NOOYEREEBA nk’omuntu orikusiima, kandi orikwebaza abandi? Twena twine kuteekateeka aha kibuuzo eki. Baibuli ekagamba ngu omu bwire obu, baingi nibaija kuba “entasiima.” (2 Tim. 3:2) Obundi oraareebireho abantu abarikuteekateeka ngu buri kimwe bakiineho obushoboorozi, orikushusha ngu buri kimwe n’ekyabo. Nooba nooshusha ngu tibaine kusiima nari kwebaza ahabw’ebi barikutunga. Mbwenu shi oshangire ngu nikitama kuba n’abantu nk’abo?

Okutaana n’ekyo, abaheereza ba Yehova nibahigwa bati: “Mube abarikusiima.” Tushemereire kuba abarikusiima “omuri byona.” (Kol. 3:15; 1 Tes. 5:18) Nangwa, okuba abarikusiima ni kirungi ahariitwe. Hariho enshonga nyingi ahabw’enki twine kusiima.

Enshonga nkuru erikutureetera kugira omutwarize gw’okusiima n’okugira ngu nikutuhwera kwegiraho emiteekateekyere mirungi. Omuntu yaayebaza, naabaasa kwehurira gye kandi n’owaayebazibwa nawe naayehurira gye. Ahabw’enki okusiima nikureetera orikusiima n’orikusiimwa kuhurira gye? Teekateeka aha ky’okureeberaho eki: Abantu baaba beeteekateekire kugira eki baakukorera, mbwenu shi ekyo tikirikworeka ngu okishemereire? Eki nikyoreka ngu nibakufaho. Waareeba oku barikukufaho, nikikureetera kwehurira gye. Nikibaasa kuba nikwo kyabaire ahari Ruusi. Boazi akagirira Ruusi obufura. Hatariho kubangaanisa, Ruusi akashemererwa munonga kureeba ngu haine orikumufaho.​—Rus. 2:10-13.

Okukira munonga ni kikuru kusiima Ruhanga. Buzima, obumwe nooteekateeka aha by’omwoyo n’eby’omubiri ebi arikutuha, n’ebi arikugumizamu naatuha. (Bir. 8:17, 18; Byak. 14:17) Omu mwanya gw’okuteekateeka kakye aha burungi bwa Ruhanga, twara obwire oteekateekye munonga aha migisha mingi ei Ruhanga akuhaire n’abakundwa baawe. Okuteekateeka aha bufura bw’Omuhangi waawe nikiija kukureetera kwongyera kumusiima n’okwongyera kwetegyereza ku arikukukunda kandi akakusiima.​—1 Yoh. 4:9.

Kwonka kora ekirikukira aha kuteekateeka aha bufura bwe n’emigisha ei akuhaire, beitu musiime ahabw’oburungi bwe. (Zab. 100:4, 5) Nikigambwa ngu “waasiima abandi nooyongyera aha kushemererwa kwawe.”

Enshonga endiijo ahabw’enki okusiima ni kurungi n’ahabw’okugira ngu nikuhamya emikago. Twena nitwenda ngu batusiime. Waasiima ondiijo oyihire aha mutima ahabw’ekikorwa ky’embabazi, nimwongyera kukundana. (Rom. 16:3, 4) Kandi, abantu abarikusiima nibabaasa kuba ab’omugasho. Nibeetegyereza eby’embabazi ebi abandi barikubakorera, kandi ekyo nikibahiga kugirira abandi embabazi. Eego, okuhwera abandi nikireeta okushemererwa. Kiri nk’oku Yesu yaagizire ngu okugaba nikureeta okushemererwa “okukira okuheebwa.”​—Byak. 20:35.

Robert Emmons, orikukora n’abacondooza omu Yunivasite ya California arikugamba aha nshonga y’okusiima, akagira ati: “Kubaasa kworeka okusiima, twine kwetegyereza ngu nitwetenga bagyenzi baitu.” Amazima gari ngu abandi nibatubaisaho kandi batushagika omu miringo mingi. Nk’eky’okureeberaho, nibabaasa kutuha eby’okurya nari batuhwere twaba turwaire. (1 Kor. 12:21) Omuntu orikumanya kusiima naayebaza abandi butunu baagira eki baamukorera. Mbwenu shi obu kiri kityo, nookira kwebaza abandi baagira eki baakukorera?

Enshonga endiijo erikureetera okusiima kuba kukuru n’ahabw’okugira ngu nikukuhwera kuta omutima aha birungi beitu bitari bibi. Obwongo bwawe buri nk’akagyegyena. Nibukubaasisa kuta omutima aha bintu ebimwe reero buzibire ebindi kutaaha omu biteekateeko byawe. Ekirikurugamu noota omutima aha birikwombeka omu mwanya gw’okuteekateeka munonga aha buremeezi. Oku orikweyongyera kuba omuntu orikusiima, nikwo orikweyongyera kureeba ebirungi, n’ekirikurugamu nooyongyera kusiima abandi. Waaguma noota omutima aha bi orikubaasa kusiimira abandi, nikiija kukubaasisa kukora eki Paulo yaatuhigire kukora obu yaagira ati: “Mushemererwe obutoosha omuri Mukama.”​—Fil. 4:4.

Okuba orikusiima nikukuhwera kutagira emiteekateekyere egwire. Mbwenu shi buzima ti kigumire kuba orikusiima kandi okagaruka okagira eitima, akaguubwa kubi, nari okagira enziika? Abantu abarikusiima tibarikukira kusherura eby’obugaiga. Nibamarwa n’ebi baine, kandi tibarikuta omutima aha kusherura ebindi.​—Fil. 4:12.

Obu ori Omukristaayo kimanye ngu Sitaane naayenda ohwemu amaani n’omuhimbo ahabw’oburemeezi obu orikutunga omu biro by’emperu ebi. Naashemererwa kukureeba oine emiteekateekyere etahikire n’omutima gw’okwetomboita. Waagira omutima nk’ogwo, nooba otakiri mubuurizi murungi ow’amakuru marungi. Nangwa, okusiima kwine akakwate n’emitwarize y’omwoyo gurikwera erikutwariramu okushemererwa ahabw’ebirungi ebi Ruhanga akuhaire n’okwikiririza omu bi arikuraganisa.​—Gal. 5:22, 23.

Waaba ori omuheereza wa Yehova, obundi noikirizana n’ebiri omu kicweka eki ebirikukwata aha kusiima. Kwonka nabwo, nooyetegyereza ngu okuba orikusiima, n’okuba endeebera birungi obumwe tikyorobi. Kwonka otaikiriza ekyo kukumaramu amaani. Noobaasa kuteeraho kugira omutwarize ogu, kandi ogume ogwine. Ota shi? Buri izooba gira obwire bw’okuteekateeka aha bintu bimwe ebi orikubaasa kusiima. Waaguma nookora otyo, noija kwongyera kugira omutwarize gw’okusiima. Ekyo nikiija kukureetera okushemererwa kwingi kukira abo abarikuta omutima aha buremeezi obu baine. Ta omutima aha birungi ebi Ruhanga n’abandi barikukukorera ebirikukugumya, bikakureetera n’okushemererwa. Noobaasa kuguma noohandiika omu katabo. Noobaasa kuhandiikamu ebintu bibiri nari bishatu buri izooba ebirikukureetera kusiima.

Abamwe abarikucondooza aha nshonga egi nibagira ngu “twaba nitukira kusiima abandi, nikibaasa kuhindura oku obwongo bwaitu burikukora, reero ekyo kitureetere kwongyera kwehurira gye.” Omuntu orikusiima naakira kuba ashemereirwe. N’ahabw’ekyo manya emigisha yaawe, yetegyereze gye ebirungi ebi otungire, reero ogume osiime! Omu mwanya gw’okuba omuntu otarikufayo ahabw’ebirungi ebi orikutunga, siima Yehova, “ahabw’okuba ni murungi.” Eego, ‘ba orikusiima’ byona.​—1 Bus. 16:34; 1 Tes. 5:18.