1-2. Kurugiirira aha ky’okureeberaho kya Angelito, buri omwe ahariitwe aine kukora ki?

MBWENU shi abazaire baawe n’Abajurizi ba Yehova? Ku kiraabe nikwo kiri, guma noijuka ngu torikubaasa kubahunguraho omukago murungi na Yehova. Yaaba abazaire baawe nibaheereza Yehova nari ngaaha, buri omwe ahariitwe aine kwombeka omukago murungi na Yehova.

² Teekateeka aha bi ow’eishe-emwe orikwetwa Angelito yaarabiremu. Akakurira omu ka y’Abajurizi ba Yehova. Kwonka obu yaabaire ari muto, akaba atarikuhurira ngu aine omukago murungi na Ruhanga. Naagira ati: “Nkaba nimpeereza Yehova ahabw’okugira ngu nkaba niinyenda kukora eki eka yangye yaabaire neekora.” Kwonka, Angelito akacwamu kukoresa obwire bwe kushoma Ekigambo kya Ruhanga n’okukiteekateekaho, kandi akatandika n’okushaba Yehova emirundi mingi. Hakarugamu ki? Angelito naagira ati: “Nkeega ngu omuringo gumwe gw’okugira omukago murungi na Tata omukundwa Yehova, n’okuteeraho kumumanya ahabwangye.” Ekyahikire ahari Angelito nikireetaho ebibuuzo: Ni ntaaniso ki eri aha gati y’okumanya ebirikukwata ahari Yehova n’okumumanya gye? Kandi nitubaasa kumumanya gye tuta?

3. Ni ntaaniso eri aha gati y’okumanya ebirikukwata ahari Yehova n’okumumanya gye?

³ Nitubaasa kugira ngu omuntu naamanya ebirikukwata ahari  Ruhanga yaaba naamanya eiziina rye nari bimwe aha bintu ebi yaagambire n’ebi yaakozire. Kwonka okumumanya gye nikitwariramu ekirikukira ahari ekyo. Twine kumara obwire turikwega ahari Yehova n’emitwarize ye mirungi munonga. Obwo nibwo turikubaasa kutandika kwetegyereza ebigambo bye n’ebikorwa bye. Eki nikituhwera kumanya yaaba naasiima ebiteekateeko byaitu, ebi turikucwamu, n’ebikorwa byaitu. Twaheza kumanya ebi Yehova arikwenda ngu tukore, nituba twine kubikora.

4. Twashwijuma ebi abarikugambwaho omu Baibuli baakozire nikituhwera kita?

⁴ Abantu nibabaasa kutugaya twaba nitwenda kuheereza Yehova, kandi batuhiiganise munonga twatandika kuteeranira hamwe n’abaheereza be. Kwonka twayesiga Yehova tarikubaasa kututsigaho. Nituba twatandika kutaho omusingi gw’okuba banywani ba Ruhanga ebiro byona. Kwonka shi nitubaasa kumanya gye Yehova? Eego buzima, nitubaasa! Ahakuba abashaija abatahikiriire, nka Musa, n’Omugabe Daudi, bakooreka ngu nikibaasika. Twaba nitushwijuma ebi baakozire, nitwija kugarukamu ebibuuzo bibiri ebi: Bakamanya bata Yehova? Kandi nitubaasa kubeegyeraho ki?

5. Musa akacwamu kukora ki?

⁵ Musa akagyendera aha bi yaayegire. Obu Musa yaabaire aine emyaka nka 40, akacwamu kwegaita aha baheereza ba Ruhanga Abaheburaayo, omu mwanya gw’okwetwa “mutabani wa muhara wa Faraho.” (Heb. 11:24) Musa akatsigaho omwanya gw’ekitiinisa. Okucwamu kwegaita aha Baheburaayo abaabaire bari abahuuku omuri Misri, akata amagara ge omu kabi ahabw’ekiniga kya Faraho, omutegyeki rugambwa ou abantu baabaire nibatwara nka ruhanga. Ka yaayorekire ngu aine okwikiriza kw’omutaano! Musa akeesiga Yehova. Obwesigye obwo n’omusingi gw’okugira omukago ogw’ebiro n’ebiro.​—Enf. 3:5.

6. Nitubaasa kwegyera ki ahari Musa?

⁶ Eki nikitwegyesa eishomo ki? Nka Musa, twena twine kucwamu: Nitwija kucwamu kuheereza Ruhanga n’okuteeranira hamwe n’abaheereza be? Nikibaasa kutwetengyesa kwefeerereza ebintu ebimwe kuheereza Ruhanga, kandi nitubaasa kuhiiganisibwa abatarikumanya Yehova. Kwonka twaba nitumwesiga, nitubaasa kugira obuhame ngu naija kutushagika!

7-8. Musa akagumizamu naayega ki?

⁷ Musa akagumizamu naayega aha mitwarize ya Yehova n’okukora ebi arikukunda. Nk’eky’okureeberaho, obu Musa yaashabwa kwebembera eihanga rya Israeli kuruga omu buhuuku, akaba ataine bumanzi kandi akaguma naagambira Yehova ngu tarikubaasa. Yehova akagarukamu Musa omu muringo gw’embabazi, yaamuha obuhwezi. (Kur. 4:10-16) N’ekyarugiremu, Musa akabaasa kutwarira Faraho obutumwa bw’okucwa orubanja. Musa akareeba Yehova arikukoresa amaani ge kucungura Abaisraeli, kandi arikucwekyereza Faraho n’eihe rye omu Nyanja Erikutukura.​—Kur. 14:26-31; Zab. 136:15.

⁸ Bwanyima ya Musa kwebembera Abaisraeli kubaiha Misri, bakagumizamu barikutunga rwekwatso y’okwetomboita. N’obu kiraabe kiri kityo, Musa akareeba okugumisiriza kwa Yehova okw’amaani arikukoragana n’abantu abu yaacungwire kuruga omu buhuuku. (Zab. 78:40-43) Kandi Musa akareeba obucureezi bwa Yehova obw’omutaano obu yaamweshengyereza kutacwekyereza Abaisraeli kandi akabura kubacwekyereza.​—Kur. 32:9-14.

9. Kurugiirira aha Abaheburaayo 11:27, Musa akaba aine mukago ki na Yehova?

 ⁹ Bwanyima y’Abaisraeli kuruga Misri, Musa akagumizamu naahamya omukago gwe na Yehova yaaba nk’orikumureeba maisho na maisho. (Shoma Abaheburaayo 11:27.) Baibuli erikworeka oku mukago ogwo gwabaire guhami munonga, neegira ngu Yehova akaba “agamba na Musa nibareebana, nk’oku omuntu agamba na mugyenzi we.”​—Kur. 33:11.

10. Kubaasa kumanya gye Yehova, twine kukora ki?

¹⁰ Eki nikitwegyesa eishomo ki? Okubaasa kumanya gye Yehova, titwine kwega aha mitwarize ye yonka, beitu twine n’okukora ebi arikukunda. Obunaku obu, Yehova naayenda ngu “abantu boona bajunwe, bamanyire kimwe amazima.” (1 Tim. 2:3, 4) Omuringo gumwe ogw’okukora ebi Ruhanga arikukunda, n’okwegyesa abandi ebirikumukwataho.

11. Twaba nitwegyesa abandi ebirikukwata ahari Yehova, nitwongyera tuta kumumanya gye?

¹¹ Obwire obwingi twaba nitwegyesa abandi ebirikukwata ahari Yehova naitwe nibwo turikwongyera kumumanya gye. Nk’eky’okureeberaho, nitureeba gye butunu embabazi za Yehova yaaba naatwebembera kutuhitsya ahari abo abaine omutima murungi. (Yoh. 6:44; Byak. 13:48) Nitwetegyereza amaani g’Ekigambo kya Ruhanga twareeba abu turikwegyesa Baibuli barikucwa emize mibi, kandi bakatandika kutaho omuntu omusya. (Kol. 3:9, 10) Kandi nitureeba obuhame ngu Ruhanga naagumisiriza ahabw’okuha abantu baingi omu kicweka kyaitu omugisha gw’okwega ebirikumukwataho bakatunga amatsiko g’okujunwa.​—Rom. 10:13-15.

12. Nk’oku kirikworekwa omu Okuruga 33:13, Musa akashaba ki Yehova, kandi n’ahabw’enki?

¹² Musa tarakwatsire eijaga omukago gwe na Yehova. Nangwa na bwanyima ya Musa kukora eby’okutangaaza omu iziina rya Ruhanga, nabwo omu muringo gw’ekitiinisa akashaba Yehova ngu amwikirize kumumanya gye. (Shoma Okuruga 33:13.) Musa akaba arengize emyaka 80 obu yaashaba Yehova atyo, kwonka nabwo akaba naareeba ngu akiine bingi by’okwega ahari Ishe ow’omu iguru.

13. Nitubaasa kuhamya tuta ngu nitutwara omukago gwaitu na Ruhanga nk’ogw’omuhendo?

¹³ Eki nikitwegyesa eishomo ki? N’obu twakuba tumazire obwire bwingi turikuheereza Yehova, titushemereire kukwata eijaga omukago gwaitu nawe. Omuringo gumwe ogwa butunu ogu turikubaasa kworeka ngu nitutwara omukago gwaitu na Ruhanga nk’ogw’omuhendo, n’okugamba nawe kurabira omu kushaba.

14. Ahabw’enki okushaba niyo ntima nkuru y’okwega ebirikukwata ahari Ruhanga?

¹⁴ Okugaaniira munonga n’omuntu n’entima nkuru y’okugira omukago murungi n’omuntu. N’ahabw’ekyo yirira haihi na Ruhanga orikumushaba butoosha, otaritiina kumugambira enyehurira zaawe n’ebiteekateeko byawe. (Efe. 6:18) Krista, orikutuura omuri Turkey, naagira ati: “Ninyeyongyera kukunda Yehova n’okumwesiga buri murundi ogu ndikumushaba nkamugambira ebiteekateeko byangye, reero nkareeba naampwera. Okureeba Yehova naagarukamu okushaba kwangye kimpwereire kumutwara nka Tata, kandi Munywani wangye.”

15. Yehova akagamba ata aha Mugabe Daudi?

¹⁵ Omugabe Daudi akazaarwa omu ihanga eryabaire ryehaireyo ahari Yehova Ruhanga. Kwonka Daudi tararamize Yehova ahabw’okugira ngu eka ye ekaba neeramya Yehova. Akombeka omukago gwe na Yehova, kandi Yehova akaba amwiniire rukundo y’omutaano. Yehova akagamba ahari Daudi nk’omuntu  ou omutima gwe gurikukunda.’ (Byak. 13:22) Daudi akaba ata munywani wa Yehova ow’aha mara?

16. Okwetegyereza ebyahangirwe kikahwera Daudi kwega ki ahari Yehova?

¹⁶ Daudi akeega ebirikukwata ahari Yehova kurabira omu byahangirwe. Obu Daudi yaabaire ari muto, akamara obwire bwingi omu ishwa arikuriisa entaama za ishe. Obundi obwo nibwo yaatandika kuteekateeka aha bihangirwe bya Yehova. Nk’eky’okureeberaho, Daudi ku yaabaire areeba ahaiguru nyekiro, akaba atareeba omuzinga gw’enyonyoozi kyonka, kureka naabaasa kuba yaabaire naayetegyereza n’emitwarize y’Ogwo owaazihangire. Eki kikahiga Daudi kuhandiika ati: ‘Eiguru nirimanyisa ekitiinisa kya Ruhanga, n’omwanya gw’ahaiguru nigworeka emirimo y’emikono ye.’ (Zab. 19:1, 2) Daudi ku yaateekateekire aha muringo ogu omuntu ahangirwemu, akareeba obwengye bwa Yehova obw’omutaano. (Zab. 139:14) Ku yaateireho kwetegyereza ebi Yehova yaahangire, kikamuhwera kwegarura ahansi.​—Zab. 139:6.

17. Nitubaasa kwega ki twateekateeka aha byahangirwe?

¹⁷ Eki nikitwegyesa eishomo ki? Fayo kwetegyereza ebyahangirwe. Kora ekirikukira aha kutuura omu nsi nungi ei Yehova yaahangire, shemezibwa ebirimu! Omu mbeera zaawe eza butoosha, teekateeka aha ku abantu, enyamaishwa, n’ebimera birikubaasa kukuhwera kwega ahari Yehova. Reero obwo buri izooba noija kugira eki waayega ahari Ruhanga waawe owa rukundo. (Rom. 1:20) Kandi buri izooba noija kureeba rukundo ei omwiniire erikweyongyera.

18. Nk’oku Zaaburi ya 18 erikworeka, Daudi akeetegyereza ki?

¹⁸ Daudi akeetegyereza ngu Yehova akaba naamuhwera. Nk’eky’okureeberaho, Daudi ku yaabaire arinda entaama za ishe kutariibwa ekicuncu n’edubu, ekyo kikaba kimuhwera kumanya ngu Yehova niwe arikumuhwera kusingura enyamaishwa z’amaani ezo. Ku yaasingwire Goliasi omurwani ekikaaka, akabaasa kwetegyereza gye ngu Yehova niwe arikumwebembera. (1 Sam. 17:37) Kandi Daudi ku yaahungire Omugabe Saulo owaabaire aine eihari akeetegyereza ngu Yehova niwe yaamujuna. (Zab. 18, omutwe gw’eshuura egyo) Omuntu oine omwetunguuro akaba naabaasa kuteekateeka ngu ebi byona abikozire ahabw’amaani ge. Kwonka Daudi akaba ari omucureezi, n’ahabw’ekyo akabaasa kureeba omukono gwa Yehova omu bi yaabaire naakora.​—Zab. 138:6.

19. Nitubaasa kwegyera ki ahari Daudi?

¹⁹ Eki nikitwegyesa eishomo ki? Twine kukora ekirikukira aha kushaba Yehova obuhwezi. Twine n’okuteeraho kumanya oku arikutuhwera n’obu arikutuhwera. Omu bucureezi twamanya obugarukiro bwaitu, nitwija kureeba gye ngu Yehova naatubaasisa kukora eki tutarikubaasa kukora ahabwaitu. Kandi buri murundi ogu turikureeba Yehova naatuhwera, omukago gwaitu nawe nigweyongyera kuhama. Ow’eishe-emwe Isaac omuri Fiji owaaheereize Yehova kumara emyaka mingi, akashanga eki kihikire. Naagira ati: “Ku ndikureeba enyima, nindeeba oku Yehova atwire naampwera kuruga obu naatandika kwega Baibuli kuhitsya na hati. N’ekirugiremu, Yehova n’owaabuzima ahariinye.”

20. Nitubaasa kwegyera ki aha mukago gwa Daudi na Ruhanga?

²⁰ Daudi akatooreza Yehova yaagira emitwarize nk’eye. Yehova akatuhanga turikubaasa kugira emitwarize nk’eye. (Kut. 1:26) Oku turikweyongyera kwega aha mitwarize ya Yehova, nikwo turikwongyera kumutooreza. Daudi akamanya gye Ishe ow’omu iguru, n’ahabw’ekyo akabaasa kumutooreza obu yaabaire naakoragana  n’abandi. Yetegyereze eky’okureeberaho kimwe. Daudi akacumura ahari Yehova obu yaashambana na Batisheba reero akaitisa iba. (2 Sam. 11:1-4, 15) Kwonka Yehova akacwamu kusaasira Daudi ahabw’okugira ngu nawe akaba naasaasira abandi. Ahabw’okugira ngu Daudi akaba aine omukago murungi na Yehova, akaba omwe aha bagabe ba Israeli abarikukundwa munonga, kandi Yehova akaba naamukoresa nk’eky’okureeberaho ky’abagabe ba Israeli abandi.​—1 Bag. 15:11; 2 Bag. 14:1-3.

21. Kuhikaana n’ebiri omu Abaefeso 4:24 na 5:1, niki ekirikuruga omu kutooreza “Ruhanga”?

²¹ Eki nikitwegyesa eishomo ki? Twine kutooreza “Ruhanga.” Okukora eki nikitugasira kandi nikituhwera kumumanya gye. Twamutooreza tukagira emitwarize nk’eye, nituhamya ngu turi abaana be.​—Shoma Abaefeso 4:24; 5:1.

22-23. Nitwija kugasirwa tuta twagyendera aha bi turikwega ahari Yehova?

²² Nk’oku twareeba, Yehova naatweyoreka kurabira omu byahangirwe n’Ekigambo kye Baibuli. Ekitabo ky’omuhendo eki nikigamba aha baheereza ba Ruhanga abu turikubaasa kutooreza, nka Musa na Daudi. Yehova abaasize kukora omurimo gwe. Kiri ahariitwe kwigura amaisho gaitu, amatu gaitu, n’omutima gwaitu kwega ebirikumukwataho.

²³ Titurikwija kurekyera aho kwega ebirikukwata ahari Yehova. (Mub. 3:11) Ekikuru, ti bwingi bw’ebintu ebi turikumumanyaho, kwonka eki turikukoresa ebi turikumumanyaho. Twagyendera aha bi turikwega kandi tukateeraho kutooreza Tataitwe ow’omu iguru, naija kugumizamu nairira haihi naitwe. (Yak. 4:8) Kurabira omu Kigambo kye, naatuhamiza ngu tarikubaasa kutsigaho abarikumusherura.