1, 2. (a) Nitumanya tuta ngu abantu nibabaasa kunywana Ruhanga? (b) Nituza kushwijuma ki omu kicweka eki?

KURUGA obu turikuzaarwa kuhitsya obu turikufa, ekyetengo kyaitu ekikuru n’okukundwa. Abantu baine ekyetengo ky’okukundwa munonga beitu etari rukundo ey’okurigirana. Nituba nitwenda ngu abandi babe banywani baitu. Kwonka okukundwa Yehova nikyo kirikukirayo obukuru, kukira okukundwa okundi kwona. Abantu baingi nikibagumira kwikiriza ngu nibabaasa kuba banywani ba Ruhanga ow’Obushoboorozi Bwona, oine omubiri gw’Omwoyo ori omu iguru otarikureebwa. Mbwenu shi naitwe twine okubanganisa nk’okwo? Ngaaha buzima!

² Baibuli neegamba aha bantu abatahikiriire abaabaasize kuba banywani ba Ruhanga. Twine kuteekateeka aha bi baakozire, ahabw’okuba okunywana Ruhanga nikyo kigyendererwa ekirikukirayo obukuru. Abrahamu akabaasa kuba munywani wa Yehova. (Shoma Yakobo 2:23.) Niki ekyamuhwereire kuba munywani wa Yehova? Ekikuru ekyamuhwereire n’okwikiriza. Baibuli neegira  ngu Abrahamu ‘n’ishenkuru wa boona abaikiriza.’ (Rom. 4:11) Ka tureebe oku okwikiriza kwahwereire Abrahamu kuba munywani wa Ruhanga. Buri omwe ahariitwe naabaasa kwebuuza ati: ‘Nimbaasa kugira nta okwikiriza nk’okwa Abrahamu, reero nkaba munywani wa Yehova?’

3, 4. (a) Niki ekirikubaasa kuba kyakizireyo kugyeza okwikiriza kwa Abrahamu? (b) Ahabw’enki Abrahamu yaabaire ayeteekateekire kuhayo Isaaka?

³ Teera akashushani omugurusi ariyo nainamuka aha rushozi. Ari omu rugyendo rugumire munonga. Ekirikurureetera kuguma ti myaka ye. Abrahamu naabaasa kuba yaabaire aine emyaka nka 125, kwonka akaba akiine amaani. ^[1] Akaba akuratiirwe omutsigazi w’emyaka nka 25. Akaba ari omutabani Isaaka, ayekoreire enku. Abrahamu akaba aine omutsyo n’eky’okuhembesa omuriro. Yehova akaba amushabire kuhayo omwana we!​—Kut. 22:1-8.

⁴ Eki nikibaasa kuba nikyo kyakizireyo kugyeza okwikiriza kwa Abrahamu. Hariho abarikugira ngu Ruhanga akaba ataine saasi kushaba Abrahamu kuhayo omwana we. Abandi nibagira ngu Abrahamu akaba naikiririza eryo, kandi ataine nyehurira. Nibagamba batyo ahabw’okuba tibaine kwikiriza, kandi tibarikwetegyereza n’oku kurikukora. (1 Kor. 2:14-16) Abrahamu akaba atarikwikiririza eryo omuri Ruhanga. Kureka akooroba ahabw’okureeba. Ahabw’okwikiriza, akareeba ngu Ishe ow’omu iguru Yehova, tarikubaasa kushaba abaheereza be abeesigwa ekintu ekirikurugamu akabi ak’obutwire. Abrahamu akaba naamanya ngu yaayorobera Yehova, naija kumuha emigisha we n’omutabani. Abrahamu akaba naihirira ahari ki kugira okwikiriza nk’okwo? N’aha kumanya n’ebi yaarabiremu.

5. Abrahamu naabaasa kuba yaayegire ata ahari Yehova, kandi ebi yaayegire bikamukwataho bita?

⁵ Okumanya. N’obu Abrahamu araabe yaakuriire omuri Uri orurembo rwa Kaludaaya orwabaire rwijwiremu abantu abarikuramya ebishushani, akabaasa kumanya Yehova. Ekyo kikabaasika kita, na munonga obu ishe Teera yaabaire naaramya ebishushani? (Yos. 24:2) Baibuli terikukyoreka butunu, kwonka neeyoreka ngu mutabani wa Noa orikwetwa Sheemu akaba aine obuzaare na Abrahamu. Sheemu akagumaho kuhitsya obu Abrahamu yaahitsya emyaka 150. Titurikubaasa kuhamiza kimwe ngu Abrahamu akeega ebirikukwata ahari Yehova kuruga ahari Sheemu. Kwonka, nitubaasa kugira ngu ebi Sheemu yaabaire naamanya ahari Yehova akabigambiraho abanyabuzaare be, kandi Abrahamu naabaasa kuba nikwo yaayegire atyo ebirikukwata ahari Yehova. Ebi Abrahamu yaayegire bikamuhika aha mutima. Bikamuhwera kukunda Yehova, kandi okumanya okwo kukahamya okwikiriza kwe.

6, 7. Ebi Abrahamu yaarabiremu bikahamya bita okwikiriza kwe?

⁶ Ebi yaarabiremu. Niki ekyareeteire Abrahamu kwongyera kwikiririza omuri Yehova? Nikigambwa ngu ebiteekateeko nibireetera omuntu kugira enyehurira, kandi enyehurira zimureetera kugira eki yaakora. Ebi Abrahamu yaayegire ahari Ruhanga bikamureetera kugira enyehurira, kandi ekyo kyamureetera kuha ekitiinisa Yehova “Ruhanga Rukira-boona, Omuhangi w’eiguru n’ensi.” (Kut. 14:22) Enyehurira egi Baibuli neegyeta ‘okutiina Ruhanga,’ n’ahabw’ekyo kubaasa kuba banywani be twine kumutiina. (Heb. 5:7; Zab. 25:14) Okutiina Ruhanga nk’okwo kukahiga Abrahamu kugira eki yaakora.

⁷ Ruhanga akeebembera Abrahamu na Saara kuruga omuri Uri kuza omu ihanga erindi. Bakaba nibaza kutuura omu mahema ebiro by’amagara gaabo byona.  Ahabw’okugira ngu Abrahamu akoorobera Yehova, akatunga emigisha n’oburinzi. Nk’eky’okureeberaho, Abrahamu akaba naatiina ngu Saara omukazi we murungi, naaza kutwarwa abandi, reero nawe aitwe. Okutiina kwa Abrahamu kukaba kwine ahu kurikwegamira, kwonka taraikiriize okutiina okwo kumuremesa kworobera Yehova. Emirundi ebiri, Yehova akarinda Abrahamu na Saara omu muringo gw’eky’okutangaaza. (Kut. 12:10-20; 20:2-7, 10-12, 17, 18) Ebyo bikahamya okwikiriza kwa Abrahamu.

8. Nitutunga tuta obwengye n’okumanya ebirikutubaasisa kwongyera kukunda Yehova?

⁸ Nitubaasa kugira omukago murungi na Yehova? Buzima nitubaasa! Obunaku obu, okumanya n’obwengye ebi turikwetenga nibishangwa omu Baibuli. Abrahamu akaba naamanya bikye munonga aha bintu by’omuhendo hati ebiri omu Baibuli. (Dan. 12:4; Rom. 11:33) Baibuli erimu ebintu by’omuhendo ebirikukwata aha ‘Muhangi w’eiguru n’ensi.’ Ebi turikwegamu nibituhwera kukunda Yehova, n’okumuha ekitiinisa. Okumukunda n’okumuha ekitiinisa nibituhiga kumworobera. Ku turikumworobera, nitureeba oku arikuturinda akatuha n’emigisha, kandi eki nikirugamu okumanya. Twaheereza Yehova omu bwijwire, nitwija kutunga okumarwa, obusingye, n’okushemererwa. (Zab. 34:8; Enf. 10:22) Twaguma nitwongyera aha bwengye bwaitu n’okumanya, nitweyongyera kwikiririza omuri Yehova, n’okuba banywani be.

9, 10. (a) Niki ekirikureetera abanywani kugira omukago guhami? (b) Niki ekirikworeka ngu Abrahamu akaba naakunda Yehova kandi arikweyongyera kuba munywani we?

⁹ Obunywani n’ekintu ky’omuhendo munonga. (Shoma Enfumu 17:17.) Kwonka, obunywani ti nk’ekintu ekitaine magara eki turikugura tukakibiika kikazaho omucuucu. Kureka obunywani ni nk’ekintu ekiine amagara ekishemereire kuguma nikireebererwa kikaguma nikireebeka gye. Abrahamu akaba akora kyona ekirikubaasika kuguma ari munywani wa Yehova. Eki akaba akikora ata?

¹⁰ Abrahamu akaba atarikuteekateeka ngu oku yaayorobeire Ruhanga enyima kikaba nikimara. Ari n’eka ye mpango barikuza Kanaani, akaba aikiriza Yehova kumuhwera omu kucwamu aha bintu ebikye n’ebihango. Obu Abrahamu yaabaire aine emyaka 99, Yehova akamugambira kushara abashaija boona abaabaire bari omu ka ye, omwaka gumwe Isaaka atakazairwe. Mbwenu shi Abrahamu akabangaanisa ekiragiro ekyo, nari akateeraho kwekwatsakwatsa kutakyorobera? Ngaaha, akeesiga Ruhanga, kandi yaakora eki yaamugambiire eizooba eryo ryenyine.​—Kut. 17:10-14, 23.

11. Ahabw’enki Abrahamu yaabaire ayerarikiriire aha bikwatiraine na Sodoma na Gomora, kandi Yehova akamuhwera ata?

¹¹ Ahabw’okugira ngu gukaba guri omucwe gwa Abrahamu kworobera Yehova n’omu nshonga ezirikureebeka nka nkye,  akaguma naayeyongyera kuba munywani we. Akaba atagumirwa kugambira Yehova buri kimwe ekimuri aha mutima, kandi akaba amushaba n’obuhwezi yaaba aine ebi arikwebuuza. Nk’eky’okureeberaho, Abrahamu ku yaamanyire ngu Ruhanga naza kucwekyereza orurembo Sodoma na Gomora, akeerarikirira ngu abahikiriire nibaza kucwekyerezibwa hamwe n’ababi. Shana obundi akaba ayerarikiriire ngu omwihwa Looti n’ab’omu ka ye abaabaire nibatuura omuri Sodoma, nabo nibaza kucwekyerera. Abrahamu akeesiga Yehova “Omucwi w’emanja z’ensi yoona” yaamubuuza omu bucureezi. Yehova akagumisiriza yaayoreka Abrahamu ngu aine embabazi, kandi ngu naareeba emitima y’abantu kubaasa kujuna abahikiriire yaaba naacwa orubanja.​—Kut. 18:22-33.

12, 13. (a) Ebi Abrahamu yaarabiremu n’okumanya kwe bwanyima bikamuhwera bita? (b) Niki ekirikworeka ngu Abrahamu akaba naayesiga Yehova?

¹² Hatariho kubanganisa, okumanya oku Abrahamu yaabaire aine n’ebi yaarabiremu, bikamuhwera kuguma ari munywani wa Yehova. Bwanyima Abrahamu ku yaahikirweho ekigyezo kigumire obu Yehova yaamushaba kuhayo omwana we Isaaka, akateekateeka aha mitwarize mirungi ya Munywani we ow’omu iguru. Hati ka tugarukye aha ky’okureeberaho kya Abrahamu arikwinamuka aha Rushozi omu nsi ya Moria. Mbwenu shi akaba naateekateeka ngu Yehova naija kuhinduka abe enshaarizi otaine saasi? Buzima Abrahamu akaba atarikubaasa kuteekateeka atyo! Ekyo nitukimanya tuta?

¹³ Abrahamu n’omutabani batakataanire n’abaheereza abu baabaire baine, akagira ati: ‘Imwe mugume aha ndogoya nyowe n’omwojo tuze kuriya, turamye, haza tugarukye, tubashangye aha.’ (Kut. 22:5) Abrahamu akaba naamanyisa ki? Mbwenu shi akaba naabeiha abaheereza be, kubagambira ngu naija kugaruka na Isaaka arikumanya ngu Isaaka naaza kuheebwayo? Ngaaha. Baibuli neetuhwera kwetegyereza eki Abrahamu yaabaire naateekateeka. (Shoma Abaheburaayo 11:19.) Abrahamu “akateekateeka ngu Ruhanga naabaasa kuzoora” Isaaka kuruga omu bafu. Buzima, Abrahamu akaba naikiriza ngu nihaija kubaho okuzooka. Akaba naamanya ngu Yehova akamubaasisa kugira amaani g’okuzaara n’obu we n’omukazi we Saara baabaire bakuzire munonga. (Heb. 11:11, 12, 18) Abrahamu akaba naamanya ngu tihaine ekitarikubaasika ahari Yehova. N’ahabw’ekyo, akaba naahamya ngu kyona ekiraabeho aha izooba eryo erigumire, omwana we omukundwa naija kuzooka, ebi Yehova yaabaire araganiise kubaasa kuhikiirira. Tikirikutangaaza kureeba ngu Abrahamu naayetwa “ishenkuru wa boona abaikiriza”!

14. Ni bintu ki ebirikukureetera kugumirwa kuheereza Yehova, kandi eky’okureeberaho kya Abrahamu nikibaasa kukuhwera kita?

¹⁴ Kandi shi hati itwe? N’eky’amazima,  Ruhanga tarikutushaba kuhayo abaana baitu obunaku obu. Kwonka naayenda ngu tumworobere nangwa n’obu ebiragiro bye birikuba nibireebeka nk’ebigumire kworobera, nari tutarikwetegyereza ahabw’enki bihairwe. Haine eki Ruhanga arikukushaba kukora eki orikureeba ngu kigumire? Abamwe, noobaasa kushanga ngu omurimo gw’okubuurira nigwo gurikubagumira. Nari obundi enshoni nizibareetera kugumirwa kubuurira amakuru marungi abantu abu batarikumanya. Abamwe, nibabaasa kuba nibagumirwa kuba ab’omutaano aha ishomero nari aha murimo. (Kur. 23:2; 1 Tes. 2:2) Oreehuriireho nka Abrahamu obu yaabaire nainamuka aha rushozi omuri Moria, waaba nooza kukora ekintu kigumire? Ku kiraabe nikwo kiri, teeraho kugira obumanzi n’okwikiriza nka Abrahamu! Okuteekateeka aha bashaija n’abakazi abaabaire baine okwikiriza nikibaasa kutuhiga kubatooreza, kandi twirire haihi Munywani waitu Yehova.​—Heb. 12:1, 2.

15. Ahabw’enki turikubaasa kuhamya ngu Abrahamu tarayefuurize ahabw’okworobera Yehova?

¹⁵ Nooteekateeka ngu Abrahamu akeefuuza ahabw’okworobera Yehova? Baibuli neegira ngu Abrahamu akafa “gye ari omugurusi w’emyaka mingi” atarikwefuuza. (Kut. 25:8) Obu Abrahamu yaabaire aine emyaka 175, akahwa amaani, kwonka akaba naabaasa kureeba enyima aine okumarwa ahabw’oku yaatwarize. Enyima akata omutima aha kuguma ari munywani wa Yehova Ruhanga, kandi akaba aine ekyetengo ky’okwija kutuuraho ebiro byona.

16. Abrahamu naija kutunga kushemererwa ki omu Paradiso?

¹⁶ Baibuli neegamba ahari Abrahamu eti: “Akaba aine amatsiko g’okutaaha omu rurembo orwine emisingi, oru Ruhanga yaagyezire, kandi akarwombeka.” (Heb. 11:10) Abrahamu akaba naikiriza ngu naija kureeba orurembo orwo, arikumanyisa Obukama bwa Ruhanga bwaba nibutegyeka ensi yoona, kandi buzima naija kubureeba! Teekateeka oku Abrahamu araabe ashemereirwe arikutuura omu Paradiso omu nsi, reero akagumizamu naayeyongyera kuba munywani wa Yehova. Ka naija kukwatwaho munonga kumanya ngu okwikiriza kwe kukahwera abaheereza ba Yehova baingi enkumi n’enkumi z’emyaka kuruga obu yaafa! Omu Paradiso naija kwetegyereza ngu oku yaagaruriirwe Isaaka kikaba nikijwekyera ekintu ekirikukira obukuru. (Heb. 11:19) Kandi naija kumanya ngu obusaasi obu yaatungire arikutebeekanisa kuhayo Isaaka, bukahwera abantu nyamwingi abeesigwa kuteekateeka aha busaasi obu Yehova yaagizire obu yaahayo Omwana we, Yesu Kristo kuba ekitambo. (Yoh. 3:16) Eky’okureeberaho kya Abrahamu twena kituhwereire kwongyera kusiima ekitambo, ekikorwa kya rukundo mpango erakizireyo kworekwa omu byafaayo!

17. Omaririire kukora ki, kandi nituza kwega ki omu kicweka ekirikukurataho?

¹⁷ Twena ka tumariirire kugira okwikiriza nk’okwa Abrahamu. Twaguma nitwega ebirikukwata ahari Yehova kandi tukamworobera, naija kutuha emigisha mingi. (Shoma Abaheburaayo 6:10-12.) Ka tuteereho kuhindura Yehova munywani waitu ebiro byona! Omu kicweka ekirikukurataho, nituza kureeba abandi bantu bashatu abeesigwa abaabaire banywani ba Ruhanga abaabuzima.