1. Omushaija Omukristaayo naabaasa kukora ki kuba omusinguzi?

 OMUGABE DAUDI akagambira Sulemaani ati: “Ba ow’amaani, oyeyorekye ori omushaija.” (1 Bag. 2:​1-3) Ni kikuru abashaija Abakristaayo boona kugyendera aha buhabuzi obu. Kubaasa kuba abasinguzi, baine kwega kugyendera aha misingye ya Ruhanga omuri byona ebi barikukora. (Luk. 2:52) Ahabw’enki ni kikuru ab’eishe-emwe abatsigazi kuba abakuzire omu by’omwoyo?

2-3. Ahabw’enki ni kikuru ow’eishe-emwe omutsigazi kukura omu by’omwoyo?

² Omushaija aine obujunaanizibwa bukuru omu ka n’omu kibiina. Hatariho kubangaanisa, ab’eishe-emwe abatsigazi mwateekateekire aha ki murikubaasa kuba omu biro by’omumaisho. Noobaasa kuba oine ekigyendererwa k’okuza omu buheereza bw’obutwire, kuba omuheereza nari omureeberezi omu kibiina. Kandi noobaasa kuba nooyenda kutaaha omu bushwere kandi ozaare n’abaana. (Efe. 6:4; 1 Tim. 3:1) Kubaasa kuhika aha bigyendererwa ebyo, oine kuba Omukristaayo okuzire omu by’omwoyo. b

³ Niki ekirikubaasa kukuhwera kuba Omukristaayo okuzire omu by’omwoyo? Hariho emyoga mikuru ei oine kwega. Noobaasa kukora ki kwetebeekanisiza kandi okaba omusinguzi omu bujunaanizibwa obu oraagire?

4. Ni nkahi ei orikubaasa kutunga abantu barungi b’okutooreza? (Reeba n’ekishushani.)

⁴ Tooreza eby’okureeberaho birungi. Baibuli erimu eby’okureeberaho birungi ebi orikubaasa kutooreza. Abashaija  abeesigwa aba ira bakaba nibakunda Ruhanga kandi baine obujunaanizibwa butari bumwe bw’okureeberera abaheereza be. Noobaasa kutunga ab’eishe-emwe abakuzire omu by’omwoyo ab’okutooreza omuka n’omu kibiina kyawe. (Heb. 13:7) Kandi oine eky’okureeberaho ekirikukirayo oburungi ekya Yesu Kristo. (1 Pet. 2:21) Waaba nooshwijuma eby’okureeberaho ebi, teekateeka aha mitwarize yaabo mirungi ei orikubaasa kutooreza. (Heb. 12:​1, 2) Reero ocwemu oku oraabatooreze.

5. Noobaasa kugira ota okubaasa kw’okuteekateeka, kandi ahabw’enki ni kikuru? (Zaaburi 119:9)

⁵ Gira okubaasa kw’okuteekateeka kandi okurinde. (Enf. 3:21) Omushaija oine okubaasa kw’okuteekateeka naashwijuma ebi arikuteekateeka n’obwegyendesereza atakagizire eki yaakora. N’ahabw’ekyo teeraho kugira okubaasa okwo kandi ogume okwine. Ahabw’enki? Abatsigazi abarikukira obwingi omu nsi nibacwamu barikwihirira aha miteekateekyere yaabo n’enyehurira zaabo. (Enf. 7:7; 29:11) Eby’empurizana nabyo nibikwata munonga aha ku orikutwaza. Kwonka noobaasa kugira ota okubaasa kw’okuteekateeka? Noobaasa kutandika orikwega emisingye ya Baibuli kandi okateekateeka aha ku erikukugasira. Bwanyima noobaasa kukoresa emisingye egyo kukuhwera kucwamu omu muringo ogurikushemeza Ruhanga. (Shoma Zaaburi 119:9.) Waagira omutwarize ogwo noija kuba waateera orutambwe rukuru omu kuba ow’eishe-emwe okuzire omu by’omwoyo. (Enf. 2:​11, 12; Heb. 5:14) Yetegyereze oku okubaasa kw’okuteekateeka kurikukugasira omu miringo ebiri egi: (1) omu kukoragana na banyaanyazi-itwe (2) n’oku orikucwamu aha kujwara n’okweboneza.

6. Okubaasa kw’okuteekateeka nikuhwera kuta ow’eishe-emwe omutsigazi kuha banyaanyazi-itwe ekitiinisa?

⁶ Okubaasa kw’okuteekateeka nikwija kukuhwera kutwariza abakazi omu muringo gw’ekitiinisa. N’ekya butoosha ow’eishe-emwe muto kwenda kumanya gye munyaanyazi-itwe Omukristaayo. Kwonka, ow’eishe-emwe ogwo yaaba aine okubaasa kw’okuteekateeka naija kwetantara kugamba, kuhandiika nari  kukora ekirikworeka ngu ainiire munyaanyazi-itwe ogwo enyehurira z’omutaano, okwihaho yaaba naayenda kutaaha nawe omu bushwere. (1 Tim. 5:​1, 2) Kandi yaaba naariima munyaanyazi-itwe, naija kuteeraho kurinda eiziina rye rirungi arikwetantara kuba nawe omu myanya eyehereire bari bonka.—1 Kor. 6:18.

7. Okubaasa kw’okuteekateeka nikuhwera kuta ow’eishe-mwe omutsigazi omu mijwarire n’okweboneza?

⁷ Omuringo ogundi ogu ow’eishe-emwe muto arikworeka ngu aine okubaasa kw’okuteekateeka n’okucwamu gye aha kujwara n’okweboneza. Kaingi, emishono y’ebijwaro neekorwa kandi neeshagikwa abantu abatarikutiina Yehova, kandi abaine emicwe mibi. Emiteekateekyere yaabo mibi neereebekyera aha bijwaro ebirikukwatira aha mubiri nari ebirikureetera abashaija kureebeka nk’abakazi. Ow’eishe-emwe muto orikutunguuka omu by’omwoyo naagyendera aha misingye ya Baibuli kandi naatooreza eby’okureeberaho birungi omu kibiina yaaba naatoorana eby’okujwara. Naabaasa kwebuuza ati: ‘Ebijwaro ebi ndikutoorana nibyoreka ngu ninteekateeka gye kandi ninfayo aha bandi? Oku ndikujwara nikureetera abandi kureeba ngu nyemmariire aha kuheereza Ruhanga?’ (1 Kor. 10:​31-33; Tit 2:6) Ow’eishe-emwe muto oine okubaasa kw’okuteekateeka, ab’omu kibiina nibamuha ekitiinisa kandi Ishe ow’omu iguru naamusiima.

8. Ow’eishe-emwe omutsigazi naabaasa kwega ata kuba orikwesigwa?

⁸ Ba orikwesigwa. Ow’eishe-emwe muto orikwesigwa naateeraho kuhikiiriza gye obujunaanizibwa bwe bwona. (Luk. 16:10) Teekateeka aha ky’okureeberaho kirungi kya Yesu. Akaba naafayo kuhikiiriza gye obujunaanizibwa obu Yehova yaabaire amuhaire n’obu kyabaire kitoorobi. Akaba naakunda munonga abantu, okukira munonga abeegi be kandi akaba ayeteekateekire kuhayo amagara ge ahabwabo. (Yoh. 13:1) Noobaasa kutooreza Yesu, orikukora n’amaani kuhikiiriza obujunaanizibwa obu orikuheebwa. Waaba otarikumanya oku oraabuhikiirize, shaba obuhwezi ab’eishe-emwe abakuzire omu by’omwoyo. Otakora ebyo byonka ebi ogambiirwe kukora. (Rom. 12:11) Kureka, hikiiriza obujunaanizibwa bwawe ‘nk’orikukorera [Yehova], beitu batari bantu.’ (Kol. 3:23) N’amazima tohikiriire, n’ahabw’ekyo manya obugarukiro bwawe kandi ikiriza enshobe ezi oraakore.—Enf. 11:2.

9. Ahabw’enki ow’eishe-emwe omutsigazi aine kwega emyoga erikugasha?

⁹ Kubaasa kuba ow’eishe-emwe okuzire omu by’omwoyo, teeraho kwega emyoga erikukugasira. Emyoga egyo neija kukuhwera kuhikiiriza obujunaanizibwa bwawe omu kibiina, aha murimo gw’okwebaisaho, omu ka, n’okugira enkoragana nungi n’abandi. Teekateeka aha myoga egi.

10-11. Ow’eishe-emwe omutsigazi naayegasira ata hamwe n’ekibiina yaayega kushoma gye n’okuhandiika gye? (Zaaburi 1:​1-3) (Reeba n’ekishushani)

 ¹⁰ Yega kushoma gye n’okuhandiika gye. Baibuli neegira ngu omuntu oine okushemererwa kandi omusinguzi naashoma Ekigambo kya Ruhanga buri izooba kandi akiteekateekaho. (Shoma Zaaburi 1:​1-3.) Waashoma Baibuli buri izooba noija kumanya emiteekateekyere ya Yehova kandi ogigyendereho. (Enf. 1:​3, 4) Abantu nk’abo nibendwa munonga omu kibiina. Ahabw’enki?

¹¹ Ab’eishe-emwe na banyaanyazi-itwe nibasherura obuhabuzi oburikwegamira ahari Baibuli aha bashaija abakuzire omu by’omwoyo. (Tit. 1:9) Waayega kushoma gye n’okuhandiika gye, noobaasa kutebeekanisa embazo n’eby’okugarukamu ebirikugasira abandi kandi bikahamya okwikiriza kwabo. Kandi noobaasa kugira ebi waahandiika waaba nooyeyegyesa, waaba ohurikiize embazo omu nteerane z’ekibiina, empango ez’ekiro kimwe, n’ez’ebiro bishatu. Ebi oraahandiikye nibiija kukuhwera kuhamya okwikiriza kwawe n’okw’abandi.

12. Niki ekiraakuhwere kuhurizana gye n’abandi?

¹² Yega kuhurizana gye n’abandi. Ow’eishe-emwe aine kwega kuhurizana gye n’abandi. Omuntu orikuhurizana gye n’abandi, naahurikiza kandi naafayo kwetegyereza ebiteekateeko n’enyehurira z’abandi. (Enf. 20:5) Naabaasa kumanya oku omuntu arikwehurira kurugiirira aha iraka rye, endeebeka ye y’aha maisho, n’oku arikukoresa ebicweka bye by’omubiri. Torikubaasa kwega kukora ekyo waaba otarikumara obwire n’abantu. Waaba nookira kumara obwire orikukoresa ebyoma kwohereza obutumwa, noija kugira obugara bw’okuhurizana n’abandi butunu. N’ahabw’ekyo, taho oburyo bw’okugamba n’abandi butunu.—2 Yoh. 12.

13. Ow’eishe-emwe omutsigazi aine kwega ki ekindi? (1 Timoseo 5:8) (Reeba n’ekishushani)

¹³ Yega kwebaisaho. Ow’eishe-emwe okuzire omu by’omwoyo aine kuba naabaasa kwereeberera n’ab’eka ye. (Shoma 1 Timoseo 5:8.) Omu mahanga agamwe, ab’eishe-emwe abatsigazi nibabaasa kwegyera ahari baishebo nari abanyabuzaare emyoga. Omu mahanga agandi, abatsigazi nibabaasa kwega eky’okukora nari emyoga bakiri omu siniya. Ekikuru, n’okwega omwoga oguraije kukuhwera kutunga omurimo. (Byak. 18:​2, 3; 20:34; Efe. 4:28) Manywa nk’omuntu otarikwegaanda kandi orikuhikiiriza emirimo. Waakora otyo, noija kutunga omurimo kandi ogugumeho. Emitwarize n’emyoga eyaagambwaho  neehwera omushaija Omukristaayo kwetebeekanisiza obujunaanizibwa obu araatungye nyentsya. Ka tureebe obujunaanizibwa obwo.

14. Ow’eishe-emwe omutsigazi naabaasa kwetebeekanisiza ata kuba omuheereza w’obutwire?

¹⁴ Omuheereza w’obutwire. Ab’eishe-emwe baingi abakuzire omu by’omwoyo bakaza omu buheereza obw’obutwire bakiri bato. Okuba payoniya nikihwera ow’eishe-emwe muto kwega kukorera hamwe n’abantu abaine emitwarize etarikushushana. Kandi nikimuhwera kukoresa gye sente, atarikushohoza ezirikukira ezi arikukora. (Fil. 4:​11-13) Okubanza kuba payoniya omuhwezi nikibaasa kukuhwera kuza omu buheereza bw’obutwire. Baingi nibabanza kuheereza nka baapayoniya abahwezi kumara obwire, kibahwera kwetebeekanisiza kuba baapayoniya ab’obutwire. Ekyo nikikubaasisa kuza omu buheereza obundi obw’obutwire, nk’okuhwera omu kwombeka nari aha Beseeli.

15-16. Ow’eishe-emwe omutsigazi naabaasa kuba ata omuheereza nari omureeberezi omu kibiina?

¹⁵ Omuheereza nari omureeberezi. Ab’eishe-emwe baine kugira ekigyendererwa ky’okuhikiiriza ebirikwetengyesa kuba abareeberezi kuheereza ab’eishe-emwe na banyaanyabo. Baibuli neegira ngu abarikukununkirira obuheereza obwo nibaba ‘bakunzire omurimo murungi.’ (1 Tim. 3:1) Ow’eishe-emwe atakahindukire omureeberezi naabanza yaahikiiriza ebirikwetengyesa kuheereza nk’omuheereza omu kibiina. Abaheereza nibahwera abareeberezi omu miringo mingi. Abareeberezi n’abaheereza nibaheereza omu bucureezi ab’eishe-emwe na banyaanyabo kandi nibeejumba n’obweziriki omu kubuurira. Ab’eishe-emwe abatsigazi nibabaasa kuhikiiriza ebirikwetengyesa kuba abaheereza n’obu bakuba abakiri emishogoyo. Kandi omuheereza orikukora gye naabaasa kutooranwa kuba omureeberezi omu myaka ya 20.

¹⁶ Nihetengyesa ki kubaasa kuhika aha bujunaanizibwa obwo? Ebirikwetengyesa byona nibyegamira ahari Baibuli na rukundo ei oiniire Yehova, eka yaawe n’ekibiina. (1 Tim. 3:​1-13; Tit. 1:​6-9; 1 Pet. 5:​2, 3) Teeraho kwetegyereza eki oine kukora. Shaba Yehova kukuhwera kuhikiiriza ebirikwetengyesa. c

17. Ow’eishe-emwe omutsigazi naabaasa kwetebeekanisa ata kuba nyineeka kandi omutwe gw’eka? (Reeba n’ekishushani)

¹⁷ Nyineeka kandi omutwe gw’eka. Yesu akooreka ngu ab’eishe-emwe abamwe abakuzire  omu by’omwoyo, nibagumira aho batagiire omu bushwere. (Mat. 19:12) Kwonka, waacwamu kutaaha omu bushwere, noija kugira obujunaanizibwa obundi, obw’okuba omutwe gw’eka. (1 Kor. 11:3) Yehova naayenda ngu omushaija akunde omukazi we, amureeberere omu by’omubiri, omu nyehurira n’omu by’omwoyo. (Efe. 5:​28, 29) Emitwarize n’emyoga eyaagambwaho omu kicweka, nk’okugira okubaasa kw’okuteekateeka, okutwariza abakazi omu muringo gw’ekitiinisa, n’okuba orikwesigwa, neija kukuhwera omu bushwere. Noija kuba oyeteekateekire kuhikiiriza obujunaanizibwa bwawe nka nyineeka kandi omutwe gw’eka.

18. Ow’eishe-emwe omutsigazi naabaasa kwetebeekanisa ata kuba omuzaire?

¹⁸ Taata. Waataaha omu bushwere, noobaasa kuzaara abaana. Noobaasa kwegyera ki ahari Yehova aha bikwatiraine n’okuba omuzaire murungi? Hariho bingi ebi orikubaasa kumwegyeraho. (Efe. 6:4) Yehova akagambira omwana we Yesu butunu ngu naamukunda, kandi naamusiima. (Mat. 3:17) Ku oraazaare abaana, butoosha bahamize ngu noobakunda. Basiime ahabw’ebirungi ebi barikukora. Abazaire abarikutooreza Yehova nibateeraho eky’okureeberaho kirungi abaana ky’okuba ab’eishe-emwe na banyaanyazi-itwe abakuzire omu by’omwoyo. Noobaasa kwetebeekanisiza obujunaanizibwa obwo hati, orikufayo aha b’eka yaawe, n’ab’omu kibiina orikworeka ngu noobakunda kandi orikubatwara nk’ab’omuhendo. (Yoh. 15:9) Eki nikiija kukuhwera kuhikiiriza obujunaanizibwa bwawe nka taata kandi nyineeka. Ekyo kitakabaireho, noija kuba ow’omuhendo ahari Yehova, omuka yaawe n’ekibiina.

19-20. Niki ekiraahwere ab’eishe-emwe abatsigazi kukura omu by’omwoyo? (Reeba ekishushani ekiri aha kipampagare.)

¹⁹ Ab’eishe-emwe bato, mumanye ngu okuba Omukristaayo okuzire omu by’omwoyo kirikwija kubaho bubaho. Tooreza eby’okureeberaho birungi, gira okubaasa kw’okuteekateeka, ba orikwesigwa, yega emyoga erikukugasira, kandi yetebeekanisize obujunaanizibwa obu oraatungye nyentsya.

²⁰ Obumwe noobaasa kutiina munonga waateekateeka aha bujunaanizibwa obu oraagire omu biro by’omumaisho. Kwonka noobaasa kuba omusinguzi. Ijuka ngu Yehova ayeteekateekire kukuhwera. (Isa. 41:​10, 13) Kandi, ab’eishe-emwe na banyaanyazi-itwe omu kibiina nibaija kukuhwera. Waahika aha kigyendererwa kyawe ky’okuba Omukristaayo okuzire omu by’omwoyo, noija kutunga okushemererwa n’okumarwa. Ab’eishe-mwe abatsigazi, nitubakunda! Nitubendeza emigisha ya Yehova omu bi murikukora hati kuba ab’eishe-emwe abakuzire omu by’omwoyo.—Enf. 22:4.