OMURIMO gw’Obukama omuri Brazil gukaba nigugyenda mpora omu myaka ya 1930. Kwonka omuri 1935, baapayoniya Nathaniel na Maud Yuille bakahandiikira Joseph F. Rutherford, owaabaire naayebembera omurimo gw’okubuurira. Bakeehayo beekundiire kuheereza, reero baahandiika ngu nibaija “kushemererwa kuza hoona ahu baraabohereze.”

Nathaniel, akahumuura aha murimo gw’obwa inginiya aine emyaka 62. Niwe yaabaire naayebembera obuheereza omu kibiina ky’Abajurizi ba Yehova omuri San Francisco, California, U.S.A. Akaba yaatebeekaniiseho omurimo gw’okubuurira yaakoreiseho n’ebyoma kuranga amakuru marungi omu mwanya ogwo. Ebi yaabaire naamanya, n’omutima gwe ogw’okukora ayekundiire bikamuhwera munonga omu buheereza bwe busya nk’omuheereza w’eitaagi, omuri Brazil ekicweka kihango ekirimu endimi nyingi.

Nathaniel na Maud bakahika omuri Brazil omuri 1936, bari na payoniya mugyenzi waabo owaabaire naabavunuurira Antonio P. Andrade. Bakagyenda n’ebintu by’omuhendo, nk’obwoma 35 oburiho embazo n’emotoka erikuranga obutumwa. Brazil eihanga rya kataano omu buhango omu nsi yoona, rikaba ririmu ababuurizi b’Obukama nka 60 bonka! Kwonka, ebikoreso ebi, bikaba nibiza kubahwera kuhika aha bukaikuru bw’abantu omu myaka mikye.

Okwezi kumwe ab’eishe-emwe aba baherize kuhikayo, ofiisi y’eitaagi ekatebeekanisa oruteerane rw’obuheereza oruhango orw’okubanza omuri Brazil, orwabaire omu rurembo São Paulo. Emotoka eyaabaire neevugwa Maud, ekatandika kurabamu erikuranga embazo, ekyabaasiise abantu 110 kwija omu ruteerane orwo! Oruteerane oru rukahwera ababuurizi kugira omuhimbo, kyabahiga kwongyera kwejumbira kimwe omu kubuurira. Bakeega  kubuurira barikukoresa ebitabo, kaada eziriho obutumwa, n’obwoma oburiho embazo omu Rungyereza, Orugyamani, Oruhangare, Orurimi rwa Poland, Oruspania, na bwanyima omu Rupotuguezi.

Enteerane empango ezaabaire omuri São Paulo, Rio de Janeiro, na Curitiba omuri 1937, zikarahusya omurimo gw’okubuurira. Abaabaire baizire aha ruteerane oruhango bakagyenda n’emotoka erikuranga obutumwa barikubuurira enju aha nju. José Maglovsky, owaabaire ari omutsigazi muto omu bwire obwo, akahandiika ati: “Tukaba tuta aha kameeza ebitabo byaitu ebirikushoboorora ahari Baibuli, obwo emotoka erikuranga obutumwa, reero tugamba n’abantu abaaruga omu maka gaabo kureeba ekirikubaho.”

Abantu bakaba nibabatirizibwa omu migyera, obwo abaizire kwibira bari aho haihi omu kashana. Ka gwabaire guri omugisha gw’amaani kubuurira amakuru marungi turikuhwerwa emotoka erikuranga obutumwa! Orubazo rw’abarikuza kubatizibwa oru ow’eishe-emwe Rutherford yaahaire rukaba niruhurirwa gye ahabw’endanguuzi, obwo abantu beetooroire emotoka, barikuruhurikiza rurikuvunuurwa omu Orupotuguezi. Bwanyima, bakabatiza barikuteera ebyeshongoro by’Obukama omu rurimi rwa Poland. Ab’eishe-emwe na banyaanyazi-itwe nabo, bakaba nibeeshongora omu ndimi zitari zimwe na zimwe. Yearbook eya 1938 ekagira eti: “Kikaba nikitwijutsya oku buri omwe aha Pentekoote yaayetegyereize omu rurimi rwe.”

Bwanyima y’enteerane ezo, buri Sande, yaaba mu mushana nari njura, emotoka erikuranga obutumwa ekaba eteera embazo ezirikukwata ahari Baibuli omu myanya erikwemerezibwamu ebiiruka, erikutuurwamu, n’omu makorero omuri São Paulo na tauni eziri haihi. Emotoka erikuranga obutumwa, buri kwezi ekaba eza omu mwanya gw’ababembe ogwabaire nigutuurwamu abantu 3,000 mahiro 60 kuruga São Paulo. Ku haahingwireho obwire, hakatandikayo ekibiina ky’amaani. N’obu ababuurizi abo baraabe baabaire baine endwara mbi, bakashaba orusa kutaayaayira ogundi mwanya ogurikutuurwamu ababembe abandi kubahuumuriza n’amakuru marungi kuruga omu Baibuli.

Bwanyima omuri 1938 hakashohozibwa embazo ezirikukwata aha Bukama eziri omu Orupotuguezi. Aha Izooba ry’Okucurira Abafu, emotoka erikuranga obutumwa ekaba egyenda erikuza eirimbo aha rindi eteireho orubazo “Abafu Bari Nkahi?,” “Yehova,” hamwe “N’eby’Obutungi,” kuhika aha barikucura abarikurenga 40,000!

Abeebembezi b’ediini bakaguubwa kubi munonga ahabw’ab’eishe-emwe kworeka obumanzi bw’okubuurira amazima g’omu Baibuli, kandi obumwe bakaba bagambira ab’obushoboorozi kuhunamisa emotoka erikuranga obutumwa. Munyaanyazi-itwe Yuille naijuka eizooba rimwe obu omunyadiini yaarundaana abatabuzi bakeetoorora emotoka erikuranga obutumwa. Kwonka orikukurira orurembo orwo n’abaporiisi bakaija baahurikiza embazo zoona. Orikukurira orurembo akatwara ekitabo ekirikushoboorora aha Baibuli. Tiharabaireho kajagararo eizooba eryo. N’obu haraabe haabaire habaho okuhakanisibwa nk’okwo, Yearbook eya 1940 erikugamba ahari Brazil ekagira ngu omwaka 1939 nigwo “gwakizireyo kuba obwire burungi bw’okuheereza Ruhanga n’okuranga eiziina rye.”

Okwija ‘kw’emotoka erikuranga obutumwa eya Watch Tower’ buzima kikahwera munonga omu murimo gw’okubuurira omuri Brazil. Ekakora kihango omu kuhitsya aha bukaikuru bw’abantu amakuru marungi g’Obukama. N’obu emotoka egyo erikumanywa munonga eraabe yaaguziibwe omuri 1941, Abajurizi ba Yehova nyamwingi bagumiizemu nibabuurira amakuru marungi abantu b’emitima mirungi omu ihanga rihango erya Brazil.​—Kuruga omu bi twabiikire omuri Brazil.