1. Abantu baingi baine miteekateekyere ki aha kukora?

ABANTU baingi ahu orikutuura nibatwara bata okukora? Omu mahanga maingi, abantu nibakora munonga kandi nibamara obwire bwingi aha murimo kukira ira. Abarikukora munonga nibakira kuburwa obwire bw’okuhuumura, obw’okuba n’ab’omu maka gaabo, nari obw’okwigutsa ekyetengo kyabo eky’eby’omwoyo. (Mub. 2:23) Kwonka kandi, abamwe tibarikukunda kukora na kakye kandi nibasherura eky’okwekwatsa ngu batakora.​—Enf. 26:13, 14.

2-3. Yehova na Yesu bakataho by’okureeberaho ki aha bikwatiraine n’okukora?

² Okutaana n’emiteekateekyere etahikire ei abantu baine aha kukora, yetegyereze oku Yehova na Yesu barikureeba okukora. Hatariho kubangaanisa Yehova n’omukozi. Eki Yesu akakyoreka gye obu yaagira ati: “Tata naakikora na hati, kandi naanye ninkora.” (Yoh. 5:17) Teekateeka aha bintu nyamwingi ebi Ruhanga yaahangire otwariiremu ebihangirwe by’omwoyo n’ebizinga by’omu mwanya. Kandi nitureeba n’obuhame oburikworeka ngu Ruhanga n’omukozi twareeba ebintu birungi ebiri omu nsi ei turikutuuramu. Eki kikareetera omuhandiiki wa Zaaburi kugira ngu ai Yehova “emirimo yaawe ka n’ey’emiringo mingi! Ebyo byona okabikoresa obwengye. N’ensi eijwire ebihangirwe byawe.”​—Zab. 104:24.

³ Yesu akatooreza Ishe. Yesu ou obwengye bwa Ishe bwayorekiirwemu, akeejumba omu kuhanga obu Ruhanga “yaataho eiguru.” Akaba ari na Yehova ari “omukozi mukuru.” (Enf. 8:27-31) Bwanyima y’emyaka mingi obu Yesu yaabaire ari omu nsi, akakora  emirimo mirungi munonga. Emirimo egyo akaba naagitwara nk’eby’okurya, kandi byona ebi yaakozire bikooreka ngu Yehova niwe yaabaire amutumire.​—Yoh. 4:34; 5:36; 14:10.

4. Nitubaasa kwegyera ki ahari Yehova na Yesu aha bikwatiraine n’okuhuumura?

⁴ Mbwenu shi Yehova na Yesu okuba abeeziriki omu kukora nikimanyisa ngu twine kukora obutahuumura? Ngaaha buzima. Yehova tarikuruha, n’ahabw’ekyo tikirikumwetengyesa kuhuumura bwanyima y’okukora ekintu. Kwonka nabwo Baibuli neegira ngu Yehova ku yaaherize kuhanga eiguru n’ensi, ‘akahuumura yaaruhuuka.’ (Kur. 31:17) Eki nikimanyisa ngu akeemereramu omu kuhanga kwe yaatunga okushemererwa n’okumarwa omu bi yaabaire yaaherize kukora. Kandi n’obu Yesu araabe yaabaire naakora n’obweziriki obu yaabaire ari omu nsi, akaba atunga obwire bw’okuhuumura, n’okurya hamwe na banywani be.​—Mat. 14:13; Luk. 7:34.

5. Abantu baingi nibagumirwa kukora ki?

⁵ Baibuli neehiga abaheereza ba Ruhanga kukunda okukora. Bashemereire kuba abeeziriki omu kukora omu mwanya gw’okuba abeeremwa nari abanafu. (Enf. 15:19) Shana obundi nookora omurimo gw’okwebaisaho kureeberera eka yaawe. Kandi abeegi ba Kristo boona baine obujunaanizibwa bw’okwejumba omu murimo gw’okubuurira amakuru marungi. Kwonka nabwo, baine kuhuumura ekirikumara. Obumwe noogumirwa kuringaaniza okukora omurimo gw’okwebaisaho, kuza omu kubuurira, n’okuhuumura? Nitumanya tuta obwire obu twine kumara turikukora n’obu twine kuhuumura?

6. Ebiri omuri Mako 6:30-34 nibyoreka bita ngu Yesu akaba aine emiteekateekyere etagwereire rubaju aha kukora n’okuhuumura?

⁶ Aha bikwatiraine n’emirimo, ni kikuru kutagwera rubaju. Omugabe Sulemaani akahwerwa kuhandiika ati: “Buri kintu kiine ebiro byakyo.” Akagamba aha kubyara, okwombeka, okurira, okusheka, okuzina, n’endiijo mirimo. (Mub. 3:1-8) Buzima, ebintu bibiri bikuru omu kubaho kw’omuntu n’okukora hamwe n’okuhuumura. Yesu akaba aine emiteekateekyere etagwereire rubaju aha kukora n’okuhuumura. Eizooba rimwe, entumwa bakagaruka barikuruga omu kubuurira. Bakabuurira munonga baaburwa “omwanya nangwa n’ogw’okurya.” Yesu akabagira ati: “Mwije aheekiikire twehereere muhuumureho.” (Shoma Mako 6:30-34.) N’obu Yesu n’entumwa ze butoosha baabaire batarikutunga obwire bw’okuhuumura nk’oku barikwenda, Yesu akaba naamanya ngu okuhuumura nikyetengyesa.

7. Nitwija kuhwerwa tuta twashwijuma ekiragiro ekirikukwata ahari Sabato?

⁷ Obumwe, twena nituba twine kuhuumura nari kuhindura ebi tutwire nitukora. Eki nitubaasa kukireebera aha ntebeekanisa ya Sabato eya buri saabiiti ei Yehova yaateeraireho abaheereza be aba ira. Titwakitegyekwa Ebiragiro bya Musa, kwonka nitubaasa kugasirwa twashwijuma eki byabaire nibigamba ahari Sabato. Ebi turaayegye nibiza kutuhwera kushwijuma emiteekateekyere ei twine aha kukora n’okuhuumura.

8. Nk’oku kirikworekwa omu Okuruga 31:12-15, Sabato rikaba riri eizooba ry’okukora ki?

⁸ Ekigambo kya Ruhanga nikigira ngu bwanyima ya Ruhanga kuhanga ebintu kumara ebiro mukaaga, akahuumura omu kuhanga eby’omu nsi. (Kut. 2:2) Kwonka, Yehova naakunda okukora, kandi “naakikora na hati” omu miringo endiijo. (Yoh. 5:17) Sabato eya buri saabiiti ekaba neekuratira engyenderwaho erikushushana n’erikugambwaho omu kitabo ky’Okutandika ey’okuhuumura kwa Yehova. Akagira ngu Sabato kakaba kari akamanyiso aha gati ye n’Abaisraeli. Sabato ekaba eri “ey’okuruhuukiriraho  kimwe, eyereziibwe” Yehova. (Shoma Okuruga 31:12-15.) Aha izooba eri tihaine owaabaire naikirizibwa kukora, otwariiremu abaana, abahuuku, nangwa n’amatungo. (Kur. 20:10) Eki kikaba nikibaasisa abantu kuta omutima aha by’omwoyo.

9. Obu Yesu yaabaire ari omu nsi abantu abamwe bakaba baine miteekateekyere ki ahari Sabato?

⁹ Sabato ekaba eri nungi aha baheereza ba Ruhanga, kwonka obu Yesu yaabaire ari omu nsi abeebembezi b’ediini bakongyeramu ebyabo aha bikwatiraine n’okukuza eizooba eryo. Bakaba nibagira ngu tikihikire kucwa obushiisha bw’oburo ahari Sabato nari kukiza omurwaire aha izooba eryo. (Mak. 2:23-27; 3:2-5) Emiteekateekyere egyo ekaba etarikuhikaana n’eya Ruhanga, kandi Yesu akashoboororera gye abaabaire bamuhurikiize enshonga egi.

10. Nitubaasa kwega ki omuri Matayo 12:9-12 aha bikwatiraine n’oku Yesu yaabaire naatwara Sabato?

¹⁰ Yesu n’abakuratsi be Abayudaaya bakaba nibaijuka eizooba rya Sabato ahakuba bakaba niboorobera Ebiragiro bya Musa. * Kwonka Yesu akooreka omu bigambo n’omu bikorwa ngu okwijuka Sabato gukaba gutari mugugu, kandi ngu ebikorwa by’embabazi n’eby’omugasho bikaba nibiikirizibwa. Akagamba butunu ati: “Ebiragiro nibiikiriza okukora gye ahari Sabato.” (Shoma Matayo 12:9-12.) Akaba atarikureeba okukora eby’embabazi kandi eby’omugasho nk’okuhenda ekiragiro kya Sabato. Ebi Yesu yaakozire nibyoreka ngu akaba naayetegyereza gye obukuru bwa Sabato. Ahabw’okugira  ngu abaheereza ba Ruhanga bakaba nibahuumura emirimo yaabo, bakaba nibatunga obwire bw’okuta omutima aha by’omwoyo. Yesu akakurira omu ka eshemereire kuba yaabaire neekoresa Sabato kwebembeza eby’omwoyo. Eki nitukireebera aha ku yaatwarize obu yaabaire ari Nazareesi omu tauni y’owaabo. Yesu ‘ahari Sabato akataaha omuri sinagogi, nk’omucwe gwe oku gwabaire guri. Yaimuka kushoma.’​—Luk. 4:15-19.

11. Yesu akaba naatooreza oha aha bikwatiraine n’okukora?

¹¹ Buzima Yosefu akaba aine emiteekateekyere nk’eya Yehova aha bikwatiraine n’okukora obu yaabaire naayegyesa Yesu obubaizi. (Mat. 13:55, 56) Kandi Yesu ashemereire kuba yaareebire Yosefu ari omweziriki omu kukora buri izooba kubaisaho eka ye mpango. Nangwa na Yesu bwanyima akagambira abeegi be ati: “Omukozi ashemereire ebihembo bye.” (Luk. 10:7) Buzima, Yesu akaba naamanya kukora n’obweziriki.

12. Ni byahandiikirwe ki ebirikworeka eki Baibuli erikugamba aha kukora n’obweziriki?

¹² Nikyo kimwe n’entumwa Paulo. Omurimo gwe omukuru gukaba guri okugambira abandi amakuru marungi agarikukwata ahari Yesu. Kwonka, Paulo akaba naakora n’omurimo gw’okwebaisaho. Abatesalonika bakaba nibamanya ngu akaba ‘naakora munonga ayecurenga nyomushana na nyekiro,’ kugira ngu ‘atagira ou yaarusya’ weena. (2 Tes. 3:8; Byak. 20:34, 35) Paulo naabaasa kuba yaabaire naamanyisa omurimo gwe gw’okukora amahema. Obu yaabaire ari omuri Korinso, akatuura na Akula na Priskila kandi akaguma “nabo, nibakora hamwe; ahakuba omwoga gwabo gukaba guri okubaziira amahema.” Okugira ngu Paulo akaba naakora “nyomushana na nyekiro” kikaba kitarikumanyisa ngu akaba naakora obutahuumura. Aha Sabato akaba ahuumura aha murimo gw’okukora amahema. Eizooba eryo rikaba rimubaasisa kubuurira Abayudaaya, nabo abaabaire batarikukora aha Sabato.​—Byak. 13:14-16, 42-44; 16:13; 18:1-4.

13. Niki eki turikubaasa kwegyera ahari Paulo?

¹³ Entumwa Paulo akataho eky’okureeberaho kirungi. Akaba aine omurimo gw’okwebaisaho, kwonka nabwo akaba naahamya ngu butoosha yaayejumba omu murimo gw’amakuru marungi aga Ruhanga. (Rom. 15:16; 2 Kor. 11:23) Akahiga abandi nabo kukora batyo. N’ahabw’ekyo, Akula na Priskila bakaba bari ‘abakozi bagyenzi be omuri Kristo Yesu.’ (Rom. 12:11; 16:3) Paulo akahiga Abakorinso kugira bingi ‘by’okukora omu murimo gwa Mukama.’ (1 Kor. 15:58; 2 Kor. 9:8) Yehova akahwera entumwa Paulo kuhandiika ati: “Omuntu weena ku araabe atarikwenda kukora, arekye n’okurya.”​—2 Tes. 3:10.

14. Yesu akaba naamanyisa ki obu yaagamba ebigambo ebiri omuri Yohaana 14:12?

¹⁴ Omurimo ogurikukira obukuru omu biro by’emperu ebi n’okubuurira kandi tukahindura abantu abeegi. Nangwa Yesu akagira ngu abeegi be bakaba nibaija kukora emirimo erikukira eye! (Shoma Yohaana 14:12.) Akaba atarikumanyisa ngu nitwija kukora eby’okutangaaza nk’oku yaakozire. Omu mwanya gw’ekyo, abakuratsi be bakaba nibaija kubuurira ekicweka kihango, beegyese abantu baingi, kandi bamare obwire bwingi barikukora omurimo ogu kukira obu yaamazire.

15. Ni bibuuzo ki ebi twine kwebuuza kandi n’ahabw’enki?

¹⁵ Waaba oine omurimo gw’okwebaisaho, yebuuze ebibuuzo ebi: ‘Ahu ndikukorera abantu nibammanya nk’omukozi omweziriki? Nimpeza emirimo yangye omu bwire kurugiirira aha kubaasa kwangye?’ Waaba noobaasa kugarukamu ngu eego, nikimanyisa ngu mukama waawe aha murimo naija kukwesiga. Kandi noija n’okureetera abarikukureeba kukunda amakuru marungi g’Obukama. Kyahika aha murimo  gw’okubuurira n’okwegyesa, nabwo oine kwebuuza ebibuuzo ebi: ‘Abantu nibammanya nk’omukozi omweziriki omu kubuurira? Naaba ninza kubuurira omuntu omurundi gw’okubanza niintebeekanisa gye? Ningarukayo ahonaaho kugaaniira n’abarikwenda kumanya ebirikukiraho? Ninkira kwejumba omu miringo y’okubuurira etari emwe n’emwe?’ Waaba noobaasa kugarukamu ngu eego, noija kutunga okushemererwa omu murimo gw’okubuurira.

16. Emiteekateekyere ya Yesu n’entumwa ze neetaana eta n’ey’abantu baingi obunaku obu?

¹⁶ Yesu akaba naamanya ngu obumwe we n’abeegi be baine kuhuumura. Kwonka, omu bwire obwo nangwa n’obunaku obu, baingi nibabaasa kugyeragyeranisibwa n’omushaija omugaiga omu ky’okureeberaho kya Yesu. Omushaija akeehamiza ati: “Huumura, orye, onywe, oshemererwe.” (Luk. 12:19; 2 Tim. 3:4) Akata omutima gwe aha kuhuumura n’okweshemeza. Okutaana n’ekyo, Yesu n’entumwa ze bakaba batarikwebembeza okweshemeza.

17. Nitukoresa tuta obwire obu turikuba tutari aha murimo gw’okwebaisaho?

¹⁷ Obunaku obu, nituteeraho kutooreza Yesu turikukoresa obwire obu turikuba tutari aha murimo kuhuumuraho n’okubuurira abandi, kandi tukaza n’omu nteerane z’Ekikristaayo. Nangwa nitutwara omurimo gw’okuhindura abantu abeegi n’okuza omu nteerane nka mukuru munonga, kitureetera kukora kyona ekirikubaasika kwejumba omu by’omwoyo butoosha. (Heb. 10:24, 25) Nangwa n’obu twakuba tugiire kurambura, nituguma tuhamiire aha ntebeekanisa yaitu ey’eby’omwoyo ahu turikuba turi hoona, kandi nitusherura oburyo bw’okugaaniira n’abantu abu turikubugana.​—2 Tim. 4:2.

18. Omugabe waitu Kristo Yesu naayenda ngu tukore ki?

¹⁸ Ka nikitushemeza munonga kumanya ngu Omugabe waitu, Kristo Yesu tarikutaho maremesa, kandi naatuhwera kugira emiteekateekyere etagwereire rubaju aha kukora n’okuhuumura! (Heb. 4:15) Naayenda ngu tuhuumure ekirikumara. Kandi naayenda ngu naitwe tukore n’obweziriki kwebaisaho kandi twejumbe n’omu murimo ogurikureeta oburuhuuko ogw’okuhindura abantu abeegi. Omu kicweka ekirikukurataho, nituza kureeba omwanya gwa Yesu omu kutucungura kuruga omu buhuuku.