Obu Yehova yaagambira abantu b’okubanza ngu “mwijure ensi, ebe eyaanyu” akooreka ngu ensi yoona ekaba neija kuhinduka paradiso. (Kut. 1:28) Abaraahungure ensi nibo baraahikiirize obujunaanizibwa obwo. Ensi teraahindukye paradiso ahonaaho, ahakuba omusiri Edeni tigukiriho. Bwanyima ya Haramagedoni nitwija kuba twine bingi by’okukora turikuboneza emyanya eraabe esiisikaire. Ogwo ka nigwija kuba guri omurimo gw’amaani!

Eki nikitwijutsya omurimo ogu Abaisraeli baabaire baine kukora obu baagaruka kuruga Babulooni. Ensi yaabo ekaba etatwirwemu kumara emyaka 70. Kwonka Isaaya akagira ngu ahabw’obuhwezi bwa Yehova bakaba nibaija kugaruka kugiboneza. Obunabi bukaba nibugira buti: ‘Eihamba ryayo naija kurihindura nka Edeni, n’eihamba ryayo ery’omusheenyi arigire nk’omusiri gwa’ Yehova. (Isa. 51:3) Yehova akahwera Abaisraeli kuboneza ensi yaabo. Kandi, Yehova naija kuhwera abaraahungure ensi kugihindura  paradiso. Niwe hati noobaasa kworeka ngu nooyenda kwejumba omu kukora ekyo.

Omuringo gumwe n’okukora kyona eki orikubaasa kurinda eby’omuka yaawe bicumire gye n’ebigyetooroire biri omu buteeka. Ekyo noobaasa kukikora n’obu bataahi baawe baakuba batarikukikora. Kandi noobaasa n’okuhwera omu kuboneza n’okureeberera Ekyombeko ky’Obukama n’eky’okugiriramu enteerane empango. Embeera zaaba nizikubaasisa yeheyo kuhwera abahikirweho ebihikiirizi. Waakora otyo, nooyoreka ngu oyeteekateekire kuhwera kyayetengyesa. Yebuuze oti: ‘Nimbaasa kuteeraho kwega omwoga ogu ndaakorese ku ndaaheebwe omugisha gw’okuhungura ensi?’

Yesu ku yaaherize kuzoora muhara wa Yairo, ahonaaho yaabagira ngu baamuhe eky’okurya. (Mak. 5:42, 43) Nikibaasa kuba kyabaire kyorobi kureeberera omwana w’omwishiki ogwo ow’emyaka 12. Kwonka, teekateeka aha kirikutwarirwamu Yesu ku araahikiirize ekiraganiso ekirikugira ngu, ‘abari omu bituuro boona abarikwijukwa ku baraahurire eiraka rye nibaija kurugamu.’ (Yoh. 5:28, 29) N’obu Baibuli eraabe etarikutugambira obushonshorekye bwona, nitubaasa kuteebereza ngu abaraazoorwe nibaija kuba nibenda eby’okurya, oburaaro, n’ebijwaro. Noobaasa kworeka ota hati ngu oyeteekateekire kuhwera? Koresa ebibuuzo ebiri ahaifo kweshwijuma.

Ku barikuranga ngu omureeberezi wa saketi naaza kutaayaayira ekibiina kyanyu, noomweta kwija owaawe kurya nawe? Abari omu buheereza bw’omutaano nk’Ababeseeli nari omureeberezi wa saketi obuheereza bwabo bwahendera, noobaasa kubahwera kutunga ah’okutuura? Haaba nihaza kubaho oruteerane oruhango orw’ebiro bishatu nari orw’omutaano omu kicweka kyanyu, noobaasa kwehayo kuhwera aha mirimo rutakabaireho na rwaheza kuhwa nari kwakiira abagyenyi?

Kurugiirira aha Ebyakozirwe 24:15, nitumanya ngu abantu baingi nibaija kuzooka. Baingi aharibo bakafa batakeegire ebirikukwata ahari Yehova. Kwonka ku baraazookye nibaija kutunga omugisha gw’okumwegaho. a Abaheereza ba Ruhanga abeesigwa nibaija kwejumba omu murimo gw’okwegyesa. (Isa. 11:9) Charlotte, obaasize kubuurira omuri Europe, South America, na Africa, aine ekihika ky’okukora omurimo ogwo. Aine okushemererwa naagira ati: “Nyine ekihika ky’okwegyesa abaraazookye. Ku ndikushoma ebirikukwata aha muntu owaabaireho ira, ninkira kuteekateeka nti: ‘Ku ogire ngu akatunga omugisha gw’okumanya Yehova, akaba naija kuhindura emitwarize ye.’ Nyine ekihika ky’okugambira abaraazookye ebirikukwata ahari Yehova n’oku baraagasirwe baacwamu kumuheereza.”

Nangwa n’abaheereza ba Yehova abaabaire bariho Yesu atakaizire omu nsi nibaija kugira bingi by’okwega. Teekateeka aha kushemererwa oku oraagire orikugambira Danieli oku obunabi obu yaahandiikire atarikushoboorokyerwa bwahikiriire. (Dan. 12:8) Kandi shi okuhwera Ruusi na Naomi kumanya ngu oruzaaro rwabo rukarugamu Mesia? Ka nitwija kushemererwa ahabw’okwejumba omu murimo gw’okwegyesa abantu omu nsi yoona, hatariho ekirikututiinisa nari kutuhuzya!

Noobaasa kworeka ota hati ngu oyeteekateekire kwejumba omu murimo gw’okwegyesa? Omuringo gumwe n’okuteeraho kuboneza omu myegyeseze yaawe kandi butoosha okeejumba omu murimo gw’okubuurira ogurikukorwa omu nsi yoona. (Mat. 24:14) N’obu emyaka nari embeera ezindi zaakukureetera kukora bikye omu bwire obu, okuteeraho kwawe nikworeka ngu oyeteekateekire kwegyesa abaraazookye.

Ekibuuzo ekikuru kiri ngu, Nooyendera kimwe kuhungura ensi? Oine ekihika ky’okuhindura ensi paradiso, kwegyesa abaraazookye n’okubaha ah’okutuura? Noobaasa kworeka ngu oyeteekateekire orikukoresa buri mugisha kukora emirimo nk’ei oraakore waahungura ensi.