1, 2. Daudi akooreka ata ngu ahamiire ahari Ruhanga? (Reeba ekishushani aha kutandika.)

EKIRO kimwe omu itumbi, Daudi na Abishai bakagyenda nibashooba baaraba omu ihe ry’abantu 3,000 abaabaire bagwejegyeire. Ahagati y’eihe eryo, Daudi na Abishai niho baashangire Omugabe Saulo agwejegyeire munonga. Saulo akaba agiire omu ihamba rya Buyudaaya kusherura Daudi ngu amwite. Abishai arikugamba omu biho akagira ati: “Reka mmuteere eicumu rimwe, rimwogyemu, rikwate omu itaka tindikwija kumuteera erya kabiri.” Oku Daudi yaamugarukiremu nikutangaaza! Akamugarukamu ati: “Reka, otamwita; mbwenu n’oha orikubaasa kubangira omukono ou Mukama yaashukireho amajuta, atagiibweho rubanja? . . . Rubuuza nyowe okubanga omukono gwangye aha muntu ou Mukama yaashukireho amajuta!”​—1 Sam. 26:8-12.

² Daudi akaba naayetegyereza ekirikutwarirwa omu kuhamira ahari Ruhanga. Akaba ataine kigyendererwa ky’okukora kubi Saulo. Ahabw’enki? Ahakuba Ruhanga akaba ashukire amajuta ahari Saulo kuba omugabe wa Israeli. Buzima, Yehova naayenda ngu abaheereza be boona bamuhamireho, kandi bahe ekitiinisa abu aikiriize  kugira obushoboorozi.​—Shoma Miika 6:8.

3. Abishai akabaasa kuhamira ata ahari Daudi?

³ Abishai akaba naaha Daudi ekitiinisa. Nk’eky’okureeberaho, Daudi omu kuteeraho kushereka obushambani bwe na Batisheba, akaragiira Yoabu mwene ishe Abishai kwitisa Uriya omu rutaro. (2 Sam. 11:2-4, 14, 15; 1 Bus. 2:16) Eki Abishai naabaasa kuba yaabaire naakimanya, kwonka akaguma naaha Daudi ekitiinisa nk’omugabe otoorainwe Ruhanga. Kandi, Abishai tarateireho kukoresa obushoboorozi bwe nk’omwebembezi w’abaserukare kutwara entebe ya Israeli. Omu mwanya gw’ekyo, akarinda Daudi kutaitwa abazigu be.​—2 Sam. 10:10; 20:6; 21:15-17.

4. (a) Daudi akooreka ata ngu ahamiire ahari Ruhanga? (b) Ni baahi abandi abu turikuza kugambaho?

⁴ Daudi okwanga kukora kubi Omugabe Saulo, kikooreka ngu ahamiire ahari Yehova. Daudi akiri omunyeeto, akarwanisa Goliasi Omufilistia ekikaaka, owaabaire naajuma “amahe ga Ruhanga ohuriire.” (1 Sam. 17:23, 26, 48-51) Daudi ku yaabaire omugabe kandi akakora ebibi by’amaani, nk’okushambana n’okwita, akaikiriza enshobe ze obu nabi Nasani yaamuhana kandi yaayeteisa. (2 Sam. 12:1-5, 13) Daudi ku yaabaire omugurusi, akaguma ahamiire ahari Ruhanga. Nk’eky’okureeberaho, akaba efura yaahayo ebintu bingi kushagika omurimo gw’okwombeka hekalu ya Yehova. (1 Bus. 29:1-5) Buzima, Daudi akakora enshobe z’amaani, kwonka akaguma ahamiire ahari Ruhanga. (Zab. 51:4, 10; 86:2) Twaba nitushwijuma ebirikukwata ahari Daudi na bagyenzi be, ka tuteereho kusherura eby’okugarukamu by’ebibuuzo ebi: N’oha ou twine kubanza kuhamiraho? Okuhamira ahari Ruhanga nikyetengyesa kugira mitwarize ki?

5. Ni ishomo ki eri turikwegyera ahari Abishai?

⁵ Abishai okushooba akaza omu rusiisira rwa Saulo, akaba atarikumanya ou ashemereire kubanza kuhamiraho. Abishai ahabw’okuhamira ahari Daudi, akaba aine ekihika ky’okwita Omugabe Saulo, kwonka Daudi akamuzibira ahabw’okumanya ngu tikihikire kwita ou Yehova “yaashukireho amajuta.” (1 Sam. 26:8-11) Ekyo nitukyegaho eishomo rikuru eri: N’obu twakuba twine abantu baingi abu tuhamiireho, tushemereire kugyendera aha misingye ya Baibuli tukabakuratanisa kurugiirira aha bukuru bwabo.

6. N’obu Kiraabe kiri ekyabutoosha kuhamira aha b’omu maka gaitu n’abanywani, ahabw’enki twine kwegyendesereza?

⁶ Okukunda omuntu okamuhamiraho nikiruga omu mutima, kwonka omutima n’engobya. (Yer. 17:9) N’ahabw’ekyo, omuntu orikuba ahamiire ahari Ruhanga, naabaasa kuhamira munonga ahari munywani we nari omunyabuzaare, n’obu omuntu ogwo yaakuba naakora ekibi. Na munonga omuntu ou turikukunda munonga yaayanga amazima, twine kwijuka ngu ni kikuru kuhamira ahari Yehova okukira ondiijo muntu.​—Shoma Matayo 22:37.

7. Munyaanyazi-itwe omwe akahamira ata ahari Ruhanga obu yaabaire ari omu mbeera zigumire?

⁷ Omunyabuzaare yaabingwa omu kibiina, nitubaasa kugumirwa kumanya ou twine kubanza kuhamiraho. Nk’eky’okureeberaho, munyaanyazi-itwe Anne ^[1] nyina owaabaire abingirwe akamuteerera esimu. Nyina akaba naayenda kumutaayaayira ahabw’okuba ab’omuka bakaba batakigamba nawe. Anne ekyo kikamuteganisa munonga, kandi yaagambira nyina ngu naija kumugarukamu arikumuhandiikira ebaruha. Anne atakahandiikire, akabanza yaashwijuma emisingye ya Baibuli. (1 Kor. 5:11; 2 Yoh. 9-11) Anne akahandiikira nyina, kandi omu muringo gw’embabazi yaamwijutsya ngu niwe yaayecwire aha ka yaabo arikukora ekibi kandi akanga kweteisa. Anne akahandiika ati: “Omuringo gwonka ogu orikubaasa kweihaho obusaasi n’okugarukira Yehova.”​—Yak. 4:8.

8. Ni mitwarize ki eraatuhwere kuhamira ahari Yehova?

 ⁸ Emitwarize eshatu niyo yaabaasiise banywani ba Daudi kuhamira ahari Ruhanga, kandi naitwe neebaasa kutuhwera kworeka ngu tuhamiire ahari Ruhanga. Emitwarize egi ni: Obucureezi, embabazi, n’obumanzi. Ka tugambe gumwe ahari gumwe.

9. Ahabw’enki Abuneeri yaateireho kwita Daudi?

⁹ Obu Daudi yaabaire akwitse omutwe gwa Goliasi omu ngaro arikugamba n’Omugabe Saulo, hashemereire kuba hariho abashaija babiri abaamureebire. Omwe aharibo akaba ari Yonasaani mutabani wa Saulo, owaakozire na Daudi endagaano y’obunywani. Ondiijo ni Abuneeri owaabaire ari omukuru w’amahe. (1 Sam. 17:57–18:3) Abuneeri bwanyima akashagika Saulo omu kuteeraho kwita Daudi. Daudi akahandiika ati: “Abataine saasi nibacwa obwengye oku baraanyite.” (Zab. 54:3; 1 Sam. 26:1-5) Ahabw’enki Yonasaani yaatwarize omu muringo ogurikutaana n’ogwa Abuneeri? Nka Yonasaani, Abuneeri akaba naamanya ngu Ruhanga atooraine Daudi kuba omugabe wa Israeli. Bwanyima ya Saulo kufa, Abuneeri akaba naabaasa kuba omucureezi ayoreka ngu ahamiire ahari Ruhanga arikushagika Daudi, beitu atari mutabani wa Saulo orikwetwa Isheboshesi. Bwanyima, obu Abuneeri yaabyama n’ekinyanshunju ky’Omugabe Saulo, naabaasa kuba yaabaire naayenda kwegarurira entebe.​—2 Sam. 2:8-10; 3:6-11.

10. Ahabw’enki Abusalomu atarahamiire ahari Ruhanga?

¹⁰ Amaryo gakaremesa Abusalomu kuhamira ahari Ruhanga. Ahakuba ‘Abusalomu akeetungira ekigaari n’embaraasi n’abashaija makumi ataano b’okumwebembeera.’ (2 Sam. 15:1) Kandi akabeihabeiha Abaisraeli baingi kuba niwe baahamiraho. Nka Abuneeri, Abusalomu akateeraho kwita Daudi, n’obu araabe yaabaire naamanya ngu Yehova akamutoorana kuba omugabe wa Israeli.​—2 Sam. 15:13, 14; 17:1-4.

11. Niki eki turikubaasa kwegyera ahari Abuneeri, Abusalomu, na Baruki?

¹¹ Ebi Abuneeri na Abusalomu baakozire nibyoreka gye ngu ebigyendererwa bitahikire nibibaasa kuremesa omuntu kuhamira ahari Ruhanga. Buzima, tihariho omuheereza wa Yehova omwesigwa orikwenda kutooreza abantu nk’abo. Kwonka, ekyetengo ky’okuba omutungi nari kutunga omurimo gw’esente nyingi omu nsi egi, nikibaasa kushiisha omukago ogu Omukristaayo aine na Ruhanga. Omuhandiiki wa Yeremia orikwetwa  Baruki haine obu yaayetenga ebintu, ekyo kikamureetera kuheereza Yehova atashemereirwe. Bwanyima Yehova akaha Baruki obutumwa obu: “Reeba, eki naayombekire, ninkisheenya; kandi eki naabyaire, ninkikuura; kandi niinyija kukikora omu nsi yoona. Mbwenu nooyesherurira ebikuru? Otabisherura.” (Yer. 45:4, 5) Baruki akaikiriza obuhabuzi obwo. Kandi ka nikiba kiri eky’obwengye kuguma nituteekateeka aha bigambo bya Ruhanga ebyo twaba tutegyereize emperu y’ensi egi embi!

12. Yoreka ahabw’enki tutarikubaasa kuhamira ahari Ruhanga twaba nitweyendeza.

¹² Ow’eishe-emwe Danieli kuruga Mexico, akaba aine kucwamu kworobera Ruhanga nari kwesherurira ebye. Akaba naayenda kushwera omwishiki otari muheereza wa Yehova. Danieli naagira ati: “Nkaguma niimuhandiikira na bwanyima y’okuba payoniya. Kwonka, nkarugaho naayecureeza naagambira omureeberezi omazire obwire naaheereza, ngu nkaba ngumiirwe kumanya ou nyine kuhamiraho. Akampwera kureeba ngu kubaasa kuhamira ahari Ruhanga, nyine kurekyera aho kuhandiikira omwishiki ogwo. Bwanyima y’okushaba emirundi mingi n’okurira munonga, ekyo nikyo naakozire. Ahonaaho, nkeyongyera kutunga okushemererwa omu kubuurira.” Danieli akaija yaashwera munyaanyazi-itwe, kandi hati naaheereza nk’omureeberezi orikutaayaayira ebibiina.

13. Nasani akahamira ata ahari Ruhanga na Daudi obu Daudi yaashiisha?

¹³ Okuhamira ahari Yehova obumwe nikituhwera kumanya omuringo oguhikire ogw’okuhamira aha bandi. Nabi Nasani akahamira ahari Daudi kandi yaaguma ahamiire n’ahari Ruhanga. Nasani akamanya ngu Daudi akaba ashambaine kandi akozire orukwe rw’okwita iba w’omukazi ou yaashambaine nawe. Yehova ku yaayohereize Nasani kuhana Daudi, Nasani akagira obumanzi yaazayo, n’obu araabe yaabaire naakunda Daudi. Nasani akahana Daudi omu bwengye n’omu muringo gw’embabazi. Nasani kubaasa kuhwera Daudi kureeba obuhango bw’ekibi kye, akakoresa eky’okureeberaho ky’obutari buringaniza bw’omugaiga owaatwire entaama y’omworo. Daudi akagirira omugaiga ekiniga, kwonka Nasani yaamugira ati: “Manya ogwo mushaija niiwe!” Daudi akeetegyereza enshonga!​—2 Sam. 12:1-7, 13.

14. Noobaasa kuhamira ota ahari Yehova na munywani waawe nari omunyabuzaare?

¹⁴ Embabazi nizibaasa kukuhwera kucwamu ou oraahamireho. Nk’eky’okureeberaho,  noobaasa kuba noomanyira kimwe ngu ow’eishe-emwe nanka haine ekibi eki arikukora. Noobaasa kuba omuhamiireho na munonga yaaba ari munywani waawe nari omunyabuzaare. Kwonka nookimanya ngu waashereka ekibi kye, nikyoreka ngu tohamiire ahari Ruhanga. Hatariho kubanganisa, oshemereire kumanya ngu okuhamira ahari Yehova nikyo kirikukirayo obukuru. N’ahabw’ekyo, nka Nasani gira embabazi kwonka ohamire aha kihikire. Higa munywani waawe nari omunyabuzaare kusherura obuhwezi aha bareeberezi. Yaaba atakikozire omu bwire oburinganiire, okuhamira ahari Ruhanga kushemereire kukuhiga kumanyisa abareeberezi. Waakora ekyo, nooba waahamira ahari Yehova kandi waagirira n’embabazi munywani waawe nari omunyabuzaare, nangwa n’abareeberezi nibaija kuteeraho kuhwera omuntu ogwo omu bucureezi.​—Shoma Abaleevi 5:1; Abagalatia 6:1.

15, 16. Ahabw’enki Hushai yaabaire aine kugira obumanzi kubaasa kuhamira ahari Ruhanga?

¹⁵ Omushaija orikwetwa Hushai akaba aine kugira obumanzi kubaasa kuhamira ahari Ruhanga. Hushai akaba ari munywani w’Omugabe Daudi. Kwonka, kikamugumira kuhamira ahari Ruhanga obu Abusalomu mutabani wa Daudi yaiba emitima ya baingi kandi akeenda n’okutwara engoma ya ishe. (2 Sam. 15:13; 16:15) Daudi akahunga omu rurembo, kwonka shi Hushai akaba naija kukora ki? Mbwenu shi akaba naija kwegaita ahari Abusalomu, nari omugabe omugurusi owaabaire ahungire ngu ataitwa? Hushai akamariirira kuhamira ahari Daudi omugabe owaabaire atoorainwe Ruhanga, yaamubugana aha Rushozi rwa Zeituuni.​—2 Sam. 15:30, 32.

¹⁶ Daudi akashaba Hushai kugaruka Yerusaalemu kweshushaniriza nka munywani wa Abusalomu, ngu reero aremese obuhabuzi bwa Ahisofeeli. Hushai akooga amagara ge yaakora eki Daudi yaamushabire, yaayoreka ngu ahamiire ahari Yehova. Nk’oku Daudi yaabaire ashabire, obuhabuzi bwa Hushai bukakira obwa Ahisofeeli.​—2 Sam. 15:31; 17:14. 

17. Ahabw’enki twine kugira obumanzi kubaasa kuhamira ahari Ruhanga?

¹⁷ Naitwe twine kugira obumanzi kubaasa kuhamira ahari Yehova. Baingi ahariitwe tubaasize kwemera okugyemeserezibwa kw’ab’omu maka gaitu, abu turikukora nabo, nari ab’obushoboorozi kubaasa kuhamira ahari Ruhanga. Nk’eky’okureeberaho, Taro kuruga Japan, omu buto akaba naayorobera abazaire be. Eki akaba atarikukikora ahabw’okugira ngu aine kukikora. Buzima akaba naayenda kushemeza abazaire be. N’ahabw’ekyo, ku baatandikire kumuremesa ngu Abajurizi ba Yehova batamwegyesa Baibuli, kikamugumira kubagambira ngu amaririire kuguma naaza omu nteerane zaabo. Taro naagira ati: “Bakagira ekiniga kingi kumara emyaka, banzibira n’okuguma nimbataayaayira omu ka. Nkashaba ngu ngire obumanzi bw’okuhamira aha kucwamu kwangye. Hati emiteekateekyere yaabo etandikire kuba mirungi, nimbaasa kubataayaayira obumwe n’obumwe.”​—Shoma Enfumu 29:25.

18. Waagasirwa ota omu kwega ekicweka eki?

¹⁸ Nka Daudi, Yonasaani, Nasani, na Hushai, ka tugire okumarwa okwabuzima turikworeka ngu tuhamiire ahari Yehova. Kwonka nabwo, ka tugire eki twayegyera ahari Abuneeri na Abusalomu abaayangire kuhamira ahari Yehova. Buzima nitwenda kuhamira ahari Yehova, nk’oku Daudi yaakozire. Ahabw’okugira ngu tituhikiriire, titurikubaasa kwetantara kukora enshobe. Kwonka, ka tuteereho kworeka ngu okuhamira ahari Yehova nikyo turikutwara nka kikuru.