NOIJUKA eizooba eryakizireyo kukushemeza? Mbwenu shi n’obu waataaha omu bushwere, nari obu omwana waawe w’okubanza yaazaarwa? Nari shi n’obu waayoreka ngu oyehaireyo ahari Yehova okabatizibwa? Noobaasa kuba nootwara izooba eryo nka rikuru munonga kandi ery’okushemererwa. Kandi buzima n’ab’eishe-emwe bataahi baawe bakashemererwa munonga ahabw’okukureeba orikworeka ngu n’okunda Ruhanga n’omutima gwawe gwona, n’obwengye bwawe bwona, n’amaani gaawe goona!​—Mak. 12:30.

Noobaasa kuba otungire okushemererwa omu kuheereza Yehova kuruga obu waabatizibwa. Kwonka, bamwe aha babuurizi b’Obukama tibakiine kushemererwa oku baabaire baine omu kubanza. Ahabw’enki eki kibaireho? Niki ekishemereire kutureetera kugumizamu nituheereza Yehova tushemereirwe?

Amakuru agarikukwata aha Bukama, na Yehova okuturaganisa ngu juba naija kwihaho ensi egi embi areeteho ensi ensya, buzima nikitureetera okushemererwa. Nangwa, na Zefania 1:14 nihatuhamiza hati: “Eizooba rya Mukama erikuru riri haihi; riri haihi, kandi nirirahuka munonga!” Kwonka, twareeba ngu tutegyereize munonga kukira oku twabaire nituteekateeka, nikibaasa kutuhezaho okushemererwa oku twabaire twine omu kubanza, tutandikye kuheereza Ruhanga tutaine mujinya.​—Enf. 13:12.

Twaguma nitukwatanisa n’abaheereza ba Yehova nikitwongyera amaani g’okumuheereza twine okushemererwa. Nangwa, n’emitwarize mirungi y’abaheereza ba Yehova neebaasa kuba niyo yaatureeteire kwija omu kuramya okw’amazima, kandi kikatuhwera kuheereza Yehova twine okushemererwa. (1 Pet. 2:12) Kwonka shi Omukristaayo mugyenzi waitu ku yaakuhanwa ahabw’okuhenda emitindo ya Yehova? Ekyo kyabaho, bamwe abaizire omu mazima ahabw’okureeba emitwarize mirungi y’abaheereza ba Yehova, nibabaasa kuhwamu amaani n’okushemererwa kubahweho.

Ebishuba ebi ab’eby’obushuubuzi barikukoresa omu nsi ya Sitaane, nabyo nibibaasa kutumaraho okushemererwa. Omuregi naakoresa ensi ye kutureetera kwikiriza ngu nitwetenga ebintu, kwonka buzima ebitarikwetengyesa. Kwonka, nikiba kiri kirungi kwijuka ebigambo bya Yesu ebi: “Tihariho omuntu orikubaasa kuheereza abakama babiri; ahakuba aryayangaho omwe akunde ondi; nari aryagumira kyarimwe ahari omwe, agaye ondi. Timurikubaasa kuheereza  Ruhanga na Mamona.” (Mat. 6:24) Titurikubaasa kuheereza Yehova tushemereirwe, kandi tukagaruka tukatunga na buri kimwe eki turikwenda omu nsi egi.

Okuheereza Yehova ti mugugu ahari abo abarikumukunda. (1 Yoh. 5:3) Ijuka ngu Yesu akagira ati: “Imwe mwena abaruhire n’abaremereirwe, mwije ahariinye, mbaruhuure. Mwekorere omugamba gwangye, muunyegyereho; ahabw’okuba nintwaza gye, kandi ndi omucureezi omu mutima; naimwe muryatunga okuhuumura omu mitima yaanyu, ahakuba omugamba gwangye tigurikuremeera, n’omutwaro gwangye gwanguhi.” (Mat. 11:28-30) Okwekorera omugamba gw’Obukristaayo ogw’okubuurira nikigaruramu amaani, kandi nikirugamu okushemererwa. Kandi kwo buzima hariho bingi ebirikutureetera kushemererwa omu kuheereza Yehova. Ka tureebe enshonga ishatu nkuru ahabw’enki turikubaasa ‘kwesiimira omuri Ruhanga w’okujunwa kwaitu.’​—Hab. 3:18.

Nituheereza Ruhanga orikutuha amagara, kandi oine okushemererwa. (Byak. 17:28; 1 Tim. 1:11) Nitumanya ngu Omuhangi waitu niwe arikutubaasisa kuba abahuriire. N’ahabw’ekyo, nitugumizamu kuheereza twine okushemererwa, tutarikwihirira aha myaka ei tumazire tubatiziibwe.

Teekateeka ahari Héctor, owaaheereize nk’omureeberezi orikutaayaayira ebibiina kumara emyaka 40. Nangwa n’obu ‘akuzire’ beitu n’omusinguzi. (Zab. 92:12-14) Héctor ahabw’omukazi we kurwara, takibaasa kuheereza munonga, kwonka ekyo tikituubize okushemererwa kwe. Naagira ati: “N’obu kiraabe nikindeetera obusaasi kureeba amagara g’omukazi wangye nigeeyongyera kusiisikara kandi kigumire kumureeberera, eki tinkikiriize kumpezaho okushemererwa okurikuruga omu kuheereza Ruhanga ow’amazima. Ahabw’okumanya ngu Yehova owaahangire omuntu ahabw’ekigyendererwa niwe arikumpa amagara, ekyo nikimmara kumukunda n’okumuheereza n’omutima gwangye gwona. Ninteeraho kwejumbira kimwe omu kubuurira, kandi ninteeraho kuguma ninteekateeka aha by’Obukama kugira ngu okushemererwa kwangye kutatuuba.”

Yehova akahayo ekitambo, kutubaasisa kutunga okushemererwa. Buzima, “Oku nikwo Ruhanga yaakunzire atyo ensi, akahayo Omwana we omwe nyamunegyere, ngu omuntu weena orikumwikiriza arekye kuhwerekyerera, kureka atungye amagara agatahwaho.” (Yoh. 3:16) Eego, nitubaasa kusaasirwa ebibi byaitu kandi twije tutungye amagara agatahwaho ahabw’okwikiririza omu kitambo kya Yesu eki Ruhanga yaahaireyo. Egyo t’enshonga nungi eshemereire kutureetera kushemererwa? Mbwenu shi okusiima ekitambo tikishemereire kutureetera kuheereza Yehova tushemereirwe?

Ow’eishe-emwe Jesús, ow’omuri Mexico, akagira ati: “Nkaba ndi omuhuuku w’omurimo gwangye,  obumwe ndikukora embu itaano zikurataine, n’obu kiraabe kyabaire kitari kiragiro ngu nkore ntyo. Nkaba ninkikora ahabw’okwenda kwongyera kutunga sente. Bwanyima nkeega ebirikukwata ahari Yehova n’oku yaahaireyo Omwana we ow’omuhendo ahabw’abantu. Nkaba nyine ekyetengo ky’amaani eky’okumuheereza. N’ahabw’ekyo nkeehayo ahari Yehova, kandi bwanyima y’okukorera ekitongore ekyo kumara emyaka 28, nkacwamu kureka omurimo ogwo naaza omu buheereza obw’obutwire.” Okuheereza Yehova nikwo kwandeteire okushemererwa.

Ebi turikwana nibirugamu okushemererwa, beitu etari naku. Noijuka oku waabaire nootwaza obu waabaire otakamanyire Yehova? Entumwa Paulo akaijutsya Abakristaayo omuri Rooma ngu bakaba “bari abahuuku b’ekibi” kwonka baahinduka “abahuuku b’okuhikiirira.” Bakaba nibaana ebyana ‘by’okwezibwa, ebyabaire nibiija kubareetera kutunga amagara agatahwaho. (Rom. 6:17-22) Naitwe nitutwaza gye, tutaine maganya agarikuruga omu micwe mibi n’obushaarizi. Ekyo ka kishemereire kutureetera okushemererwa kwingi!

Teekateeka ahari Jaime, owaabaire atarikwikiririza omuri Ruhanga arikwikiriza ngu ebintu bikabaho kuruga omu bindi, kandi ari omuteezi w’entomi. Jaime akatandika kuza omu nteerane z’Ekikristaayo kandi akashemezibwa okukundana oku yaareebireyo. Jaime kubaasa kureka emitwarize ye mibi, akashaba ngu abaase kwikiririza omuri Yehova. Jaime naagira ati: “Mporampora, nketegyereza ngu hariho Tata oine rukundo kandi Ruhanga oine embabazi. Okugyendera aha misingye ya Yehova erikwera kindinzire munonga. Ku ogire ngu tindahindwire mitwarize yangye, hati kuri banyitsire nk’oku banywani bangye abateezi b’entomi baitsirwe. Emyaka ei mmazire nshemereirwe n’egyo ei mmazire nimpeereza Yehova.”

Tushemereire kwehurira tuta obwo twaba tutegyereize emperu y’ensi egi embi? Guma noijuka ngu ‘nitubiba ahabw’omwoyo’ gurikwera kandi nitwija kutunga “amagara agatahwaho.” N’ahabw’ekyo, ka “turekye kuruha omu kukora gye; ahakuba obunaku ku burihika, turyagyesha, ku turiba tutarikuhwa amatsiko.” (Gal. 6:8, 9) Turikuhwerwa Yehova, ka tugumisirize, tuteereho kugira emitwarize erikwetengyesa kubaasa kuhonokaho omu “kubonabona kwingi,” kandi tugumizemu nituheereza Yehova tushemereirwe, nangwa n’obu twakuba nitugyezesibwa.​—Kush. 7:9, 13, 14; Yak. 1:2-4.

Nitubaasa kuhamya ngu okugumisiriza kwaitu nikwija kurugamu ebirungi, ahakuba Yehova naamanya gye ebi turikukora, oku turikumukunda, n’oku turikukunda eiziina rye. Twaguma nituheereza Yehova tushemereirwe, nitwija kuba nk’omuhandiiki wa zaaburi, owaagizire ati: “Mukama niwe ntaho amaisho obutoosha; tinditengyetsibwa, ahakuba ari aha rubaju rwangye rwa buryo. Nikyo omutima gwangye gushemerererwa, n’amagara gangye gakeesiima.”​—Zab. 16:8, 9.