1. Yehova naakira kugarukamu ata okushaba kw’abaheereza be?

 OBAIRE nookimanya ngu Yehova naabaasa kukukoresa kugarukamu okushaba kw’omuntu ondiijo? Eego, naabaasa kukukoresa yaaba ori omureeberezi, omuheereza, payoniya, nari omubuurizi omu kibiina. Kandi nikibaasika yaaba ori muto nari okuzire, ow’eishe-emwe nari munyaanyazi-itwe. Omuntu orikukunda Yehova yaamushaba obuhwezi, Yehova naakira kukoresa abareeberezi n’abaheereza be abandi abeesigwa kuhuumuriza omuntu ogwo. (Kol. 4:11) Ka nikitushemeza kuheereza Yehova n’ab’eishe-emwe bagyenzi baitu omu muringo ogwo! Ekyo nitubaasa kukikora haabaho endwara erikurahuka kujanjaara, ekihikiirizi nari okuhiiganisibwa.

2. Ahabw’enki nikibaasa kutugumira kuhwera abandi haabaho endwara erikurahuka kujanjaara?

² Endwara erikurahuka kujanjaara neebaasa kutureetera kugumirwa kuhwerahwerana. Nk’eky’okureeberaho, nitubaasa kuba nitwenda kutaayaayira banywani baitu, kwonka oshangye kiri eky’akabi kukikora. Nitubaasa kuba nitwenda kutaayaayisa abaine oburemeezi omu by’entaatsya kurya nabo, kwonka oshangye ngu tikirikubaasika. Nitubaasa kuba nitwenda kuhwera abandi, kwonka ekyo nikibaasa kutooroba ab’eka yaitu baaba nibabonabona. Kwonka nabwo, nitwenda kuhwera ab’eishe-emwe bagyenzi baitu, kandi Yehova naatusiima twateeraho kukora eki turikubaasa kubahwera. (Enf. 3:27; 19:17) Nitubaasa kukora ki?

3. Nitwegyera ki aha abareeberezi b’ekibiina kya Desi? (Yeremia 23:4)

³ Eki abareeberezi barikubaasa kukora. Ku oraabe ori omureeberezi, teeraho kumanya gye entaama. (Shoma Yeremia  23:4.) Desi, munyaanyazi-itwe owaagambwaho omu kicweka eky’enyima, naagira ati: “Abareeberezi ba guruupu yangye y’okubuurira bakaba baanyegaitaho n’abandi omu buheereza nari omu by’okweshemeza.” b Ekyo kikoorobera abareeberezi kuhwera Desi ku haabaireho ekigwererezi kya COVID-19 n’obu yaafeerwa bamwe aha b’eka ye.

4. Ahabw’enki abareeberezi baabaasize kuhwera Desi, kandi abareeberezi bo nibakyegyeraho ki?

⁴ Desi naagira ati: “Ahabw’okugira ngu abareeberezi bakaba bari banywani bangye, kikanyorobera kubagambira oku ndikwehurira n’ebirikunyerarikiriza.” Abareeberezi nibakyegyeraho ki? Teeraho kumanya entaama zaawe embeera zigumire zitakabaireho. Hinduka munywani waabo. Haabaho endwara erikurahuka kujanjaara ekakuremesa kubataayaayira, teeraho kuhurizana nabo omu miringo endiijo. “Obumwe abareeberezi batari bamwe bakaba baanteerera esimu nari baanyoherereza obutumwa aha izooba niryo rimwe,” nikwo Desi arikugira. “Ebyahandiikirwe ebi twagaaniireho bikankwataho munonga, n’obu ndaabe naabaire nibimanya gye.”

5. Abareeberezi nibabaasa kumanya bata ebi ab’eishe-emwe na banyaanyazi-itwe barikurabamu, kandi bakabahwera?

⁵ Omuringo gumwe oku orikubaasa kumanya ebi ab’eishe-emwe na banyaanyazi-itwe barikurabamu n’okubabuuza omu bwengye. (Enf. 20:5) Baine eby’okurya birikumara, emibazi, n’ebindi ebirikwetengyesa? Mbwenu shi beerarikiriire ngu nibaza kufeerwa emirimo yaabo nari ngu tibaraabaase kushashurira enju yaabo? Nari nibenda ow’okubahwera kutunga obuhwezi bwa gavumenti? Desi akahwerwa ab’eishe-emwe bagyenzi be omu by’omubiri. Kwonka obuhwezi obw’eby’omwoyo obu abareeberezi baamuhaire nibwo bwakirizeyo kumuhwera. Akagira ati: “Abareeberezi bakashaba naanye. N’obu ndaabe ntarikwijuka ebi baagambire, ninyijuka oku naayehuriire. Okaba nooshusha oti Yehova naangira ngu, ‘Tori wenka.’”—Isa. 41:10, 13.

6. Baingi omu kibiina nibabaasa kukora ki kuhwera abandi?(Reeba ekishushani.)

⁶ Eki abandi barikubaasa kukora. Nitumanya ngu abareeberezi nibo baine obujunaanizibwa bw’okureeberera abari omu kibiina. Kwonka Yehova naayenda ngu tuhwere abandi kandi tubagumye. (Gal. 6:10) Nangwa n’ebikorwa  bikye bya rukundo nibihwera omuntu orikuba arwaire. Omwana naabaasa kwoherereza ow’eishe-emwe kaada eriho obutumwa nari ekishushani ekihuugirwe kumugumya. Omunyeeto naabaasa kuhwera munyaanyazi-itwe kugura ebintu. Nari noobaasa kuteekyera omurwaire eby’okurya obimutwarire. Kwonka haabaho endwara erikujanjaara, buri omwe omu kibiina naaba naayenda kugumibwa. Obundi noobaasa kugaaniira n’ab’eishe-emwe na banyaanyazi-itwe bwanyima y’enteerane, yaaba ori aha Kyombeko ky’Obukama nari aha zoom. Kandi n’abareeberezi nibaba nibenda kugumibwa. Ab’eishe-emwe abamwe nibahandiika obutumwa bw’okusiima abareeberezi abarikukora munonga haabaho endwara erikurahuka kujanjaara. Ka nikishemeza twakora kyona ekirikubaasika ‘kugumyana, kandi tukombekana’!—1 Tes. 5:11.

7. Nihabaasa kubaho bureemezi ki bwanyima y’ekihikiirizi?

⁷ Ekihikiirizi nikibaasa kuhindura embeera y’omuntu kitaraariire. Abamwe nibabaasa kufeerwa ebintu byabo, enju yaabo, nari abakundwa baabo. Ab’eishe-emwe na banyaanyazi-itwe nabo nibahikwaho oburemeezi nk’obwo. Niki eki turikubaasa kukora kuhwera?

8. Abareeberezi n’emitwe y’amaka nibabaasa kukora ki ekigwererezi kitakabaireho?

⁸ Eki abareeberezi barikubaasa kukora. Abareeberezi, muhwere ab’eishe-emwe kwetebeekanisiza ekihikiirizi. Hamya ngu boona omu kibiina nibamanya eki baine kukora kwerinda n’oku baraahurizane n’abareeberezi. Margaret, owaagambwaho omu kicweka eky’enyima, naagira ati: “Abareeberezi baitu, omu kicweka ky’ebyetengo by’ekibiina bakaturabura ngu nihabaasa kugaruka kubaho ekigwererezi ky’omuriro. Bakagira ngu n’obu ab’obushoboorozi baakuturagira kuruga omu maka gaitu nari embeera zikeeyongyera kusiisikara, twine kuhunga ahonaaho.” Obwo bukaba buri obuhabuzi omu bwire obuhikire ahakuba bwanyima ya saabiiti itaano hakabaho ekigwererezi ky’omuriro. Omu kuramya kw’eka emitwe y’amaka nibabaasa kwijutsya buri omwe omuka eki aine kukora. Iwe n’abaana baawe mwaba mwetebeekaniise nimwija kubaasa kuguma mwikaikaine haabaho ekigwererezi.

9. Abareeberezi nibabaasa kwetebeekanisa bata ekigwererezi kitakabaireho na bwanyima y’okubaho?

⁹ Waaba ori omureeberezi wa guruupu y’okubuurira, hamya ngu oine enamba z’esimu n’endagiriro ebihikire ebya buri mubuurizi ori omu guruupu yaawe ekigwererezi kitakabaireho. Zihandiike kandi guma noohamya ngu zihikire. Haabaho ekihikiirizi noija kubaasa kuhurizana n’ababuurizi boona abarikwenda obuhwezi. Ahonaaho manyisa omuhikaanisa w’akakiiko k’abareeberezi haaba haine ebirikwetengyesa kandi nawe naija kumanyisa omureeberezi wa saketi. Ab’eishe-emwe baakorera hamwe nibaija kubaasa kuhwera gye. Bwanyima y’ekihikiirizi ky’omuriro kubaho, omureeberezi wa saketi ei Margaret arimu akamara eshaaha 36, arikuteeraho kuhurizana n’abareeberezi abaabaire nibareeberera ab’eishe-emwe nka 450 abahungire omu maka gaabo. (2 Kor. 11:27) N’ahabw’ekyo, boona abaabaire nibenda ah’okuraara bakatunga oburaaro.

10. Ahabw’enki ni kikuru abareeberezi kugumya ab’ei-she-emwe? (Yohaana 21:15)

¹⁰ Abareeberezi omu kibiina Ekikristaayo baine obujunaanizibwa bw’okuhwera ab’eishe-emwe omu by’omwoyo n’omu nyehurira. (1 Pet. 5:2) Haabaho ekihikiirizi abareeberezi nibabanza bahamya ngu buri omwe ari gye, aine eby’okurya, ebijwaro n’oburaaro.  Kwonka na bwanyima y’ameezi maingi, abarikuba bahonokireho nibaba baine kuhwerwa omu by’omwoyo n’omu nyehurira. (Shoma Yohaana 21:15.) “Nikitwara obwire kugaruka kwehurira gye” nikwo Harold ori aha Kakiiko k’Eitaagi kandi oraagaaniireho na b’eishe-emwe na banyaanyazi-itwe baingi abahikirweho ekihikiirizi arikugira. “Nibabaasa kuba nibatandika kwehurira gye, kwonka bagaruka bateekateeka abakundwa baabo abaafiire, ebintu byabyo ebi bafeereirwe n’embeera zigumire ezi baarabiremu. Okwijuka ebyo nikibaasa kubareetera kugaruka kugira amaganya. Kwonka ekyo tikirikumanyisa ngu omuntu taine kwikiriza, kureka ezo n’enyehurira za butoosha.”

11. Amaka gaine kuhwerwa mu muringo ki?

¹¹ Abareeberezi nibakuratira obuhabuzi obu, “murire hamwe n’abarikurira.” (Rom. 12:15) Nibaba baine kuhamiza abahikirweho ekihikiirizi ngu Yehova, n’Abakristaayo bagyenzi baabo nibakibakunda. Abareeberezi nibahwera amaka kuguma gahamiire aha ntebeekanisa yaago y’eby’omwoyo, erikutwariramu okushaba, okweyegyesa, okuza omu nteerane, n’okubuurira. Kandi nibahiga abazaire kuhwera abaana baabo kuta omutima aha bintu ebi ekihikiirizi kitarikubaasa kucwekyereza. Abazaire, mwijutsye abaana baanyu ngu Yehova ni munywani waabo kandi butoosha naaba ayeteekateekire kubahwera. Kandi muteereho kubahamiza ngu nibaija kuguma bari ab’eka y’ab’eishe-emwe na banyaanyazi-itwe omu nsi yoona abarikwenda kubahwera.—1 Pet. 2:17.

12. Abandi nibabaasa kukora ki kuhwera haabaho ekihikiirizi? (Reeba ekishushani.)

¹² Eki abandi barikubaasa kukora. Haabaho ekihikiirizi haihi naiwe, buuza abareeberezi oku orikubaasa kuhwera. Obundi noobaasa kuha oburaaro abahungire omu maka gaabo nari abarikuhwera omu kwombeka kumara obwire bukye. Noobaasa kuhwera ab’eishe-emwe orikubatwarira eby’okurya n’ebindi ebirikwetengyesa. Ekihikiirizi kyabaho omu kicweka kya hare, nabwo noobaasa kuhwera. Ota shi? Orikushabira abahikirweho ekihikiirizi. (2 Kor. 1:8-11) Noobaasa kuhwera abarikuhikwaho ebihikiirizi orikuhayo esente kushagika omurimo ogurikukorwa omu nsi yoona. (2 Kor. 8:2-5) Waaba noobaasa kuza omu kicweka ekiteirwe ekihikiirizi, buuza abareeberezi eki orikubaasa kukora kuhwera. Waayetwa kuhwera, noija kutendekwa kugira ngu obaase kukoresibwa obu kiraabe nikyetengyesa.

13. Ab’eishe-emwe bagyenzi baitu abari omu mahanga ahu omurimo gwaitu guzibiirwe nibatunga buremeezi ki?

¹³ Omu mahanga ahu omurimo gwaitu guzibiirwe, okuhiiganisibwa nikureetera embeera kwongyera kuguma. Ab’eishe-emwe omu myanya egyo nibaba baine oburemeezi omu by’entaatsya, nibarwara kandi baafeerwa abakundwa baabo. Kwonka omurimo gwaitu gwazibirwa, abareeberezi nibabaasa kutazayo kubataayaayira nari kugamba nabo butunu kubagumya. Ekyo nikyo kyahikire ahari Andrei, owaagambwaho omu kicweka eky’enyima. Munyaanyazi-itwe ori omu guruupu ye y’okubuurira akaba aine oburemeezi omu by’entaatsya. Reero yaatunga butandu y’emotoka. Akaba aine kushemezibwa emirundi mingi kandi atarikubaasa kukora. N’obu omurimo gwaitu gwabaire guzibiirwe kandi hariho n’ekigwererezi, ab’eishe-emwe bakakora kyona ekirikubaasika kumuhwera, kandi Yehova akaba naareeba ekyabaire nikibaho.

14. Abareeberezi nibataho ky’okureeberaho ki baayesiga Yehova?

¹⁴ Eki abareeberezi barikubaasa kukora. Andrei akashaba kandi yaakora eki yaabaire naabaasa. Yehova akakora ki? Akakoresa ab’eishe-emwe bagyenzi be abaabaire nibabaasa kuhwera. Abamwe bakatwara munyaanyazi-itwe ogwo kutunga obujanjabi. Abandi bakamuha esente z’okumuhwera. Yehova akabahiga kukora kyona eki barikubaasa kuhwera, kandi akabaha omugisha omu kuteeraho kwabo. (Heb. 13:16) Omurimo gwaitu gwaba guzibiirwe, abareeberezi nibabaasa kushaba abandi kuhwera. (Yer. 36:5, 6) Okukira byona, yesigye Yehova. Naabaasa kukuhwera kushagika ab’eishe-emwe na banyaanyazi-itwe kutunga ebirikwetengyesa.

15. Nitubaasa kurinda tuta obumwe bw’Ekikristaayo haabaho okuhiiganisibwa?

¹⁵ Eki abandi barikubaasa kukora. Omurimo gwaitu gwazibirwa, nitubaasa kutandika kuteeranira hamwe n’ab’eishe-emwe bagyenzi baitu omu guruupu nkye. N’ahabw’ekyo ni kikuru kuguma twine obusingye n’abagyenzi baitu hati. Turwanise Sitaane, omu mwanya gw’okurwana na bagyenzi baitu. Yeehuzye enshobe z’ab’eishe-emwe, nari teeraho kushoboorora obutaikirizana ahonaaho. (Enf. 19:11; Efe. 4:26) Yehabure kuhwera abandi. (Tit. 3:14) Obuhwezi obu abandi baahaire munyaanyazi-itwe bukakwata aha b’eishe-emwe abandi omu guruupu ye. Bakoongyera kukwatanisa nk’eka.—Zab. 133:1.

16. Kurugiirira aha Abakolosai 4:3, 18, nitubaasa kuhwera tuta ab’eishe-emwe na banyaanyazi-itwe abarikuhiiganisibwa?

 ¹⁶ Enkumi n’enkumi z’ab’eishe-emwe na banyaanyazi-itwe nibaheereza Yehova n’obu gavumenti zaakutaho amaremesa. Bamwe aharibo nibakomwa ahabw’okwikiriza kwabo. Nitubaasa kubashabira, tushabire ab’eka zaabo, abarikworeka obumanzi kubahwera omu by’omwoyo, omu by’omubiri, kandi tubashagike na baatwarwa omu macwero g’emanja. c (Shoma Abakolosai 4:3, 18.) Muteebwa ngu okushaba kwine amaani!—2 Tes. 3:1, 2; 1 Tim. 2:1, 2.

17. Noobaasa kwetebeekanisiza ota okuhiiganisibwa hati?

¹⁷ Iwe n’eka yaawe nimubaasa kwetebeekanisiza okuhiiganisibwa hati. (Byak. 14:22) Otata omutima aha bintu bibi ebirikubaasa kubaho. Omu mwanya gw’ekyo, hamya omukago gwawe na Yehova kandi hwera abaana baawe kukora nikyo kimwe. Waayerarikirira, shaba Ruhanga oyihire aha mutima. (Zab. 62:7, 8) Mugambe aha nshonga zoona ezishemereire kubareetera kwesiga Yehova nk’eka. d Haabaho ekihikiirizi oyetebeekaniise kandi orikwesiga Yehova, nikiija kuhwera abaana baawe kugira obumanzi n’obusingye.

18. Ni birungi ki ebi turaatungye omu biro by’omumaisho?

¹⁸ Obusingye bwa Ruhanga nibutuhwera kuhurira twine oburinzi. (Fil. 4:6, 7) Ahabw’obusingye obwo, Yehova naikaikanisa omutima gwaitu haabaho endwara, ekihikiirizi, nari okuhiiganisibwa. Naakoresa abareeberezi abarikukora n’amaani kutuhwera. Kandi twena atuhaire obujunaanizibwa bw’okuhwerahwerana. Obusingye obu twine hati nibutuhwera kwetebeekanisiza embeera zigumire eziraabeho otwariiremu ‘n’okubonabona kwingi.’ (Mat. 24:21) Omu bwire obwo, nikiija kutwetengyesa kuguma twine obusingye kandi tukahwera n’abandi kubugira. Kwonka bwanyima y’okubonabona kwingi, tihariho embeera eraabe neetureetera kwerarikirira. Nitwija kutunga obusingye obwabuzima obu Yehova arikwenda ngu tugire ebiro byona.—Isa. 26:3, 4.