Ngaaha! Ahakuba Baibuli nari ebyafaayo tihaine ahu birikworeka ngu ekyo kikaba nikikorwa.

Oku ekyahandiikirwe ekyo kiri omu Baibuli nyingi kireeteire bamwe kuteekateeka ngu omu bunaku bwa Paulo abantu bakaba nibabatizibwa omu maizi ahabw’abafu. Nk’eky’okureeberaho: “Hati ku haraabe hatariho kuzooka, abo abarikubatizibwa ahabw’abafu nibaija kukora ki?”​—New International Version.

Kwonka, yetegyereze ebigambo by’abacondooza ba Baibuli babiri. Dr. Gregory Lockwood akagira ngu eky’okugira ngu hakaba nihabaho okubatizibwa “ahabw’abantu abaafiire tikiine buhame kuruga omu byafaayo nari omu Baibuli.” Kandi, Omuhangu Gordon D. Fee akahandiika ati: “Tihariho ekirikworeka omu byafaayo nari omu Baibuli ngu okubatizibwa nk’okwo kukabaho. Endagaano ensya tihaine eki erikugamba aha nshonga egyo na kakye, kandi ekikorwa ekyo kikaba kitari mu makanisa nari omu Bakristaayo Abasodokisi omu byasha ebyakuratsireho.”

Baibuli neegira ngu abakuratsi ba Yesu bakaba baine ‘kugyenda omu mahanga goona, kuhindura abantu abeegi n’okubabatiza bakabeegyesa kworobera byona ebi’ yaabaire aragiire. (Mat. 28:19, 20) Omuntu atakabaire omwegi wa Yesu obatiziibwe, akaba aine kwega ebirikukwata ahari Yehova n’Omwana we kandi akabaikiririzamu. Omuntu ofiire kandi ori omu kituuro akaba atarikubaasa kukora ekyo, kandi n’Omukristaayo ohuriire akaba atarikubaasa kukikora ahabw’omuntu ogwo.​—Mub. 9:5, 10; Yoh. 4:1; 1 Kor. 1:14-16.

Mbwenu shi Paulo akaba naamanyisa ki?

Abamwe omuri Korinso bakaba nibahakana ngu abafu tibarikwija kuzoorwa. (1 Kor. 15:12) Paulo akaba naayoreka ngu emiteekateekyere egyo egwire. Akooreka ngu ‘buri izooba akaba ari ow’okufa.’ Beitu buzima akaba akihuriire. Kwonka akaba aine obuhame ngu n’obu yaakufa naija kuzoorwa ari ekihangirwe ky’omwoyo eky’amaani, nk’oku Yesu yaabaire ari.​—1 Kor. 15:30-32, 42-44.

Abakorinso bakaba baine kumanya ngu obu bashukirweho omwoyo gurikwera nikimanyisa ngu nibaija kugyezibwa buri izooba, kandi bafe reero bategyereze kuzoorwa. Ekirikumanyisa ngu ku baabatiziibwe “kutaaha omuri Kristo Yesu” baabatizibwa “kutaaha omu kufa kwe.” (Rom. 6:3) Okubatizibwa kwabo okw’akamanyiso kukaba nikwija kubareetera kufa reero bazoorwe baze omu iguru.

Emyaka erengire ebiri Yesu aherize kubatizibwa omu maizi, akagambira babiri aha ntumwa ze ati: ‘Okubatizibwa oku ndikubatizibwamu, nimwija kubatizibwamu.’ (Mak. 10:38, 39) Yesu akaba atariyo naabatizibwa omu maizi. Akaba naamanyisa ngu okuguma kwe ahamiire ahari Ruhanga nikwija kumurugiramu okwitwa. Paulo akahandiika ngu abashukirweho omwoyo gurikwera nibaija kubonabonesibwa ‘hamwe nawe, kugira ngu babone kuheebwa ekitiinisa hamwe nawe.’ (Rom. 8:16, 17; 2 Kor. 4:17) N’ahabw’ekyo nabo bakaba baine kubanza baafa kubaasa kuzoorwa kuza omu iguru.

Mbwenu, ebigambo bya Paulo nibibaasa kuhandiikwa gye biti: “Kitari ekyo, nibaija kukora ki abo abarikubatizibwa ahabw’ekigyendererwa ky’okuba abafu? Abafu ku baraabe bataraazoorwe na kakye, ahabw’enki nibabatizibwa ahabw’ekigyendererwa nk’ekyo?”