1-2. (a) Bashatu aha ntumwa za Yesu bakaragiirwa kukora ki, kandi bakatwaza bata? (b) Nituza kushwijuma ki omu kicweka eki?

BWANYIMA y’omukoro gw’Okuhingurwaho omu gwa 32 Y.A.K., entumwa Petero, Yakobo, na Yohaana, bakatunga okworekwa kw’omutaano. Obu Yesu yaabaire ari aha Rushozi ruraingwa Herumooni, akahindurwa omu maisho gaabo. “Aha maisho ge hakamurinkana nk’eizooba, n’ebijwaro bye” byayaka nk’ekyererezi. (Mat. 17:1-4) Okworekwa oku kuri haihi kuhendera, entumwa bakahurira Ruhanga naagira ati: ‘Ogu n’omwana wangye omukundwa, ou ndikwesiimira munonga; mumuhurire.’ (Mat. 17:5) Oku entumwa bashatu abo baatwarize bwanyima, kikooreka gye ngu bakahurira Yesu. Nitwenda kubatooreza.

² Omu kicweka eky’enyima, twegire ngu okuhurira eiraka rya Yesu nikimanyisa ngu niturekyera aho kukora ebintu ebimwe. Omuri eki, nituza kureeba ebintu ebi Yesu yaagizire ngu twine kukora.

3. Kurugiirira ahari Matayo 7:13, 14, twine kukora ki?

³ Shoma Matayo 7:13, 14. Yetegyereze ngu Yesu akagamba aha marembo abiri agarikuhitsya ahatarikushushana, omu muhanda ‘omuhango’ ‘n’ogufunzire.’ Tihariho muhanda gwa kashatu. Niitwe twine kwetooranira omuhanda ogu turaagyederemu. Oku n’okucwamu kukuru ahakuba omuhanda ni gumwe gwonka ogurikuhitsya omu magara agatahwaho.

4. Noobaasa kushoboorora ota omuhanda ‘omuhango’?

⁴ Twine kuguma nitwijuka entaaniso y’emihanda ebiri. Omuhanda “omuhango” gurimu abantu baingi, kandi tikigumire  kugugyenderamu. Eky’obusaasi, baingi bacwiremu kuguma omu muhanda ogwo baakuratira abantu nyamwingi. Tibarikumanya ngu orikwenda bagyendere omu muhanda ogwo ni Sitaane Omuregi, kandi ngu omuhanda ogwo tihaine ahu gurikubahitsya.—1 Kor. 6:9, 10; 1 Yoh. 5:19.

5. Abamwe nibateeraho bata kubona omuhanda ‘ogufunzire’ kandi bakatandika kugugyenderamu?

⁵ Yesu akagira ngu omuhanda ‘ogufunzire,’ nigubonwa abantu bakye okutashushana n’omuhanda ‘omuhango.’ Ahabw’enki? Omu mushororongo ogurikukurataho Yesu akarabura abakuratsi be aha baanabi b’ebishuba. (Mat. 7:15) Hariho ediini nyamwingi, kandi nizigira ngu nizegyesa amazima. Abantu baingi batamirwe nari bashobeirwe n’ahabw’ekyo tibarikuteeraho kusherura omuhanda ogurikuhitsya omu amagara agatahwaho. Kwonka omuhanda ogwo nigubaasa kuboneka. Yesu akagira ati: ‘Ku muraahamire aha kigambo kyangye, nimuba muri abeegi bangye buzima, kandi nimwija kumanya amazima, n’amazima nigaija kubahindura ab’obusingye.’ (Yoh. 8:31, 32) Ni kirungi ngu iwe omu mwanya gw’okukuratira abantu nyamwingi, ocwiremu kusherura amazima. Okatandika orikweyegyesa Ekigambo kya Ruhanga waamanya eki arikukwenza, kandi waahurira n’enyegyesa za Yesu. Omu bi waayegire, okareeba ngu Yehova naayenda ngu twetantare enyegyesa z’ediini ez’ebishuba, n’okurekyera aho kwejumba omu kukuza ebiro bikuru ebirikukomooka omu bukafiire. Kandi okeega ngu okukora ebi Yehova arikutwenza n’okwecwa aha mize ei atarikusiima nikibaasa kuguma. (Mat. 10:34-36) Nikibaasa kuba kyakugumiire kukora empinduka ezirikwetengyesa. Kwonka, okagumizamu nooteeraho kuzikora ahabw’okukunda Yehova, n’okwenda kumushemeza. Ka aine kuba naakwesiimisa!—Enf. 27:11.

6. Kurugiirira ahari Zaaburi 119:9, 10, 45, 133, niki ekirikubaasa kutuhwera kuguma omu muhanda ogufunzire?

⁶ Twatandika kugyendera omu muhanda ogufunzire, niki ekiratuhwere kugugumamu? Teekateeka aha ky’okureeberaho eki. Ebyoma ebirikuteebwa aha rubaju rw’enguuto efunzire nibirinda emotoka kutatunga butandu ekahiringita. Nibiteebwaho kurinda abantu kuvuga gye bakeetantara kuvugira haihi n’enengo. Tihaine muvugi orikubaasa kwetomboita ahabw’okutaho ebyoma ebyo! Emitindo ya Yehova eri omu Baibuli neekora nk’ebyoma ebyo. Neetuhwera kuguma omu ruguuto orufunzire.—Shoma Zaaburi 119:9, 10, 45, 133.

7. Abato baine kureeba bata omuhanda ogufunzire?

⁷ Abato, obumwe nimureeba emitindo ya Yehova nk’amaremesa? Okwo nikwo Sitaane arikwenda ngu muteekateekye. Naayenda ngu mute omutima ahari abo abarikugyenda omu muhanda omuhango ogurikureebeka nk’ogurimu ebintu birungi. Naabaasa kukoresa ebi ab’orwingano rwanyu aha ishomero barikora nari ebi murikureeba aha Intaneeti kubareetera kuteekateeka ngu haine ebi murikufeerwa. Sitaane naayenda ngu mureebe emitindo ya Yehova nk’erikubaremesa kwesiimira amagara omu bwijwire. * Kwonka ijuka eki: Sitaane tarikwenda ngu abarikugyendera omu muhanda omuhango bamanye ekirikuza kubahikaho aha muheru. Kwonka, Yehova naabooreka gye eki arikuza kukorera  abari omu muhanda ogurikuhitsya omu magara agatahwaho.—Zab. 37:29; Isa. 35:5, 6; 65:21-23.

8. Abato nibabaasa kwegyera ki ahari Olaf?

⁸ Yetegyereze eki orikubaasa kwegyera aha w’eishe-emwe muto orikwetwa Olaf. * Abu arikushoma nabo bakamugyemesereza kwejumba omu by’obushambani. Ku yaabagambiire ngu Abajurizi ba Yehova nibagyendera aha mitindo ya Baibuli ey’emicwe, abaishiki abamwe omu kibiina kye kikabagumira kwikiriza, baaguma nibateeraho kumushendashenda kuteerana nabo. Kwonka Olaf akanga yaahamira aha kihikire. Kandi tikwo kugyemeserezibwa kwonka okwamuhikireho. Olaf naagira ati: “Abashomesa bakateeraho kungyemesereza kutunga obwegyese bw’ahaiguru kubaasa kuba ow’ekitiinisa. Bakangira ngu naaba ntakikozire, tindikwija kuba omusinguzi.” Niki ekyahweraire Olaf kwangira okugyemeserezibwa okwo? Naagira ati: “Nkatandika kunywana ab’omu kibiina. Bakantwariza nk’omwe aha b’eka yaabo. Kandi nkongyera kweyegyesa Baibuli. Ku naayongyeire  kweyegyesa, naayongyera kuhamya ngu aga n’amazima. N’ekyarugiremu, nkamariirira kuheereza Yehova.”

9. Abarikwenda kuguma omu muhanda ogufunzire baine kukora ki?

⁹ Sitaane naayenda kukureetera kuruga omu muhanda ogurikuhitsya omu magara agatahwaho. Naayenda ngu oyegaite aha bantu nyamwingi abariyo nibagyendera omu muhanda muhango ogurikuhitsya “omu kucwekyerera.” (Mat. 7:13) Kwonka, nitubaasa kuguma omu muhanda ogufunzire twagumizamu nituhurira Yesu kandi tukareeba omuhanda ogwo nk’oburinzi. Hati ka tureebe ebintu ebimwe ebi Yesu yaagizire ngu twine kukora.

10. Kurugiirira ahari Matayo 5:23, 24, Yesu akagira ngu twine kukora ki?

¹⁰ Shoma Matayo 5:23, 24. Yesu akagambira Abayudaaya abaabaire bamuhurikiize enshonga nkuru. Teera akashushani omuntu arikureetera omunyamurwa ekitambo aha hekalu. Omu kaire ako ku yaabaire aijuka ngu haine eki arikufa na mugyenzi we, akaba atsigaho empongano ye agarukayo. Ahabw’enki? Niki ekyabaire kiri kikuru munonga kukira okuha Yehova ekitambo? Yesu akagamba butunu ati: “Ogyende, obanze ogarukane” na mwene sho.

11. Shoboorora oku Yakobo yaateireho kugaruraho obusingye na Esau mwene ishe.

¹¹ Nitubaasa kwegyera ahari Yakobo amashomo makuru aha bikwatiraine n’okugaruraho obusingye. Bwanyima ya Yakobo kumara emyaka 20 ahungire owaabo, Ruhanga akamugambira arikurabira omuri maraika kugarukayo. (Kut. 31:11, 13, 38) Kwonka hakaba hariho oburemeezi. Akaba naatiina mukuru we Esau ngu naija kumwita. (Kut. 27:41) Yakobo ‘akatiina munonga, yaashoberwa’ obundi arikuteekateeka ngu omurumuna akimwiniire enziika. (Kut. 32:7) Yakobo akakora ki kugaruraho obusingye na mwene ishe? Eky’okubanza, akashaba munonga Yehova aha bikwatiraine n’enshonga egyo. Bwanyima, akoheerereza Esau ekiconco kihango. (Kut. 32:9-15) Aha muheru, Yakobo ku yaahikire Esau, niwe yaabandize kumuha ekitiinisa. Akainama ahansi omu maisho ga Esau ti murundi gumwe nari ebiri, beitu emirundi mushanju! Yakobo akagaruraho obusingye na mwene ishe omu muringo gw’ekitiinisa kandi ogw’obucureezi.—Kut. 33:3, 4.

12. Yakobo nitumwegyeraho ki?

¹² Yakobo nitumwegyeraho eishomo rikuru aha ku yaatebeekaniise kubugana Esau n’oku yaatwarize ku yaamuhikire. Yakobo akashaba Yehova omu bucureezi kumuhwera. Reero akakorera aha kushaba kwe yaakora kyona ekirikubaasika kugarukana nawe. Yakobo ku yaabugaine mukuru we, akeetantara kwimutsya enshonga ez’enyima, yaaba niwe yaabaire ahikire nari agwire. Yakobo akaba agyendereire kugarukana na mukuru we. Nitubaasa kutooreza tuta Yakobo?

13-14. Twagwisa kubi ow’eishe-emwe mugyenzi waitu, twine kukora ki?

¹³ Itwe abari omu muhanda ogurikuhitsya omu magara agatahwaho nitwenda kutuurana omu busingye n’ab’eishe-emwe abagyenzi baitu. (Rom. 12:18) Twine kutwaza tuta twamanya ngu tugwisize kubi Omukristaayo mugyenzi waitu? Nka Yakobo, twine kushaba Yehova twihire aha mutima. Nitubaasa kumugambira kutuhwera omu kuteeraho kwaitu kugarukana n’ow’eishe-emwe.

 ¹⁴ Twine kutunga obwire bw’okweshwijuma. Nitubaasa kwebuuza ebibuuzo nk’ebi: ‘Nyeteekateekire kwecureeza nkashaba okusaasirwa kubaasa kugaruraho obusingye? Yehova na Yesu nibaija kwehurira bata waaba niiwe waayehabura kugaruraho obusingye n’ow’eishe-emwe nari munyaanyako?’ Eby’okugarukamu ebi oraatungye nibibaasa kukuhiga kuhurira Yesu n’okuba omucureezi kuza kugaruraho obusingye n’Omukristaayo mugyenzi waawe. Omu nshonga egi, nitubaasa kutooreza Yakobo.

15. Okugyendera aha musingye oguri omu Abaefeso 4:2, 3, nikibaasa kutuhwera kita kugaruraho obusingye n’ow’eishe-emwe?

¹⁵ Teekateeka aha kyabaire nikiija kubaho ku ogire ngu Yakobo akagira amaryo obu yaabugana omukuru we! Hakaba nihaija kurugamu oburemeezi bwingi. Twaza kugonjoora enshonga n’ow’eishe-emwe, twine kukikora omu bucureezi. (Shoma Abaefeso 4:2, 3.) Enfumu 18:19 nihagira hati: “Okugarukana n’ow’eishe-emwe ogwisiibwe kubi kugumire okukira okukwata orurembo rw’amaani, kandi entongane nk’ezo zigumire [nk’ebyoma] by’ekigo.” Okushaba okusaasirwa omu muringo gw’obucureezi nikubaasa kukuhwera kutunga eirembo eririkutaaha omu ‘kigo’ ekyo.

16. Twine kuteekateeka ahari ki, kandi ahabw’enki?

¹⁶ Kandi twine kuteekateeka n’obwegyendesereza aha bi turikuza kugamba n’oku turaabigambe. Twaheza kweteekateeka, twine kuza kubugana ou tugwisize kubi n’ekigyendererwa ky’okugaruka kugira omukago murungi nawe. Omu kubanza naabaasa kugamba ebitarikushemeza. Eki nikibaasa kutugwisa kubi nari kwenda kwehozaho. Kwonka shi okukora ekyo nikirugamu obusingye? Buzima ngaaha. Ijuka ngu okugarukana n’ow’eishe-emwe mugyenzi waawe ni kikuru munonga kukira okumanya n’oha ohikire nari ogwire.—1 Kor. 6:7.

17. Niki eki orikubaasa kwegyera ahari Gilbert?

¹⁷ Ow’eishe-emwe orikwetwa Gilbert akakora munonga kugaruraho obusingye. Naagira ati: “Nkagiraho obutaikirizana bw’amaani n’omwe aha b’eka yaitu. Kumara emyaka ebiri, nkaba niinteeraho kugamba nawe omu muringo gw’amazima n’obucureezi kugaruraho enkoragana yaitu nungi.” Gilbert akakora ki ekindi? “Ntakagambire nawe, nkaba nshaba kandi mba nyeteekateekire kuteehurira kubi yaangambira kubi. Nkaba nyine kuba nyeteekateekire kusaasira. Nkeega kutarwanirira obugabe bwangye, kandi nketegyereza  ngu nyine kureetaho obusingye.” Hakarugamu birungi ki? Gilbert naagira ati: “Hati, nyine obunanukye bw’omu biteekateeko ahabw’okugira enkoragana nungi n’ab’eka yangye boona.”

18-19. Twagwisa kubi omuntu, twine kumariirira kukora ki, kandi ahabw’enki?

¹⁸ Oine kumariirira kukora ki waamanya ngu oshagiize Omukristaayo mugyenzi waawe? Kuratira obuhabuzi bwa Yesu obw’okugaruraho obusingye. Shaba Yehova aha nshonga egi, kandi yesigye omwoyo gurikwera kukuhwera kugaruraho obusingye. Waakora otyo, noija kushemererwa, kandi noija n’okwongyera kuhamya ngu noohurira Yesu.—Mat. 5:9.

¹⁹ Nitusiima Yehova kureeba naatuha obuhabuzi kurabira omuri Yesu Kristo, “omutwe” gw’ekibiina. (Efe. 5:23) Ka tumaririire ‘kumuhurira’ turikutooreza entumwa Petero, Yakobo, na Yohaana. (Mat. 17:5) Twaheza kureeba oku turikubaasa kukora ekyo turikugaruraho obusingye n’Omukristaayo ou tugwisize kubi. Twakikora kandi tukaguma omu muhanda ogufunzire ogurikuhitsya omu magara agatahwaho, twija kutunga emigisha hati, n’okushemererwa okw’ebiro byona nyentsya.