1. Abamwe baine nyehurira ki aha kutuuraho ebiro byona?

 ABANTU baingi obunaku obu nibafayo aha bi barikurya, kandi nibateeraho kukora ebisasayizi obutoosha kuguma baine amagara marungi. Kwonka nabwo, nibamanya ngu tibarikubaasa kutuuraho ebiro byona. Kandi nibakireeba nk’ekitarikushemeza ahabw’amaganya ga bukuru. Kwonka, Yesu akagira ngu nikibaasika kutunga “amagara agatahwaho,” nk’oku kirikworekwa omuri Yohaana 3:​16, na 5:24.

2. Yohaana eshuura 6 neegamba ki aha magara agatahwaho? (Yoh. 6:​39, 40)

² Eizooba rimwe, Yesu akariisa enkumi n’enkumi z’abantu emigaati n’eby’enyanja omu muringo gw’eky’okutangaaza. a Ekyo buzima kikaba nikishemeza, kwonka eki yaagambire eizooba eryakuratsireho kikaba nikikiraho. Omutwe muhango gw’abantu bakamukurata Kaperenaumu, haihi n’enyanja ya Galilaaya, akabagambira ngu abantu nibabaasa kuzooka batungye amagara agatahwaho. (Shoma Yohaana 6:​39, 40.) Okuhikaana n’ekyo, teekateeka ahari banywani baawe, n’abakundwa baawe abaafiire. Ebigambo bya Yesu nibyoreka ngu baingi abaafiire nibabaasa kuzooka, kandi iwe n’abakundwa baawe nimubaasa kwesiimira amagara agatahwaho. Kwonka, ebigambo ebi Yesu yaayongyeireho ebiri omuri Yohaana eshuura 6 bitwire nibigumira bingi kwetegyereza. Ka tubishwijume.

3. Kurugiirira ahari Yohaana 6:​51, Yesu akeegyesa ki aha birikumukwataho?

³ Omutwe muhango gw’abantu omuri Kaperenaumu bakareeba  akakwate akaabaire kari aha gati y’emigaati ei Yesu yaabaire abahaire, n’emaanu ei Yehova yaahaire baishenkurubo. Nangwa, Ebyahandiikirwe nibyeeta emaanu “omugaati ogwarugire omu iguru.” (Zab. 105:40; Yoh. 6:31) Yesu akeegyesa abantu ebintu ebindi arikwihirira aha maanu. N’obu Ruhanga yaahaire abantu emaanu omu muringo gw’eky’okutangaaza, abaagiriire bakahitsya obwire baafa. (Yoh. 6:49) Kwonka we Yesu, akeegambaho ‘nk’omugaati gw’amazima ogwarugire omu iguru,’ “omugaati gwa Ruhanga,” kandi ‘omugaati gw’amagara.’ (Yoh. 6:​32, 33, 35) Akooreka entaaniso eyaabaire eri aha gati ye n’emaanu. Akagira ati: “Niinye mugaati gw’amagara ogwarugire omu iguru, omuntu weena ku arikurya aha mugaati ogu, naija kugumaho ebiro byona.” (Shoma Yohaana 6:51.) Abayudaaya abo bakashoberwa. Yesu akaba naabaasa ata kwegambaho ‘nk’omugaati’ ogwarugire omu iguru, ogurikukira emaanu ei Ruhanga yaahaire baishenkurubo omu muringo gw’eky’okutangaaza? Yesu akabagambira ekyabaire nikibaasa kubahwera kwetegyereza eki yaabaire naamanyisa. Akagira ati: “Omugaati ogu ndiha . . . n’omubiri gwangye.” Naabaasa kuba yaabaire naamanyisa ki? Ni kikuru kukyetegyereza ahakuba eky’okugarukamu nikyoreka oku turikubaasa kutunga amagara agatahwaho n’abakundwa baitu. Ka tureebe eki Yesu yaabaire naamanyisa.

OMUGAATI GW’AMAGARA HAMWE N’OMUBIRI GWE

4. Ahabw’enki abamwe baatangaariire ebi Yesu yaagambire?

⁴ Abamwe abaahuriire ebigambo bya Yesu bakatangaara ku yaagambire aha kuhayo omubiri gwe “ahabw’ab’omu nsi ngu batungye amagara.” Mbwenu shi bakaba nibateekateeka ngu naaza kubaha omubiri gwe gwenyine ngu bagurye? (Yoh. 6:52) Yetegyereze ekindi eki yaayongyeireho: “Ku murikuba mutariire mubiri gw’Omwana w’omuntu, kandi mutanywaire shagama ye, timurikugira magara omuriimwe.”—Yoh. 6:53.

5. Ahabw’enki nitubaasa kuhamya ngu Yesu akaba atarikumanyisa ngu abantu bakaba baine kunywa eshagama ye yenyine?

⁵ Omu bwire bwa Noa, Ruhanga akazibira abantu kurya eshagama. (Kut. 9:​3, 4) Yehova akagaruka yaakigambaho omu biragiro ebi yaahaire Abaisraeli. Omuntu weena owaabaire arya eshagama akaba aitwa. (Lev. 7:27) Na Yesu akakihamya. (Mat. 5:​17-19) N’ahabw’ekyo, akaba atarikubaasa kugambira Abayudaaya kurya omubiri gwe gwenyine, nari kunywa eshagama ye. Kwonka, ebigambo ebi Yesu yaagambire bikaba nibyegyesa abantu oku barikubaasa kutunga “amagara agatahwaho.”—Yoh. 6:54.

6. Nitubaasa kwetegyereza tuta ebigambo bya Yesu ebirikukwata aha kurya omubiri gwe n’okunywa eshagama ye?

⁶ Yesu akaba naamanyisa ki? Yesu akaba naagamba omu muringo gw’akamanyiso nk’oku yaabaire yaagambiire Omusamariakazi ati: ‘Weena orikunywa aha maizi agu ndimuha, tarigira iriho ebiro byona, ahakuba amaizi agu ndimuha, nigaija kuhinduka enshuro y’amaizi, efumukye omuriwe, neereeta amagara agatahwaho.’ (Yoh. 4:​7, 14) b Yesu akaba atarikugira ngu Omusamariakazi akaba naija kutunga amagara ahabw’okunywa amaizi bwizi. Nikyo kimwe, akaba atarikugambira abaabaire bamuhurikiize omuri Kaperenaumu ngu nibaija kugumaho ebiro  byona ahabw’okurya omubiri gwe gwenyine, kandi bakanywa eshagama ye.

EMIKORO EBIRI ETARIKUSHUSHANA OBU YESU YAAKORESA EBIGAMBO NIBYO BIMWE

7. Abamwe nibagamba ki aha bigambo bya Yesu ebiri omuri Yohaana 6:53?

⁷ Abanyadiini abamwe nibagira ngu ebigambo bya Yesu ebiri omu Yohaana 6:53 ebirikukwata aha kurya omubiri gwe n’okunywa eshagama ye, nibyoreka ekirikubaho aha Kihuuro kya Mukama Waitu, ahakuba aha mukoro ogwo, akakoresa ebigambo ebyabaire biri nk’ebyo. (Mat. 26:​26-28) Nibagira ngu weena orikwija aha mukoro ogwo naaba aine kurya aha mugaati, kandi akanywa n’ahari viinyo ebi baarikurabyamu. Kwonka ekyo kihikire? Ni kirungi kushwijuma obuhame, ahakuba buri mwaka abantu baingi omu nsi yoona nibatwegaitaho aha mukoro ogwo. Ka tureebe zimwe aha ntaaniso eziri aha gati y’ebiri omu Yohaana 6:​53, hamwe n’ebi Yesu yaagambire aha Kihuuro kya Mukama Waitu.

8. Ni ntaaniso ki ezimwe eziri aha gati y’emikoro egyo ebiri? (Reeba n’ebishushani.)

⁸ Ka tureebe emiringo ebiri oku emikoro egi erikutaana. Ogw’okubanza, ni ryari obu Yesu yaagamba ebiri omuri Yohaana 6:​53-56, kandi akaba ari nkahi? Akabigambira Abayudaaya abaabaire bari Galilaaya omu gwa 32 Y.A.K. Hakaba nihaburayo nk’omwaka  gumwe kutandikaho omukoro gw’Ekiihuro kya Mukama Waitu omuri Yerusaalemu. Ogwa kabiri, ebigambo ebyo akabigambira baahi? Abaingi abaabaire bamuhurikiize omuri Galilaaya bakaba bataire omutima aha kwigutsa ebyetengo byabo eby’omubiri okukira eby’omwoyo. (Yoh. 6:26) Niyo nshonga ahabw’enki, Yesu ku yaagambire ebi bataretegyereize, ahonaaho bakarekyera aho kumwikiririzamu. Nangwa na bamwe aha beegi be bakarekyera aho kumukuratira. (Yoh. 6:​14, 36, 42, 60, 64, 66) Gyeragyeranisa ekyo n’ekyabaireho omwaka ogwakuratsireho omu gwa 33 Y.A.K. obu Yesu yaatandikaho Ekiihuro kya Mukama Waitu. Aha mukoro ogwo, entumwa 11 abeesigwa bakaba bari hamwe nawe n’obu baraabe bataretegyereize byona ebi yaayegyeise. Kwonka nabwo, okutashushana na baingi omuri Galilaaya, entumwa ze abeesigwa bakaba nibahamiza kimwe ngu Yesu n’Omwana wa Ruhanga owaabaire aizire omu nsi kuruga omu iguru. (Mat. 16:16) Akabasiima ati: “Niimwe abaagumisiriize naanye omu bi naagyeziibwe.” (Luk. 22:28) Entaaniso ibiri ezo zonka nizooreka ngu ebigambo bya Yesu ebiri omu Yohaana 6:53 tibirikworeka ekirikubaho aha Kiihuro kya Mukama Waitu. Kandi hariho n’obundi obuhame oburikukihamya.

NAIWE NOOTWARIRWAMU

9. Ebi Yesu yaagambire aha Ekiihuro kya Mukama Waitu bikaba nibikwata ahari baahi?

⁹ Aha mukoro gw’Ekiihuro kya Mukama Waitu, Yesu akaha entumwa ze omugaati ogutatumbisiibwe, kandi yaabagira ngu nigujwekyera omubiri gwe. Reero akabaha viinyo, reero yaagira ngu neejwekyera ‘eshagama ye ey’endagaano.’ (Mak. 14:​22-25; Luk. 22:20; 1 Kor. 11:24) Ekyo ni kikuru munonga. Endagaano ensya erimu “Israeli [ey’omwoyo],” nibo bantu abaraategyeke “omu Bukama bwa Ruhanga.” (Heb. 8:​6, 10; 9:15) Entumwa bakaba batarikwetegyereza buri kimwe omu bwire obwo, kwonka bakaba bari hakye kushukwaho omwoyo gurikwera, kandi bakaza omu ndagaano ensya kuza kutegyeka na Yesu omu iguru.—Yoh. 14:​2, 3.

10. Ebi Yesu yaagambire ari Galilaaya nibitaana bita n’ebi yaagambire aha Kihuuro kya Mukama Waitu? (Reeba n’ekishushani.)

¹⁰ Yetegyereze ngu aha Kihuuro kya Mukama Waitu, Yesu akagamba aha ‘b’obusyo obukye.’ Guruupu egyo ekatandika n’entumwa abeesigwa abaabaire bari hamwe nawe omu kishengye obwire obwo. (Luk. 12:32) Entumwa abo, hamwe n’abandi abaabaire nibaija kubeegaitaho, bakaba nibaija kurya aha mugaati na viinyo. Nibo baraatungye omwanya omu iguru hamwe na Yesu. Ebi yaagambiire entumwa ze aha Kihuuro kya Mukama Waitu nibitaana aha bi yaagambiire abantu omuri Galilaaya. Ebi yaagambiire Galilaaya nibikwata aha mubaro muhango gw’abantu.

11. Niki eki Yesu yaagambiire omuri Galilaaya ekyayorekire ngu akaba atarikugamba aha bantu bakye?

¹¹ Obu Yesu yaabaire ari omuri Galilaaya omu gwa 32 Y.A.K., akaba naagamba n’Abayudaaya abaabaire nibenda ngu abahe omugaati. Kwonka, akateeraho kubahwera kwetegyereza ngu hariho ekirikukira eby’okurya ebya butoosha. Akabamanyisa ekyabaire nikibaasa kubahwera kutunga amagara agatahwaho. Kandi Yesu akagira ngu n’abaafiire, nibaija kuzooka aha kiro ky’aha mperu batuureho ebiro byona. Akaba atarikugamba ahari bakye abatoorainwe, nk’abu yaagambireho aha Kihuuro kya Mukama Waitu. Kureka, omuri Galilaaya akata omutima  aha mugisha ogu abantu boona baabaire nibaija kutunga. Nikyo yaagiriire ati: ‘Omuntu weena ku arikurya aha mugaati ogu, naagumaho ebiro byona, . . . omugaati ogu ndiha ahabw’ab’omu nsi ngu batungye amagara, n’omubiri gwangye.’—Yoh. 6:51. c

12. Niki ekirikwetengyesa kutunga amagara agatahwaho agu Yesu yaagambireho?

¹² Yesu taraagambiire Abayudaaya omuri Galilaaya ngu omuntu weena oraabaireho nari weena oraazaarwe, naija kutunga amagara agatahwaho. Kureka abo bonka, ‘abarikurya aha mugaati ogwo,’ ekirikumanyisa okumwikiririzamu, nibaija kugasirwa. Abantu baingi abarikweyeta Abakristaayo nibateekateeka ngu nibaija kujunwa ‘ahabw’okwikiriza [Yesu],’ n’okumutwara nk’omujuni waabo. (Yoh. 6:​29, Envunuura eya King James) Kwonka, bamwe aha bantu abaabandize kwikiriza Yesu bakamutsigaho. Ahabw’enki?

13. Niki ekirikwetengyesa kuba omwegi wa Yesu?

¹³ Baingi aha bantu abu Yesu yaarisiize bakaba nibenda kumukuratira, kuri yaagumiizemu naabaha ebi barikwenda. Bakaba nibenda eby’okurya bya busha, kutambirwa omu muringo gw’eky’okutangaaza, n’enyegyesa ezaabaire nizihikaana n’ebi barikwenda. Kwonka, Yesu akooreka ngu hariho bingi ebi abeegi be ab’amazima baabaire baine kukora. Taraizire omu nsi kuhikiiriza ebyetengo by’omubiri eby’abantu kyonka. Bakaba baine kwikiriza okweta kwe ‘bakaija’ ahariwe, kandi bakorobera byona ebi yaayegyeise.—Yoh. 5:40; 6:44.

14. Twine kukora ki kugasirwa omu mubiri n’eshagama ya Yesu?

 ¹⁴ Yesu akahamiza abaabaire bamuhurikiize ngu baine kugira okwikiriza. Omuri ki? Omu maani g’omubiri gwe, n’eshagama ye ebi yaabaire naija kuhayo nk’ekitambo. Kikaba kiri kikuru ngu Abayudaaya bagire okwikiriza nk’okwo, kandi na hati nikwo kiri. (Yoh. 6:40) Naitwe kubaasa kugasirwa omu mubiri n’eshagama ya Yesu, twine kwikiririza omu kitambo nk’oku kirikworekwa omuri Yohaana 6:53. Kandi abantu baingi baine omugisha ogwo.—Efe. 1:7.

15-16. Ebiri omu Yohaana 6 nibituhwera kuguma nitwijuka migisha ki?

¹⁵ Ebiri omuri Yohaana 6 biine amakuru maingi ahariitwe, n’abakundwa baitu. Nibyorekyera kimwe embabazi ezi Yesu ainiire abantu. Obu yaabaire ari Galilaaya, akakiza abantu, yaabeegyesa aha Bukama, kandi yaahaazya ekyetengo kyabo ky’eby’okurya. (Luk. 9:11; Yoh. 6:​2, 11, 12) Ekikuru munonga, akabeegyesa ngu niwe “mugaati gw’amagara.”—Yoh. 6:​35, 48.

¹⁶ Ab’entaama ezindi’ tibarikurya aha mugaati nari kunywa ahari viinyo aha Kihuuro kya Mukama Waitu ekya buri mwaka, kandi tibaine kukikora. (Yoh. 10:16) Kwonka nabwo, nibagasirwa omu mubiri, n’eshagama ya Yesu Kristo. Ekyo nibakikora barikworeka ngu nibaikiririza omu maani g’ekitambo kye. (Yoh. 6:53) Kwonka, abarikurya aha mugaati kandi bakanywa ahari viinyo nibooreka ngu beetsirwe omu ndagaano ensya nk’abahunguzi b’Obukama bw’omu iguru. N’ahabw’ekyo, yaaba turi entoore nari ab’entaama ezindi, ebiri omu Yohaana eshuura 6 ni bikuru munonga ahariitwe. Nibyoreka ngu ni kikuru kworeka okwikiriza kubaasa kutunga amagara agatahwaho.