EKICWEKA EKY’OKWEGA 51
EKYESHONGORO 3 Amaani Gaitu, Amatsiko Gaitu, Obwesigye Bwaitu
Amarira Gaawe n’ag’Omuhendo Ahari Yehova
“Ote amarira gangye omu cupa yaawe. Tigarahandiikirwe omu kitabo kyawe?”—ZAB. 56:8.
ENTIMA
Oku Yehova arikwetegyereza gye enyehurira z’obusaasi bwaitu n’oku arikutuha okuhuumurizibwa okurikwetengyesa
1-2. Ni bintu ki ebirikubaasa kutureetera kurira?
HAIHI twena turagizireho amarira. Twahikwaho embeera ezirikutushemeza, nitubaasa kugira amarira g’okushemererwa. Obundi noobaasa kuba waarizire obu haabaho ekintu kikuru nari eky’omuhendo, nk’obu omwana waawe yaazaarwa, obu waijuka ekintu ekyakushemeize munonga, nari obu waabugana munywani waawe ou waabaire omazire emyaka mingi otarikureeba.
2 Kwonka obumwe, amarira gaitu nigaba nigooreka obusaasi obu twine omu mutima. Nk’eky’okureeberaho, nitubaasa kurira omuntu yaatureebya, twaba twine obusaasi bw’amaani oburikureetwa endwara, nari twaba nituganya ahabw’okufeerwa omukundwa. Omu bwire nk’obwo, nitubaasa kwehurira nk’oku nabi Yeremia yaayehuriire obu Abababulooni baacwekyereza Yerusaalemu. Yeremia akagira ati: “Amaisho gangye nigahimintika emigyera y’amarira . . . Amaisho gangye nigahimintika amaizi obutaitsya, gatarikurereera.”—Tonz. 3:48, 49.
3. Yehova naayehurira ata yaareeba abaheereza be nibabonabona? (Isaaya 63:9)
3 Yehova naamanya obwingi bw’amarira agu turizire ahabw’embeera zigumire. Baibuli neetuhamiza ngu naamanya emirabanamu y’abaheereza be, kandi naatuhurira twamutakira kutuhwera. (Zab. 34:15) Kwonka, Yehova naakora ekirikukira aha kutureeba n’okutuhurira. Ari nk’omuzaire oine rukundo, naafayo munonga aha baana be ku barikumutakira, kandi naaba ayeteekateekire kubahwera.—Shoma Isaaya 63:9.
4. Nituza kwegyera ki ahari bamwe abarikugambwaho omu Baibuli?
4 Ekigambo kya Yehova nikyoreka eki yaakozire, obu abaheereza be baabaire nibarira. Nk’eky’okureeberaho, nitubaasa kwegyera ahari Hanna, Daudi, n’Omugabe Hezekia. Niki ekyabareetaire kurira? Yehova akakora ki kubahwera? Kandi eby’okureeberaho byabo nibibaasa kutuhwera bita twaba twine obusaasi, abandi baatureebya, nari twaba twine amaganya?
AMARIRA G’OBUSAASI
5. Hanna akeehurira ata ahabw’embeera ezi yaabaire naarabamu?
5 Hanna akahikwaho oburemeezi bwingi obwamureetaire kugira amarira g’obusaasi. Oburemeezi bumwe n’okugira ngu akaba aine muka iba Penina, owaabaire naamutwariza kubi. Okwongyera aha busaasi obwo, Hanna akaba ari engumba, kandi we Penina akaba aine abaana baingi. (1 Sam. 1:1, 2) Penina akaba ateerera Hanna enaku obutaitsya ahabw’okuba engumba. Ku ogire ngu okaba oriiwe, okaba noija kwehurira ota? Hanna akaba ‘arira, ayanga n’okurya,’ kandi agira “obusaasi bwingi” omu mutima.—1 Sam. 1:6, 7, 10.
6. Hanna akakora ki kutunga okuhuumurizibwa?
6 Hanna akatunga ata okuhuumurizibwa? Kimwe aha byamuhweraire n’okuza kuramya aha ihema ry’okubugabuganiramu. Ku yaahikireyo, obundi haihi n’omuryango ogurikutaaha omu mbuga y’eihema, ‘akatandika kushaba [Yehova], aine obusaasi bwingi omu mutima, naarira munonga.’ Akeeshengyereza Yehova ati: ‘Ku oraareebe okubonabona kw’omuzaana waawe, onyijukye.’ (1 Sam. 1:10b, 11) Hanna akagambira Yehova enyehurira ze kurabira omu kushaba. Yehova ka aine kuba yaakwatsirweho okurira kwa muhara we ogwo ow’omuhendo!
7. Ni kuhuumurizibwa ki oku Hanna yaatungire ahabw’okugambira Yehova buri kimwe?
7 Hanna akeehurira ata ku yaaherize kugambira Yehova buri kimwe omu kushaba, na bwanyima y’Omunyamurwa Omukuru Eli kumuhamiza? Baibuli neegira eti: “Ogwo mukazi yaayegyendera, yaarya, tiyaagaruka kureebwa aine enaku.” (1 Sam. 1:17, 18) N’obu embeera ye y’okuganya etarahindukire ahonaaho, akatunga oburuhuuko. Oburemeezi bwe akabwegyekyerera Yehova. Akareeba amaganya ge n’okutaka kwe, kandi bwanyima akamuha omugisha yaatwara enda.—1 Sam. 1:19, 20; 2:21.
8-9. Kurugiirira aha Abaheburaayo 10:24, 25, ahabw’enki twine kuteeraho munonga kuza omu nteerane? (Reeba n’ekishushani.)
8 Amashomo agu turikwega. Ori omu mbeera egumire erikukureetera kugira amarira g’obusaasi? Obundi nooganya ahabw’okufeerwa omwe aha b’eka yaawe, nari munywani waawe. Omu bwire nk’obwo, ti kigwire kwenda kuba wenka. Kwonka nk’oku Hanna yaahuumuriziibwe kandi akagumibwa ahabw’okuza aha ihema, naiwe noobaasa kutunga okuhuumurizibwa waaza omu nteerane, n’obu waakuba otarikwehurira gye. (Shoma Abaheburaayo 10:24, 25.) Ku turikuhurira Ebyahandiikirwe birikuhuumuriza omu nteerane, Yehova naatuhwera kusingura ebiteekateeko bibi. Ekyo nikituhwera kwehurira gye n’obu embeera zaakuba zitahindukire ahonaaho.
9 Omu nteerane zaitu, nitushemererwa kukwatanisa n’ab’eishe-emwe abaine esaasi, kandi ebikorwa byabo ebya rukundo n’okufayo nibitugumya. (1 Tes. 5:11, 14) Teekateeka ahari payoniya w’omutaano owaafeereirwe omukazi we. Akagira ati: “Na hati ninkirira. Obumwe, ninshutama omu kashonda ndira. Kwonka enteerane nizingumya munonga. Ebigambo birungi by’ab’eishe-emwe na banyaanyazi-itwe buzima nibimpumuriza. N’obu ndikuba nyerarikiriire, kandi nyine amaganya ntakagiire aha ruteerane, butoosha ninyehurira gye naazayo.” Twaba turi omu nteerane, Yehova naabaasa kukoresa ab’eishe-emwe na banyaanyazi-itwe kutuhwera.
Abakristaayo bagyenzi baitu nibabaasa kutuhuumuriza (Reeba akacweka 8-9)
10. Nitubaasa kutooreza tuta Hanna twaba twine obusaasi omu nyehurira?
10 Hanna akatunga okuhuumurizibwa arikugambira Yehova oku arikwehurira kurabira omu kushaba. Naiwe noobaasa ‘kwegyekyera [Yehova] okushoberwa kwawe kwona’ oine obwesigye ngu naija kukuhurira. (1 Pet. 5:7) Munyaanyazi-itwe ou iba yaitsirwe abashuma, naagira ati: “Okaba nooshusha ngu omutima gwangye gucwekiremu obucweka bukye, kandi tigurikira. Nkatunga obuhuumure ahabw’okushaba Yehova, Tata ow’omu iguru owa rukundo. Obumwe, nkaba mburwa ebigambo bihikire eby’okukoresa omu kushaba, kwonka akaba anyetegyereza. Ku naabaire nyehurira kubi, nkaba nshaba Yehova kumpwera kugira obusingye. Nkaba ngira obusingye bw’omu biteekateeko n’omu mutima, reero mbaasa kugumisiriza.” Waagambira Yehova ebirikukwerarikiriza, naakwatwaho munonga amarira gaawe g’enaku, ahabw’okwetegyereza obusaasi bw’omu mutima gwawe. Ebirikukwerarikiriza n’obu byakugumaho, Yehova naabaasa kwikaikanisa omutima gwawe, kandi akuhwere kugira obusingye buringaniire. (Zab. 94:19; Fil. 4:6, 7) Kandi naija kukushumbuusha ahabw’okugumisiriza omu bwesigwa.—Heb. 11:6.
AMARIRA G’OKUKUREEBYA
11. Embeera ezirikwerarikiriza zikareetera Daudi kwehurira ata?
11 Daudi omu kubaho kwe kwona, akaba aine kugumisiriza embeera zigumire ezaabaire nizimureetera kurira. Abu yaabaire naayesiga bakamureebya, kandi abandi bakaba nibamutwariza kubi. (1 Sam. 19:10, 11; 2 Sam. 15:10-14, 30) Rimwe akahandiika ati: “Okutsinda kunkabize, buri kiro ndirira aha kitanda kyangye; ekitanda kyangye nkijubya n’amarira.” Ahabw’enki Daudi yaayehuriire atyo? Akagarukamu ati: “Ahabw’abazigu bangye boona.” (Zab. 6:6, 7) Ebikorwa bibi by’abandi bikareetera Daudi obusaasi bw’amaani yaarira munonga.
12. Nk’oku kiri omuri Zaaburi 56:8, Daudi akaba aine buhame ki?
12 N’obu Daudi araabe yaabaire aine oburemeezi, akaba naahamya ngu Yehova naamukunda. Akahandiika ati: “[Yehova naija kuhurira] eiraka ry’okurira kwangye.” (Zab. 6:8) Aha murundi ogundi, akagamba ebiri omu Zaaburi 56:8. (Kishome.) Ebigambo ebyo nibyoreka oku Yehova arikufayo munonga aha baheereza be. Okaba nooshusha ngu Yehova naarundaana amarira ga Daudi omu cupa nari naagahandiika omu kitabo. Akaba naahamya ngu Yehova naamanya obusaasi bwe, kandi naabwijuka. Akaba naahamiza kimwe ngu Ishe ow’omu iguru owa rukundo, naayetegyereza ebi yaabaire naarabamu n’oku byamureetaire kwehurira.
13. Twine kwijuka ki, abandi baatureebya? (Reeba n’ekishushani.)
13 Amashomo agu turikwega. Nooyehurira kubi ahabw’okugira ngu omuntu ou orikwesiga akureebize? Obundi noobaasa oine obusaasi ahabw’okugira ngu ou obaire nooriima nari omukundwa waawe akutsigireho kitaraariire, nari munywani waawe arekyeire aho kuheereza Yehova. Ow’eishe-emwe ou omukazi we yaashambaine kandi akamutsigaho akagira ati: “Nkagira ekyekango, kandi nkaba ntarikuteekateeka ngu eki nikibaasa kubaho. Nkehurira nk’otaine mugasho, kandi naagira ekiniga.” Ku haraabe haine okureebize, nikibaasa kukuhuumuriza waamanya ngu Yehova tarikubaasa kukutsigaho. Ow’eishe-emwe akagira ati: “Nyetegyereize ngu omukago gwaitu n’abantu nigubaasa kuhwaho, kwonka Yehova n’Orukiri rwaitu. N’obu haakubaho ki, butoosha naaba ariho kutuhwera. Tarikutsigaho abarikuguma bamuhamiireho.” (Zab. 37:28) Kandi, ijuka ngu Yehova naatukunda munonga kukira omuntu ondiijo weena. Yehova naakufaho munonga n’obu oraabe oine obusaasi ahabw’okugira ngu bakureebize. (Rom. 8:38, 39) Eky’okwega: N’obu omuntu yaakuba akutwariize kubi ata, Sho ow’omu iguru naakukunda.
Ekitabo kya Zaaburi nikituhamiza ngu Yehova ari haihi n’ab’emitima ehendekire (Reeba akacweka 13)
14. Zaaburi 34:18 neetuhamiza ki?
14 Haaba haine okureebize, noobaasa kuhuumurizibwa ebigambo bya Daudi ebiri omu Zaaburi 34:18. (Kishome.) Ekitabo kimwe nikigira ngu “ab’emitima ehendekire” nibabaasa kutwariramu “abataine matsiko g’okutunga ebirungi.” Yehova naakorera ki abarikwehurira batyo ahabw’abandi kubareebya? Nk’oku omuzaire omurungi arikuhuumuriza omwana we yaarira, Yehova naaba ari “haihi” naitwe kutugirira embabazi, kandi naaba ayeteekateekire kutuhwera, abandi batureebya nari twafeerwa. Ayeteekateekire kutuhuumuriza twaba twine obusaasi nari tuhwiremu amaani. Kandi naatuha ebintu bingi by’okugirira ekihika kugira ngu tubaase kugumisiriza oburemeezi hati.—Isa. 65:17.
AMARIRA G’OKWEHWA AMATSIKO
15. Hezekia akahikwaho mbeera ki eyaamureeteire kurira?
15 Aha myaka 39, Omugabe Hezekia owa Yuda akamanya ngu aine endwara y’amaani. Nabi Isaaya akagambira Hezekia ngu akaba naija kufa ahabw’endwara egyo. (2 Bag. 20:1) Okaba nooshusha ngu Hezekia takiine matsiko. Amakuru ago, gakareetera Hezekia kurira munonga. N’ahabw’ekyo akashaba Yehova emirundi mingi.—2 Bag. 20:2, 3.
16. Yehova akatwaza ata ku yaahuriire okweshengyereza kwa Hezekia?
16 Yehova akakwatwaho munonga obu Hezekia yamweshengyereza arikurira, reero yaamugira ati: “Naahurira okushaba kwawe, kandi naareeba n’amarira gaawe. Reeba, niinyija kukukiza.” Yehova kurabira omuri Isaaya, akamuraganisa kumwongyeraho emyaka kugira ngu ajune Yerusaalemu omu mikono y’Abasiria.—2 Bag. 20:4-6.
17. Yehova naatuhwera ata twaba twine endwara y’amaani? (Zaaburi 41:3) (Reeba n’ekishushani.)
17 Amashomo agu turikwega. Oine endwara erikukureetera kwehwa amatsiko? Shaba Yehova, n’obu waakuba noorira. Baibuli neetuhamiza ngu “Tataitwe ow’okusaasira, kandi Ruhanga ow’okuhuumuza kwona” naija kutuhuumuriza omu busaasi bwaitu bwona. (2 Kor. 1:3, 4) Obunaku obu titwine kuteekateeka ngu Yehova naija kwihaho oburemeezi bwaitu bwona, kwonka nitubaasa kumwesiga kutuhwera. (Shoma Zaaburi 41:3.) Yehova naakoresa omwoyo gurikwera kutuha amaani, obwengye, n’obusingye bw’omutima, kubaasa kugumisiriza. (Enf. 18:14; Fil. 4:13) Kandi naatuhuumuriza kurabira omu matsiko gaitu agarikwegamira ahari Baibuli, agarikworeka ngu naija kwihaho endwara z’emiringo yoona.—Isa. 33:24.
Yehova naija kugarukamu okushaba kwaitu arikutuha amaani, obwengye, n’obusingye bw’omu mutima (Reeba akacweka 17)
18. Ni kyahandiikirwe ki ekirikukuhuumuriza waaba nooraba omu mbeera egumire munonga? (Reeba akabokusi “ Ebigambo Birikuhuumuriza Ebirikuragaza Amarira Gaitu.”)
18 Hezekia akahuumurizibwa ebigambo bya Ruhanga. Naitwe nitubaasa kuhuumurizibwa Ekigambo kya Ruhanga. Yehova naakoresa Ekigambo kye kutugarura mutima omunda twaba nituraba omu mbeera zigumire. (Rom. 15:4) Munyaanyazi-itwe omuri West Africa ku yaacebeirwe akashanga aine ekookoro, akaba naakira kurira munonga. Naagira ati: “Ekyahandiikirwe kimwe ekirikukira kungumya ni Isaaya 26:3. N’obu obumwe turaabe tutarikubaasa kuzibira oburemeezi, omushororongo ogwo nigumpamiza ngu Yehova naabaasa kutuha obusingye bw’omu mutima oburikutuhwera kumanya oku twine kutwaza.” Hariho ekyahandiikirwe ekirikukuhuumuriza waaba ori omu mbeera egumire, obundi erikubaasa kukureetera n’okwehwa amatsiko?
19. Twine ekihika ky’okutunga ki omu biro by’omumaisho?
19 Turi omu biro by’emperu, n’ahabw’ekyo ebirikutureetera kurira nibiija kweyongyera. Kwonka nk’oku twareeba omu ky’okureeberaho kya Hanna, Daudi, n’Omugabe Hezekia, Yehova naareeba okurira kwaitu, kandi naagira eki yaakora. Amarira gaitu n’ag’omuhendo ahariwe. N’ahabw’ekyo twahikwaho embeera zigumire, buzima nituba nitwenda kugambira Yehova oku turikwehurira. Ka tuteereho kuteetaanisa aha b’eishe-emwe na banyaanyazi-itwe abakundwa omu kibiina. Kandi ka tugumizemu turikuhuumurizibwa ebigambo ebiri omu Baibuli. Nitubaasa kugira obuhame ngu twagumizamu nitugumisiriza omu bwesigwa, Yehova naija kutuha emigisha. Eki nikitwariramu ekiraganiso ky’omuhendo, ngu Ruhanga naija kwiha omu maisho gaitu amarira g’obusaasi, ag’okutureebya, n’ag’enaku. (Kush. 21:4) Obwo nitwija kurira amarira g’okushemererwa gonka.
EKYESHONGORO 4 “Yehova “Niwe Muriisa Wangye”
