Oshomire n’obwegyendesereza Eminaara y’Omurinzi ey’omwaka ogu? Reeba yaaba noobaasa kugarukamu ebibuuzo ebi:

Nitubaasa kugasirwa tuta twamara obwire turikugamba, turikuhurikiza kandi turikuteekateeka ahari Yehova?

Nitwija kucwamu gye, tube abeegyesa barungi, tugire okwikiriza kuhami, kandi omukago gwaitu na Yehova nigwongyera kuhama.—w22.01, rup. 30-31.

Nitwija kugasirwa tuta twayesiga Yehova, n’abu arikutoorana kutwebembera?

Hati nibwo bwire bw’okwesigira kimwe omuringo ogu Ruhanga arikukoramu ebintu, tutarikweziringa kukuratira obuhabuzi n’ebi abareeberezi barikucwamu. Okubonabona kwingi kukuratandikye, nitwija kuba tweteekateekire kworoba n’obu obuhabuzi obu baraatuhe buraareebeke nk’obutarikukora.—w22.02, rup. 4-6.

Maraika akaba naamanyisa ki obu yaagambira Zekaria ahari ‘kariisho eri omu ngaro [z’omukungu] Zerubabeeli’? (Zek. 4:8-10)

Okworeka oku kukahamiza abantu ba Ruhanga ngu hekalu eyaabaire neeyombekwa ekaba neija kuhwa, kandi ehikaane n’emitindo ya Yehova.—w22.03, rup. 16-17.

Nitubaasa kuba tuta “eky’okureeberaho . . . omu kugamba”? (1 Tim. 4:12)

Nitugamba omu muringo gw’embabazi kandi ogw’ekitiinisa omu kubuurira, tweshongora twihire aha mutima, tugarukamu obutoosha omu nteerane, tugamba eby’amazima ebirikwombeka abandi, kandi twetantara kukoresa ebigambo by’okujumiirana.—w22.04, rup. 6-9.

Ahabw’enki ebicweka by’enyamaishwa ina (obugabe) ezirikugambwaho omuri Danieli eshuura 7 biri aha nyamaishwa emwe ey’omu Okushuuruurwa 13:1, 2?

Enyamaishwa ey’omu Okushuuruurwa 13 terikujwekyera gavumenti emwe, nari obutegyeki kirimaani nka Rooma. Kureka, neejwekyera obutegyeki bwona obutwire nibutegyeka abantu omu byafaayo byona.—w22.05, rup. 9.

Nitubaasa kukora ki kworeka ngu twine obwesigye omu buringaniza bwa Ruhanga?

Haagira owaatujuma, owaatugwisa kubi, nari owaatushagiza, titurikugira ekiniga nari enziika, nitureka enshonga omu mikono ya Yehova. Naija kwihaho akabi koona akareetsirwe ekibi.—w22.06, rup. 10-11.

Ow’eishe-emwe orikuza kujwekyera abandi omu kushaba aha ruteerane aine kwijuka ki?

Okushaba tikushemereire kukoresibwa kuhana abandi nari kuranga ebirango. Taine kukoresa ‘ebigambo bingi,’ okukira munonga aha kutandika kw’enteerane. (Mat. 6:7)—w22.07, rup. 24-25.

“Abaakozire kubi,” nibaija ‘kuzookyera okucwerwa orubanja’ mu muringo ki? (Yoh. 5:29)

Tibarikwija kucwerwa orubanja kwihirira aha bi baakozire batakafiire. Kureka nibaija kushwijumwa kurugiirira aha emiteekateekyere yaabo n’ebi baraakore bwanyima y’okuzooka.—w22.09, rup. 18.

J. F. Rutherford akagamba ki ekyahigire abandi, aha ruteerane oruhango orwa Seputemba 1922?

Aha ruteerane oruhango orwabaire omuri Cedar Point, Ohio, U.S.A., akagira ngu, “Mureebe, Omugabe naategyeka! Niimwe mutoorainwe kuranga ebirikumukwataho. N’ahabw’ekyo murangye, murangye, murangye, Omugabe n’Obugabe bwe!”—w22.10, rup. 3-5.

Isaaya 30 neegamba aha miringo ki eshatu oku Yehova arikuhwera abaheereza be kugumisiriza?

Eshuura egyo neegamba aha ku (1) arikufayo kuhurira okushaba kwaitu kandi akakugarukamu, (2) arikutuha obuhabuzi, kandi (3) akatuha emigisha hati n’omu biro by’omumaisho.—w22.11, rup. 9.

Ahabw’enki nitubaasa kugira ngu ebigambo bya Zaaburi 37:10, 11, 29 bikabanza kuhikiirira ira kandi nibiija kuhikiirira omu bwijwire omu biro by’omumaisho?

Ebigambo bya Daudi ebyo bikaba nibigamba aha migisha eyaabaireho omuri Israeli eya ira, nk’obu Sulemaani yaabaire naategyeka. Yesu akajuriza omushororongo 11, arikugamba ahari paradiso eyaabaire neija kubaho. (Mat. 5:5; Luk. 23:43)—w22.12, rup. 8-10, 14.