NOOYEHURIRA ota waatunga ebaruha kuruga ahari munywani waawe? Timoseo akatunga ebaruha nk’egyo kuruga aha ntumwa Paulo, ei turikumanya hati nka 2 Timoseo. Buzima Timoseo akaba aine ekihika ky’okuza omu mwanya gucureire kushoma ebigambo bya munywani we. Obundi Timoseo akaba naateekateeka ati: ‘Paulo ari gye? Naayenda kumpabura omu buheereza bwangye? Ebaruha egi neebaasa kumpwera kusingura omu buheereza bwangye obw’Ekikristaayo kandi ehwere n’abandi?’ Nk’oku turikuza kureeba, Timoseo akatunga eby’okugarukamu by’ebibuuzo ebi, n’ebindi bingi omu baruha y’omuhendo egi. Kwonka hati, ka tute omutima aha buhabuzi bumwe obukuru oburi omu baruha egi.

Timoseo ku yaatandikire kushoma ebigambo by’okubanza omu baruha egi, ahonaaho akareeba ngu we na Paulo baine omukago guhami. Paulo akamweta “omwana wangye orikukundwa.” (2 Tim. 1:2) Obundi Timoseo akaba aine emyaka nka 30 obu yaatunga ebaruha egi nk’omu 65 Y.A.K, kandi akaba yaamazire obwire buraingwa ari omureeberezi. Akaba yaamazire emyaka erengire ikumi arikukoragana na Paulo kandi akaba eyegire bingi.

Kishemereire kuba kyagumize Timoseo kumanya ngu Paulo ariyo naagumisiriza oburemeezi omu bwesigwa. Paulo akaba ari omu kihome omuri Rooma, arikuza kwitwa. (2 Tim. 1:15, 16; 4:6-8) Timoseo akaba naareeba obumanzi bw’entumwa Paulo omu bigambo bye ebi: “Ningumisiririza byona.” (2 Tim. 2:8-13) Nka Timoseo, naitwe nitubaasa kuhuumurizibwa okugumisiriza kw’entumwa Paulo.

Paulo akahiga Timoseo kureeba obuheereza bwe omu kuramya Ruhanga nk’obw’omuhendo. Paulo akaba naayenda ngu Timoseo ‘ayenegyeze ekiconco kya Ruhanga’ ekyabaire kimurimu. (2 Tim. 1:6) Paulo akakoresa ekigambo kha’ri·sma kumanyisa “ekiconco.” Ekigambo ky’Orugriika ekyo kiine amakuru g’ekiconco eki omuntu arikuheebwa buheebwa atakishemereire, eki atarikubaasa kukoreerera, kandi eki atahikire kutunga. Timoseo akaba atungire ekiconco eki obu yaatooranwa kuhikiiriza obujunaanizibwa bw’omutaano obwine akakwate n’ekibiina.​—1 Tim. 4:14.

Timoseo akaba naaza kukoresa ata ekiconco eki? Ku yaashomire ebigambo ‘okwenegyeza ekiconco kya Ruhanga,’ naabaasa kuba yaateekateekire  aha ku omuriro gurikuraara hakatsigaraho amakara. Omuriro ogwo gukaba gwine kuguma nigwenegyezibwa kubaasa kuguma nigwaka gukareeta obutagatsi. Kashoboorozi emwe neegira ngu ekigambo ky’Orugriika (a·na·zo·py·reʹo) eki Paulo yaakoreise nikimanyisa “okwatsya, okuhimbuura, nari okuhuuha omu muriro,” omu muringo gw’akamanyiso ekirikumanyisa “okwimutsya omuhimbo.” Omu bugufu, Paulo akaba naahabura Timoseo ngu ‘ayejumbire kimwe omu buheereza bwe!’ Naiwe noobaasa kureeba obukuru bw’okukora nikyo kimwe obunaku obu orikwejumbira kimwe omu buheereza.

Timoseo arikugumizamu kushoma ebaruha kuruga ahari munywani we, akashangamu ebigambo ebindi ebyabaire nibibaasa kumuhwera kusingura omu buheereza bwe. Paulo akahandiika ati: ‘Orinde ekirungi ekyo eki waakwatsiibwe omwoyo ogurikwera ogurikutuura omuriitwe.’ (2 Tim. 1:14) Akaba akwatsiibwe ki? Niki eki Timoseo yaabaire ahairwe eki yaabaire aine kurinda? Omu mushororongo ogw’enyima, Paulo akagamba aha ‘bigambo by’amazima,’ nigo mazima agari omu Byahandiikirwe. (2 Tim. 1:13) Obu Timoseo yaabaire ari omubuurizi, akaba aine kubuurira amazima omu kibiina n’aheeru yaakyo. (2 Tim. 4:1-5) Kandi, Timoseo akaba atoorainwe kuba omureeberezi w’okuriisa entaama za Ruhanga. (1 Pet. 5:2) Akaba naabaasa kurinda eki yaakwatsiibwe, amazima agu yaabaire naayegyesa abandi arikwesigira kimwe omwoyo gwa Yehova ogurikwera n’Ekigambo kye.​—2 Tim. 3:14-17.

Obunaku obu, naitwe tuhairwe amazima agu turikubagana n’abandi omu buheereza bwaitu obw’Ekikristaayo. (Mat. 28:19, 20) Nitubaasa kuguma nitusiima ekiconco eki eky’omuhendo turikuguma nitushaba, turikugira n’omucwe gw’okweyegyesa Ekigambo kya Ruhanga. (Rom. 12:11, 12; 1 Tim. 4:13, 15, 16) Nitubaasa kuba tuhairwe n’obujunaanizibwa obundi nk’okuba omureeberezi nari obuheereza obw’obutwire. Eki tukwatsiibwe kiine kutuhwera kwecureeza, turikureeba ngu twine kwesiga Ruhanga. N’ahabw’ekyo twine kurinda eki tukwatsiibwe, turikukitwara nk’eky’omuhendo kandi tukeesiga Yehova kutuhwera omu kukireeberera.

Obuheereza bwa Timoseo bukaba nibukwata n’aha bandi. Nikyo Paulo yaahigiire Timoseo ati: ‘Ebi waahuriire ningamba, obikwatse abantu abarikwesigwa, abarikubaasa kubyegyesa abandi.’ (2 Tim. 2:2) Eego, Timoseo akaba aine kwegyera aha b’eishe-emwe bagyenzi be kandi akabagana nabo. Ni kikuru ngu buri mureeberezi omu kibiina Ekikristaayo obunaku obu ateereho kukora nikyo kimwe. Ow’eishe-emwe orikureeberera gye ekibiina tarikugira eitima arikwanga kworeka abandi oku ekintu kiine kukorwa. Kureka, naayegyesa abandi kugira ngu nabo babaase kukikora. Tarikutiina ngu nibaija kumurabaho barikumanya bingi nari kumanya kukora gye ekintu kumukira. N’ahabw’ekyo, omureeberezi nk’ogwo tarikwegyesa ebirikutandikirwaho byonka. Kureka naaba naayenda kuhwera abu arikutendeka kwega kucwamu barikukoresa obwengye, kubaasa kutunguuka omu by’omwoyo. Omu muringo ogu, “abantu abarikwesigwa” abu arikwegyesa nibagasira ekibiina.

Hatariho kubanganisa Timoseo akasiima munonga ebaruha ei Paulo yaamuhandiikiire. Nitubaasa kuteebereza oku Timoseo yaagumire naashwijuma obuhabuzi burungi obu, kandi akateekateeka aha ku aine kubugyenderaho omu buheereza bwe.

Naitwe nitwenda kuta omu nkora obuhabuzi obu. Tuta shi? Nitubaasa kuteeraho kwenegyeza ekiconco kyaitu nk’omuriro, tukarinda eki tukwatsiibwe, kandi ebi turikumanya tukabyegyesa abandi. Omu muringo ogu, nk’oku Paulo yaagambiire Timoseo, nitubaasa ‘kuhikiiriza kimwe obuheereza’ bwaitu.​—2 Tim. 4:5.