Entumwa Paulo akahandiikira omureeberezi mugyenzi we Timoseo arikugira ati: “Ninkwehanangiriza omu maisho ga Ruhanga na Kristo Yesu na baamaraika abaatoorainwe, oyerinde ebyo biragiro, okutagira rubaju ru waagwera, n’obu kwakuba okukorera omuntu weena ekintu ahabw’obuganzi.”—1 Tim. 5:21.

Ka tubanze tureebe baamaraika abatarikugambwaho omu kyahandiikirwe ekyo. Baamaraika abo ti bamwe aha 144,000. Obu Paulo yaahandiikira Timoseo, Abakristaayo entoore bakaba batakatandikire kuzooka kuza omu iguru. Entumwa n’abandi abaabaire entoore bakaba batakahindukire ebihangirwe by’omwoyo, n’ahabw’ekyo tibo baabaire nibagambwaho nka “baamaraika abaatoorainwe.”—1 Kor. 15:​50-54; 1 Tes. 4:​13-17; 1 Yoh. 3:2.

Kandi, “baamaraika abaatoorainwe” ti abo abaagomiire Ruhanga omu bwire bw’omwegyemure. Baamaraika abo bakakuratira Sitaane baahinduka baadaimoni abaabaire bari abazigu ba Yesu. (Kut. 6:2; Luk. 8:​30, 31; 2 Pet. 2:4) Omu biro by’omumaisho nibiija kukomwa banagwe omu kiina kumara emyaka 1,000, reero bwanyima bacwekyerezibwe na Sitaane.—Yud. 6; Kush. 20:​1-3, 10.

“Baamaraika abaatoorainwe” abu Paulo yaagambireho bashemereire kuba bari ab’omu iguru abarikushagika “Ruhanga na Yesu Kristo” abu yaagambireho omu mushororongo nigwo gumwe.

Hariho baamaraika abeesigwa enkumi n’enkumi. (Heb. 12:​22, 23) Titwine kuteekateeka ngu buri maraika aine obujunaanizibwa nibwo bumwe. (Kush. 14:​17, 18) Ijuka ngu maraika omwe akaheebwa obujunaanizibwa bw’okucwekyereza eihe ry’Abasiria 185,000. (2 Bag. 19:35) Baamaraika abaingi nibabaasa kuba bahairwe obujunaanizibwa ‘bw’okwiha omu bukama bwa [Yesu] byona ebirikuteeza abantu entsibo, n’enkozi z’ebibi.’ (Mat. 13:​39-41) Kandi abandi nibabaasa kuba nibarundaana “entoore” kuza omu iguru. (Mat. 24:31) N’abandi bahairwe obujunaanizibwa ‘bw’okuturinda omu mihanda yaitu yoona.’—Zab. 91:11; Mat. 18:10; gyeragyeranisa Matayo 4:11; Luka 22:43.

“Baamaraika abaatoorainwe” abarikugambwaho omuri 1 Timoseo 5:​21, nibabaasa kuba bari abo abaahairwe obujunaanizibwa bw’omutaano obw’okuhwera abantu ba Ruhanga. Kurugiirira aha byetooroire omushororongo ogwo, Paulo akaha abareeberezi obuhabuzi, kandi yaahiga ab’omu kibiina kubaha ekitiinisa. Abareeberezi baine kuhikiiriza obujunaanizibwa bwabo batarikushoroora nari kugwera orubaju, kandi tibaine kurahuka kucwamu nari kucwera omuntu orubanja bataine buhame. Enshonga nkuru erikubareetera kukuratira obuhabuzi bwa Paulo, n’okugira ngu nibakorera “omu maisho ga Ruhanga na Kristo Yesu na baamaraika abaatoorainwe.” N’ahabw’ekyo, nikireebwa butunu ngu baamaraika abamwe bahairwe obujunaanizibwa bw’okuhwera ekibiina, nk’okuha oburinzi, okureeberera omurimo gw’okubuurira, n’okumanyisa Yehova ebi barikureeba.—Mat. 18:10; Kush. 14:6.