1. Ahabw’enki nitubaasa kugira ngu Abrahamu akaba aine amatsiko gahamire?

 YEHOVA akaraganisa munywani we Abrahamu ngu amahanga goona ag’omu nsi gakaba nigaija kuheebwa omugisha kurabira omu ruzaaro rwe. (Kut. 15:5; 22:18) Ahabw’okugira ngu Abrahamu akaba aine okwikiriza kuhamire, akaba naahamiza kimwe ngu Ruhanga naija kuhikiiriza eki yaamuraganiise. Kwonka, Abrahamu akahitsya emyaka 100 n’omukazi we yaahitsya emyaka 90, batakazaire omwana w’omwojo. (Kut. 21:​1-7) Kwonka Baibuli neegira ngu, Abrahamu ‘akaba aine amatsiko, ngu naija kuba ishenkuru w’amahanga maingi nk’oku kyagambirwe. (Rom. 4:18) Nitumanya ngu eki Abrahamu yaabaire aineho amatsiko kikahikiirira. Akazaara omwana w’omwojo Isaaka ou yaabaire atwire ategyereize. Abrahamu akaba naihirira ahari ki kugira obwesigye?

2. Ahabw’enki Abrahamu yaabaire naahamiza kimwe ngu Yehova naija kuhikiiriza eki yaamuraganiise?

² Abrahamu akaba aine omukago murungi na Yehova, n’ahabw’ekyo akaba “[naahamiza] kimwe ngu eki Ruhanga yaaraganiise, naabaasa kukikora.” (Rom. 4:21) Ahabw’okugira ngu Abrahamu akaba aine okwikiriza kandi arikusiimwa Yehova akamweta ohikiriire. (Yak. 2:23) Nk’oku kirikworekwa omu Abarooma 4:​18, okwikiriza kwa Abrahamu kukaba kwine akakwate n’amatsiko agu yaabaire aine. Ka tushwijume eki entumwa Paulo arikugamba aha matsiko omu Abarooma eshuura 5.

3. Paulo akagamba ki aha bikwatiraine n’amatsiko?

 ³ Paulo naayoreka ahabw’enki turikubaasa kuhamya ngu ‘amatsiko tigarikukwatsa nshoni.’ (Rom. 5:5) Kandi naatuhwera kumanya oku amatsiko g’Omukristaayo garikubaasa kwongyera kuhama. Twaba nitushwijuma ebiri omu Abarooma 5:​1-5, teekateeka aha ku birikuhikaana n’ebi oraabiremu. Waakora otyo, noija kwetegyereza ngu amatsiko gaawe g’Ekikristaayo gongyeire kuhama. Nituza n’okureeba oku orikubaasa kwongyera kuhamya amatsiko gaawe kukira oku gari hati. Ka tubanze tureebe amatsiko g’omuhendo agu Paulo yaagizire ngu tigarikukwatsa nshoni.

4. Niki ekirikugambwaho omu Abarooma 5:​1, 2?

⁴ Shoma Abarooma 5:​1, 2. Ebigambo ebyo, Paulo akabihandiikira ekibiina kya Rooma. Ab’eishe-emwe abo bakaba beegire ebirikukwata ahari Yehova na Yesu, boorekire okwikiriza omu bikorwa kandi bahindukire Abakristaayo. N’ahabw’ekyo Ruhanga akabeeta abahikiriire “ahabw’okwikiriza,” kandi akabashukaho omwoyo gurikwera. Bakagira amatsiko g’omuhendo.

5. Entoore baine matsiko ki?

⁵ Paulo akahandiikira Abakristaayo abashukirweho omwoyo gurikwera omuri Efeso aha bikwatiraine n’amatsiko agu baayetairwe. Amatsiko ago gakaba nigatwariramu ‘obuhunguzi bwabo.’ (Efe. 1:18) Kandi obu Paulo yaahandiikira Abakolosai akabagambira ahu baabaire nibaija kutungira omugabo gwabo. Akagira ngu amatsiko ago ‘gababiikiirwe omu iguru.’ (Kol. 1:​4, 5) N’ahabw’ekyo, abashukirweho omwoyo gurikwera, baine amatsiko g’okuzookyera amagara agatahwaho omu iguru ahu baraategyekyere na Kristo.—1 Tes. 4:​13-17; Kush. 20:6.

6. Omwe aha ntoore akagamba ki aha matsiko ge?

⁶ Entoore nibatwara amatsiko gaabo nk’ag’omuhendo. Omuri 1991, Ow’eishe-emwe Frederick Franz omwe aha ntoore, akagamba  aihire aha mutima arikugira ati: “Amatsiko gaitu n’agaabuzima kandi nigaija kuhikiirira omu bwijwire obu twena 144,000 turaatungye eki Ruhanga yaaturaganiise.” Bwanyima y’okuheereza omu bwesigwa kumara emyaka mingi, akagira ati: “Amatsiko ogu twine nitukigatwara nk’ag’omuhendo. . . . Ku turikwongyera kutegyereza ebi twineho amatsiko nibyongyera kuba ebyabuzima ahariitwe. Nitwija kutegyereza, n’obu haakuhinguraho obukaikuru bw’emyaka. Nintwara amatsiko gaitu nk’ag’omuhendo okukira ira.”

7-8. Abakristaayo abaingi baine matsiko ki? (Abarooma 8:​20, 21)

⁷ Baingi abarikuramya Yehova, baine amatsiko nk’agu Abrahamu yaabaire aine, ag’okutungira amagara agatahwaho omu nsi barikutegyekwa Obukama bwa Ruhanga. (Heb. 11:​8-10, 13) Paulo akahandiika aha matsiko aga ag’omuhendo agu baabaire nibaija kutunga. (Shoma Abarooma 8:​20, 21.) Niki eki waagiriire ekihika obu waabanza kwega eki Baibuli erikugamba aha biro by’omumaisho? Mbwenu shi n’okumanya ngu izooba rimwe noija kuba ohikiriire, otarikushiisha? Nari n’okumanya ngu abakundwa baawe abaafiire nibaija kugaruka kuba abahuriire omu paradiso? Ekyo nikibaasa kuba kyakuhweraire kugirira ekihika ebi oineho amatsiko.

⁸ Yaaba nitwija kutungira amagara agatahwaho omu iguru nari omu nsi, twine amatsiko g’omuhendo agarikutureetera kushemererwa. Kandi amatsiko aga nigabaasa kwongyera kuhama. Ebi Paulo yaahandiikire nibyoreka oku ekyo kirikubaasa kubaho. Ka tushwijume ebi yaahandiikire ebirikukwata aha matsiko gaitu. Okukora ekyo nikiija kuhamya obwesigye bwaitu ngu amatsiko gaitu nigaija kwongyera kuhama, kandi tigarikwija kutukwatsa nshoni.

9-10. Nka Paulo, Abakristaayo nibabaasa kuhikwaho ki? (Abarooma 5:3) (Reeba n’ebishushani.)

⁹ Shoma Abarooma 5:3. Yetegyereze ngu nitubaasa kugira obusaasi twaba nituteeraho  kuhamya amatsiko gaitu. Ekyo nikibaasa kututangaaza. Kwonka, Abakristaayo boona baine kumanya ngu nibaija kugira obusaasi. Yetegyereze eky’okureeberaho kya Paulo. Akagambira aba Tesalonika ati: “Ahakuba tukabamanyisa kare tukiri owaanyu, ku turi ab’okubonabonesibwa, kandi nikwo kyabaire, nk’oku murikumanya.” (1 Tes. 3:4) Kandi akahandiikira Abakorinso ati: ‘Titurikwenda ngu mutamanya okubonabona okwatubaireho . . . kukatureetera kwehwa amatsiko ngu titurakire.’—2 Kor. 1:8; 11:​23-27.

¹⁰ Abakristaayo nabo nibamanya ngu nibabaasa kuhikwaho obusaasi omu miringo etari emwe. (2 Tim. 3:12) Mbwenu shi waahiiganisiibwe ahabw’okwikiririza omuri Yesu n’okumukuratira? Banywani baawe n’abanyabuzaare nibabaasa kuba bakujumire nari bakutwariize kubi. Mbwenu shi okumariirira kuba ow’amazima omuri byona kikureetaire kuhiiganisibwa aha murimo? (Heb. 13:18) Waahakanisiibwe gavumenti ahabw’okugambira abandi amatsiko agu oine? Entumwa Paulo akagira ngu twine kushemererwa n’obu twakuhikwaho okuhiiganisibwa kwa muringo ki. Ahabw’enki?

11. Ahabw’enki twine kumariirira kugumisiriza okugyezibwa kwona?

¹¹ N’obu twakuba twine obusaasi nitubaasa kushemererwa ahabw’ebirikurugamu. Abarooma 5:3 nihagira hati: “Omu busaasi harugamu okugumisiriza.” Abakristaayo boona nibagira obusaasi, n’ahabw’ekyo baine kugumisiriza. Twine kumariirira kwemera okugyezibwa kwona okuratuhikyeho. Obwo nibwo turaabaase kureeba ebi twineho amatsiko birikuhikiirira. Titurikwenda kuba nk’abu Yesu yaabaire naamanyisa obu yaagamba aha mbibo ezaagwire aha rukiri. Bakaikiriza amakuru marungi n’okushemererwa kwonka ku haabaireho ‘obusaasi nari okuhiiganisibwa’ bakahwa amaani. (Mat. 13:​5, 6, 20, 21) Amazima gari ngu, okugyezibwa nari okuhakanisibwa tikurikushemeza, kwonka waagumisiriza noogasirwa. Mu muringo ki?

12. Nitugasirwa tuta twagumisiriza okugyezibwa?

¹² Entumwa Yakobo akagamba ebirungi ebirikuruga omu kugumisiriza. Akahandiika ati: “Murekye okugumisiriza kuhitsye omurimo gwakwo, naimwe mubone kuba abahikire omuri byona, mutaine ki mubuzirweho.” (Yak. 1:​2-4) Yakobo akagira ngu okugumisiriza haine eki kurikubaasa kuhikiiriza. Okugumisiriza nikutuhwera kwongyera kugira omutwarize gw’okwikiriza n’okwesiga Ruhanga. Kwonka, hariho omuringo ogundi oku turikugasirwa twagumisiriza.

13-14. Waagumisiriza niharugamu ki, kandi ekyo kiine kakwate ki n’amatsiko? (Abarooma 5:4)

¹³ Omu Abarooma 5:​4, Paulo akooreka ngu omu kugumisiriza niharugamu okusiimwa. Waagumisiriza noosiimwa Yehova. Eki tikirikumanyisa ngu Yehova naashemererwa waagira oburemeezi, kureka naashemererwa ahabw’okugira ngu noogumisiriza. Ekyo ka nikitugumya munonga!—Zab. 5:12.

¹⁴ Ijuka ngu Abrahamu akagumisiriza okugyezibwa kandi yaasiimwa Ruhanga. Yehova akamweta munywani we kandi yaamureeba nk’ohikiriire. (Kut. 15:6; Rom. 4:​13, 22) Kandi naitwe Yehova naabaasa kutureeba omu muringo nk’ogwo. Ruhanga tarikwihirira aha bi turikukora omu buheereza bwe kutusiima nari n’aha bujunaanizibwa obu twine. Kureka, naatusiima ahabw’okugumisiriza omu bwesigwa. Twena nitubaasa kugumisiriza n’obu twakuba tukuzire, turi mu mbeera ki, nari twine okubaasa kutarikushushana. Hariho embeera egumire ei oriyo noogumisiriza? Kyaba nikwo kiri, okumanya ngu  Ruhanga naakusiima nikikuhuumuriza kandi amatsiko gaawe nigongyera kuhama.

15. Niki ekindi eki Paulo yaagambire, kandi ahabw’enki nikibaasa kutangaaza bamwe?

¹⁵ Paulo akagira ngu twaba abasinguzi omu kugumisiriza okugyezibwa nitusiimwa Yehova. Akoongyeraho ati: ‘Omu kugumisiriza harugamu okuhamibwa, n’omu kuhamibwa harugamu amatsiko, kandi amatsiko tigarikukwatsa nshoni.’ (Rom. 5:​4, 5) Eki nikibaasa kureetera bamwe kutangaara. Ahabw’enki? Ahabw’okuba omu Abarooma 5:​2, Paulo akaba yaagizire ngu Abakristaayo aba Rooma bakaba baine amatsiko ‘g’ekitiinisa kya Ruhanga.’ Kwonka abamwe nibabaasa kwebuuza, ‘Abakristaayo abo ku baraabe baabaire baine amatsiko, ahabw’enki amatsiko nigo Paulo yaahererukire kugambaho?’

16. Okatandika ota kugira amatsiko? (Reeba n’ebishushani.)

¹⁶ Nitubaasa kwetegyereza eki Paulo yaabaire naamanyisa twamanya ngu amatsiko nigabaasa kuguma nigakura. Teekateeka ahari eki: Noijuka obu waabanza kumanya amatsiko g’omuhendo agari omu Kigambo kya Ruhanga? Omu bwire obwo noobaasa kuba waateekateekire ngu ekiraganiso ky’okutuuraho ebiro byona omu paradiso n’ekirooto burooto. Kwonka ku waayongyeire kwega ebirikukwata ahari Yehova n’ebi arikuturaganisa, okoongyera kuhamiza kimwe ngu ebi oineho amatsiko nibiija kuhikiirira.

17. Amatsiko gaawe nigongyera gata kuhama bwanyima y’okwehayo n’okubatizibwa?

¹⁷ Na bwanyima y’okwehayo kandi okabatizibwa, amatsiko gaawe gakoongyera kuhama ku waagumiizemu nooyeyegyesa, kandi nookura omu by’omwoyo. (Heb. 5:13–6:1) Noobaasa kuba oreebire oku ebiri omu Abarooma 5:​2-4 birikuhikiirira. Obundi ohikirweho okugyezibwa kw’emiringo etari emwe n’emwe waakugumisiriza, kandi waareeba oku Ruhanga arikukusiima. Ahabw’okugira  ngu noomanya ngu Ruhanga naakusiima, oine obwesigye ngu naija kuhikiiriza ebi arikuraganisa. Amatsiko gaawe gongyeire kuhama kandi gaaba agaabuzima. Nigakuhiga kugira eki waakora kandi nigakwata ahari buri kimwe eki orikukora, otwariiremu oku orikutwariza ab’eka yaawe, oku orikucwamu, n’oku orikukoresa obwire bwawe.

18. Yehova naatuhamiza ki?

¹⁸ Entumwa Paulo akagamba enshonga endiijo nkuru erikukwata aha matsiko agu orikugira waaba noosiimwa Ruhanga. Akagira ngu ebi oineho amatsiko nibiija kuhikiirira. Ahabw’enki ekyo nookihamya? Paulo akahandiikira Abakristaayo obuhame obutarikubanganisibwaho arikugira ati: ‘Amatsiko tigarikukwatsa nshoni, ahabw’okuba okukunda kwa Ruhanga kushukirwe omu mitima yaitu omwoyo gurikwera ogu twahairwe.’ (Rom. 5:5) N’ahabw’ekyo oine enshonga zihikire ahabw’enki amatsiko agu oine n’agaabuzima.

19. Noobaasa kugira bwesigye ki aha bikwatiraine n’amatsiko agu oine?

¹⁹ Teekateeka aha ki Yehova yaaraganiise Abrahamu n’oku yaabaire naamusiima kandi akamutwara nka munywani we. Eki Abrahamu yaabaire aineho amatsiko kikahikiirira. Baibuli neegira ngu Abrahamu akaheebwa eki yaaraganisiibwe ahabw’okugumisiriza obutaruha. (Heb. 6:15; 11:​9, 18; Rom. 4:​20-22) Buzima tarakwatsirwe nshoni. Gira obwesigye ngu waaguma ori omwesigwa noija kutunga ekiconco ahabw’okugira amatsiko. Amatsiko agu oine n’agaabuzima kandi tigarikukwatsa nshoni. (Rom. 12:12) Paulo akahandiika ati: ‘Ruhanga Mukama w’amatsiko abaijuze okushemererwa kwona n’obusingye omu kwikiriza, amatsiko gaanyu gakanyisibwe amaani g’Omwoyo gurikwera.’—Rom. 15:13.