Eizooba rimwe, munyaanyazi-itwe omuri New Zealand akareeba vidiyo aha jw.org erikworeka oku Yehova arikugirira abandi embabazi. (Isa. 63:​7-9) Akacwamu kugyenderera aha bi yaayegire arikuhwera omuntu butunu. Aha izooba niryo rimwe ku yaabaire naagura ebintu omu katare, akabugana omukazi owaabaire ataine buraaro yaayehayo kumugurira eby’okurya. Omukazi ogwo akaikiriza. Munyaanyazi-itwe ku yaabiretsire, akamubuurira omu bugufu, arikukoresa turakiti Okubonabona Kuryahwaho?

Omukazi ogwo akaatika yaarira. Akagira ngu akaba akuriire omuka y’Abajurizi ba Yehova, kwonka taratunguukire. Kwonka obwire bukye enyima, akaba ashabire Yehova ngu amuhwere amugarukire. Munyaanyazi-itwe akaha omukazi ogwo Baibuli kandi yaakora entebeekanisa y’okumwegyesa. a

Nitubaasa kutooreza Yehova turikugirira abantu embabazi, otwariiremu abanyabuzaare baitu n’ab’eishe-emwe omu kibiina. Kandi nitubaasa kukyoreka turikusherura oburyo bw’okubuurira abandi.