Ebiri omu Eky’Ebiragiro 22:25-27 ekigyendererwa kyabyo ekikuru ti kworeka yaaba omushaija aine orubanja, ahakuba ekyo kikaba kiba kyahamiibwe. Kureka ekiragiro eki kikaba nikyoreka yaaba omwishiki aine rubanja nari atarwine. Yetegyereze ebyetooroire ekyahandiikirwe ekyo.

Emishororongo ey’enyima neegamba aha mushaija owaabaire abyama n’omwishiki orikugambwa obugyenyi yaamushanga “omu rurembo.” Omushaija nk’ogwo, akaba agiibwaho orubanja rw’obushambani, ahabw’okugira ngu omwishiki naatwarwa nk’ori omu bushwere. Kandi shi omwishiki we? Akaba agira orubanja “ahabw’okutateera nduuru, haza ari omu rurembo.” Ku yaakuteire enduuru, buzima abandi bakamuhuriire baija bamurwanirira. Kwonka ahabw’okutateera nduuru, akaba aba yaayejumba omu bushambani, n’ahabw’ekyo bombi bakaba bagiibwaho orubanja.​—Bir. 22:23, 24.

Ekiragiro ekyo nikyongyera kyoreka embeera endiijo: “Kwonka omushaija ku arishanga omwishiki orikugambwa obugyenyi omu ishwa, yaamuhamba, yaabyama nawe, obwo ogwo mushaija obyamire nawe niwe ariitwa wenka. Kwonka omwishiki mutarigira eki mwamukora; aryaba ataine rubanja orushemereire kumwitsa; nimumanya ngu orubanja orwo ni nk’orw’omuntu ogurukaine mutaahi we, akamwita. Ahakuba omushaija aryaba amushangire omu ishwa; ogwo omwishiki orikugambwa obugyenyi, n’obu yaakuteire enduuru, tihaine waakumujunire.”​—Bir. 22:25-27.

Omu mbeera egyo, abaramuzi bakaba baikiriza obujurizi bw’omwishiki. Mu muringo ki? Kikaba kyetegyerezibwa ngu “n’obu yaakuteire enduuru, tihaine waakumujunire.” N’ahabw’ekyo bakaba batamutwara nk’owaashambana. Kwonka omushaija we, akaba agiibwaho orubanja rw’obuhambi n’obushambani ahabw’okukiza amaani omwishiki orikugambwa obugyenyi ‘akamuhamba, akabyama nawe.’

N’ahabw’ekyo, n’obu ekiragiro eki kyabaire nikyoreka ngu omwishiki taine rubanja, nikyongyera kyoreka ngu omushaija akaba aba aine orubanja rw’obuhambi n’obushambani. Nitubaasa kugira obuhame ngu abaramuzi bakaba “bakuratiriza, kandi bacondooza” enshonga, reero bacwamu kuhikaana n’emitindo ya Ruhanga erikureebwa butunu kandi eri omu biragiro bingi.​—Bir. 13:14; 17:4; Kur. 20:14.