Oshomire n’obwegyendesereza Eminaara y’Omurinzi ey’omwaka ogu? Reeba yaaba noobaasa kugarukamu ebibuuzo ebi:

Nikimanyisa ki “okugarurwa busya omu biteekateeko byanyu”? (Rom. 12:2)

Nikikira aha kukora ebirungi. Nikitwariramu okweshwijuma kandi tukakora empinduka kugira ngu emitwarize yaitu ehikaane n’emitindo ya Yehova nk’oku kirikubaasika.—w23.01, rup. 8-9.

Nitubaasa kworeka tuta emiteekateekyere eringaniire twaba nitureeba ebirikubaho omu nsi?

Nitufayo kureeba oku ebirikubaho omu nsi birikuhikiiriza obunabi bwa Baibuli. Ahabw’okugira ngu okuteebereza nikuteganisa obumwe bw’ekibiina, ebi turikugamba nitubyegamiza aha bitabo by’ekibiina. (1 Kor. 1:10)—w23.02, rup. 16.

Okubatizibwa kwa Yesu nikutaana kuta n’okw’Abakuratsi be?

Yesu akaba ataine kwehayo ahari Yehova, ahakuba akazaarirwa omu ihanga eryabaire ryehaireyo ahari Ruhanga. Akaba ahikiriire, ataine kibi. Kikaba kitarikumwetengyesa kweteisa ahabw’ebibi.—w23.03, rup. 5.

Nitubaasa kureetera tuta abandi kwejumba omu kugarukamu?

Twagarukamu omu bugufu, baingi nibagarukamu. Kandi nitubaasa kwetantara kugamba enshonga zoona. Twakora tutyo, abandi nibaija kutunga eky’okugarukamu.—w23.04, rup. 23.

“Omuhanda Ogurikwera” ogurikugambwaho omuri Isaaya 35:8 ni guuha?

Omuhanda gw’akamanyiso omu kubanza rukaba ruri orugyendo rw’okuruga Babulooni kuza Israeli. Kandi shi obunaku obu? Ebyasha bingi omwaka 1919 gutakahikire, emirimo eyaabaire neeyetengyesa kutebeekanisa omuhanda ogwo ekakorwa, nk’okuvunuura, okuteera Baibuli n’ebindi. Abaheereza ba Ruhanga batwire nibagyendera omu ‘Muhanda Ogurikwera’ kuza omu paradiso y’eby’omwoyo, kutunga emigisha y’Obukama.—w23.05, rup. 15-19.

Ni bakazi ki babiri ab’akamanyiso abarikugambwaho omu Enfumu eshuura 9?

Enfumu neegamba aha ‘mukazi omushema’ ou okweta kwe kurikutwara ‘okuzimu owa Nyamuteza,’ kandi hariho orikujwekyera obwengye, okweta kwe nikuhitsya ‘omu muhanda gw’okwetegyereza’ n’omu kugumaho. (Enf. 9:​1, 6, 13, 18)—w23.06, rup. 22-24.

Oku Ruhanga yaatwariize Looti kikooreka kita ngu Yehova n’omucureezi kandi oringaniire?

Yehova akagambira Looti kuruga Sodoma kuhungira omu nshozi. Looti ku yaayeshengyereize Yehova kuhungira Zoari, akamwikiriza.—w23.07, rup. 21.

Omukazi naabaasa kukora ki iba yaareeba ebirikwitsa enshoni?

Taine kwetaho orubanja. Aine kufayo kuhamya omukago gwe na Ruhanga, kandi ateekateekye aha bakazi abari omu Baibuli abu Ruhanga yaahuumuriize. Naabaasa kuhwera iba kwetantara embeera ezirikumugyeza.— w23.08, rup. 14-17.

Okwetegyereza nikutuhwera kuta kutwaza gye twahakanisibwa ahabw’ebi turikwikiriza?

Nitureeba ekibuuzo eki omuntu yaabuuza nari okuhakanisibwa nk’ekirikutuhwera kumanya ekikuru ahariwe. Eki nikituhwera kuba tweteekateekire kumugarukamu gye.— w23.09, rup. 17.

Nitwegyera ki ahari Mariamu aha bikwatiraine n’okutunga amaani?

Ku yaamanyire ngu naija kuba nyina wa Mesia, akatunga amaani kuruga aha abandi. Yehova akagumya Mariamu arikukoresa Gaburieli na Elizaabeesi. Naitwe nitubaasa kutunga amaani kuruga aha b’eishe-emwe bagyenzi baitu.—w23.10, rup. 15.

Yehova naabaasa kugarukamu ata okushaba kwaitu?

Naaraganisa kuhurira okushaba kwaitu kandi naareeba oku kurikuhikaana n’ekigyendererwa kye. (Yer. 29:12) Naabaasa kugarukamu okushaba kurikushushana omu miringo etari emwe, kwonka naatushagika obutoosha.—w23.11, rup. 21-22.

Abarooma 5:2 nihagamba aha ‘matsiko,’ kwonka ahabw’enki nigagambwaho n’omu mushororongo 4?

Omuntu yaahurira amakuru marungi, naagira amatsiko g’okwesiimira amagara omu paradiso. Kwonka yaagumisiriza oburemeezi, kandi akamanya ngu Yehova naamusiima, amatsiko ge nigongyera kuhama n’okuba agaabuzima.—w23.12, rup. 12-13