1. Nitubaasa kwebuuza ki twateekateeka aha kwikiriza kwa Abrahamu?

 ABANTU baingi nibamanya bikye ebirikukwata ahari Abrahamu, kwonka iwe noomumanyaho bingi. Nk’eky’okureeberaho, noomanya ngu Abrahamu naayetwa ‘ishenkuru wa boona abarikwikiriza.’ (Rom. 4:11) Kwonka noobaasa kuba nooyebuuza oti: ‘Nimbaasa kugyendera omu biribatiro bya Abrahamu kandi ngire okwikiriza nk’oku yaabaire aine?’ Eego, nikibaasika.

2. Ahabw’enki ni kikuru kwega ebirikukwata ahari Abrahamu? (Yakobo 2:​22, 23)

² Omuringo gumwe oku orikubaasa kugira okwikiriza nk’okwa Abrahamu n’okwega ebirikumukwataho. Akoorobera Ruhanga yaaza omu mwanya gwa hare, yaatuura omu mahema emyaka mingi, kandi akaba ayeteekateekire kuhayo Isaaka, omwana we omukundwa. Ebikorwa ebyo bikooreka ngu aine okwikiriza kuhami. Okwikiriza kwa Abrahamu n’ebikorwa bye bikamureetera kusiimwa Ruhanga n’okuba munywani we. (Shoma Yakobo 2:​22, 23.) Yehova naayenda ngu twena otwariiremu naiwe, tube banywani be kandi atusiime. N’ahabw’ekyo, akahwera Paulo na Yakobo bamwe aha baahandiikire ebiri omu Baibuli kuhandiika ebirikukwata ahari Abrahamu. Ka tushwijume ebirikumukwataho ebiri omu Abarooma eshuura 4 na Yakobo eshuura 2. Eshuura zombi ezo nizigamba ebintu bikuru ebirikukwata ahari Abrahamu.

3. Ni kyahandiikirwe ki kikuru eki Paulo na Yakobo baajuriize?

³ Paulo na Yakobo bakajuriza ebiri omu Okutandika 15:​6, aharikugira hati: “Abrahamu akaikiriza [Yehova], yaakimubarira kuba okuhikiirira.” Okuhikiirira nikimanyisa okuba  orikusiimwa Ruhanga kandi otaine kamogo. Ka nikishemeza kureeba ngu Ruhanga, naareeba omuntu otahikiriire nk’otaine kamogo! Obundi nooyenda ngu Ruhanga akureebe nk’ohikiriire, kandi buzima nikibaasika. Kubaasa kumanya eki twine kukora kuba abahikiriire, twine kwetegyereza ekyareeteire Abrahamu kwetwa ohikiriire.

4. Niki ekirikuremesa abantu kuba abahikiriire?

⁴ Omu baruha ei Paulo yaahandiikire Abarooma, akagira ngu abantu boona n’abasiisi. (Rom. 3:23) Mbwenu shi nikibaasika kita omuntu omusiisi kureebwa nk’ohikiriire nari otaine kamogo omu maisho ga Ruhanga? Paulo akagamba ahari Abrahamu kuhwera Abakristaayo boona kutunga eky’okugarukamu.

5. Yehova akaihirira ahari ki kweta Abrahamu ohikiriire? (Abarooma 4:​2-4)

⁵ Yehova akeeta Abrahamu ohikiriire obu yaabaire naatuura omu nsi ya Kanaani. Ahabw’enki Yehova yaayetsire Abrahamu ohikiriire? Mbwenu shi n’ahabw’okugira ngu akaba naayorobera Ebiragiro bya Musa omu muringo oguhikiriire? Ngaaha. (Rom. 4:13) Abaisraeli bakaheebwa ebiragiro ebyo bwanyima y’emyaka erikurenga 400 Ruhanga aherize kweta Abrahamu ohikiriire. Ruhanga akaihirira ahari ki kweta Abrahamu ohikiriire? Yehova akaihirira aha mbabazi ze ezitatushemereire, yaayeta Abrahamu ohikiriire ahabw’okwikiriza.—Shoma Abarooma 4:​2-4.

6. Yehova naihirira ahari ki omuntu omusiisi kumweta ohikiriire?

⁶ Paulo akagira ngu omuntu yaikiririza omuri Ruhanga, ‘okwikiririza kwe nikumubarirwa kuba okuhikiirira.’ (Rom. 4:5) Paulo akoongyeraho ati: “Nk’oku Daudi nawe yaagambire aha mugisha oguheebwa omuntu ou Ruhanga abarira okuhikiirira, kutari habw’okukora emirimo ati: ‘Baine [okushemererwa] abasaasirwe eby’okushiisha byabo, n’ebibi byabo bikashwekwa. Aine [okushemererwa] omuntu ou [Yehova] ataribarira kibi.’” (Rom. 4:​6-8; Zab. 32:​1, 2) Ruhanga naasaasira nari naashweka ebibi by’abo abarikumwikiririzamu. Kandi ku arikubasaasirira kimwe tarikwijuka ebibi byabo. Naabareeba nk’abataine kamogo kandi abahikiriire ahabw’okwikiriza.

7. Abaheereza ba Ruhanga abeesigwa bakaba bari abahikiriire mu muringo ki?

⁷ N’obu Abrahamu, Daudi, n’abandi baheereza ba Ruhanga abeesigwa bayetsirwe abahikiriire, bakaba bari abasiisi. Kwonka ahabw’okwikiriza kwabo, Ruhanga akabareeba nk’abataine kamogo, waabagyeragyeranisa n’abandi abaabaire batarikumwikiririzamu. (Efe. 2:12) Nk’oku Paulo yaahandiikiire Abarooma, ni kikuru kugira okwikiriza kubaasa kugira omukago murungi na Ruhanga. Ekyo nikyo Abrahamu na Daudi baakozire, kandi naitwe nikyo twine kukora.

8-9. Ni miteekateekyere ki egwire ei bamwe baine ahabw’ebi Paulo na Yakobo baahandiikire, kandi ahabw’enki?

⁸ Kumara ebyasha bingi, abanyadiini batwire nibahajaana aha kakwate akari aha gati y’okwikiriza n’ebikorwa. Abanyadiini abamwe nibeegyesa ngu omuntu kubaasa kujunwa, aine kwikiririza omuri Yesu Kristo kyonka. Noobaasa kuba oraahuriire nibagira bati: “Ikiriza Yesu nk’omujuni waawe.” Nibabaasa n’okujuriza ebigambo bya Paulo barikugira bati: ‘Naatubarira okuhikiirira kutari habw’okukora emirimo.’ (Rom. 4:6) Kandi abandi nibagira ngu noobaasa  “kwejuna” orikuramaga nari orikwejumba omu mirimo endiijo ei ediini erikukuragiira kukora. Obundi nibajuriza ebiri omu Yakobo 2:24 aharikugira hati: “[Omuntu naaba ohikiriire] ahabw’okukora kutari kwikiriza kwonka.”

⁹ Ahabw’enshonga ezo, abahandiiki abanyadiini abamwe nibagira ngu Paulo na Yakobo bakaba batarikwikirizana aha nshonga erikugira ngu okwikiriza kwine akakwate n’ebikorwa. Abanyadiini nibabaasa kugira ngu, Paulo akaba naikiriza ngu omuntu naaba ohikiriire ahabw’okwikiriza bitari bikorwa, kandi Yakobo akeegyesa ngu ebikorwa ni bikuru kubaasa kusiimwa Ruhanga. Omuhangu omunyadiini akagira ati: “Yakobo akaba atarikwetegyereza ahabw’enki Paulo yaagizire ngu omuntu naaba ohikiriire ahabw’okwikiriza kwonka, bitari bikorwa.” Kwonka Yehova akahwera Paulo na Yakobo omu bi baahandiikire. (2 Tim. 3:16) N’ahabw’ekyo, hashemereire kuba hariho omuringo gworobi gw’okwetegyereza ebi baahandiikire. Ekyo nitukikora turikushwijuma emishororongo eyetooroire enshonga ei baabaire nibagambaho.

10. Paulo akaba naagamba aha “bikorwa” bya muringo ki? (Abarooma 3:​21, 28) (Reeba n’ekishushani.)

¹⁰ Ni “bikorwa” bya muringo ki ebi Paulo yaagambireho omu Abarooma eshuura 3 n’eya 4? Akaba naagamba aha kworobera Ebiragiro bya Musa ebi yaaheereirwe aha Rushozi Sinai. (Shoma Abarooma 3:​21, 28.) Nikireebeka ngu omu bwire bwa Paulo, Abakristaayo abamwe Abayudaaya bakaba nibagumirwa kwikiriza ngu tibaine kugyendera aha Biragiro bya Musa ahabw’okugira ngu bikaba bitakikora. N’ahabw’ekyo, Paulo akagamba ahari Abrahamu kworeka ngu kuba  ohikiriire omu maisho ga Ruhanga tikirikurugiirira aha kworobera ebiragiro. Omu mwanya gw’ekyo, Paulo akooreka ngu twine kugira okwikiriza. Okumanya ekyo nikituhuumuriza kandi nikituha obwesigye ngu nikibaasika kusiimwa omu maisho ga Ruhanga. Ekyo nikimanyisa ngu nitubaasa kusiimwa Ruhanga twamwikiririzamu kandi tukaikiririza n’omuri Kristo.

11. Yakobo akaba naagamba aha “bikorwa” ki?

¹¹ Kwonka, “ebikorwa” ebirikugambwaho omuri Yakobo eshuura 2 tibyo Paulo yaagambireho. Yakobo akaba naagamba aha bikorwa nari emirimo, ei Abakristaayo barikukora butoosha. Ebikorwa ebyo nibyoreka yaaba Omukristaayo aine okwikiriza okwabuzima omuri Ruhanga nari takwine. Teekateeka aha by’okureeberaho bibiri ebi Yakobo yaakoreise.

12. Yakobo akooreka ata ngu okwikiriza kwine akakwate n’ebikorwa? (Reeba n’ekishushani.)

¹² Omu ky’okureeberaho eky’okubanza, akooreka ngu Abakristaayo tibaine kushoroora baaba nibakoragana n’abandi. Akooreka obukuru bw’enshonga egyo arikugamba aha mushaija owaabaire naatwariza gye omugaiga, kwonka arikutwariza kubi omworo. Yakobo akooreka ngu omushaija nk’ogwo naabaasa kuteekateeka ngu aine okwikiriza, kwonka ebikorwa bye bitarikukyoreka. (Yak. 2:​1-5, 9) Omu ky’okureeberaho kya kabiri, Yakobo akagamba aha muntu orikureeba ‘munyaanya nari mwene ishe ataine by’okujwara nari eby’okurya,’ akaremwa kugira eki yaakora kumuhwera. Omuntu nk’ogwo n’obu yaakugira ngu aine okwikiriza, ebikorwa bye nibyoreka ngu naaba atakwine. Nk’oku Yakobo yaagizire, ‘okwikiriza kwonka,  kwaba kutaine bikorwa, nikuba kufiire.’—Yak. 2:​14-17.

13. Yakobo akakoresa by’okureeberaho ki kworeka ngu okwikiriza kwine akakwate n’ebikorwa? (Yakobo 2:​25, 26)

¹³ Yakobo akagamba ahari Rahabu nk’eky’okureeberaho kirungi ky’owaayorekire okwikiriza omu bikorwa. (Shoma Yakobo 2:​25, 26.) Akahurira ebirikukwata ahari Yehova kandi akamanya ngu naashagika Abaisraeli. (Yos. 2:​9-11) Akooreka omu bikorwa ngu aine okwikiriza, arikushereka Abaisraeli babiri entatsi abaabaire bari omu kabi. N’ekyarugiremu, omukazi ogwo owaabaire atari Mwisraeli kandi atahikiriire akeetwa ohikiriire nka Abrahamu. Eky’okureeberaho kye nikihamya ngu ni kikuru kworeka ngu twine okwikiriza omu bikorwa.

14. Ebi Paulo yaahandiikire nibihikaana bita n’ebi Yakobo yaahandiikire?

¹⁴ N’ahabw’ekyo Paulo na Yakobo bakaba nibagamba aha ku okwikiriza kwine akakwate n’ebikorwa omu miringo etarikushushana. Paulo akaba naagambira Abakristaayo Abayudaaya ngu tibarikubaasa kusiimwa Ruhanga ahabw’okworobera Ebiragiro bya Musa kyonka. Kandi Yakobo akagira ngu Abakristaayo boona baine kworeka okwikiriza kwabo barikukorera abandi ebirungi.

15. Ni miringo ki emwe oku turikubaasa kworeka okwikiriza kwaitu omu bikorwa? (Reeba n’ebishushani.)

¹⁵ Yehova tarikugira ngu kubaasa kuba abahikiriire, twine kukora byenyini nk’ebi Abrahamu yaakozire. Kureka, hariho emiringo mingi oku turikubaasa kworeka okwikiriza kwaitu omu bikorwa. Nitubaasa kwakiira abasya omu nteerane, kuhwera ab’eishe-emwe bagyenzi baitu abaine ebi bakyenire, kandi tukorere ebirungi ab’eka yaitu, twakora tutyo Ruhanga naatusiima kandi naatuha emigisha.  (Rom. 15:7; 1 Tim. 5:​4, 8; 1 Yoh. 3:18) Omuringo mukuru gw’okworeka ngu twine okwikiriza n’okuba abeeziriki omu kubuurira amakuru marungi. (1 Tim. 4:16) Twena nitubaasa kworeka omu bikorwa ngu ebi Yehova arikuraganisa nibiija kuhikiirira kandi ngu omuringo ogu arikukoramu ebintu nigwo gurikukirayo oburungi. Twakora tutyo nitugira obwesigye ngu Ruhanga naija kutureeba nk’abahikiriire, kandi tube banywani be.

16. Amatsiko agu Abrahamu yaabaire aine gakaba gaine kakwate ki n’okwikiriza?

¹⁶ Abarooma eshuura 4 neeyoreka ngu okugira amatsiko n’enshonga endiijo nkuru ei turikwegyera ahari Abrahamu. Yehova akaraganisa ngu kurabira omuri Abrahamu ‘amahanga maingi’ nigaija kuheebwa omugisha. Abrahamu ka yaabaire aine amatsiko g’omuhendo! (Kut. 12:3; 15:5; 17:4; Rom. 4:17) Abrahamu akahitsya emyaka 100 na Saara yaahitsya 90, batakazaire omwojo owaabaire araganisiibwe. Kurugiirira aha mireebere y’abantu, okaba nooshusha ngu Abrahamu na Saara tibakibaasa kuzaara. Kukaba kuri okugyezibwa kuhango ahari Abrahamu. Kwonka, ‘akagira amatsiko omu bunaku obu yaakugahwereiremu, ngu naija [kuba] ishenkuru w’amahanga maingi.’ (Rom. 4:​18, 19) Kandi buzima, ebi yaabaire aineho amatsiko bikahikirira. Akazaara Isaaka omwana ou yaabaire ategyereize kumara obwire.—Rom. 4:​20-22.

17. Nitumanya tuta ngu Ruhanga naabaasa kutureeba nk’abahikiriire kandi banywani be?

¹⁷ Naitwe nitubaasa kusiimwa omu maisho ga Ruhanga, tube abahikiriire, kandi tube banywani be nka Abrahamu. Paulo akagamba aha nshonga egyo obu yaahandiika ati: “Tikiramuhandiikiirwe wenka [Abrahamu], ngu kikamubarirwa okuba okuhikiirira, kureka ahabwaitu naitwe abaribarirwa okuhikiirira, itwe abarikwikiriza ogwo owaazoire Yesu.” (Rom. 4:​23, 24) Nka Abrahamu, twine kworeka okwikiriza omu bikorwa kandi tugire n’amatsiko. Paulo akagamba n’aha matsiko omu Abarooma eshuura 5, agu turikuza kugambaho omu kicweka ekirikukurataho.