesu yaaba naategyeka nk’Omugabe w’Obukama bwa Ruhanga, naija kugumizamu naatwegyesa kureeba ekibi n’ekirungi nk’oku arikubireeba. (Abaheburaayo 1:9) Kandi Yesu naija kutuhindura abahikiriire omu biteekateeko n’omu mubiri. Teekateeka oku embeera ziraabe ziri twaba tutarikubaasa kwohibwa kukora ebibi, kandi tutarikubaasa kurwara ahabw’okutahikiirira. Obwo, nitwija kurugaho nitutunga “obusingye [obugabe] bw’abaana ba Ruhanga obw’ekitiinisa” obu Yehova yaaraganiise.

20. (a) Yehova naakoresa ata obugabe bwe? (b) Noobaasa kumutooreza ota?

²⁰ Omu nsi ensya, nabwo obugabe bwaitu nibwija kuba bwine obugarukiro. Mu muringo ki? Nabwo nitwija kuba nituhigwa rukundo ei twiniire Ruhanga n’abandi. Twaba nitukora buri kimwe turikwihirira ahari rukundo, nituba nitutooreza Yehova. N’obu Yehova araabe aine obugabe obutaine bugarukiro, ebi arikukora byona nibyegambira ahari rukundo, otwariiremu n’oku arikututwariza. (1 Yohaana 4:7, 8) N’ahabw’ekyo nikikora amakuru kugira ngu nitugira obusingye obwabuzima twatooreza Ruhanga.

21. (a) Daudi akaba naatwara ata Yehova? (b) Omu kicweka ekirikukurataho nituza kugaaniira ahari ki?

²¹ Noosiimira kimwe ebirungi byona ebi Yehova akuhaire? Akuhaire eby’okurya eby’omwoyo, abanywani barungi, ebigyendererwa by’omugasho, amatsiko g’okutunga obugabe obwabuzima omu biro by’omumaisho, n’ebindi biconco birungi bingi. (Zaaburi 103:5) Nk’oku Zaaburi 16:11 harikworeka, obundi nooyehurira nka Daudi obu yaashaba ati: ‘Noonyoreka omuhanda gw’amagara, omu maisho gaawe hariho okushemererwa kwingi munonga; omu mukono gwawe gwa buryo harimu ebirikushemeza ebiro byona.’ Omu kicweka ekirikukurataho, nituza kugaaniira aha mazima g’omuhendo agandi agari omuri Zaaburi 16. Amazima aga nigaija kukuhwera kureeba oku orikubaasa kutunga okushemererwa okurikukirayo!